EH Bilduk lehendakariaren agerraldia eskatu du. Jaurlaritzak eskura dituen baliabide guztiak erabili behar ditu katalanen erabaki demokratikoa, igandean adierazi zutena, errespetatua izan dadin.

EH Bilduk Urkullu lehendakariaren presazko agerraldia eskatuko duela iragarri du gaur, Legebiltzarrean azal dezan zein urratsak emango dituen Kataluniaren erabaki demokratikoa defendatzeko. Maddalen Iriarteren aburuz, “Jaurlaritzak inakziotik akziora pasatu behar du; Espainiak, Europak eta mundu osoak jakin behar dute gatazka honetan Jaurlaritza Kataluniaren alboan dagoela, bere aldarrikapenekin bat eginik, eta ez duela inolako konponbiderik ontzat emango kataluniarren borondate demokratikoa aintzat hartzen eta onartzen ez badu”. Finean, zehaztu du Iriartek, “lehendakariari eskatzen diogu Generalitaten alboan jar dadila, eskura dituen baliabide guztiak erabil ditzala Kataluniako herriak pasa den igandean adierazi zuen borondate demokratikoa errespetarazteko”.

EH Bilduko bozeramailearen iritziz, Lakuako Gobernua katalanen ondoan jarri behar da, zalantza izpirik gabe, Katalunian gertatzen ari denak eragin zuzena duelako Euskal Herrian. “Kataluniaren nazio eskubideak defendatzea Euskal Herriaren nazio eskubideak defendatzea da; ondorioz, Urkullu busti egin behar da, irtenbide baten bila. Bistakoa da txio batean etsipena eta kezka adieraztea ez dela nahikoa, lehendakari bati gehiago eskatu behar zaiola”.

Espainiako erregeak bart egindako agerraldiari dagokionez, Iriartek “Kataluniaren aurkako gerra deklaraziotzat” hartu du, nahiz eta “funtsean erregearen hitzaldiak ez zuen berri handirik ekarri”. Izan ere, “Estatuko botereek betiko leloan –Espainia bakarra, handia eta askea– ainguraturik jarraitzen dute eta Felipe VI.ak berretsi du Estatutik ezin dugula bestelakorik espero, mehatxuak, errepresioa eta gure nazio eskubideen ukapena bakarrik”.

Urtero bezala, Amasa Villabonako udaleko kultur sailak, ikasturte berrirako ikastaro ezberdinak antolatu ditu herritarrentzat. Izena emateko epea zabalik egongo da irailaren 7tik 21era eta udaletxeko kultur saileko bulegora jo beharko da. Udaleko webgunean ikastaroak ordaintzeko sistema aldatu dela iragartzen da: "Ordainketa sistema aldatu egin da: Izena ematerakoan kontu korrontearen 24 digitoak ekarri behar dira."

Hauek dira aurtengoan izango diren ikastaro ezberdinak:

• EGUR LANKETA. 90 orduko ikastaroa.

Irakaslea: Jon Iñaki Ormazabal.
Taldeak: Astelehena, 15:30-18:30. Osteguna, 09:30-12:00 edo 15:30-18:30.
Sacemgo lantegian. Hasiera: Urriaren 2an.
Prezioa: 232 euro Villabonan erroldatuentzat / 327 euro gainerako guztientzat.

• ZAHARBERRITZEA ETA ARTE APLIKATUAK. 90 orduko ikastaroa.

Altzarien zaharberritzea eta esku-lanak oro har.
Irakaslea: Oihana Insausti.
Astelehena, 17:00-20:00.
Sacemgo lantegian. Hasiera: Urriaren 2an.
Prezioa: 196 euro Villabonan erroldatuentzat / 307 euro gainerako guztientzat.

• PINTURA HELDUENTZAT. 60 orduko ikastaroa.

Irakaslea: Urkiri Salaberria.
Taldeak: Asteazkena, 17:30-19:30. Osteguna, 18:30-20:30.
Larrea auzoa, 20. Hasiera: Urriaren 4an.
Prezioa: 131 euro Villabonan erroldatuentzat / 199 euro gainerako guztientzat.

• PINTURA HAURRENTZAT. 30 orduko ikastaroa.

Irakaslea: Urkiri Salaberria.
Taldeak: Astelehena 17:30-18:30 (4-7 urte). Astelehena, 18:30-19:30 (8-11 urte). Osteguna 17:30-18:30 (8-11 urte).
Larrea auzoa, 20. Hasiera: Urriaren 2an.
Prezioa: 91 euro Villabonan erroldatuentzat / 120 euro gainerako guztientzat.

* Taldea osatzeko gutxieneko ikasle kopurua osatzen ez bada, taldea bertan behera utz dezake Udalak.

* Izen-ematea: Kultur saileko bulegoan, irailaren 7tik 21ra, 09:00etatik 12:00etara bitartean.
Info gehiago: 943 691 655 / This email address is being protected from spambots. You need JavaScript enabled to view it..

Anima zaitzezte eta izena eman!

EH Bilduren iritzia:

Amasa Villabonako EH Bilduko udal taldetik, aurtengo kultur ikastaroen eskaintza hau murritzegia dela pentsatzen dugu. Eskaintzen diren lau ikastaroak inola ere gutxietsi gabe (erabat errespetatzen eta babesten ditugun ikastaroak dira) nabarmena da aurtengoan, aurreko hainbat urtetan ez bezala, ez dela ikastaro berriak eskaintzeko ahaleginik egin. Azken urte luzetan udalak udazkeneko kultur ikastaro laburrak antolatu ditu herriko sortzaile edo artista ezberdinekin elkarlanean (argazkigintza, serigrafia, sukaldaritza, bitxigintza, tornua...) eta aurtengoan hori ez egitea erabaki du udal gobernuak. EH Bilduko udal taldean ez dugu erabaki hau inondik inora konpartitzen. Izan ere, udazkeneko ikastaro hauetako batzuk gutxienez, herritarren parte hartze zabala izatea lortzen zuten eta urtez urte balorazio oso positiboak jasotzen zituzten. Beraz, udazkeneko ikastaro guzti guztiak bertan behera uztea ulertezina egiten zaigu. 

Gure ustez, honako hau PNVko hainbat zinegotzik behin eta berriz erakusten duten axolakabekeriaren beste adibide argi bat da. Kasu honetan, Mertxe Garmendia kultur zinegotzia da erabaki honen arduradun politikoa. Agian billabonatarra ez izateak, herriko kultur ikastaroei garrantzirik ez ematea eragin dio baina gure ustez hori ez da aitzakia onargarria.

Ikastaroen ezabatzea ez da udaleko kultur sailean ikusi dugun arazo bakarra, adibidez udaleko kultur batzordea ia ez da biltzen eta erabaki ia guztiak inorrekin kontsultatu gabe, aldebakarrez eta inolako azalpenik eman gabe hartzen ditu Garmendia andreak. Gure iritziz nabarmen geratzen ari da PNVren gobernuaretzat kulturak ez duela garrantzi nahikorik bertan serio lan egin eta behar den denbora inbertitzeko. Nahiago dute saila ia paralisi egoera batean edukitzea, herriko beste ordezkari politikoekin, kultur eragileekin edota herritarrekin eztabaidatuz eta adostuz, kultur politika txukun bat garatzea baino.

Kaixo denoi. Kontaketa hau egitea erabaki dut, pasa den igandeko egun historikoan Katalunian egoterik izan ez zenuten herritarrek guk bertatik bertara bizi izan genuena ezagutzeko aukera izan dezazuen, askotan manipulatzen eta egia ezkutatzen duten komunikabideen (gehienbat espainiar komunikabideen) filtrotik pasa gabe.

Duela aste batzuk Udalbiltzak, Euskal Herri osoko hautetsiak biltzen dituen instituzio bakarrak, urriaren 1eko erreferenduma bertatik bertara ikusteko aukera eskaini zigun eta nik joatea erabaki nuen Amasa Villabonako EH Bilduko zinegotzien ordezkari gisa. Udalbiltzak Katalunia osoko 800dik gora udalerri biltzen dituen AMI (Associació de Municipis per la Independencia) erakundearekin egindako hitzarmenari esker, Euskal Herriko hautetsiok erreferendumean "nazioarteko bisitari" gisa aritzeko lana (ohorea esango nuke nik) eduki genuen. Guztira 100 hautetsi inguru joan ginen Euskal Herritik eta beste hainbat naziotako hautetsiak ere (Suitza, Quebec, Alemania, Eskozia, Kroazia...) gurekin batera izan genituen lan bera egiteko.

Larunbat arratsaldean heldu ginen Bartzelonara eta erdialdean, Catalunya plazatik gertu dagoen Bartzelonako Ateneu-ra jo genuen. Bertan 18:00etan AMI erakundearen harrera jaso behar genuen. Behar bezala akreditatu eta paperak jaso ondoren, Ateneu-ko aretoan AMI-ko kideek hurrengo eguneko erreferendumean egin beharrekoa azaldu ziguten. Guztira 40-50 hautetsiz osatutako 4 talde osatu ziren eta talde bakoitza Kataluniako lurralde batera joango zen; Girona hiriburua, Bartzelona-Girona kostaldea, barrualdea (Manresa, Vic) eta Bartzelona hiria. Niri Bartzelonan geratzea tokatu zitzaidan eta gure nazioarteko bisitari taldeak egin beharreko lana eta ibilbidea (zein hautestoki bisitatuko genituen etab.) azaldu zizkiguten hainbat hizkuntzatan. Harrera ekitaldiaren ondoren, Kataluniako produktuak (cava, "coca" boiloa eta bertako enbutidoak) dastatzeko aukera izan genuen Ateneu-ko patio dotorean.

