Pasa den astean ezagutu genuen albistea, espainiar gobernuko ministroen kontseiluak Donostian zezenketen inguruan egitekoa zen kontsulta debekatu zuen! Gure ustez, albiste honek ondo baino hobeto isladatzen du espainiar estatuak duen maila demokratiko eskasa. Nola da posible erabat udal kudeaketari dagokion gai baten inguruan hiri batean galdeketa demokratiko bat egitea debekatzea? Horrelako neurri errepresibo eta antdemokratikoak diktadura totalitarioetan soilik ikusten dira eta honako hau bere burua demokratatzat duen edonork eskuak burura eramateko modukoa da. Espainiar estatuak hartzen dituen horrelako erabakiek, herri honen burujabetza osoa defendatzen dugunon argudioak indartzen ditu, espainiar estatuaren mugen barruan ezinezkoa da benetako demokrazia parte hartzaile bat eraikitzea. Egungo dependentzia egoerak, espainiar estatuak Madrilen hartzen dituen erabakien menpe uzten gaitu eta horren aurrean, estatu propio bat eratzeko helburuan aurrera egitea dagokigu. Benetan demokratikoa izango den estatu duin batean bizi nahi badugu, Euskal Errepublika independientea eraki beharko dugu. 

EH Bilduk lehen momentutik salatu zuen espainiako ministroen kontseiluak hartutako erabaki lotsagarri hau, eta bat egiten du Donostia Antitaurina Orain elkarteak egiten duen irakurketarekin eta Donostiako alkatea den Eneko Goia jeltzaleari luzatzen zaizkion eskaerekin.

Donostia Antitaurina Orain plataformak egindako manifestazioa pasa den abuztuan

Hau da Donostia Antitaurina Orain elkarteak berriki argitaratu eta zabaldu duen oharra: 

Ministroen Kontseiluak Donostiako zezenketen inguruko herri-galdeketa baimendu ez izanaren aurrean Donostia Antitaurina Orain Plataformak zera adierazi nahi du:
Gure ustez donostiarren gehiengo zabal batek gaitzesten ditu zezenketak eta, orokorrean, animaliekiko tratu txarrak.
10.000 bizilagunen babesarekin zezenketen inguruko herri-galdeketa sustatu genuen duela urtebete, eta oraindik ezin izan da burutu.
Gure ustez udalak eskumen osoa du bere eraikinetan egin daitezken iharduerak zehazteko.
Udal batek bere herritarren iritzia ezagutu nahi izatea ona, beharrezkoa eta demokratikoa dela iruditzen zaigu.
Ministroen Kontseiluaren erabaki honek ez gaitu kontutan hartzen, ez gaitu errespetatzen eta gure eskubide demokratikoak nabarmen urratzen ditu.
Galdeketa eskatu zuten 10.000 donostiarrekin alkateak hartutako konpromezua gogoratu eta nabarmendu nahi dugu orain. Bestalde, bere eskumenak urratuak izan zaizkion udalari gure elkartasuna adierazi nahi diogu, eta elkarrekin irtenbide egoki bat bilatzeko gure prestutasuna adierazi.
Guzti honengatik, Udalari bi eskakizun luzatuko dizkiogu:
- Bere herritarren parte-hartzeko eskubideak defendatu ditzala, herriari hitza eman ahal izateko bide berriak aztertuz eta hauek martxan jarriz.
- Herri-galdeketa egin ezin den bitartean Illunbe zezenketetarako ez alokatzea edo uztea. Ikuskizun tamalgarri hauek baimentzeak ondorio konpontezinak izango lituzke heriotzeraino torturatuak izango lirateken animalientzako.

Donostian, 2017ko martxoaren 13an.
DONOSTIA ANTITAURINA ORAIN PLATAFORMA

Pasa den asteleheneko udaleko osoko bilkurako hirugarren puntuan, Tolosaldeko Giltzarriak udalean aurkeztutako mozioa aurkeztu eta bozkatu zen. Tolosaldeko Giltzarriaren baitan Amasa Villabonan lanean ari diren zenbait herritar pleno aretora joan ziren eta Josu Jauregi billabonatarrak irakurri zuen udalbatzako alderdi politikoei aurkeztutako mozioaren edukia. Hauxe da irakurri zen testua:

Herritarrak mozioaren irakurketa amaitu zuenean EH Bildu eta EAJ-PNVko zinegotziek txaloekin erantzun zuten.

Jarraian EH Bilduko Udal-Taldearen izenean Xabat Laborde zinegotzi billabonatarrak hartu zuen hitza:

"Lehenik eta behin, Gure Esku Dagon eta Tolosaldeko Giltzarriaren baitan bolondres gisa lanean ari diren herritarrei gure aitortza eta babesa adierazi nahi diegu.
Datorren martxoaren 19a egun historikoa izango da Tolosaldean eta baita Amasa Villabonan ere. Gure herriaren erabakitzeko eskubidearen edo autodeterminazioaren alde hamarkada luzeetan garatu den borrokaren bidean, mugarri edo inflexio puntu oso garrantzitsua izango da. Galdeketa sinple bat baina askoz gehiago izango da.
Azpimarratu nahi dugu dinamika eta ekimen hau guztiz herritarra dela, behetik gora egiten ari dena, ideologia edo pentsakera ezberdinetako herritar soilak biltzen dituena etab. herriz-herri antolatzea eta eskubide demokratiko hau mahai gainean jartzea dute helburu eta hau oso pozgarria da guretzat.

"Nahi al duzu euskal estatu burujabe bateko herritarra izan?" da datorren martxoaren 19an Tolosaldeko herritarrei egingo zaigun galdera. Gure erantzuna oso argia da: BAI.
BAI, herritar librez osatutako Euskal Herri libre bat nahi dugulako, munduan aitortua izango dena, ez dugu beste inor baino gehiago izan nahi, baina ezta gutxiago ere.
BAI, herritar guztiak kontuan hartuko dituen estatu duin eta justu bat eraiki nahi dugulako.
BAI, hobeto bizi nahi dugulako, gure etorkizun ekonomiko eta soziala eraikitzeko burujabeak izan nahi dugulako.
BAI, justizia sozialean, berdintasunean eta eskubide sozialak errespetatuko dituen gizarte solidarioan bizi nahi dugulako. Etxebizitza eskubide erreala izango den, zerbitzu publikoak benetan unibertsalak izango diren, babes sozialerako sistema sendoa izango duen, pentsio duinak izango diren eta aberastasuna modu justu batean birbanatuko den estatua nahi dugu. Pobrerik egongo ez den Euskal Herria nahi dugulako.
BAI, euskaraz lasai bizi ahal izango garen Euskal Herria nahi dugulako. Munduaren aurrean euskaldun gisa agertu nahi dugulako.
BAI, gure hezkuntza sistema propioa eraiki nahi dugulako, Euskal Herriaren beharretarako egina eta kanpoko inposaketarik jasan beharko ez duena.
BAI, gazteei herri honetatik alde egin behar izanik gabe, hemen bertan etorkizun bat eskaini nahi diegulako.
BAI, ustelkeria, indarkeria matxista, diskriminazioa, esklusio soziala, arrazakeria... behin betirako desagertu eta jendarte berri bat eraiki nahi dugulako.
BAI, Aniztasunean oinarrituta, bakoitzaren jatorri eta identitate sentimenduen gainetik, guztion artean eta guztiontzako euskal estatua nahi dugulako.

