Eusko Jaurlaritzako Segurtasun Sailak 200 euroko isuna jarri dio apirilean Ertzaintzak Bilbon foam jaurtigai batez tiro eginda zauritutako gazteari. Voxen aurkako protesta batean zauritu zuten, apirilaren 13an. Poliziak iraintzea egotzita, Mozal Legea ezarri diote.

Neskaren masailezurra pelotazoa jaso eta gero

Ertzaintzak Bilbon VOX-en ekitaldi bat babesteko asmoz kargatu zuenekoak dira gertaerak. Bertan, ertzainek botatako pelotazoek neska baten aurpegian jo eta masailezurra hautsi zioten, operatua izan eta gero hainbat egunez ospitalean egon behar izan zuelarik. Neskak salaketa aurkeztu zuen eta Lakuako segurtasun sailak ikerketa zabalduko zuela agindu arren, lau hilabete beranduago ez da inongo berririk. Are gehiago, Estefania Beltran kontseilariak esan zuenez "Ertzaintzaren karga neurrikoa" izan zen eta Josu Zubiaga kontseilariordeak esandakoak ere oso argigarriak izan ziren... Honek esan zuenez pelotazoa ezin izan zioten neskari zuzenean burura jaurti, poliziaren protokoloek hau egitea debekatzen baitute expreski. Neskak aldiz, ertzaina zuzenean berari apuntatzen ikusi zuela dio. Eta neskak izango du arrazoi, kontua baita zientifikoki ezin izan zuela beste modu batera izan, foam pilotek ez baitute errebotatzen lehengo gomazkoen moduan. Baina hau gutxi balitz, orain isuna jarri diote neskari, pelotazoa jaso eta gero ertzainak iraindu zituela argudiatuz. Tira, ez dakigu irainena egia ote den edo ez, baina erreakzio hori eduki izana ere ez zen harritzekoa izango, masailezurra hautsi berri ziotela kontuan hartuz.

Beraz, hiru ondorio ateratzen ditugu guzti honetatik:

1. Negargarria da Lakuako buruek behin eta berriro Ertzaintzaren gehiegikeriak justifikatzen dituztela ikustea.

2. Neskari masailezurra hausteaz gain, orain isuna jarri izana, gehiegikeri handia izateaz gain, sentsibilitate oso gutxi erakusten du hain kaltetua izan den herritar baten aurrean.

3. Herriak behar duen polizia ereduaz urrun dago oraindik Ertzaintza.

Jasone Agirre EH Bilduko legebiltzarkideak ezinbestekotzat jo du EITBn erredaktoreen karrera profesionala sustatzea eta ardura postuak banatzerakoan irizpide profesionalak bakarrik aintzat hartzea, gardentasuna eta aukera berdintasuna independentziaren bermea baitira hedabide publiko batean.

Jasone Agirre (EH Bildu) Gasteizko legebiltzarrean

EH Bilduren proposamen bati jarraituz, Legebiltzarrak aho batez eskatu dio EITBko zuzendaritzari informazio zehatza eman diezaiola haren albistegien independentzia eta pluraltasuna bermatzeko eta erredaktoreen karrera profesionala sustatzeko eman dituen urratsei buruz. Legebiltzarrak helburu horiek lortzeko proposamen zehatza egiteko eskatu zion duela urtebete, 2018ko maiatzaren 31n, EITBko zuzendariari, gaur egun ildo editoriala erabakitzen duten karguak izendatzeko erabiltzen duen sistemak, konfiantza pertsonalaren araberakoak, ez independentzia ez aniztasuna bermatzen ez dituelakoan. EAJ eta PSE horren kontra agertu ziren orduan; gaur, aldiz, independentzia eta pluraltasuna ziurtatu beharra onartu dute eta, inplizituki, aitortu dute gaur EITBk ez duela ez bata ez bestea bermatzen.