AMI-ko arduradunak nazioarteko hautesioi azalpenak ematen Ateneu-ko harrera ekitaldian

Harrera ekitaldia eta ondorengo luntxa amaitu ondoren, Bartzelona erdialdeko kaleetara irten ginen buelta bat ematera. Mundu guztiak zekien hurrengo eguna historikoa zela eta iluntzean urduritasuna eta zalantza antzematen zen, bai gure artean eta baita herritar gehienen artean ere. Zer gertatuko da bihar? bozkatu ahal izango dugu? zalantza eta kezka ziren nagusi. Alde zaharrean bokadilo bat afaltzen ari ginela, 22:00ak jo zituen eta kazerolada hasi zen hirian! jende asko etxeko balkoietara irten zen eta burrunbada nagusitu zen kaleetan. Kazerolada amaitu eta gure albergera jo genuen lo egitera, bagenekien hurrengo eguna luzea izango zela eta.

Iritsi zen U-1a, erreferendumaren igande historikoa! Goizean goiz jaiki, dutxatu, kafea hartu eta 7:30etarako Gracia auzoko Fontana metro geltokian elkartu ginen Bartzelonan gertzea tokatu zitzaigun nazioarteko bisitarien 40 lagun inguruko taldea, AMI-ko gure arduradunekin. Euria ari zuen Bartzelonan, euskaldunok xirimiria bertaraino eraman genuela zirudien. Metro geltokitik oso gertu, eraikin baten aurrealdean jende ugari pilatuta eta errepidean zutik ikusi genuen, hautestoki bat zen! zehazki Gran de Gracia caleko "CEF. Centre d`Estudis Financiers"-en kokatutako hautestokia. Bertara inguratu ginen eta jendea urduri ikus zitekeen, bazekiten Polizia eta Guardia Zibilak portuko itsasontzietatik irtenda zeudela edozein momentutan ager zitezkeela eskola indarrez itxi eta papeletak eta hautestontziak eramatera. Gure akreditazioa ikustean jendea eskerrak ematera gerturatu zitzaigun "gracias por estar aquí" esanez eta batzuk txaloka ere hasi zitzaizkigun. Mossoen auto bat gerturatu zen eta une batez tentsioak gora egin zuen. Mossoek errepidea ez zegoela itxita eta mesedez autoak pasatzen uzteko eta jendea errepide erditik kentzeko eskatu zuten. Jendeak berehala errepidea libre utzi zuen eta Mossoek alde egin zuten, jendeak txaloka agurtu zituen.

 Bartzelonako Gran de Gracia caleko "CEF. Centre d`Estudis Financiers"-en kanpoaldea jendez beteta eguna argitu aurretik

Hautestoki hau atzean utzi eta programatuta genuen ibilbideko lehen eskolara abiatu ginen, oso gertu zegoen Gracia-ko "Vedrunes" eskola publikora. Eskolara gerturatu ginenean, sarrera zegoen kalea jendez gainezka ikusi genuen, goizeko 8:00ak inguru ziren eta euria egiten jarraitzen zuen. Hemen ere lepotik zintzilik generaman gure "nazioarteko bisitari" kredentziala ikustean jendea eskerrak ematen eta txaloka hasi zitzaigun eta baita ezaguna egin den "Votarem!", "Votarem!" ohiuka ere. Momentu benetan zirraragarria. Herritarrak ondo prestatuta zeuden, karpa txiki bat montatu zuten eta bertan kafea, gailetak, ura etab. hartu zezakeen edonork.

 Gracia-ko "Vedrunes" eskola publikorako sarrera kalea 8:00ak inguruan

Gure asmoa hauteslekuen prestaketa nola egiten zen ikustea eta hauteslekuen irekiera momentuan bertan egotea zen. Eskola barrura sartzen utzi ziguten eta bozka emateko lekua prest zegoen dagoeneko. Bertan ziren Generalitat-eko logoa zuten hautestontzi edo urna ezagunak eta baita espainiar estatuko segurtasun indarrek bereganatu nahi izan zituzten bozkatzeko papeleta ofizial mordoa ere. Minutu batzuk beranduago mahaietan egotea tokatu zitzaien herritarrak eta alderdi ezberdinetako ahaldun eta ikuskatzaileak bertara sartu eta mahaiak ofizialki osatuta geratu ziren. Estatuak ez zuen bere helburua lortu, Kataluniako autodeterminazio erreferenduma prest zegoen eta egin egingo zen!

Vedrunes eskola publikoko hautestokia erabat prest zegoen 8:15etarako.

Hauteslekuen irekiera ordua iritsi zen, goizeko 9:00ak ziren. Baina eskolako ateak itxita jarraitzen zuten eta herritarrek ezin zuten bozkatzera sartu. Zer gertatzen zen? ba Generalitat-ak erreferendumerako prestatutako programa informatikoari eraso egin ziotela estatuko segurtasun indarrek. Programa ezin zen martxan jarri eta egoera horretan bozkak ezingo ziren behar bezala erregistratu. Minutuak aurrera zihoazen bitartean, kezka eta ezinegona geroz eta nabarmenago ikusten zen hautestokian zeuden arduradunen artean. Bazekiten hori gertatu zitekeela eta estatuaren eraso zibernetikoari erantzuna emateko prest zeuden; bolondres gisa gerturatutako informatikoak arazoa konpontzen saiatzen ari ziren buru-belarri. Bitartean kalean "Votarem!, Votarem!" ohiuak.

10:00ak pasatxo zirenean, ospakizun ohiuak entzun genituen, arazoa konpontzea lortu zuten eta erreferendumeko programa informatikoa martxan zegoen azkenean!!! Jendearen aurpegiak bapatean aldatu ziren, kopetilun egotetik, pozez zoratzen egotera pasa zen jendea instant batean. Kanpoan zain zegoen jende uholdea ere segituan ohartu zen arazoa konpontzea lortu zela eta txaloka hasi ziren. Denborarik galdu gabe, eskolako ate nagusia zabaldu egin zen eta lehen herritarrak sartzen hasi ziren. Lehen bozkatzaileak ateraino gerturatzen eta ilada pasatzen utzi zitzaien gizon emakume nagusiak, aitona eta amonak izan ziren. Piskanaka eta modu oso ordenatuan pasatzen zen jendea (ez zuten ate handia guztiz zabaldu nahi, polizia edo guardia zibila etortzearen beldur baitziren) eta eskolatik aulkiak ere atera ziren pertsona helduak eseri eta hankak deskantsa zitzaten. Bozka ematera sartzerakoan jendearen aurpegietan emozioa eta poza nabari ziren eta batzuk negarrez ere sartzen ziren eskolara. 90 urte inguru izango zituen amona batek duela hilabete batzuk hildako bere senarrak une historiko hura ez bizi izanak penatzen zuela esan zigun, bizitza osoan horrelako momentu batekin amets egin ondoren. Momentu horiek guretzat ere hunkigarriak izan ziren, mota eta adin guztietako jendeak, herritar normal-normalak, erreferendumarekiko erakusten zuten inplikazio emozionala sentitzeak gu ere hunkitu gintuen. Kataluniako jendeak bozkatu egin nahi zuen bere indar eta gogo guztiarekin, horixe bakarrik, bozkatu nahi zuten! Domokraziaren festa hasi zen!    

Momentu gozo horiek ordea, garraztu egin ziren sare sozialetatik, whatsapp-etik eta irratietatik iristen hasi ziren albiste, irudi eta bideoek Kataluiniako leku askotan gertatzen ari zena ikusarazi zigutenean. Espainiar Polizia eta Guardia Zibila jendea erasotzen ari zen bozka eman nahi hutsagatik! eta zenbait tokitan eskolak itxi eta hautestontziak lapurtu zituzten. A ze demokratak! Lotsagarria! Aurpegi ilunak eta amorru hitzak nagusitzen hasi ziren jendearen artean. 

AMIko arduradunek guretzat aurrikusi zuten ibilbidea erabat aldatu beharrean aurkitu ginen orduan. Hasiera batean Badalonako udaletxean bertako alkatearekin zita bat genuen, ondoren pare bat eskola bisitatzeko asmoarekin. Baina Badalonatik deitu ziguten polizia hainbat eskoletara sartzen ari zela eta egoera oso zaila zela esanez. Ondorioz gu bertara ez joatea gomendatu ziguten. 

Zer egin orduan? Vedrunes eskolan jendea normaltasunez bozkatzen ari zela egiaztatu ondoren, gure taldea Gracia auzoan gertu genituen beste eskola batzuetara joatea erabaki genuen. Gure asmoa ahalik eta hautesleku gehien bisitatzea zen eta Vedrunes atzean utzi eta 300bat metrora zegoen insitutu batetara abiatu ginen. Ez dakit zehazki zein institutu zen baina bertan ere sekulako jende-iladak zeuden bozkatzeko zain. Hemen ere hurbildu eta nortzuk ginen azaldu genienean, jendea txaloka hasi zitzaigun eta bereziki momentu goxoa bizi izan nuen andre batek besarkatu ninduenenan "por favor, contar lo que de verdad está ocurriendo aquí" esanez.  

Aipatu dudan institutuko kanpoaldea jendez gainezka

Bozka emateko zain zegoen jendeak ilada oso luzeak osatu zituen, eta hau bezalko ilada ugari ikusi genituen.