Amasa Villabonako EH Bildu koaliziotik galdeketa honetan herritarren parte hartzea handia izan dadin gure eskuetan dagoen guztia egiteko prest gaude. Zentzu horretan EAJ-PNVri enplazamendu bat egin nahi diogu, gure ustez momentu historiko honetan, teorian erabakitzeko eskubidearen alde gaudenon artean adierazpen bateratu bat egin eta zabaltzeko gai izan behar genuke. Guk proposamen hori egiten diogu Villabonako EAJ-PNVri."

Ondoren, bozketa egiteko momentua iritsi zen; EH Bildu eta EAJ-PNVko ordezkari guztiek Tolosaldeko Giltzarriak aurkeztutako mozioaren aldeko bozka eman zuten eta PSOEko Maria Luisa Arija zinegotziak ordea kontra bozkatu zuen. Beraz, mozioa onartua izan zen aldeko 12 bozka eta kontrako bozka bakarrarekin. PSOEko ordezkariak ez zuen bere kontrako botoa azaltzeko inolako adierazpenik egin eta isilik geratzea erabaki zuen. 

Araba, Bizkaia eta Gipuzkoan hezkuntza arloak bizi duen konfrontazio egoerarekin bukatzeko eskua luzatu zion EH Bilduk Jaurlaritzari joan zen astean. Hala, errealitateari entzungor egiteari utzi eta hezkuntza sistema publikoaren egoera hobetzeko deia egin du gaur Rebeka Ubera legebiltzarkideak. Hartara, mozio bat erregistratu du Gasteizko Legebiltzarrean.

“Agerikoa da azken urteotako murrizketek hezkuntza sistemaren sare publikoa itolarrian dutela, eta horrek ondorioak dituela gure ikasleek jasotzen duten hezkuntzan. Hala, bada garaia herri-akordio zabala egiteko hezkuntza sistema publikoaren oinarriak finkatze aldera. Ildo horretatik, abiapuntuak izan beharko luke gaur egungo plantilla hedatzea, hain zuzen, 2008an hasi ziren murrizketei tinko aurre egiteko”, adierazi du Uberak.

Hartara, legebiltzarrak EH Bilduren ekimena eztabaidatuko du, hezkuntza sistemaren plantilla estrukturalak 2.000 lanpostutan handitzeko eta jada 5 urte baino gehiago lanean dauden 6.000 irakasleren plaza egonkortzeko. Hala nola, testu liburuen programa solidarioa berreskuratzeko eta partida handitzeko eskaera ere egin du.

“Jakin badakigu inbertsioan esfortzua ekarriko duela horrek, baina hori da, hain zuzen, bilatzen duguna: herri honen zutabeak finkatzeko apustu politiko irmoa hezkuntza sistema publikoaren alde”. Hain zuzen, EH Bilduk iritzi dio “gehiago eta hobeto” inbertitu behar dela hezkuntzan, eta hartara, diagnosi zehatza eskatu du, herrialderik herrialde, baliabideak eta premiak identifikatzeko.

Mozioa bere osotasunean:

1.-EAEko ikasle guztien aukera berdintasuna eta eskola arrakasta xede izanda, inbertsioa eraginkor bilakatzeko, herrialde bakoitzean ikastetxez ikastetxe dauden beharrak identifikatzeko diagnostiko zehatza egitea lau hilabeteko epean, ondorengo adierazleak aztertuz: irakaslegoa, azpiegiturak, hezkuntza premia bereziak dituzten eta zailtasun handiko ikasleak, ikastetxeko hezkuntza – hizkuntza proiektuak, baliabideak, IKT-ak, ebaluazio diagnostikoaren emaitzak, jantokia, bestelako proiektuak.

2.-Desberdintasun sozial, ekonomiko eta kulturalak orekatzeko xedearekin, testu liburuen programa solidarioa berreskuratu eta handitu dezala. Bekak ikasturte hasieran ordaintzea

3.-Ikasle kopurua gelako jaistea xede izanda, irakasle gehiago plantillan sartzeko eta behin behineko egoeran daudenak egonkortzen hasteko, plantilla estrukturala handitu dezala 2000 plazetan; eta 5 urtetik gora behin behineko egoeran lanean jardun duten plantillatik 6.000 plaza egonkortu ditzala, lege bidezko habilitazio zein horretarako beharrezkoak diren bitartekoak erabiliz.

GuraSOSek deituta milaka pertsonak manifestazioa egin zuten igande eguerdian Donostiako kaleetan. Zubietako erraustegiaren gatazkari irtenbide adostu bat topatzeko eskatu dute.

“Elkarrekin gehiago gara. Adostasuna besterik ez! Sin conflicto. La solución es el acuerdo” lemapean, 10.000 pertsona baino gehiago bildu dira eta manifestazioa historikotzat jo dute.

Antolatzaileak oroitarazi dute lanen inguruko azken erabakia Gipuzkoako Aldundiak duen arren, legea, eta batez ere, herritarren nahia errespetatu behar dutela. GuraSOS plataformako kide Joseba Belaustegik irtenbidearen aldeko deia egin dio aldundiari: “Irtenbide hori adostua, kontsentsuzkoa eta iraunkorra izan dadin eskatzen dugu. Eta batez ere, urte asko irauten ari den eta gizartea bereizten hari den gatazkari irtenbidea ematea”.

Donostiako Bulebarra jendez gainezka GuraSOSen manifestazioaren amaieran

Manifestazio amaieran, GuraSOSeko lehendakari Joxe Mari Izetak aldarrikatu du Gipuzkoako etorkizunari buruz erabakitzeko eskubidea dutela, eta aldundiari galdera zuzena bota dio: “Zergatik ez duzue martxan jarri parte-hartze prozesua?”.

Bestalde, aldundiari ohartarazi diote Europar Batasuneko legediaren arabera sei urtetik behin berritu behar dela hondakinen inguruko legedia, eta arlo horretan Gipuzkoan "berandu" dabiltzala.