EITBko zuzendaritzari Legebiltzarrak duela urtebete emaniko agindua ez betetzea leporatu ostean, Jasone Agirrek gogorarazi du gaur EITBn “ardura guztiak atzamarrez banatzen” direla, konfiantza pertsonalaren arabera, eta hori bateraezina dela albistegien independentziarekin. Horretarako, azpimarratu du, ezinbestekoa da bertako erredaktoreen karrera profesionala sustatzea, “albistegien egunerokoa erabakitzen dutenak irizpide profesionalen arabera soilik hautatzeko, gardentasunez eta aukera berdintasunez”. Izan ere, “gardentasuna eta aukera berdintasuna komunikabide publiko baten independentziaren bermea dira” eta, beraz, karrera profesionala sustatzea da “EITBk hartu beharreko lehen neurria, kalitatezko komunikabide publikoa izan gura badu, eta ez Jaurlaritzaren komunikabidea; bertako profesionalak libre izan behar dira, independenteak, eta euren karrera profesionala ezin liteke zuzendaritzaren konfiantzaren menpekoa izan”.

Berdintasunean oinarritutako Euskal Errepublikan bizi nahi dugula aldarrikatuko dugu larunbatean, Donostiako kaleetan, 'Gora goaz Euskal Errepublikarantz' lelopean egingo dugun kalejira-manifestazioan. Arratsaldeko 5etan Artzai Onetik hasiko da.

Amasa-Villabonako EH Bilduk Herri Batzar irekia antolatu du datorren ekainaren 12an, 19:00etan udaletxeko pleno aretoan.

Herri Batzar honek bi gai nagusi izango ditu:

1. Hauteskundeen balorazioa:

Helburua pasa den maiatzaren 26ko udal eta foru hauteskundeei dagokionez EH Bilduk Amasa-Villabonan egindako lanaren balantze partekatu bat osatzea da. Aurre-kanpaina, hautagaien aukeraketa prozesua, aurrera eramandako ekimenak, hauteskunde kanpainan zabaldutako mezuak, lortutako emaitzak... guztia mahai gainean jarri eta modu autokritiko batean ondo eta gaizki eginak partekatuko dira bertaratutako herritarrekin.

2. Udalari begirako lehen proposamenak:

Ekainaren 15ean EH Bilduk Amasa-Villabonako alkatetza eskuratuko du eta jarraian, epe motzean hainbat erabaki esanguratsu hartu beharko dira: Udal Batzordeen definizioa, batzorde bakoitzean parte hartuko duten zinegotzien izendapena, talde politikoei bideratuko zaien diru kopurua, batzorde edo plenoetan parte hartzeagatik zinegotziek jasoko duten ekarpen ekonomikoen ezarpena, alkateordeen izendapena, liberazioak etab. Hau kontuan hartuta, Amasa-Villabonako EH Bilduk proposamen bat osatu du eta batzar honetan aurkeztuko du publikoki. Proposamen hori, ezbaian jartzeko aukera izango da eta batzarrak hartuko du azken erabakia.

Amasa-Villabonako EH Bildutik, batzarrean parte hartzeko deia luzatu nahi diegu pasa den maiatzaren 26an gugan konfiantza ezarri zuten herritar guztiei. Fase berri baten atarian gaude, herritarrek alkatetzan eta udal gobernuan kokatu gaituzte eta ardura handia dugu geure gain. Baina aldi berean gogo eta ilusio izugarria dugu bestelako udal kudeaketa bat martxan jartzeko, askozaz ere irekiagoa, gardenagoa eta batez ere parte hartzaileagoa.

Talde bikaina dugu udalean egin beharreko lanari berme guztiekin heltzeko eta hortara goaz!

Herri Batzarraren deialdia egiteko argitaratu dugun kartela

Hitz bakar batekin eta begiratu azkar batean definitu behar bagenu, urte gutxiren buruan, gure herriaren osaketan ematen ari den bilakaera, ondorengoa aipatu beharko genuke: ANIZTASUNA. Arrazoi ugari tarteko, jatorri desberdineko pertsonak iritsi dira gure herrira.
Errealitate honek, iritzi eta zer esan asko sortzen baditu ere, gure ustez aniztasuna ez da zertan arazo batean bilakatu behar; aberastasun iturri baizik. Beste kontu bat da, aniztasun edo ugaritasun hori ondo kudeatzen jakin behar dela, gizarte integratu eta kohesionatua sortzeari begira. Herri ikuspegitik argi dago aniztasunarena dela etorkizun hurbilean dugun lehentasunetariko bat, modu sakonean aztertu beharreko erronka garrantzitsuenetakoa alegia.
Etorkizuneko zoru hori gaur bertatik eraikitzen hasteko, gure ikuspegitik hiru dira landu beharreko esparruak : euskara, errespetua eta berdintasuna.