Instututu hori atzean utzi eta Bartzelona erdialdera abiatu ginen euri gero eta indartsuagoari aurre eginez. AMIkoek hurrengo geltokia Ensanche bezala ezaguna den auzoan dagoen Generalitat-eko Turismo egoitza nagusia izango zela zehaztu zuten. Eraikin oso handi eta dotorea da, Bartzelonako goi klaseko auzo batean kokatua eta barrualdean lorategiak eta argazki esposaketa bat ikusi genituen. Esan zigutenez auzo hori soziologia aldetik ez zen sekula bereziki independentista izan eta garai bateko Convergencia y Unió alderdiak irabazten omen zituen beti hauteskundeak. Baina beste behin hauteslekura iristeko ilada luzeak ikusi genituen. Bertako bizilagun batek esan zigun iladan zeudenetako asko independentista "berriak" direla, auzo horretako jende asko duela gutxi heldu omen zen independentzia beste irtenbiderik ez zegoelakoaren ondoriora. Hautestontziak zeuden aretora sartzeko garaian, telefonoak "hegazkin modura" jartzea eskatu ziguten, izan ere, bertan zeuden arduradun eta alderdietako behatzaileak berriro programa informatikoa edo internet konexioa galtzearen beldur ziren. 

Generalitateko Turismo egoitzan, jendea iladan eta normaltasunez bozkatzen

AMI-ko arduradunarekin hitz egin eta hurrengo hauteslekura abiatu ginen, zehazki Provença kaleko Maragall institutura (Diagonaletik oso hurbil). Institutura iritsi aurretik sekulako ilada ikusi genuen, egun guztian ikusi ahal izan genuen luzeena. Eraikin osoari buelta ematen zion bozkatzeko irrikitan zeuden herritarrek osatutako ilada lodiak. Motel bazen ere, jendea bozkatzen ari zen eta tarteka bozka eman ondoren kalera ateratzen zen norbaiten ohiuak entzuten ziren "em votat!!!". Bertan berriz ere txaloka hartu gintuzten eta bertako jende ugarirekin hitz egiteko aukera izan genuen. Jendea emozioz gainezka zegoen, historikoa zen zerbaiten partaide sentitzen ziren. Bazekiten handia egiten ari zirela, egun hori inflexio puntu garrantzitsua izango zela, ez zegoela atzera bueltarik "Catalunya se va!" zioten. 

Maragal Institutuaren kanpoaldea jendez gainezka.

Hau izan zen nazioarteko bisitari gisa AMI-ko antolakuntzarekin eta nazioarteko beste hainbat lagunekin batera egin genuen azken bisita. Denak elkar agurtu ginen eta Euskal Herritik joandako kuadrila bat batu eta bazkaltzera joan ginen. 

Ofizialki egin beharreko lana bukatu bagenuen ere, argi geneukan arratsaldean ere hautestoki gehiago bisitatu nahi genituela. Katalunia plaza aldera abiatu ginen eta bertan mundu osotik etorritako komunikabideen kamioi eta karpak ikusi ahal izan genituen. Argi zegoen mundu osoa zegoela Katalunian gertatzen ari zenari begira. Ondoren Bartzelonako zonalde ezagunetatik pasatu ginen; Ranblak, Saint Jaume plaza, Katedrala... beti bezala turista mordo bat zebilen kaleetan, gertatzen ari zenaz konturatu ere egiten ez ziren "giri" tipikoak, sangria edan eta edozein lekutan argazkiak ateratzen. Bartzelonaren partidua ikus zitekeen tabernetako telebistetan, dakizuen bezala, gertatzen ari zenagatik harmailak hutsik zeuden Camp Nou-n. 

Azkenean topatu ahal izan genuen alde zaharreko auzo Gotikoan zegoen hautesleku bat, Cervantes eskola publikoa. Eskolaren atzeko aldea zegoen kaletik pasa ginen eta jende ugari zegoen ate handi baten inguruan, polizia edo guardia zibila etorriz gero, atzetik sartu ez zitezen. Esan behar dut antolakuntza izugarria ikusi genuela, jendea edozertarako prest zegoen, ateak babesteko, iladan zeudenei kafea, ura edota jatekoa emateko, inguruan poliziak ikusten bazituzten abisua emateko... egundokoa zen.

   Cervantes eskolako atzeko atea babesten ari zen jendea

Ondoren eskola honetako sarrera nagusia dagoen kalera joan ginen eta bertan beste behin jendetza izugarria ikusi genuen. Jendeak polizia edo guardia zibila arratsaldeko azken orduan etor zitezkeela pentsatzen zuen, denek ikusi zituzten Kataluniako hainbat lekutan gertatzen ari zen errepresioaren irudiak eta indar errepresiboak etorri eta hautestontziak botoz beteta zeudenean lapurtzearen beldur ziren. Mossoen auto bat gerturatu zen eskolara eta tentsioak gora egin zuen. Bi agente ziren eta hautesleku horretako arduraduna nor zen galdetu zutenean, ahots bakar batez erantzun zuen jendeak: "Tots!, Tots!!" (denok!). Orduan Mossoek buelta erdia eman eta alde egin zuten jendearen txaloen artean. 

Cervantes eskolako sarrera nagusia, bertatik sartzen zen jedea bozkatzera

20:00ak gero eta gertuago zeuden eta herritar ugari gerturatu ziren erresistentzia egiteko prest, kaleak jendez gainezka egin arte. Oraindik bozka eman ez eta arratsaldeko azken orduan bozkatzera zihoazen herritarrek, beren NANa eskuan hartu eta ikusteko moduan erakusten zuten. Orduan eskolako sarreraren babeserako zeuden pertsonak pasabidea egiten zieten. Momentu ahaztezinak. Nik eskola barrura sartzeko aukera ere izan nuen, lepoan zintzilik nuen nazioarteko bisitari txartela erakutsi eta jendeak barrura sartzen lagundu zidan. Eskola barrura sartu eta atentzioa deitu zidan lehen gauza, erreferendumaren antolaketa lanean zebilen jendearen artean, Espainiako selekzioko kamiseta zeraman pertsona bat zegoela izan zen. ERC alderdiko ikuskatzaile bati galdetu nion ea gizon horrek zer egiten zuen eta hauxe erantzun zidan "este nos está ayundando, es español, pero es demócrata". 

Orduan Carme Forcadell Kataluniako Parlament-eko presidentea iritsi zen bertara. Erreferendumeko mahaietan edo ikuskatzaile lanetan zegoen jendeak txalo zaparrada handi batekin agurtu zuen Forcadell andrea eta denek argazki edo selfi bat atera nahi zuten berarekin. Nabarmena da oso pertsona maitatua dela. Jende askok burujabetza prozesua aurrera eraman duten politikariak estimu handian ditu, leku gehienetan politikariak fama oso eskasa hartu duten garai hauetan, harrigarria da Katalunian jendeak politikari independentistei dien miresmena. "Los políticos han cumplido con el mandato de la gente, no nos han defraudado y por eso les aplaudimos" esan zidan bertako herritar batek.

Instant batez Carme Forcadell-ekin egoteko aukera izan nuen.

20:00ak gainean genituen eta bapatean pare bat gazte etorri ziren korrika, ondoko kalean polizia nazionala zegoela esanez. Tentsioak gora egin zuen. Denek zekiten zer egin behar zen: erresistentzia pasiboa, modu baketsuan baina tinko eutsiz. Eskolako lehen solairuko balkoitik horixe bera azpimarratu zuten eta jendea poliziaren etorrera bortitzerako prestatzen hasi zen, gu ere urduritu ginen, zer gertatuko ote zen? normala den bezala, kolpatuak izateko beldur zen jendea eta gu ere berdin geunden. Minutuak aurrera egiten zuten eta ez zen poliziarik ageri, herritar batzuk inguruko kaleetatik zabaldu ziren poliziak non zeuden ikusteko eta ez zituzten ikusi. Uff, alarma faltsua izan zen, eskerrak! 

Iritsi zen hauteslekuak isteko momentua eta bapatean bozka ematera zihoazen azken pertsonak agertu ziren NANa eskuan zutela. Azken pertsona sartzera zihoanean, eskolako ate nagusian segurtasun lanetan zebilen arduradunak geratu egin zuen. Porra estensible edo zabalgarri horietako bat zeraman eta polizia zela pentsatuz indarka geldiarazi zuen. Orduan gizonak, ahaztuko ez dudan zerbait ohiukatu zuen: "Soy Mosso, acabo de salir de trabajar y quiero votar!!!" hori entzutean jendea ero moduan txaloka hasi zen eta Mosso d`Escuadra agente hura izan zen eskola horretan bozka eman zuen azken pertsona. 20:00etara isteko azken segundoak iritsi ziren eta kalean zegoen jende uholdeak atzera kontaketa egin zuen ohiuka eta aho batez. 20:00etan puntuan eskolako atea itxi zuten txalo artean. Izugarria izan zen, benetan zirraragarria!  

Ondoren, kontaketa hasi zen. Gu eskola kanpoan geratu ginen, datuen zain kalean zeuden ehunka herritarren artean murgilduta. Kontaketa luze joan zen, ordu betetik gora iraun zuen (azken mahaieko emaitza falta omen zen) baina bapatean eskolako balkoitik kontaketa amaitu zela esan zuten eta hautestoki horretako emaitzak bota ziztuzten. 4.000tik gora bozka egon ziren eta baiezkoak irabazi zuen nabarmen. Baiezko bozken kopuru zehatza esan zutenean, jendea "i! inda! Independencia!!!" ohiuka hasi zen. Eta amaiera gisa, eskolako ateak zabaldu ziren eta hustutako hautestontzi edo urna famatuak jendearen artera atera zituzten. Eromena izan zen, jendea emozioz gainezka zegoen, bazekiten beren herriak, Kataluniak, oztopo eta errepresio guztiaren gainetik sekulako lezio demokratikoa eman zuela eta harro zeuden. Gu ere hunkituta geunden, ez daukat momentu horiek deskribatzeko hitzik.