Amasa Villabonako EH Bildutik bat egiten dugu GuraSOS plataformak eta milaka gipuzkoarrek kalean egin dituzten aldarrikapen eta eskaerekin eta Gipuzkoako Foru Aldundiari Zubietako erraustegiaren lanak geldiaraztea eskatzen diogu. Bada garaia honakinen kudeaketa publikoaren afera iskanbila politiko-mediatikotik ateratzeko eta gaia behar bezala objetiboki aztertuz, erabakiak modu adostu eta garden baten bidez hartzeko. GuraSOSek aldarrikatzen duen herritarren parte hartzea ezinbestekoa dela uste dugu eta Donostiko manifestazio jendetsuak zer pentsa eman beharko lieke kosta hala kosta erraustegia eraiki nahian dabiltzan EAJ eta PSEko ordezkari politikoei. Oso argi geratzen ari da EAJ eta PSEk politika egiteko duten moduan herritarren parte hartzeak ez duela lekurik, soilik interesatzen zaienean eta euren helburu politikoak lortzeko baliagarria zaienean aldarrikatzen dute herritarren hitza.

EH Bildutik erraustegiaren inposaketaren aurkako lanean sakontzeko deia egin nahi diogu Gipuzkoako gizarteari, oraindik garaiz gaude gure seme alaben osasunarentzat eta ingurumenarentzat kaltegarria eta ekonomikoki gipuzkoarrontzat hipoteka galanta izango den azpiegitura hau gelditzeko.

Hamaika hilabete pasa dira Nekane Txapartegi preso asteasuarra atxilotu zutela, eta hori salatzeko elkarretaratzea egin zuten astelehen iluntzean Zizurkilgo Joxe Arregi plazan. Txapartegi Suitzan dago preso, Espainiak egindako estradizio eskaerari Suitzak zer erantzungo zain.

Bidegabetzat jo dute Txapartegiren egoera: "Dagoeneko 11 hilabete daramatza Suitzan espetxeraturik, eta egunean 20 ordu inguru pasatzen ditu bakartuta. Egoera hori erabat bidegabea eta jasangaitza da", salatu dute.

"Nekaneren haserrea eta ezin ulertua gero eta handiagoak dira", azaldu dute: "Ezin du ulertu zergatik ez duten erabakirik hartu oraindik, ezin du ulertu teorian torturaren aurka dagoen estatu batek ez ikusiarena egin izana". Txapartegik "nahi duen lekuan eta nahi duen pertsonekin bizitzeko eskubidea" duela aldarrikatu dute.

Txapartegiren kasuaz gain, azken egunetako "gertakari larriak" salatu dituzte elkarretaratzearen amaieran: Sara eta Izarrena, Ibon Iparragirrerena eta Manu Azkarateren kasuak, hain zuzen.

Amasa Villabonako EH Bildutik bat egiten dugu "Nekane Libre" Aiztondo bailarako plataformak egiten dituen eskaerekin eta Nekane Txapartegiren berehalako askatasuna eskatzen dugu. Bestalde, Suitzar estatuari dei egiten diogu espainiar estatuak egindako estradizio eskaerari ezezko batekin erantzun dezan, Nekane bortizki torturatua izan da espainiar polizia indarren eskuetan eta berriz ere infernu bera pasatzeko arriskua hor dago. Nenaken Libre!!!

EAJk PSE eta Podemosekin adostu duen erdibidekoak Polizia eta Guardia Zibila erretiratzeko aldarrikapen historikoa baztertu du, dio EH Bilduko Arzuaga legebiltzarkideak.

EH Bilduk Guardia Zibilaren, Polizia Nazionalaren eta Armada espainolaren erretiratze osoa aldarrikatu du Gasteizko Legebiltzarrean, segurtasun arloko eskuduntza guztiak euskal Poliziek beren gain hartzera eramango duen prozesu baten baitan. EAJk, PSEk eta Podemosek, ordea, Segurtasun Indarren egokitzapena bakarrik eskatu dute, eta hori ez da nahikoa horrekin batera plan bat eskatu eta egiten ez bada Guardia Zibila, Polizia eta Ejerzitoa gure herritik ateratzeko.

Espainiar Polizia Nazionalaren ekitaldia Donostian

EH Bilduko legebiltzarkideak gogorarazi du Estatuko Segurtasun Indarren erretiratzea euskal herritar gehienen aldarrikapen historikoa dela. Hori dela eta, deitoratu du EAJk aldarrikapen hori bazterrean utzi izana, jeltzaleek PSE eta Podemosekin adostu duten erdibidekoan Guardia Zibila eta Poliziaren egokitzapena baino ez dutelako eskatzen Gernikako Estatutuak ematen dizkien funtzioen arabera. Hori ikusita, Arzuagak gai horretan atzera egitea egotzi dio EAJri, 2013an Estatuko Segurtasun Indarren atzera-egitea eskatu zuelako eta gaur, ordea, Estatutuari egokitzearekin konformatzen delako, “eta horrek, finean, esan nahi du Polizia eta Guardia Zibilaren presentzia ontzat ematen dela”.

Pasa den larunbat arratsaldean Amasa Villabonako Onddo Gazte Asanbladak Sara Majarenas euskal presoaren askatasunaren aldeko argazki herrikoia ateratzeko deialdia egin zuen. Herritar ugarik bat egin zuten deialdiarekin eta argazki jendetsua ateratzea lortu zen. Sara Majarrenas presoaren kasua bereziki larria da, ezaguna denez, 3 urte bete dituen bere alaba Izarrek bere aitaren eraso bortitza jasan zuen Sarari min emateko helburuz, eraso matxista onartezina. Izar bere amarengandik aldendu nahi izan zuten espetxe politika espainiarraren arduradunek eta horrek erreakzio handia ekarri zuen Euskal Herrian, besteak beste, pasa den ostegunean Donostian milaka lagun elkartu ziren Sarak aske eta Izarrekin egon behar duela aldarrikatzeko. 

Analdo Otegi EH Bilduko bozeramaileak prentsaurrekoa eskeini zuen koalizio subiranistak datozen aste eta hilabeteetan Euskal Herrian egingo duen lanketa osoa aurkezteko. Otegik adierazi du EH Bildutik diagnostiko zehatz bat egiteko eta herri honek subirautza berreskuratzeko behar duena proposatzeko planteamendu irekia egingo duela.

Arnaldo Otegiren agerraldia Donostian. Iturria: ehbildu.eus 

EH Bilduk Euskal Herrian datozen hilabeteetan Kataluniaren antzeko prozesu subiranista bat hastea nahi luke, horretarako ordea, ezinbestekoa ikusten da diagnostiko erreal eta zabal bat egitea. Ondoren herri honek behar duena proposatzeko gonbitea luzatuko die EH Bilduk sindikatuei, feministei, ikasleei edota intelektualei. Betorik gabeko gonbidapena izango da, planteamendu ireki batetik egindakoa.