a.- Ez zaigu batere axola etorri berria nongoa den. Euskal Herrian bizi eta lan egiten duenarekin, elkarrekin, Euskal Herria eraiki nahi baitugu. Eta eraikitze horretan, euskal herritar sentitzen joatea beharrezkoa izango da. Guk, zubi lan hori, euskara eta euskal kultura eskaintzetik egin behar dela argi dugu.
b.- Gurera etortzen diren pertsonak berdintasunez tratatzen ez baditugu, ezingo dugu ezer eraikitzailerik eta seriorik egin. Harremanen porrotak hortik etortzen dira, bat bestea baino gehiago dela pentsatzetik, alegia. Batek besteari zerbait egitera behartzeko eskubidea duela pentsatzen badugu, besteak bere burua babesteko eskubideari eutsiko dio, eta ez du onartuko. Edozer gauza elkarrekin egin nahi badugu, berdinetik berdinera egin beharko dugu, elkarrenganako errespetuan oinarrituz.
d.- Eta bestetik, bizitzari aurre egiteko baliabide eta tresna berdinak eskuratzeko eskubide eta aukera berberak izan behar ditugu guztiok. Eta horretan hezkuntzak oinarrizko baliabidea izan behar du.

Zentzu honetan, hezkuntza eta euskara ardatz dituen proiektu inklusibo eta berritzailea goraipatu nahi dugu gaur, Aniztasunean Lagun boluntario taldeak egiten duena, hain zuzen. Boluntarioekin osatutako taldea, zailtasunen gainetik emaitza akademikoak hobetzea eta euskara erakustea erronka nagusitzat dituena. Murrizketen ondorioak hezkuntzan ere pairatzen diren garaian, beraien ekarpen xume bezain baliotsua egiten duten herritarrak. Zuek zarete maila teorikotik orube praktikora igaro zareten dinamika kolektiboa; euskara, errespetua eta berdintasunean eraiki beharreko euskal gizarte horren kimu eredugarria.
Horregatik, kuadrillen eguna ospatzen den egun honetan, Santio Jai Batzordeak suziria botatzeko proposamenarekin egindako aitortzara gehitu nahi genuke guk ere; Euskal Herri anitz bezain aberats hori eraikitzeko egiten ari zareten ekarpenagatik. Biba zuek!!! Ea datorren urtean beste amasa-billabonatarrei Etxeondoko bazkarian txoko bat egiten diegun. Guztion borondatearekin lortzea dago.

Iker Casanovak EH Bilduko legebiltzarkideak Jaurlaritzari utzikeriaz aritzea egotzi dio. “Oposizioak hartu behar izan du lidergoa saltoki handien irekitzea eta handitzea arautzeko eta merkataritza txikiaren apokalipsia saihesteko”.

Donostialdean, Bidasoaldean eta Ezkerraldean bereziki saltoki handiak ireki edota handitzeko martxan dauden proiektuek “merkataritza txikiaren apokalipsia” ekar dezaketela ohartarazi du EH Bilduk gaur Legebiltzarrean, eta, arrisku horrekin arduratuta, bide eman dio saltoki handiak ireki eta handitzea arautzen eta mugatzen duen lege proposamen bati, oposizioko beste bi taldeekin batera. Helburua, finean, merkataritza txikiaren jarduera babestea da, azpimarratu du Iker Casanovak.

Iker Casanova Gasteizko legebiltzarrean merkataritza txikia babesteko lege proposamena aurkezten

EH Bilduko legebiltzarkideak azaldu duenez, EH Bildu planteatzen ari den legeak “segurtasun juridiko osoa dauka europar epaitegien legedia eta jurisprudentzia aintzat hartzen duelako” eta dendari txikien etengabeko eskari bati erantzuten dio. Horren ildotik, Casanovak sektorean ordena jarri beharra aldarrikatu du, ez delako onargarria instituzioek mota guztietako abantailak eta erraztasunak ematea konpainia handiei merkatari txikien kaltetan, horrek ehunka dendaren etorkizuna arriskuan jartzen baitu.