Hautestontziarekin argazkia ere atera ahal izan nuen, talde berean geunden Leitzako eta Lizartzako zinegotziekin batera.

Auzo Gotikoko Cervantes eskola atzean utzi eta Katalunia plazara abiatu ginen. Bertan ANC (Assenblea Nacional Catalana) elkarteak pantaila erraldoi bat ezarri zuen Katalunia osoko kontaketa ofiziala zuzenean jarraitzeko. Milaka lagun zeuden bertan eta jai-giroa zen nagusi. Nagusi ziren Kataluniako eta baiezkoaren aldeko ANCko banderak, Galizia, Sardinia, Eskozia, Quebec eta beste hainbat naziotako banderekin nahasten ziren eta jakina, ikurriñak eta Nafarroako banderak ere ikusi genituen. Kontaketa orokorrak ere luze jo zuen, oso luze, goizean goiztik kalean eta eskoletan egon ondoren jedearen aurpegietan nekea nabari zen eta gu ere oso nekatuta geunden. Plazan gazteak ziren nagusi eta esan bezala festa giroa zegoen.

Katalunia plazan pantaila erraldoian TV3-eko irudiak ikusten, erreferendumeko datuen zain.

Gaueko ia ordubietan, Generalitateko bozeramailea den Jordi Turull jauna komunikabideen aurrera irten zen eta orduan bota zituen Generalitatat bildu ahal izan zituen datuak. Baiezko bozkak 2 milioitik gora izan zirela entzutean, Katalunia plazan zegoen jendea txaloka eta saltoka hasi zen, lurrean eserita zeudenak berriro zutik jarriz. Momentu hunkigarria hau ere. Pantaila erraldoian "Hola! Nou País" jarri zuenean, bazirudien une hartan bertan independentzia eskuratu zuela Kataluniak.

Horrelaxe bukatu zen egun historiko hura, irakurri ahal izan duzuen bezala zorte handia eduki genuen, egun osoan ez baikenuen polizia edo guardia zibilaren "bisitarik" jaso. Zoritxarrez askok ez zuten zorte bera izan eta indar errepresiboen ekinbide bortitz eta kriminalaren ondorioz ehunka izan ziren zaurituak Katalunia osoan. Doakie nire elkartasun eta maitasun guztia. Animo!

Igandean Kataluniako herriak demokrazia eta duintasun erakustaldia egin zuen eta aldi berean espainiar gobernua lotsagarri geratu zen mundu osoaren aurrean. Bozka eman nahi zuen jende baketsua erasoz, espainiar estatuaren izaera autoritario eta antidemokratikoa ageri agerian gelditu zen beste behin. Nik ondorio hau atera nuen: Espainiak Katalunia galdu du. Kataluniako herritarren gehiengoak dagoeneko deskonektatu du Espainiarekin eta horrek ez dauka atzera bueltarik. 

ZORIONAK KATALUNIA!!!

Xabat Laborde Etxabe

Amasa Villabonako EH Bilduko zinegotzia

Behar Zana pilota eskolak antolatutako pilota ikastaroak irailaren 18an hasiko dira.

Ekaineko izen-ematean inor gogoz geratu bazen, oraindik bada izena emateko aukera joko garbian, eskuz edo palaz aritzeko:

- Aurrebenjaminek (2010-11) eta benjaminek (2008-09) astelehen eta asteazkenetan izango dituzte entrenamendu saioak.

Ume kopuru handiak izena eman duenez, maila horietan taldekatze ezberdinak egongo dira eta talde homogeneotan arituko dira.

- Alebinek (2006-2007) astearte eta ostegunetan entrenatuko dute.

- Joko garbiak astearte eta ostegunetan izango du tartea eta palaz neskek ere beraien pilota saioak izango dituzte.

- Federatu mailakoek (infantil, kadete, jubenil eta nagusiek) entrenamendu bereziak izango dituzte. Maila horietako pilotariren batek Behar Zanan izena eman nahiko balu telefonoz edo emailez jarri beharko luke harremanetan.

Larunbat goizetan ere pilota saio libre eta irekiak eskainiko dira Amasako pilotalekuan.

GURASOEN BILERA: Gurasoei zuzendutako ikasturte hasierako bilera irailaren 14an ostegunez izango da 19:30ean Bear Zana pilotalekuan bertan.

Informazio gehiago nahi izanez gero, Behar Zana taldeko kideekin jarri behar da harremanetan:

Emailez: This email address is being protected from spambots. You need JavaScript enabled to view it.

Telefonoz: 600375352 // 688685982

Aduna, Alkiza, Amasa Villabona, Zizurkil, Asteasu eta Larraul minbiziaren aurka elkartu dira eta Gipuzkoako Minbiziaren Aurkako Elkartearekin bat egin dute aste osoko egitaraua prestatzeko.

Minbizia gizakiaren lehen heriotza kausa da Euskal Herrian. Azken datuen arabera, hildakoen %32 minbiziak jota hiltzen da. Emakumeen kasuan bularrekoa da gehien ematen dena, gizonezkoen kasuan prostatakoa eta biak batuz gero hesteetakoa. Aipatzekoa da azken urteotan biriketako minbiziak gorakada handia egin duela. Gizartearen zahartzea eta bizi ohiturak dira egoera honen erantzule nagusiak.

Hori dela eta, 2014an Gipuzkoa herriz herri zeharkatzea erabaki zuen Minbiziaren Aurkako Elkarteak bi helburu nagusirekin: gaixotasun hau jasaten dutenei eta bere familiakoei bakarrik ez daudela adieraztea; eta bestetik gaixotasuna gutxitzeko asmoz, bizi ohitura osasungarriak sustatzea herritarren artean. Elkartearen hirugarren ardatza, ikerketa bultzatzea da. Horregatik, azken urteetan Gipuzkoako elkartetik urtero kalitatezko ikerketa onkologikoa finantzatzeko bekak eskaintzen dira. 

Ikerketa, prebentzioa eta laguntza oinarri direlarik, aurreko urtean Tolosako Udalari testigua hartu ondoren, Aiztondo bailaran prestatu dute Aiztondo martxan minbiziaren aurkako eguna. Maider Sierra, Gipuzkoako Minbiziaren Aurkako Elkarteko kideak aipatu duenez, "herriak girotzeko eta minbizia duten pertsonak eta familiei bakarrik ez daudela adierazteko hainbat ekitaldi antolatu ditugu bi astetan zehar".

Ikastetxeetan minbiziaren prebentzioaren inguruko lana hasi dute Aiztondon eta urriaren 7ra arte, ohitura osasungarriak bultzatzen jardungo dute lehen hezkuntzatik batxilergo bitarteko ikasleekin. Hitzaldiak, ikastaroak eta sukaldaritza saioak izango dira egun hauetan eta urriko lehen larunbat horretan, Aiztondoko herrietatik ibilaldiak abiatuko dira Zizurkilgo Joxe Arregi plazan guztiak elkartzeko. Pedro Mari Otaño ikastetxean 8 urtetik gorakoentzat kirol ekintzak egingo dira. Handik Villabonara joango dira eta kirol jarduerak egingo dira herriko puntu ezberdinetan.

Datorren urtean Minbiziaren aurkako martxan ekimena Zarauzko herriak antolatuko du eta urriaren 7an Villabonako plazan jasoko du testigua. Aiztondoko udal ordezkarien izenean Pili Legarra Asteasuko alkateak hitz egin du: "Garrantzitsua da gure gizarteari hain latz eragiten dion gaixotasun honi aurre egiteko horrelako ekimenak antolatzea eta udaletatik parte hartzera animatu nahi ditugu herritarrak".

IRAILAK 26, ASTEARTEA

18:30. Adunako kultur etxean, Minbizia familian sartzen denean... noiz eskatu laguntza? hitzaldia izango da Lara Franco eta Itxaso Uribieetxeberria psikologoen eskutik. Sarera librea da baina aurrez eman behar da izena 943 65 21 43 telefonoan.

IRAILAK 27, ASTEAZKENA

19:00. Asteasuko udaletxeko areto nagusian. Minbizia, bizitzaren gaixotasuna? hitzaldia emango dute. Sarrera librea da eta izen emateko 943 65 21 43 telefonora hots egin beharko da.

URRIAK 3, ASTEARTEA

19:00-22:00. Amasa-Villabonako Behar Zana elkartean sukaldaritza ikastaroa Javi Rivero sukaldaria eta Maider Sierra psikologoaren parte hartzearekin: Osasuna erosketak egitetik hasten da. 15 euroko prezioa izango du eta ikastaroan erabiliko diren produktuak erosi eta ekintzak sortzen dituen gastuak estaliko dira. Izen emateak 943652143 telefonoan.

URRIAK 4, ASTEAZKENA

18:30. Zizurkilgo Atxulondo kultur etxean. Etxeko txikiekin fruta eta barazkiak jaten tailerra emango da. Guraso eta haurrei zuzendurikoa izango da eta gosari eta merienda dibertigarri eta osasungarriak sortzen lagunduko dute. .

URRIAK 5, OSTEGUNA

18:30. Amasa-Villabonako Berdura plazan. Ondo jan, ondo bizi show cooking ekimena. Izen emateak 943 65 21 43 telefonoan. Tratamendu onkologikoek liseriketa aparatuan sor ditzakete eragozpenak gutxitzeko ideiak emango dituzte.

URRIAK 7, LARUNBATA: MINBIZIAREN KONTRAKO EGUNA ZIZURKIL ETA VILLABONAN

09:30 - 11:00. Zizurkilgo Pedro Mari Otaño ikastetxean 8 urtetik gorakoentzat kirol ekintzak.

09:30. Larraul, Asteasu, Alkiza, Zizurkil gora eta Adunatik ibilaldiak abiatuko dira denak Joxe Arregi plazan batzeko.