Otegik esan du saiatu beharra dagoela Espainiako Estatuarekin akordioa lortzen, baina ohartarazi du aukera denak ezin direla horretara mugatu, estatua ez delako bere kabuz demokratizatuko. Interesa dutenekin, prozesu subiranista-independentista bat eraikitzen hasi behar da, eta aldebakarrekoa izan beharko da.

Kataluniaren eta Espainiaren artean aurki talka bat gertatuko dela aurreikusten du EH Bilduk, eta katalanekiko elkartasun eraginkorrena Euskal Herrian ere prozesu subiranista bat martxan jartzea dela argi du koalizio subiranistak.

EH Bilduk EAEko eta Nafarroako autogobernu batzordeetan parte hartuko du, beti ere eztabaida hori lau hormen artean itxita utzi gabe. Herritarren eta eragileen parte hartzea sustatu behar da herri honetan behetik gorako pozesu herritar, anitz eta zabala eratu eta martxan jarriko bada.

Pasa den larunbat eguerdian Villabonako Amalurra plazan, gure herrian ez-ohikoa den argazki esanguratsua ateratzea lortu zuen Tolosaldeko Giltzarriak. 1979. urteko legealditik gaur egun arte, udalean zinegotzi edo alkate izandako alderdi ezberdinetako herritarrak bat egin zuten martxoaren 19ko galdeketarekin eta parte hartzeko deia luzatu zuten.

EAJ-PNV, Herri Batasuna, Euskadiko Ezkerra, Eusko Alkartasuna, Bidean, EAE-ANV eta EH Bilduko Villabonako udaleko hautetsi ohiak izan ziren argazkian, denak batera, irrifartsu eta erabakitzeko eskubidearen aldeko ekimen honen alde guztiz konbentzituta.

EH Bildutik oso positiboki baloratzen dugu ideologia, pentsakera eta alderdi politiko ezberdinetako herritar hauek elkartu izana eta martxoaren 19ko herri galdeketan parte hartzea sustatzeko eman duten urratsa. Hori da bidea, finean galdeketa honen bidez, independentzia edo burujabetza defendatzetik aratago, demokrazia eta herritarren ahalduntzea aldarrikatuko dira eta helburu horien aldeko batasuna behar beharrezkoa dela pentsatzen dugu.    

Gernikako udalerrian dagoen 'Guernica' margolanaren muralaren parean hainbat instituziotako EH Bilduko kideek, hurrengo egunetan Pablo Piccasoren margolana Euskal Herrira eta Gernikara ekartzeko ekimen instituzionalak abiatuko dituztela adierazi dute. Hala nola, mozioak aurkeztuko ditu EH Bilduk udaletan, eta ekimena Batzar Nagusietara, Gasteiz eta Iruñeko parlamentuetara eta Madrilgo Kongresura ere eramango ditu.

EH Bilduko kideek Gernikan egindako aurkezpen agerraldia. Iturria: ehbildu.eus

Jasone Agirre legebiltzarkideak adierazi duenez, “margolan honek ez du zentzurik Gernika eta bere historiari lotua ez baldin badago, hura izan baitzen Picasso gertatuaren izugarrikeria salatzera eraman zuena. 'Guernica'-k Gernikan egon behar luke”.

Gaineratu duenez, 'Guernica' margolanak esanahi berezia du euskal herritarrentzat. “Zama sinboliko handikoa, euskaldunontzat esanahi berezia duen margolana da”.

“Sufrimendu guzti-guztien aitortza egingo duen memoria historiko bat eraikitzea ezinbestekoa den honetan”, jarraitu du Agirrek, “margolan honek, bonbardaketa jasan zuen Gernika herrian kokatua, bere indarra eta salaketaren sakontasuna biderkatu egiten duela aldarrikatu nahi dugu”.

Zentzu horretan, Madrilgo gobernu ezberdinek izandako jarrera salatu du, egon diren eskaera ezberdinak ukatu dituztelako arrazoi teknikoak “aitzakia” erabilita. Garraio eta mantenurako beharrezkoak diren baldintza guztiak betetzeko arazorik euskal instituzioek ez dutela gogoratu du Agirrek. “Espainiako gobernuak dituen interes ekonomiko zein politikoak daude 'Guernica' Euskal Herrira ez ekartzeko arrazoi nagusien artean”.

Amasa Villabonako EH Bilduk ekimen honekin bat egin, eta "Guernica Gernikara" mozioa ofizialki aurkeztu du udalean. Honako hau aspaldiko aldarrikapen historikoa da eta bonbardaketaren 80. urteurrena beteko den urte honetan, Picasso-ren artelan ezagunak bere lekua Gernikako herrian izan behar duela eskatuko dugu berriz ere. Mozioa datorren astelehenean, otsailak 20, 19:00ean Villabonako udaleko areto nagusian izango den Osoko Bilkuran aurkeztuko du EH Bilduko udal taldeak eta ondoren eztabaida eta bozketa izango dira. EH Bildutik aldarrikapen honek udalbatza osoaren babesa izatea espero dugu eta modu horretara, Euskal Herriko beste hainbat instituzio publiko ugarirekin batera, gure udalak ere Guernica Gernikara ekartzeko aldarrikapena egitea Madrilgo Gobernuari.

Pertsona transexualen eskubideak urratzen dituen 'Hazte Oir' kanpaina Euskal Herrira helduko dela ohartuta, kanpaina hori gaitzestea eta pertsona transexualen aitortza eta haien eskubideen defentsan aritzen diren eragileen defentsa egitea eskatuko die EH Bilduk euskal instituzioei. Era horretara, eraginpean dauden instituzioetan ekimenak aurkeztuko ditu hurrengo egunetan.

'Hazte Oir' kanpainaren barruan, pertsona transexualen aurka egiten duten leloak dituen autobus batek Espainiako estatuko leku ezberdinak zeharkatzen ditu. Honako hau, haur transexualen eskubideen alde Chrisallys elkarteak egindako kanpainaren kontrakanpaina lotsagarri bat baino ez da.

EH Bildu Giza eskubide guztien defentsan berresten da eta beraz, pertsona transexualen eskubideen defentsa eta aldarrikapena geure egiten dugu. Era horretara, sektore ultra eta atzerakoiek bultzatutako 'Hazte Oir' kanpainak gure herrian lekurik ez duela izan behar uste dugu.