Auzitegi Gorenak –adierazi du Casanovak– bertan behera utzi zituen 2015ean merkataritza arloa arautzen zuen Lurraldeko Plan Sektorialean jasotako mugak eta, geroztik, Araban, Bizkaian eta Gipuzkoan ez dago saltoki handiak irekitzeko edo handitzeko mugarik, baina, legebiltzarkideak zehaztu duenez, ez legalki ezinezkoa delako, interes orokorra lehenestearren, baizik eta EAJ-PSE Gobernuak horretarako eta merkataritza txikia babesteko behar ziren urratsak eman ez dituelako. Hori dela eta, Casanovak utzikeriaz aritzea leporatu dio Jaurlaritzari. Oposizioak hartu behar izan du ekimena horregatik, sektorean ordena jarriko duen legea sustatzeko. “Tarte honetan, 2015etik, EAJ eta PSEk erabateko ezgaitasuna erakutsi dute, ez dira kapazak izan saltoki handien erregulazioan euren zabarkeriaren ondorioz zeuden gabeziak konpontzeko”. Eta are okerrago, 2015az geroztik bi alderdi horiek erraztasun guztiak eman dituzte saltoki handiak irekitzeko hainbat udaletan, Donostia eta Hondarribikoetan kasu.

Usadioak normalean ez dira betirako, gizartea aldatu ahala aldatzen dira hauek; une batean amaitzen direnak badira, eta beste une batean sortzen diren berriak ere bai. Argi dago ordea, tradizioz egiten diren kultur adierazpenek badutela eraginik herri baten nortasunean edo beste modu batera esanda, tradizioek asko diotela herri baten izaeraz. Herriak mantendu nahi dituen usadioak badira, inori kalterik egiten ez diotenez herritarrek biziraunarazi nahi dituztenak, eta jakina, egon badaude garaiz kanpo dauden tradizioak eta gainditu edo eraldatu beharrekoak. Gure herrira etorriz, Santio jaietako egitarauan burutzen den Soka dantza, lehenengoen artean koka dezakegu.

EH Bilduko hautetsiek, udal gobernuan edo oposizioan egon, urtero parte hartu izan dute Soka dantzan, atzo zazpiak gainera, alkateak herritarrei eskainitako agurra tarteko. Garbi geratu behar du, jaietako ekitaldi honetan parte hartzera hautetsi guztiak zeudela gonbidatuak, urteroko moduan. Lehen aipatu bezala, EH Bilduko hautetsiek oposizioan egondako garaietan ere urtero parte hartu dute, inoiz ez dute ez joateko itsusirik egin. Herenegun bakarrik zeuden ordea, beste alderdietako hautetsien laguntzarik gabe.

Batzuk eta besteek herria ezberdin bizi dugula dirudi, intentsitate ezberdinez, baina guztiak gara herritarrak, eta horregatik hurrengo urteetarako guztion parte hartzea litzateke desiragarriena eta bidezkoena, inoren itsusirik egon gabe.

EH Bilduk gogora dakar lege bat hitzartu duela gaur bertan Gobernuko alderdiekin eta hauek PPrekin bat egin dutela pentsioak hobetzea ekarriko zuen koalizioaren proposamen baten kontra. PPk EH Bildurekin batera bozkatu dituen ekimenak halako zazpi bozkatu ditu PNV eta PSErekin.

PNVk EH Bildu-PP ustezko pintza salatu du gaur enegarrenez, baina, Iker Casanovak adierazi duenez, Ortuzarren alderdiak “hobe luke barregarri geratzeari uztea”. Horixe eskatu dio EH Bilduko legebiltzarkideak, “irrigarria delako sinestezina den tesi bat defendatzea eta, gainera, objektiboki faltsuak diren datuak erabiltzea horretarako”. Izan ere, zenbaki objektiboek erakusten dute legealdian zehar PPk bozkatu dituen EH Bilduren ekimenak halako zazpi bozkatu dituela PNV eta PSErekin, hain justu EH Bilduren aurka. Hori da benetan Legebiltzarrean dagoen pintza, PNV-PSE-PP hirukoak osatzen dutena. Gaur bertan horren azken adibidea izan dugu, hirurek bat egin dutelako pentsioak hobetzea ekarriko zuen Nerea Kortajarenaren proposamena atzera botatzeko.

Iker Casanova EH Bilduko legebiltzarkidea

Casanovak berretsi du, hortaz, PNVk hobe lukeela “barregarri geratzeari uztea” eta, horri jarraituz, “euskal herritarren inteligentzia politikoa ez iraintzeko” eskatu dio. “EH Bilduk eta PPk akordio bat dugun tesia hain da burugabea ezen inork ez duen sinesten, EH Bildu harresirik sendoena izan delako beti PPk ordezkatzen duenari aurre egiteko. PNVrengatik balitz, aldiz, Rajoyk presidentea izaten jarraituko luke eta Maroto Gasteizko alkatea litzateke oraindik”. Casanovaren iritziz, “gobernatzeko arazoak baldin baditu, EAJk akordioak bilatzeari ekin beharko lioke, horrelako argudio arin eta zentzugabeak erabilita oposizioari eraso egin ordez”.