11:10. Zizurkilgo plazan harrera egingo zaie martxei, erraldoiak bertan direla. Handik kalejiran joango dira Villabonara.

12:00. Zarauzko herriari testigua pasako zaio, 2018ko martxa antolatu dezan.

12:15. Zumba, spining... ekintzak Villabonako puntu ezberdinetan.

Amasa Villabonako EH Bildutik, nola ez, bat egiten dugu antolatu diren ekimen guztiekin eta gure babes osoa agertu nahi diogu minbiziaren kontrako Gipuzkoako elkarteari eta bertan lanean ari diren gizon eta emakume guztiei. Guztiok dugu lagun, senide edo gertukoren bat gaitz krudel honen ondorioz sufritzen ari dena edo zoritxarrez gaitzak hil duena eta minbiziari aurre egiteko prebentzioan eta ikerketan sakontzea behar beharrezkoa dela pentsatzen dugu.

Beraz, herritar guztiei dei egiten diegu antolatu diren ekintza edo ekimenetan parte har dezaten. 

ELAk eta LABek aldebakarreko burujabetza prozesu baten aldeko adierazpena kaleratu dute, Euskal Herrian eredu ekonomiko eta soziala aldatzea premiazkoa dela iritzita. Egoeraren diagnostikoa egin eta beren proposamenak mahai gainean jarri dituzte Bilbon egindako agerraldian.

ELA eta LABeko idazkari nagusiek, Adolfo Muñozek eta Garbiñe Aranburuk, aurkeztu dute burujabetza prozesua bultzatzeko bi sindikatuek egin duten hausnarketa eta beren proposamenak eta konpromisoak jasotzen dituen dokumentua. Euskal Herri osoan eredu ekonomikoa eta soziala aldatzea «premiazkoa» dela aldarrikatu dute eta bide hori «aldebakarrekoa» izango dela nabarmendu dute. Ildo horretan, Kataluniako prozesuari babesa adierazi diote eta Gobernu espainolaren jarrera salatu eta Lakuako Gobernuaren «elkartasun keinu falta eta distantzia hartu nahia» gaitzetsi dute.

ELA eta LAB-eko Igor Arroyo, Amaia Muñoa, Adolfo Muñoz eta Garbiñe Aranburu

Bi sindikatuon diagnostikoaren arabera, bizitzaren prekarizazioak «ez du etenik, langileontzat ez dago errekuperazio ekonomikorik» eta desoreka sozialak handitzen ari dira. Hori aldatzeko «ezinbestean» lan harremanetarako eta babes sozialerako euskal esparrua eraiki behar da. «Geure aldarrikapenak eraginkorrago bihurtzeko eta bizi eta lan baldintzak hobetu ahal izateko beharrezkoa dugu erabakiak gure herrian hartzea», nabarmendu dute.

«Herri bat garela aitortu behar da, euskal herritarrok dugun erabakitzeko eskubidea aitortu behar da. Enplegu eta babes sozialeko gaietan ahalmen legegile osoa behar dugu, bestelako eredu ekonomiko eta sozial bat eraiki nahi dugulako. Euskal herritar guztiek bizitza duina izan dezaten nahi dugulako», nabarmendu dute.

Helburu horrekin, burujabetza prozesua abiatzeko konpromisoa hartu dute ELAk eta LABek eta bide hori jorratzeko prest dauden «ezkerreko eragile politiko, sindikal eta sozialen arteko aliantzak» bultzatuko dituzte.

 ADIERAZPENA (PDF): http://www.lab.eus/materiala/argazkiak/ekintzaSindikala/burujabetasuna/17_09_04LAB-ELA/Adierazpena.pdf

ELA eta LABek burujabetzaren alde aurkeztutako adierazpen bateratua urrats garrantzitsua dela uste du EH Bilduk:

Burujabetzaren alde ELAk eta LABek gaur aurkeztu duten adierazpen bateratua urrats garrantzitsua dela uste du EH Bilduk. Milaka eta milaka langile ordezkatzen dituzten herri honetako bi indar sindikal nagusiek burujabetzaren alde adierazpen bateratu bat kaleratu izanak agerian uzten du gure gizartean badela erabakiak gure aldetik hartzeko eta etorkizun hobea eraikitzen joateko grina eta beharra.

Espainiako estatuarekiko harremana berdintasunean oinarritu behar da. Herri honek burujabetza nahi eta behar du. Herri honek bere erabakiak hartu behar ditu eta hartu nahi ditu. Baina horretarako, ezinbestekoa da ezberdinen arteko elkarlana eta guztien artean bidea marrazten joatea. Zentzu horretan, EH Bilduk txalotu egiten du ELAk eta LABek gaur aurkeztutako ekimen bateratua, eta etorkizun laburrean bide horretan sakontzeko itxaropena agertzen du.

Asteleheneko udaleko osoko bilkuran PNV eta EH Bilduren arteko mozio bateratua onartu zen aho batez (PSEko ordezkaria ez zen bertan izan osasun arazoak direla eta). Hau da Mozioaren testua:

"Espainiako Guardia Zibilak Katalunian egin duen operazioen larritasuna ikusirik, eta urriaren 1eko erreferenduma Kataluniako instituzio nagusiek herritarren nahiei bide emateko hartutako erabakia galarazteko Espainiako Gobernua bultzatzen ari den neurri antidemokratikoei erantzunez, Amasa Villabonako Udalbatzak ondorengo Mozioa onartzen du:

1. Oso kezkatuta gaude Espainiako Estatua Katalunian izaten ari den esku-hartzearekin eta irmoki salatzen ditugu azken gertakariak/erasoak: Generalitateko hamalau kargudunen atxiloketak, miaketak eta etengabeko jazarpen polizial eta judizialak. Atxiloketa politikoak dira eta beraien delitua politika egitea soilik da. Salbuespen egoera ezartzen ari da Katalunian, eskubide zibil eta politikoak masiboki urratuz. Gertatzen ari dena asaldagarria eta onartezina dela uste dugu. Nahikoa dela esateko ordua da.

2. Gure elkartasun osoa helarazi nahi diegu atxilotuen eta jazartuen lagun eta senide, Kataluniako erakunde guztiei eta orokorrean Kataluniako herri osoari. Gure babesa eta laguntza izango dute, orain artean bezala, urriaren 1a bitartean, eta baita urriaren 1etik aurrera ere.

3. Urriaren 1eko erreferenduma Kataluniako herritarren gehiengoaren nahiari erantzuteko tresna demokratikoa dela eta, beraz, guztiz zilegia. Herritarrok gure etorkizuna erabakitzeko eskubidea edo herri honek autodeterminazio eskubidea du. Euskal Herriak eta Kataluniak libreki adierazitako herritarren borondatearen bidez bere etorkizuna eraikitzeko eskubidea dute.

4. Kataluniako alkateak deklaratzera deitzea irmoki salatzen dugu eta ez dugu onartuko politika egitea delitu bilakatzea, demokrazia ezin baita Konstituziora mugatu. Elkartasuna adierazi nahi diogu espresuki alkateei.

5. Udal honek kataluniarrek Urriaren 1ean hartutako erabakia errespetatu eta aitortuko du eta beste erakundeei ere errespetatzeko deia egiten die. Horretarako erabaki honen berri, Kataluniako Parlament-eko lehendakariari, Madrilgo Gobernuko presidenteari eta Auzitegi Konstituzionaleko presidenteari ematea erabakitzen du. Gure udalerriko herritarrei ere jakinaraziko zaie erabaki honen berri."

Amasa Villabonako EH Bildutik pozez hartu dugu PNVrekin mozio bateratu bat onartzeko, Villabonako udalbatzan lortu ahal izan dugun akordioa. Benetan pozten gaitu Villabonako PNVk mozio honetan jasotako edukiekin bat egiteak, izan ere zoritxarrez beste hainbat instituziotan (Gasteizko legebiltzarrean edo hiru herrialdeetako Foru Aldundietan kasu) ez dugu jeltzaleen ahotik horrelako mezurik entzun, eta Iñigo Urkullu lehendakariaren hitzek lotsaarazi ere egin gaituzte zenbaitetan. Espero dugu hau "postureo" hutsa ez izatea eta aurrerantzean ere Kataluniaren defentsan eta batez ere Euskal Herriaren erabakitzeko eskubidearen defentsan urrats bateratuak ematen jarraitu ahal izatea. Bada garaia espainiar estatuari bigarren fronte bat zabaltzeko hemen, Euskal Herrian. Nazio bat garela aitortzen dugunok eta ondorioz erabakitzeko eskubidea dugula defendatzen dugunok, bat egin, eta Madrilen aurrean gure eskubideak modu bateratu eta indartsu batean defendatzeko gai izan behar genuke. Hori da guk aldarrikatzen dugun bidea, prest gaude Madrilera edo joan behar den tokira joateko eta herri honen aitortza eta erabakitzeko eskubidea defendatzeko, baina estatuak eskubide horiei ateak isten badizkio eta hitz egin edo negoziatzeari uko egiten badio, guk gure aldetik ekin beharko diogu bideari, euskal bideari.   

Intxaurrondoko ikastolan matrikulatu dute Sara Majarenasen alaba eta hilaren 7an hasiko da ikasturte berria, baina bai Sara Majarenasek bai Izarrek Acobendasen (Madril) jarraitzen dute, harrera-zentroan. “Izar ikastolara!” ozen aldarrikatu zuten pasa den igandean milaka lagunek Donostian izan zen mobilizazioan. EH Bilduko kideak bertan izan ginen eta Sara Majarenas presoak bere alaba Izarrekin batera kalean egon behar luketela aldarrikatu genuen.