Era berean, pertsona transexualen eskubideen alde Chrysallis bezalako elkarteek egiten duten lana goraipatu nahi dugu. Haur transexualen eskubideen alde eta beren izaera gizarteratzeko Chrysallisek egindako kanpaina babestu genuen bere egunean. Sektorerik ultraeskuindarrenek eta ultrakatolikoenek Chrysallisek defendatzen dituen ideien aurka abiatutako kanpainaren aurrean, gure babes osoa agertu nahi diegu berriro elkarteari eta pertsona transexualei, eta haien eskubideak aitortuak izateko lanean jarraituko dugula iragartzen dugu.

Joan zen urtarrilaren 28an amaitu zuten lana eta dagoeneko gerturatzen den ororen zerbitzura dago, parketik pasatzen den erreka txikia alde batetik bestera igarotzea errazten duelarik. Lasturko parkea Amasa Villabonako herritar askoren artean txoko ezaguna eta maitatua da, eta Aizkardi mendizale elkarteko kideek lan oso txukuna egin dute egurrezko zubi dotorea eraikiz. 

EH Bildutik gure eskerrik beroenak eman nahi dizkiegu Aizkardiko lagunei, gure herriko mendiak zaindu eta txukun mantentzen egiten duten lan paregabeagatik. Lan honek gure aitortza eta miresmena merezi ditu eta lanak auzolanean egiteak are balore handiagoa ematen dio lan horri. 

ARGAZKIAK:

Lehen:

Orain:

Pasa den otsailaren 20ko udalbatzan jorratu zen Gurea zinea erabiltzeko udalaren eta Jesusen Bihotza parrokiaren arteko kontratuaren gaia. Ezadostasuna eta eztabaida izan zen alokairu kontratu berria babestu zuten PNV eta PSOE alderdien eta aukako bozka eman zuen EH Bildu koalizioko ordezkarien artean.

Gogoan izan behar da 1991. urtetik, azken 25 urteetan, Gurea zinea udalari doan uzteko kontratua egon dela indarrean. Oraingoan ordea, PNVko udal gobernuak Jesusen Bihotza parrokiari 15 urtean zehar urtean 1.500 euroko alokairua ordaintzea erabaki du eta azpimarratzekoa da era berean 2017ko aurrekontuetan zinean bertan 54.000 euroko inbertsioa egitea aurreikusten dela.  

Xabat Laborde EH Bilduko zinegotziak azaldu zuen udalbatzan, gai honen inguruan Amasa Villabonako koalizio abertzaleak duen iritzia: 

"Gure udal-taldeak errenta kontratu honen kontra bozkatuko du eta jarraian erabaki hori azaltzen duten argudio ezberdinak azalduko ditut: 

2016ko abenduko udalbatzan, parrokia eta udalaren arteko negoziazioa 3 hilabetez luzatzea erabaki zen. Guk negoziazio horietan aktiboki parte hartu nahi genuela adierazi genuen eta udal gobernutik horretarako arazorik ez zegoela erantzun zitzaigun. Orduz geroztik ez zaigu bilera batera ere gonbidatu eta bapatean akordio bat jarri zaigu mahai gainean. EAJko udal gobernuak beraz, ez du bere hitza bete.

Gure ustez, zinearen erabilerarako udalak parrokiarekin sinatu beharrekoa, erabilerarako doako lagapena edo erdaraz "Cesión de uso" bat izan beharko litzateke. Duela 25 urte sinatutako kontratua bezalaxe.

Egungo egoera duela 25 urtekoaren berdin berdina da. Orduan bezalaxe, oraingoan 2017. urtean, udalak inbertsio garrantzitsu bat egingo du eraikin horretan, 54.000 euroko partida dago aurrekontuetan horretarako. Gogoratu nahi dugu hau, diru publikoa jabetza pribatua duen eraikin batean inbertitzea dela eta horrek eraikinari balio ekonomikoa erantsiko diola.

Udalak mantenu, erabilpen eta kontserbazio gastu guztiak bere gain hartzeaz gain, 54.000 euro inbertituko ditu eraikin honetan, eta gainera alokairua ordaindu behar du? gainera orain arte sekula ordaindu ez denean? EH Bilduko kideon ustez hau gehiegikeria bat da. Gainera, parrokiarekin egin beharreko negoziazio horietan udala bere baldintzak ezartzeko indar posizio batean aurkitzen zen. Zer egingo luke elizak eraikin horrekin, eraikinak erabilera bat izateko eraikinaren iparraldean udalak egindako eta udal jabetzakoak diren espazioak derrigorrezkoak direnean?

Gauza bat da parrokiako ordezkariak negoziazio batean errenta bat eskatzea, (eskubidea du horretarako) eta bestea, udalak besterik gabe ontzat eman eta hori onartzea. Finean, aurkeztu zaigun alokairu kontratu hau, inolako beharrik izan gabe Elizari diru publikoa oparitzea da.
Ikusita orain udal gobernuak onartuko duen kontratu honek ez duela oposizioko alderdi nagusia osatzen dugunon babesik, EH Bildutik udala 15 urtez ez hipotekatzea eta kontratu honek legealdi honen iraupena, hau da, 2019ko maiatzera bitartekoa izan dezan eskatzen dugu.

Udal Gobernuari luzatu nahi diogun galdera oso argia da, zergatik ekartzen diguzue mahai gainera errenta kontratu bat eta ez, erabilerarako lagapena, orain arte izan den bezala? Zergatik onartu duzue hori?
Aipamen berezi bat egin nahi nuke gai honetan Maria Luisa Arija PSOEko ordezkariak izan duen jarreraren inguruan. Elizaren portaeren gaineko diskurtso oso zorrotza entzun genion Arijari kurtura batzordean: IBIa ez duela ordaintzen, diru gose direla, eliza ez dela fidatzekoa... diskurtso gogor hau entzun ondoren, logikoena kontratu honen kontrako bozka ematea litzateke, baina ez! oraingo honetan ere Arija andreak PNVri itsu itsu jarraitzea erabaki du. Aspertuta gaude Maria Luisa Arija andreari diskurtso oso sozialak entzuteaz eta ondoren, sistematikoki EAJk ondo baino hobeto ordezkatzen duen euskal eskubiarekin bozkatzen ikusteaz. Koherentzia falta handiegiak dira,eta gehiago ere esango nuke, jokabide horri hipokresia deitzen zaio, gauza bat esan, eta bestea egin."