PNVren akusazioen zentzugabekeria are handiagoa da gainera kontuan hartzen bada gaur bertan EH Bilduk lege bat, Kultura Ondareari buruzkoa, hitzartu duela EAJ eta PSErekin. Eta oposizioak merkataritzari buruz aurrera atera duen proposamenari dagokionez, “inoiz ezin daiteke Gobernuaren jarduna oztopatzeko saiotzat har, lege bat onartzeaz ari garelako, eta legebiltzar batean ezer ez dago hori baino eraikitzaileagorik”.

Ezaguna da Onddo Gazte Asanbladak Santioak medio, egun Gaztetxea dagoen eraikinean burutzekoak zituen ekimenak Pilotari Kaleko bigarren zenbakian dagoen lokalean burutuko dituela.
Aldaketa honen kausa Kale Nagusiko bizilagun batek jarritako salaketan datza. Duela urte askotxotik datorren afera da honakoa. Gaztetxeko ekimenek (kontzertuek bereziki) sortzen duten soinua dela eta salaketa judiziala, Arartekoaren aurreko salaketa eta udaletxean hainbat eskari sartu ditu bizilagun honek, soinuak atseden hartzea eragozten diola argudiatuz.
Prozesua judizializaturik egonda eta Kale Nagusia 38ko lokalak kontzertuak burutzeko bete behar dituen baldintza minimoak ez dituela betetzen ikusiz (soinua, segurtasuna…) Udal Gobernu berriak behin behineko irtenbide bat topatu du Gazte Asanbladak bere festetako ekimenak aurrera eraman eta era berean bizilagun honen kexari erantzuteko. Irtenbide honek Pilotari 2ko bizilagunen jarrera ulerkorra izan du.
Txalotzekoa da Udal Gobernuak, Gazte Asanbladak eta bizilagunek erakutsi duten prestutasuna eta eraginkortasuna, baina egoera ikusirik Amasa-Villabonako EH Bilduk behin-behineko konponbideetatik haratago, konponbide iraunkor baterako lanketa burutu nahi du Onddo Gazte Asanbladarekin eta bizilagunekin batera. Gazteek euren ekimenak aurrera eramateko gune autogestionatuak izatea positiboki baloratzen dugu, herriarentzat onuragarriak direla deritzogu,baina gune hauek baldintza minimo batzuk bete behar dituzte inguruko bizilagunen atseden eskubidea errespetatu eta bizikidetza egoki bat garatzeko.
Bi printzipio horiei jarraiki irailetik aurrera konponbide iraunkorra ekarriko duen prozesua gidatuko dugu. 

Azken egunotan PNVko Udal Gobernuaren jarduerari dagokionez, bi salaketa publiko egin dira: Lehena, Alkatearen elkarrizketa bat argitaratzeagatik Noticias de Gipuzkoa egunkariari udaleko diru publikotik 1.800 euro ordaindu izana. Biharrena, herrian zehar agertutako kartel batzuen bidez egindako salaketa publikoa da, PNVko zenbait zinegotzik eta hautagai batek (egungo alkatearen anaiak) Malkar plaza azpialdeko aparkalekuak musu truk eta baimenik gabe erabiltzea salatzen delarik.

Akusazio edo salaketa hauen larritasuna ikusirik, Amasa-Villabonako EH Bildutik honakoa adierazi nahi dugu:

1. Elkarrizketaren afera:

Duela egun batzuk, EH Bilduko zinegotzi taldea udalak azken hilabeteetan egindako gastuen fakturak errepasatzen aritu zen eta bertan jasota zegoen gastu berezi batek atentzioa deitu zien: Udalak 1.800€ ordaindu dizkio Noticias de Gipuzkoa egunkariari, Maite Izagirre alkatearen elkarrizketa bat argitaratzeagatik. EH Bilduko hautetsiek udalean faktura egiaztatu zuten eta bai, baieztatu dezakegu hori horrelaxe izan dela.