Izarrekin Sara Etxera plataformako bozeramaile Araitz Zubimendik kritikatu zuenez, Madrilgo ikastetxe batean eskolatzera behartuko dute Izar, “berea ez den hizkuntza batean” eta nahiz eta “familiarteko loturak zein lotura sozial eta kulturalak Donostian dituen”. Irailaren 7an bertan beste mobilizazio bat egingo dela iragarri zuten "Izarrekin" plataformatik.

Mobilizazio amaierako irudia San Telmo plazan

Kontxi Ibarreta Izarren amonak adierazi zuenez, Sarak apenas jaso duen baimenik: “Hamabi orduko sei egun baino ez dizkiote eman uda guztian. Epailearen autoak dio bigarren gradua duela hirugarren graduko ezaugarriekin, baina Sarak ez ditu izan hirugarren graduko abantailak”. Alaba psikologikoki gaizki ikusten duela eta zigorra behingoz amaitzeko ordua dela dio Ibarretak. “Itxaropena dut, epaileak iritziz aldatu eta Izar irailaren 7an Intxaurrondoko ikastolan hasiko den itxaropena”.

Gaur arratsaldean Villabonako Malkar plazan 100 lagun inguru elkartu gara, EH Bilduren deialdiari erantzunez. Gu ere kataluniar herriarekin gaudela adierazi nahi izan dugu kalean eta baita espainiar estatuaren errepresioa salatu ere. Urriaren 1eko autodeterminazio erreferenduma babesten dugula eta Euskal Herriak ere, erabakitzeko eskubidea duela aldarrikatzen dugu.

Visca Catalunya lliure!

ARGAZKIAK:

Euskal Herria Bilduk urte politikoa abiatzeko ekitaldia egin zuen pasa den ostiralean Donostiako Viktoria Eugenia antzokian. Bertan izan ziren EH Bilduko aurpegi ezagun asko, besteak beste, Marian Beitialarrangoitia, Bakartxo Ruiz, Pello Urizar, Maddalen Iriarte, Rebeka Ubera edo Arkaitz Rodrigez eta Amasa Villabonako ordezkariak ere ekitaldian parte hartu genuen.

Arnaldo Otegi koordinatzaile orokorrak aztertu zuen datozen hilabeteetako jokaleku politikoa non kokatzen duen ezkerreko independentismoak. Hain justu ere, urriaren 1ean Katalunian egitekoak diren galdeketa izan zen abiapuntua, eta horregatik honakoa urte berezia izango dela aurrikusi zuen Arnaldok: «Kataluniako erreferenduma benetako zentsura mozio bat izango da Espainiako 1978ko erregimenarentzat». EH Bilduk babes osoa emango dio Kataluinako erreferendumari, euskaldunon elkartasuna adieraziz eta bideratuz, estatuak egin ditzakeen eraso antidemokratikoen aurrean. Kataluina defendatzea Euskal Herria defendatzea baita, helburu eta amets berberak dituzten bi nazio anai garelako eta parean herrien eskubideak zapaltzen dituen espainiar estatu bera dugulako. Beraz, ikasturte politiko honen lehen hilabeteetan erabakitzeko eskubidearen aldeko herri dinamikak indartu eta euskaldunok ere kalera irteteko urratsa ematea defendatuko ditu EH Bilduk. 

Arnaldo Otegik ostiraleko ekitaldian egindako hitzartzearen une bat

Euskal Herriko testuinguru politiko eta ekonomikora begira, beste era batera gobernatzeko, eta PNVk martxan jarritako politika neoliberalei aurre egiteko beharraz mintzatu zen Otegi, desberdintasun sozialak gero eta handiagoak direla salatuz: «Badira eragile kulturalak, sozialak, sindikalak... gobernatzeko modu justoago eta zintzoagoa izango duen herrialde bat eraikitzeko». Zentzu horretan, Euskal Herria Bilduk herri alternatiba bat jarriko du mahai gainean: «Jendearekin eraiki nahi dugu herri hau, ez eliteekin». Euskal industriak bizi duen egoera zaila ere aipatu zen eta PNVk politika industrial ganorazkorik ez duela agerian geratu dela salatu zuen EH Bilduko koordinatzaileak.

Burujabetza eta erabakitzeko eskubidea defendatu zituen Otegik, eta Euskal Herria bere burua gobernatzeko nahikoa heldua eta arduratsua dela nabarmendu zuen: «Inoren zaintza edo tutelarik gabe askoz hobeto bizi gaitezke». Honako hau ez da estatutuak edo foru hobekuntzak erreformatzeko garaia, Estatuarekiko harreman eredua aldatzekoa baizik eta apustu politiko horretan gogor lan egiteko konptromisoa du EH Bilduk.

Greba egunak irailaren 25etik 29ra izango dira. LAB eta ELA sindikatuetako ordezkariek azaldu dutenez, enpresak langile bat kaleratu du bajan egoteagatik. Kaleratze hau enpresaren aldetik soilik lehen urrats bat izatea eta horrek bajan egon daitezkeen langileen lanpostuak arriskuan egotea ekar dezakeela uste dute sindikatuek.. 

Irailaren 14an egin zuen LAB eta ELAk osatutako enpresa batzordeak bilera eta bertan erabaki zuten kaleratutako langilea berriz ere hartzeko mobilizazioak egitea.

Enpresa batzordeak dio onartezina dela enpresak nahi bezala eta libreki langileak bidaltzeko aukera izatea. Era berean, borrokatzea garrantzitsua dela diote, bai kaleratze honengatik eta baita lantegiko lanpostuak bermatzeko ere.

EH Bildutik bat egiten dugu aldarrikapen hauekin eta enpresako arduradunei sindikatuen bidez langileek egiten dituzten eskaerak entzun eta kontuan hartzea eskatzen diegu, kaleratutako langilea birkontratatuz eta bajan dauden pertsonen lanpostuak mantenduko dituztela bermatuz. 

Pasa den asteazkenean Gurtel ustelkeria kasu ezagunari buruz egindako plenoan, Oskar Matute EH Bilduk Madrilgo kongresuan duen ordezkariak argi eta garbi hitz egin zion espainiar gobernuko presidenteari, hau da bi minutu eskasean Matutek (gaztelaniaz, kongresuak euskara erabiltzea galarazten duelako) egindako hitzartzea:

"Gaur Rajoy jauna, zure alderdiaren ustelkeria auzi eta afera guztiak gogoratuko nizkizuke baina bi egun beharko nituzke eta bi minutu baino ez ditut. Bi egun beharko nituzke zure sei urteko agintaldiko ustelkeria guztia zerrendatzeko.

Ustelkeria zure alderdikideek jasotako gainsoldatak dira, diru beltza, B kontabilitatea eta sakeleko telefonotik botatako “Luis se fuerte” hori.

Ustelkeria da zure alderdia Gürteleko trajeekin janztea eta zuk barkamenik ez eskatzea, ezta plasmazko telebista bidez ere.

Ustelkeria dira Punica-ko zure morroiak, %3-ko komisioak eta kapitalen zuriketa.

Ustelkeria da Catalunya operazioa, espioitza sarea eta funts publikotik ordaindutako katalan herriaren aurkako gerra zikina.

Ustelkeria da Bankia eta Caja Madriden espoliazioa.

Ustelkeria da guk ez jakitea zuek agintzen duzuen Espainia Berlangaren filme batean bizi den ala El Padrinoren beste batean bizi den.

Ustelkeria da Genova kalean disko gogorrak mailukadekin desagerraraztea eta zure diruzaintzako paperak birringailuan txikitzea.

Ustelkeria da Alderdi Popularra talde kriminala izatetik gertuago egotea alderdi politiko izatetik baino.

Ustelkeria da mafian bezala, zuen burua babesteko darabilzuen isiltasuna."

BIDEOA: https://www.youtube.com/watch?v=HcPA6lNfvGk

Hau da Amasa Villabonako EH Bildu-ren oharra:

Pasa den ostiralean Diario Vasco-n argitaratutako ohar baten bidez, Xabat Laborde EH Bilduko zinegotziaren soldataren inguruan jendeari gezurrak sinestarazten saiatu zen Villabonako PNV. Besteak beste, hau zioen jeltzaleen oharrak: "Xabat Laborde cobrará 46.800 euros anuales de salario base" eta "liberar a un concejal suyo por el montante de 7.800.000 de las antiguas pesetas al año".

EH Bilduko kideoi, faltsukeriaz jositako PNVren ohar hori erabat onartezina dela iruditzen zaigu. PNVk manipulazioa eta joko zikina lotsagabe erabiliz, gure ordezkariaren kontrako kanpaina bat abiatu du, bere izena zikindu eta bere oposizioko jardun politikoa baldintzatu edo desegiteko asmoz.

HAU DA ERREALITATEA: Xabat Labordek 23.400 euro gordin kobratzen ditu urtean. Hilabete amaieran 1.212 euro jasotzen ditu udaletik eta EH Bilduren soldata politika jarraituz, horietatik 337 euro alderdiari ematen dizkio. Beraz, errealitatean hilean 875 euro kobratzen ditu.

Guk ez dugu ezkutatzeko ezer, hemen dituzue Xabat Laborde zinegotziaren nominaren eta bankuko ziurtagiriaren argazkiak 

Gogorarazi nahi dugu, Euskadiko Toki Erakundeen Legea betez, Villabonako udalak oposizioko zinegotzi batek lanaldi partzialean lan egitea bermatu behar duela, eta EH Bilduk batzar ireki batean bozketa bidez erabaki zuela Xabat Laborde aukeratzea postu horretarako.