EH Bilduren iritzia entzun ondoren, eztabaida piztu zen udalbatzan, PNVko Eneko Urdangarin andoaindarrak eta Mertxe Garmendia lazkaotar zinegotziak alokairu kontratua defendatu zuten, "kontratu oso ona" dela argudiatuta eta 1.500 euro diru gutxi dela esanez. Baina aldi berean ez zuten EH Bilduko ordezkariak egindako galderei erantzun nahi izan. Urdangarinek EH Bilduren jarrera kritikatu zuen eta "demagogia" egitea leporatu zion EH Bilduko Laborderi, pasa den legealdian EH Bilduk ere zinean inbertsioak egin zituela gogorarazi zuen jentzaleak. Maite Izagirre alkatea isilik egon zen eztabaida osoan zehar.

EH Bildutik zinean inbertsioak egitea logikoa eta positiboa ere badela erantzun zitzaien, "zerbitzu publikoa izanik udalak zerbitzuaren kalitatea zaindu behar baitu beti". "Zentzu honetan butakak konpontzeko inbertsio bat egitea ez dugu kritikatzen, kontratua doakoa ez izatea da ulertzen ez duguna". Baina gaia desbideratzea eta kontratuari buruz egindako galderei eta kontratua legealdi honetarako soilik izateari buruz egindako proposamenari erantzunik ez ematea leporatu zien Labordek jeltzaleei.

PSOEko Maria Luisa Arijak ere hitza hartu zuen eta esan zuen horrelako eztabaidarik ez egoteko, parrokiarekin egin beharreko bileretan alderdi guztien ordezkariak egon behar luketela. Udal Gobernuari oposizioarekin ez kontatzea leporatu zion eta gauzak modu traketsean egitea. Hala ere, aldeko bozka emango zuela adierazi zuen, "kontratua ez delako horren txarra ere".

Amaitzeko, bozketa egin zen eta aipatutako alokairu kontratuak PNV eta PSOEren ordezkarien aldeko 7 boto izan zituen, EH Bilduko 6 zinegotziek kontra bozkatu zutelarik. Beraz, gehiengo osoz onartua izan zen.

Josu Juaristi EH Bilduko europarlamentariak eskala txikiko proiektu energetikoak defendatu ditu, autokontsumoa eta energia berriztagarriak ardatz dituztenak.

EH Bilduk Energia Batasunari buruzko eztabaidan parte hartu du Europako Parlamentuak Bruselan duen egoitzan. Juaristik defendatu du "eredu energetikoak, ezinbestean, tokiko dimentsioa duten proiektuetan oinarritutako banaketa-sistema izan behar duela. Horrek produkzio- eta kontsumo-puntuak herritarrengana eta bere beharretan hurbiltzen ditu, eta berez, erabaki horiek tokiko eta eskualdetako erakundeek herritarrekin batera hartu beharko lituzkete".
EH Bilduko ordezkariak nabarmendu du "herritarrak, enpresa txikiak, erakundeak (tokikoak, batez ere) gero eta gehiago kolaborazio lanetan ari dira, energia berriztagarriaren produkzio, banatze, kontsumo eta biltegiratze alorretan, autokontsumoan eta komunitateetan oinarritutako proiektuak sustatuz". Juaristik gaineratu du "esfortzu horiek guztiek, positiboak alde guztietatik, Europako Batzordearen laguntza eta sostengua ere izan behar dute, komunitatearen ongizaterako".

Azkenik, mugaz gaindiko lankidetzak duen garrantzia azpimarratu du Juaristik: "Energia eredu berri hau modu berezi batean mugaz gaindiko inguruetan sustatu beharko litzateke, sare lokalak zabaltzeko helburuarekin, trantsizio energetiko erreal eta jasangarria osatuko duena Europa mailan".

Jon Iñarritu EH Bilduko senatariak Sareri lapurtutako dirua itzultzea exijitu dio Estatuari. Senatari subiranistak gogor hitz egin du PPren gobernuaren aurka. “Noiz eta gaur, otsailaren 23an (23-F) etorri behar izan dugu berriz ere euskal herritar batzuri elkartasuna adieraztera”, esan du.

Bere hitzetan, Estatuaren lapurreta baten aurrean gaude eta beraz, lapurtutakoa itzuli behar du lehenbailehen. Era berean, salbuespenezko politikak behingoz albo batera utzi ditzala eskatzen diogu Rajoyren gobernuari.

EH Bilduren izenean Oskar Matute diputatua eta Jon Iñarritu senataria hurbildu dira Audientzia Nazionalera Sare mugimenduari elkartasuna adieraztera. LABeko idazkari nagusia den Ainhoa Etxaide ere bertan izan da Sareko kideei elkartasuna adierazteko.

Euskal Herrian "urtetan entzundako aldarriei" heldu, eta horien inguruan iritzia emateko garaia iritsi dela azaldu du, gaur, Tolosaldeko Euskal Herria Bilduk, datorren martxoaren 19ko galdeketari begira. "Erabakitze ariketa erraldoia" egiteko eguntzat jo dute hitzordua eta, horrenbestez, "pauso bat eman, eta partaide izateko garaia" dela erdietsi dute, "identitate sentimendu nahiz sentsibilitate politiko guztien gainetik". Bide horretan, koalizioak bere aldetik, baiezko botoa sustatuko du estatu ereduaren inguruko galdeketan.

Besteak beste, "burujabetza, Euskal Errepublika, Euskal estatua, independentzia, euskara, eskubide sozialak, parekidetasuna, justizia, elkartasuna nahiz etorkizun hobea" aipatu dituzte, balizko baiezko emaitza baten ondorio gisa, eta aurreratu dute, datozen asteotan egitasmoren bat iragarriko dutela, martxoaren 19ko hitzordua girotze aldera.

Pasa den otsailaren 16an Gipuzkoako "Kaleratzeak STOP Desahucios " plataformak agerraldia egin zuen Donostiako Garibai kaleko Kutxabank-en egoitzaren aurrean. Bertan hainbat alderdi politiko, sindikatu eta gizarte eragilek bere babesa adierazi zieten egoera larria bizi duten Amaia eta Kontxi herritarrei. EH Bilduko Donostiako udaleko eta Gipuzkoako Batzar Nagusietako ordezkariak ere bertan izan ziren. 

Amaia eta Kontxi afektatuak ere agerraldian izan iziren.

Hau da Kaleratzeak STOP Desahucios plataformak argitaratu duen oharra:

PRENTSA OHARRA | 2017/02/16

GAURKOAN GIPUZKOAKO ETXEGABETZEAK STOP PLATAFORMAKO KIDEAK HEMEN ELKARTU GARA KUTXABANK ATXIKITUA DAGOEN GUINDOS DEKRETUA (BANKU PRAKTIKA ONEN KODEA) BEHIN ETA BERRIRO BORTXATZEAGATIK SALATU ETA KONTXY ETA AMAIA GURE KIDEEI ELKARTASUNA ADIERAZTEKO.