Eta nondik ateratzen da soldata hori? EUDEL (Euskadiko Udalen Elkartea) erakundean alderdi guztien adostasunarekin zehaztu da soldata kalkulatzeko formula: 

Udal Gobernuan lanaldi osoan dagoen eta gutxien kobratzen duen pertsonaren soldata da kontuan hartzen dena. Soldata horri %10a kentzen zaio, eta ateratzen den zifratik %50 eta %75 arteko portzentaje bat ezartzea erabakitzen da.
Gure kasuan, Alkatearen soldata hartu behar izan da kontutan eta 52.000 euroko soldatatzarra du. Beraz, formula minimoarekin aplikatuta ere (52.000-%10 eta emaitzaren %50a) aipatutako urtean 23.400 euro gordineko soldata ateratzen da.

EH Bilduk auzi honetan koherentzia osoa mantendu du beti, hasieratik esan genuen soldata handiegia iruditzen zitzaigula, baina tamalez alkateak duen neurriz kanpoko soldata kontuan hartu behar izan dugu derrigor. Gogoan dugu, inolako arrazoirik eman gabe, Maite Izagirrek alkate gisa hartutako lehen erabakia bere soldata %35ean igotzea izan zela. Pasa den uztaileko plenoan bere soldata kopuru normalagoetara jaistea proposatu genion, (horrela automatikoki Xabat Laborderena ere jaitsiko litzateke) baina alkateak ez zuen erantzun nahi izan. Ez hori bakarrik, alkateak hilabete honetan bertan bere soldata beste %1ean igotzea erabaki du.

Bestalde, PNVk pasa den legealdian 4 liberatu izatea leporatzen dio EH Bilduri. Kontatzen ez dutena da, PNVk gaur egun dituen 2 liberatuak garestiago ateratzen zaizkiola udalari, EH Bilduren 4ak baino. Izagirre alkatea eta bere konfiantzazko postua: 107.380 euro urtean. EH Bilduko alkatea, 2 zinegotzi lanaldi erdiz eta konfiantzazko postua: 97.031 euro (2014ko datuak).

Azkenik, PNVren udal gobernua erakusten ari den jarrera eta funtzionamendu penagarria aipatu behar ditugu. Udala paralisi egoera batetara eraman dute, jardun politikoa minimora murriztuz. PNVk hartzen dituen erabakiak ia beti alkate-dekretuz eta batzorde informatiboetan inolako azalpenik eman gabe hartzen dira. EH Bilduren udal taldea sistematikoki baztertua izaten ari da eta gure zinegotziei oposizio lana egiteko zailtasun handiak jartzen zaizkie. Badirudi jeltzaleek beldurra diotela eztabaida politikoari eta oso urduri eta ezeroso jartzen dira EH Bildutik galderak egin edo azalpenak eskatzen zaizkienean. Ez zaie batere gustatzen oposizioak bere lana egitea eta horregatik oposizio lan serioa egiten ari den gure ordezkariaren izena zikindu nahi izan dute.

Hau al da PNVk behin eta berriz aldarrikatzen duen "elkarrizketan eta akordioan oinarritutako gobernu estiloa"?

AMASA VILLABONAKO EH BILDU
2017ko irailaren20an

Sestaoko La Naval ontziola Hartzekodunen konkurtsoan sartuko dela eta, Maddalen Iriarte, EH Bildu Eusko Legebiltzarrean duen bozemaileak ontziolako langile eta euren senideei elkartasuna adierazi die.

Sestaoko La Naval enpresako langileen protesta atzo

Ildo horretan, Iriartek euskal industriaren eta arriskuan dauden milaka lanpostuen defentsan elkarrekin esku hartuta jardun dezatela dei egin gainontzeko alderdi politikoei. Izan ere, uda honetan industria enpresa esanguratsu ugari izan dira arrazoi ezberdinak direla medio, enpleguak suntsituko dituztela iragarri dutenak, besteak beste, ehunka langile dituzten Fagor CNA eta CEL enpresak.  

“Gure herriak ezin du bere industria galdu gure ekonomia eta gure seme-alaben etorkizuna arriskuan jarriz”, esan du bozemaile subiranistak.

Iriartek adierazi duenez, ahalegin berezia egin behar da inbertsio teknologikoan. “Europak Barne Produktu Gordinaren %3 inbertitzea eskatzen duen bitartean hemen %1,84 inbertitzen da soilik”, esan du. EH Bilduko bozemaileak industriari, industria txiki eta ertainari bereziki, “laguntza osoa” eman diezaiela eskatu die euskal erakundeei. “EH Bildu beti izango da hor”, adierazi du.

Gure Esku Dago, erabakitzeko eskubidearen aldeko herri mugimenduak deituta, milaka euskal herritarrek Bilboko kaleak bete zituzten pasa den larunbatean. Demokraziaren eta Kataluniako erreferendumaren aldeko olatu herritar ikusgarria izan zen eta nola ez, gu ere, EH Bilduko kideak bertan izan ginen. Momentu honetan, behar beharrezkoa da Euskal Herritik beren etorkizuna bozkaren bidez erabaki nahi duen kataluiniar herriari eta erreferenduma antolatzeko lanetan tinko jarraitzen duen Generalitat-ari gure elkartasun eta babesa adieraztea, eta zentzu horretan larunbateko jende uholdea oso positiboki baloratzen dugu.

Larunbateko manifestazioak Bilboko Autonomia kale ezaguna jendez betetzea lortu zuen

Hemen duzue Gure Esku Dago-k argitaratu duen manifestazioaren laburpen BIDEOA: https://www.youtube.com/watch?v=9a7asyU1HOQ  

Bestalde, espainiar gobernua hartzen ari den politika errepresiboa gogor salatu beharrekoa da, izan ere, diktadura baten erara jokatzen ari dira. Erabat lotsagarria eta antidemokratikoa izaten ari da Rajoy-ren gobernuaren eta bere menpeko botere judizialaren jarduna, frankismoaren garai ilunetara garamatzana. Espainiar Guardia Zibila eta Polizia Nazionala boto-paperak eta kartelak konfiskatzen, inprentak eta komunikabideak miatzen, hitzaldi eta ekitaldiak debekatzen... ikusteak argi erakusten du zer nolako jarrera autoritario eta bortitza duen PPren gobernu ustelak.  

Azkenik, Euskal Herrian estatuari "bigarren frentea" zabaltzeko beharra azpimarratu nahi genuke. Uste dugu gure herrian ere burujabetzaren, erabakitzeko eskubidearen eta erreferendumaren aldeko prozesu politiko eta sozial zabal bat abiatzeko baldintzak baditugula, eta inoren zain egon gabe gaurdanik hasi gaitezkeela norabide horretan urratsak ematen. EH Bildutik ELA eta LAB sindikatuek, euskal gehiengo sindikalak, duela aste batzuk kaleratutako "Alde bakarreko burujabetza prozesu sozial baten alde" dokumentuarekin bat egiten dugu eta aipatutako prozesua martxan jartzeko aurrera pausu esanguratsua dela uste dugu. Guk gure eskuan dagoen guztia egingo dugu Euskal Herrian ere burujabetzaren eta erabakitzeko eskubidearen aldeko prozesu herritar, anitz eta zabal bat martxan jartzeko.

Greenpeace erakundeak salatutakoaren arabera urriaren 19tik gaurdaino 312 “lehergailu” kontenedore bidali dira Bilboko Portutik Saudi Arabiara. Informazio honen aurrean EH Bildu eta Podemosen batzarkide taldeek Bizkaiko Batzar Nagusietan Arauz besteko proposamen bateratua aurkeztuko dute Portu Agintaritzari eta Espainiar Gobernuari Europar Parlamentuak Arabia Saudirentzat eskatu zuen blokeoa bete dezaten eta giza eskubideak errespetatzen ez dituzten herrialdeetara armen bidalketa erabat etetea eskatuz.

EH Bilduk gogorarazi nahi du 2016ko urrian Europar Parlamentuak ebazpen bat onartu zuela Europar Batasunari eskatuz Arabia Saudiren kontrako arma-blokeoa, Yemenen gertatzen ari diren nazioarteko giza eskubideen urraketak guztiz aztertzen diren arte. Espainiar Gobernuari eskatzen diogu ez dezala entzungorrarena egiten jarraitu eta material hauen bidalketaren bitartez ez dadila izan Yemenen gertatzen ari diren hilketen konplizea. Greenpeacek egindako deialdiarekin bat egiten dugu eta Euskal Administrazioei eskatzen diegu berandu baino lehen arma bidalketa izugarri hauen aurka azaltzea. Gogora dezagun NBEn arabera jada 10.000 hildako baino gehiago izan direla Yemenen eta 3 milioi pertsona baino gehiago lekualdatu direla gerratik ihes eginez.

Apirilean beste proposamen bat aurkeztu zuen EH Bilduk Bizkaiko Foru Aldundiak Bilboko Portuan armen ontziratzea laguntzeko lanak egiteari uko egiteagatik suhiltzaileari irekitako diziplina espedientea erretiratzea eskatuz. Kasu horretan Arabia Saudirantz 4.000 tona bonba bidali ziren. EH Bilduk agintariei eskatzen die lehenbailehen neurriak hartzea giza eskubideen eta nazioarteko zuzenbide humanitarioaren urraketa larrien (gerrako krimenak barne) konplize izateari uzteko.

Beste urte batez, euskara ikasteko ikastaro edota kurtso aukera ezberdinen informazioa kaleratu dute Amasa Villabonako euskara zerbitzuak eta Zizurkilgo udalak, AEKko Andoaingo euskaltegiarekin elkarlanean. "Elige EUSKARA aukeratu" leloaren bidez, euskara ez dakitenek edo bere euskara maila hobetu nahi dutenek, ikastaroetan izena emateko urratsa eman dezaten, bultzada ematea da asmoa.