Batzar orokorretako EH BILDU, PSE ETA PODEMOS-eko KIDEAK; Donostiako IRABAZI, EH BILDU eta PSEko zinegotziak; LAB, ELA, ESK, STE-EILAS sindikatuak eta DUINTASUNA zein GEPE elkarteak ditugu gurekin hemen.

KUTXABANKEK KONTXY ETA AMAIARENTZAKO BOST URTERAKO KUOTA MURRIZTUKO KARENTZIA SINATZEARI UKO EGIN ETA TRABAK JARRI DIZKIO. BIAK GURASO BAKARREKO FAMILIAK DIRA, BALIABIDE URRIEKIN ADIN TXIKIKO HIRU SEME-ALABA DITUZTENAK.

GAINERA AMAIA ETA BERE HIRU SEME-ALABEN AURKAKO SALAKETA AURKEZTU DU, ETXEA ENKANTERA ATERA ETA GERO ETXETIK BOTATZEKO.

Onartezina da KUTXABANK EDL 6/201 eta ondorengo legeak ez betetzen edo trabak jartzen aritzea. PAH guztiok lege horiek nahikoa ez direla behin eta berriro salatu dugun arren bazterketa sozialean aurkitzen diren familiek horietarako eskubidea dute.

Guzti honetan okerrena KUTXABANK egoera honetan dauden familiei banku praktika onen kodearen onurez informatzera behartua dagoen arren halakorik egin ez duela da. Ez hori bakarrik, gainera ordaindu gabeko kuotak meta ditzaten itxaroten du, gero HIPOTEKA EXEKUZIO SALAKETA BAT JARTZEKO, Amaiarekin Donostiako 4. epaitegian egin duten bezala.

Gure kide eta haien familien kasua da hori; banka praktika onen kodeak eskatutako baldintzak bete arren KUTXABANKEKO BEZEROAREN ARRETA ZERBITZUAK esan digunaren arabera 5 urteko KARENTZIA UKATU eta TRABATU zaie Kontxy eta Amaiari, euribor gehi %0,25eko kuota murriztua ukatuaz.

KONTXIren kasuan, EZEZKOA bere etxebizitzak Hazkunde Ministerioak ezarritako 8588 euroko muga gainditzeagatik ezarri diote, Eusko Jaurlaritzak 2005 urte horretan bertan Gipuzkoan ezarritakoa 1458 handiagoa izan arren, non Kontxiren 183.000 euroko etxebizitza bai egongo zen. Prezio hau 56 metro karratu eta 60 urte zituen MARTUTENEko etxebizitza bategatik ordaindu zuen, KUTXAk berak elikatutako burbuilaren puntu gorenean. Harrigarria da KUTXAK, bere burua "hemengoa" bezala definitzen duenak, estatu mailako prezioak erabiltzea eta ez EAEkoak, estatuko altuenak eta espekulazioa gehien jasan zutenak.

AMAIAREN kasuan, OZTOPOA bere senar ohiaren dokumentazioa eskatzean datza, Kodeak 3. artikuluak eta jarraipen komisioaren ebazpenak FAMILIA UNITATEA zein den argi eta garbi uzten duten arren. Unitate horrek soilik du banku praktika onen kodean babestek obeharrezko den bere babesgabetasuna frogatzeko zilegitasuna.

Azkenik, ONARTEZINA da PNVko zuzendaritza politikoak jarrera lotsagarri hau baimentzea, KUTXABANKEKO zein jada desagertutako kutxen zuzendaritza bera denean: VITAL, BBK ETA KUTXA. Zuzendari politiko hauei eskatzen diegu jarrera aldaketa bat eman dezaten, beren erantzukizuna har dezaten eta karentzia hauek zein iruzur finantzarioaren biktima izan diren edozeinen karentziak sinatu ditzaten.

BAI AHAL DUGU | KALERATZEAK STOP DESAHUCIOS GIPUZKOA

EH Bilduk EAJ-PSE-PP aliantza salatu du gizarte eskubideak gauzatzeko eskubidea bermatzea xede duen eztabaida ekidin nahi izan dutelako.

EH Bilduk EAJ, PSE eta PPren arteko aliantza deitoratu du aipatu alderdiek bat egin dutelako gaur arratsaldean Legebiltzarrean Gizarte Zerbitzuen Legearen garapena bultzatzeko ponentzia bat sortzea eragozteko. EH Bilduk lantalde hori sortzea proposatua zuen eta horren beharra aldarrikatu du gaur diagnostiko bat egin dezan eta neurri zehatzak planteatu ditzan eskubide sozialak gauzatzeko eskubide subjektiboa bermatzeko, hori legediak herritar guztiei aitortzen dien eskubidea baita. Nerea Kortajarenaren iritziz, EAJk, PSEk eta PPk emandako ezezkoak agerian uzten du alderdi horiek ez dutela inolako interesik 2008an onartutako Gizarte Zerbitzuen Legea behar bezala garatzeko.

EH Bilduko legebiltzarkideak ohartarazi duenez, herritarrek zaintza eta babeserako duten eskubidea arriskuan dago Araban, Bizkaian eta Gipuzkoan Gizarte Zerbitzuen Legearen garatzeko finantzazio, koordinazio eta lidergoa falta delako eta herrialde eta eskualdeen arteko desorekak daudelako. “Egun, gurean, herritarren artean aukera-berdintasuna ez da errespetatzen eta gizarte zerbitzuak jasotzeko eskubidea subjektiboa ez dago bermaturik. Aurreratua izan nahi duen herri batek beren kideak babestu eta zaintzeko obligazioa du eta, lan horretan, funtsezkoa da euskal gizarte zerbitzuen sistema sendo izatea. Ezin dugu inolako luzapenik onartu. Eskubideen alorrean moratoriak ez dira zilegi; are gutxiago behar gehien duten pertsonen eskubideei dagokienean”.

Gipuzkoarrontzat Ernio-Aralar Natur Parkeak balio sinboliko, ekologiko eta kultural handia du. Hori dela eta, Foru Gobernuak aurkeztutako Kudeaketa Planak jendartean tentsio handia sortu du azken hilabeteetan.

Babesgabetasun sentsazioa eta ezinegona zabaldu dira, eta Zaldibiako Oiduiko borda erretzea azkeneko adierazlea dugu. Egoera honetan, irtenbide bakarra kudeaketa egokia eta parte hartzerako kanalak irekitzea da. Horregatik, EH Bilduk proposatu du Batzar Nagusietan talde txostengile bat eratzea Ernio-Aralar Natur Parkearen kudeaketa integrala eta egokirako ekarpen kualifikatuak jasotzeko, sektore anitz, ezberdin eta ugarien parte hartzearekin. Iritzi guztiak kontutan hartuta, batzorde bereziak txosten bat onartuko luke ekainean, Foru Aldundiari aurkezteko.