Hauek dira bi udalak banatzen ari diren eskuorrian agertzen diren aukera ezberdinak:

Urtero bezala, ikastaro edo kurtso hauetakoren batean izena ematen duenak, udalen diru laguntza jasotzeo aukera izango du. Laguntza ekonomikoei dagokienez, azken urteetako irizpide berberak mantendu dira: Gehienez matrikularen %75aren balioa ordainduko da eta 400 euroko topea izango da. Mintzalaguna egitasmoan parte hartu ezkero, laguntza ekonomikoa %10 igotzeko aukera izango da. Diru laguntzak jasotzeko bete beharreko baldintzak ere mantendu egin dira: Villabona edo Zizurkilen erroldatuta egotea, klaseetako asistentzia gutxienez %85ekoa izatea, euskaltegiaren aldeko txostena aurkeztea eta matrikula ordainduta izatea.

Hona hemen bi udalek kaleratu duten eskuorriaren irudia:

Pasa den ostegunean Sofia Tato billabonatarraren hilketaren berria zabaldu zenetik, pena, samin eta amorru sentimenak nagusitu ziren gure herriko jendearen artean. Berehala Sofiaren senide eta lagunei babesa, elkartasuna eta gertutasuna adierazteaz gain, hilketa matxista nazkagarri honen aurrean herri erantzun sendo bat artikulatu beharra zegoen, dudarik gabe.

Herriko Onddo Gazte Asanbladaren baitan elkartzen diren dozenaka gazte feministek hartu zuten herri erantzuna bideratzeko iniziatiba eta ostiralerako gaitzespen edo protesta mobilizazioak deitu zituzten: 18:30etan manifestazioa Malkar plazatik eta 19:00etan elkarretaratzea Errebote plazan.

Ostegunean bertan, EH Bilduko zinegotziak alkatetzarekin bildu ziren eta Villabonako udalak adostutako Adierazpen Instituzional bat kaleratzea eta ostiralerako deituta zeuden aipatutako mobilizazioekin bat egitea erabaki zen. 

Gauzak horrela, ehunka herritar batu ziren ostiral arratsaldeko mobilizazioetara eta herri mugimendu feministak, administrazio publikoek eta herritarrek bat eginda, erantzun sendo eta eredugarria eman genion oraingoan oso gertutik bizitzea egokitu zaigun erailketa matxista berri honi. Malkar plazatik abiatutako manifestazioaren pankartan "Matxismoak hiltzen gaitu, parean gaituzue!" leloa irakur zitekeen eta "gora borroka feminista!", "patriarkatuari sua!" edota "erasorik ez, erantzunik gabe!" ohiuak entzun ziren, herriko gazte feministek momentu gogor horietan sentitzen zuten amorruaren adierazgarri.

Manifestazioa plazara iritsi zenean hasi zen elkarretaratze isila. Bertan zeuden erakunde ezberdinetako hainbat politikari eta ordezkari, eta ehunka herritarrekin batera oso ozen entzuten zen isiltasun sentikor batean murgildu zen plaza.

Minutu gutxi batzuetako ixiltasuna txalo zaparrada batekin amaitu zen eta ondoren bi emakumek hartu zuten hitza mobilizazioa antolatu zuten gazte feministen ordezkari bezala, irakurketa bat partekatzeko. Besteak beste "Komunikabide batzuetan Sofia hil egin dela diote, baina hori ez da egia, hil egin dute, hil egiten gaituzte, matxismoak hiltzen gaitu!", "Indarkeria eta eraso matxistak gizarte heteropatriarkalaren ondorio latzenak besterik ez dira eta beraz, ez dira kasualitatez gertatzen" eta "nazkatuta gaude!" esan zuten. Hitzartzea bukatzean plazan bilduta zeuden herritarren aldetik txalo zaparrada handi bat jaso zuten.

EH Bildutik Amasa Villabonako herriak emandako erantzuna oso positiboki baloratzen dugu. Beste behin, billabonatarrok modu eredugarri batean, lasaitasunez baina tinko, indarkeria matxistaren aurrean inolako tolerantziarik ez dugula izango erakutsi dugu. Bestalde, gure babesa adierazi nahi diogu herriko mugimendu feministari eta zoriondu ere egin nahi ditugu indarkeria matxistaren kontrako mobilizazioak antolatzeko erakutsi duten gaitasunagatik. 

ELA, LAB eta Steilasek sektorekako lau greba egun eta orokor bat iragarri dituzte, Jaurlaritzak beraien aldarrikapenei ez dielako erantzun.

Hezkuntza publikoko lan arloan, ikasturte berria pasa den urteko ildo beretik hasi da Araba, Bizkai eta Gipuzkoan. Gauzak horrela, irailaren 15ean hasi eta urtea bukatu arte egingo dituzten protesta ekintzen zerrenda zehaztu dute hezkuntza arloko hiru sindikatu nagusiek. Besteak beste, sektorekako lau greba egun (azaroan, ostegunero) eta abenduaren 12rako greba orokorra iragarri dituzte. Eta jai edo zubia ez den ostiraletan, elkarretaratzeak egingo dituzte. Bat egitera gonbidatu dituzte ikasle eta familiak.

Langileen ordezkariek benetako negoziazio prozesu bat eskatzen diote Jaurlaritzari. Izan ere, EAJ-PSE koalizio gobernuak hiru sindikatuok egindako aldarrikapenei ez diela benetako erantzunik eman salatu dute hiru sindikatuek.

Besteak beste, aldaketen zerrendan hezkuntzari dagokion inbertsioaren hazkundea eskatzen dute sindikatuek, eta horretarako datu hauek aurkeztu dituzte: Eusko Jaurlaritzaren inbertsioa hezkuntzan %3,7koa da; Europako Batasuneko batez bestekoa, berriz, %4,9koa denean. ELAko ordezkariak azaldu duenez, "Maila horretara iristeko 968 milioi gehiago bideratu beharko lituzke gobernuak. Eta Unescok %6ra arte igotzea gomendatu du".

Langileen behin-behinekotasuna ere salatzen dute ordezkari sindikalek. Batez beste, %40 da behin-behinekotasuna hezkuntza publikoan. Baina alde nabarmenak daude sektoreka. Adibidez, irakasleen %38 behin-behineko beharginak dira, eta sukalde eta garbiketan dabiltzanen artean, berriz, %63 daude egoera horretan. Gainera, azken arlo horretako langile gehienak 55 urtetik gorakoak dira.

Hezkuntza pubilkoko langileen eskubideak hobetzeko, sindikatuen protesta Donostian

Oraingoz, irakasleentzako proposamena soilik egin du Hezkuntza Sailak: 3.000 lanpostu, lau urtean, aurtengo lan eskaintza publikoak jasotako 740ak barnean hartuta. Sindikatuek eskaintza hori ez dela inola ere nahikoa izango erantzun dute: "Eskaintza horrekin, lau urte horietan egongo diren erretiroak ere ez dira ordezkatuko. Beraz, behin-behinekotasun tasa gaur egungoa edo handiagoa izango litzateke", azaldu dute.

Hezkuntza publikoko Haur Eskolen kasua ere mahai gainean dago. "EAEn matrikulazioak behera egiten ari dira, garestia delako. Gainera 0 eta 2 urte arteko doako hezkuntza publikoa behar beharrezkoa dugu" adierazi dute sindikatuek.

LOMCE eta Heziberri: Beste behin ELA, LAB eta Steilas erreforma hauen aurka agertu dira argi eta garbi. Espainiako Gobernuaren hezkuntza erreforma bertan behera uzteko eta euskal hezkuntza sistema arautuko duen legedi berria osatzeko eskatu diote Eusko Jaurlaritzari. Eta balizko lege berri horren osaketan sindikatuen, hezkuntza eragileen eta herritarren iritzia kontuan hartzeko. "Eredu berri horrek alde batera utzi behar du hezkuntzaren merkantilizazioa eta bere oinarriak gizarte kohesioa, integrazioa, aniztasuna, berdintasuna eta hezkidetza izan behar lukete" adierazi dute langileen gehiengoa ordezkatzen duten hiru sindikatuetatik.

Ehunka herritar bildu ziren pasa den asteazkenean Donostiako Alde zaharreko kaleetan, Erraustegiaren Aurkako Mugimenduak Aingura kofradiarekin elkarlanean deitutako protesta mobilizazioan. Udaberriko beste ekintza ikusgarrian Gipuzkoa Zutikeko ekintzaileek erabilitako buzo zuriak jantzirik, Alde Zaharreko kaleak zeharkatu zituzten errausketaren kalteak salatzen. "Errausketari ez!" eta "osasuna bai!" ohiuen artean, hainbat hizkuntzatan idatzitako informazio orriak banatu zituzten antolatzaileek. 
Hasieran Bulebarretik pasatzea aurreikusi zen arren, agintariek debekatu egin zuten ibilbide hura. Ordainetan, errausketaren aurkako ekintzaileek aukera hobea izan zuten Aste Nagusiko ekitaldiek erakarritako euskaldunei bezala turista eta atzerritarrei erraustegiaren berri emateko. Gainera, Bulebarreko McDonalds-en aurrean parodia ikusgarria burutu zen, PNV-PSEk inposatu nahi duten Zubietako erraustegiaren ondorioz "zombie" bilakatutako herritarrak irudikatuz.

Ikusten denez, errausketaren aurkako mugimenduak indartsu jarraitzen du Gipuzkoan, eta EH Bildutik gure babesa adierazi nahi diogu mugimendu herritar eta zabal honi. Guk gure esku dagoen guztia egingo dugu Zubietako erraustegia gelditzeko, baina kaleak betetzea izango da helburu hori lortzeko berme bakarra. Lortuko dugu!