Gipuzkoako Batzar Nagusietako mahaiak gaur onartu du EH Bilduren ekimenaren tramitazioa, eta ponentziaren sorrera hurrengo Landa Garapen batzordean eztabaidatu eta bozkatu egingo da. Koalizioak ebazpen hau babestea eskatu die EAJ eta PSEri, eta elkarrizketarako deia egin dio Foru Gobernuari, gatazka ez baita bide egokia Aralarko parke naturalak eta artzaintzak behar duten babesa bultzatzeko eta etorkizunerako irtenbide jasangarriak bilatzeko.

Aralarko pistak egiten ari diren guneetako baten irudia.

Foru Aldundiak Enirio-Aralar kudeaketa plana osatu zuen, honako helburuarekin: Mankomunitateak identifikatu eta onartutako beharrak egikaritzen laguntzea legealdian zehar, horretarako beharrezkoak diren baliabide tekniko eta ekonomikoak bideratuz. Diputazioak jarraitu duen prozeduran, baina, Natur Parkea kudeatzeko aholku organoa den Patronatua ez du deitu eta, ondorioz, ez du jaso arlo ezberdinetako eragileen iritzia. Beraz, kudeaketa planean ez dago Natur Parkearen ikuspegi integralik.

Adibidez, bide-azpiegiturei dagokienez, ez dira proiektu ezberdinak proposatzen ezta inbertsioak justifikatzeko azterketarik aurkezten, beraz, ezin da lehenetsi inpaktu gutxien izango lukeen aukera. Bestalde, artzaintzaren egoerari buruzko diagnosi eta proposamen integralik ez dago, ezta inbertsioek artzaintzan izango duten eragina eta bideragarritasun txostenik. Honetaz gain, pisten ingurumen inpaktuko aurre azterketarik ere ez da jasotzen.

Gabezi guzti horiek kontutan izanda, eta Aralarko parke naturalean bideak eraikitzeko asmoak Gipuzkoan sortu duen krispazio soziala ikusita, EH Bilduk Batzar Nagusietan proposatu du talde txostengilea eratzea, Ernio-Aralar Natur Parkearen kudeaketa zuzenerako aukerak aztertzeko ikuspegi integraletik. Horretarako, parkearen erabilera zein kudeaketarekin zerikusia duten eragileek parte hartu ahalko dute. Honetaz gain, iritzi kualifikatua duten agenteen presentzia bermatuko da, izan artzain, ganaduzale, sindikatu, unibertsitateko kide, ingurumen talde, natur, ekologista edo ikerketa talde.

Azterketa bukatutakoan, batzordeak txosten bat osatuko du ekainean, eta Gipuzkoako Foru Aldundiari eta Enirio-Aralar mankomunitateko kideei helaraziko zaie.

EH Bilduk azpimarratu du Gipuzkoako erraustegia auzitegietan katramilatuta dagoela EAJ eta PSEren obsesioagatik, eta egoera horretan urteak igaro daitezkeela, ez atzera eta ez aurrera. Horregatik, Rebeka Uberak eta Xabier Olanok Gipuzkoako hondakinen arazoari akordio zabal eta jasangarria emateko eskua luzatu diote Foru Gobernuari:

Derrigorrez, gauza guztien gainetik, presaka eta korrika aurrera jarraitzen dute itsututa, gipuzkoarren ia erdia ordezkatzen dugun indar politikoen iritziei, nazioarteko gomendioei, mediku adituei eta herritarren eskaerei kasurik egin gabe. Eta, horrek zer ekarri du? Arazoak, hanka sartzeak, kudeaketa kaxkarra eta ziurtasun juridiko eza. Eta hori da, hain zuzen ere, gaur egun dugun egoera. Foru Aldundiak, baina, bere obsesioarekin jarraitzen du tramiteak egiten, presaka eta korrika, akats formalekin eta segurtasun juridiko ezarekin. EAJ eta PSE oso egoera zailean kokatzen ari dira Gipuzkoako Administrazio Publikoa.

Egoera hain korapilatsua izanda, azken egunetan EAJk eta PSEk atentzioa desbideratu nahi izan dute publikoki EH Bilduren kontrako eraso bortitzak erabiliz, tonua igoz deskalifikazioekin eta mehatxuekin. Erabiltzen ari diren estrategia argia da; euren akats eta arazoak estaltzeko besteen aurka egin, begirada besteen lepo gainean ezarri. Baina gu oso lasai gaude. Aurreko legealdian, GHKko eta Foru Aldundiko agintariek legitimitate demokratiko osoarekin eta legea %100 betez jokatu zuten: txosten teknikoetan oinarrituz, kudeaketa zuzena eta gardena egin zuten, gipuzkoarren osasunaren eta interes publikoaren defentsan, eta herritarren borondatea errespetatuz.

Beraz, zer da benetan gertatzen ari dena? EAJ eta PSE bere kabuz sartu dira, eta gipuzkoar guztiok sartu gaituzte, nola askatu ezin duten korapilo baten erdian. Ez dakite mahai gainean duten arazoa nola konpondu. Egoera kaotikoa da, katramila juridiko izugarria dute esku artean. Hala aditzera ematen dute astearteko Imanol Lasaren adierazpenak, erraustegi berriaren esleitze prozesua paralizatuko dutela iragarriz, EAEko Auzitegi Nagusiak GuraSOS elkartearen helegitea ebatzi arte, behintzat.

Momentu aproposa da beraz, zoramen frenetiko hau gelditu, hausnartu eta nahaspila honetatik irteteko. Itsu-itsuan ibil i beharrean, gogoeta sakona egiteko unea da. Eskenatoki honek erraustegiaren proiektua birplanteatzeko aukera paregabea zabaldu du.

Diputazioak derrigorrez gelditu behar izan ditu, momentuz, Zubietako planta eraikitzeko tramiteak. Beraz, Foru Gobernuari eskatzen diogu probestu dezala impasse hau hondakinen kudeaketan akordio zabalak bilatzeko mahai bat osatzeko. Akordio politikoak eta sozialak behar ditu herri honek, horregatik, beste behin ere, mahai baten bueltan alderdi politiko, eragile sozial, sindikatu, plataforma, aditu taldeak eta egoera hau kezkaz bizi duten herritarrak biltzeko aukera sortu dezan eskatzen diogu Foru Gobernuari. Gu prest gaude.

Erraustegia gelditzeko garaiz gaude. Gipuzkoako hondakinen arazoari akordio zabal eta jasangarria emateko aukera dugu aurrean. Egin dezagun”.