Ekinbide hau lotsagarria iruditzen zaigu, alkateak bere buruaren propaganda egiteko udalaren diru publikoa erabiltzea onartezina da eta politika egiteko modu tranpatia eta etika gutxikoa islatzen du.

2. Malkar plazako aparkalekuen erabilera irregularra:

Herriko kaleetan agertutako kartelek egindako salaketa larrien harira, EH Bildutik honako argipenak egin nahi genituzke:

1- Udalean ez da inolako erabakirik hartu, udal langileek edo hautetsiek (are gutxiago hautetsien senideek) Malkar plaza azpian, herriarenak diren aparkalekuak erabiltzeko baimena izatearen inguruan.
2- Aparkaleku horiek guztiak jabetzan daude, ez dago bakar bat ere alokatuta.
3- Aparkalekuak erosita dituztenen artean, ez dago udaleko zinegotzirik eta ezta hauen seniderik ere.

Kartel hauen bidez egin den salaketa egiaztatuko balitz, oso larria eta guztiz onartezina litzateke, herritarrekiko errespetu falta handia erakutsiko lukeeelako.

Nabarmena da, bi salaketa publiko larri hauen aurrean, Maite Izagirre alkateak eta PNVko Udal Gobernuak azalpenak eman beharko dituztela. Udal agintarien eta PNVren isiltasunak, salaketa hauek egiazkoak direla frogatuko luke eta larriagoa dena, egungo alkatetzak prebarikazioa egin duela ondorioztatu daiteke.  

Espero dugu oraingo honetan azalpen eskaerak erantzun bat izatea, izan ere legealdi honetan ohikoa izan da alkateak isiltasunarekin erantzutea oposiziotik egin zaizkion galdera eta azalpen eskaerei. Portaera honen adibide ugari jar ditzakegu, hala nola duela hilabete inguru Aiurri aldizkarian alkataeak botatako gezurren aurrean edo Amavi udal aldizkarian argitaratutako gezurrezko albisteen ondoren, azalpenak eskatzerakoan jasotako erantzunik ezak.

Badatoz Santioak eta aurreko ostegunean udalak agerraldia egin zuen jaien egitaraua iragarriz. Agerraldi hau herriko eragileekin batera burutu zen, herriko jaiak ez balirateke ezer izango eragile ezberdinetan dabiltzan dozenaka herritarren borondatezko ekarpena egongo ez balitz.

Honen harira, duela hilabete, EH Bildu udal gobernuan sartu eta gau berean, herriko jaiak kapitalismoaren eredutzat jotzen zituzten pintadak agertu ziren herrian. Jakina, hurrengo egunean PNVk EH Bilduri egozten zion margoketa horien ardura eta hauteskunde lehia galdu eta gero aipatzen zuten “oposizio eraikitzailea” hutsaren hurrengoa izango dela erakutsi ziguten lehen momentutik. Izan ere, PNVk badaki margoketa horien atzean ez dagoela EH Bildu (beste gauza batzuen artean herriko jaien antolaketan dagoen eragile eta herritarren ekarpen ordainezina miresten dugulako), baina berdin dio, EH Bilduren kudeaketa ezegonkortuko duen zerbait topatzearekin amets egiten baitute, lehenago zaborraren gaiarekin egin zuten moduan. Oraingoan ez dute pagotxa hori edukiko ordea.

Santiotako egitaraua

EH Bilduk ekinbide legegilea aurkeztu du Gasteizko Legebiltzarrean: EAEko Legebiltzarrak Espainiako Gorte Nagusietan lege aldaketa bat eska dezala proposatzen du EH Bilduko legebiltzarreko taldeak. Rebeka Ubera legebiltzarkideak aurkeztu du publikoki proposamena eta beste alderdi politiko guztiei helarazi zaie.

Eutanasia Espainiako Zigor Kodean zigortuta ez egotea bilatzen du koalizio abertzaleak, baina hori aldatzea Espainiako Gorteen eskumena da eta ondorioz, legebiltzar gisa bertara jotzea proposatu du Rebeka Uberak. Beraz, alderdi baten ekinbidea beharrean, araudi aldaketa hori (eutanasiaren despenalizazioa) Eusko Legebiltzarrak eska dezala planteatu du.

Aurkeztutako proposamenak hiru puntu nagusi ditu. Lehenik eta behin, Zigor Kodearen 143.4 artikulua aldatzea, eutanasian laguntzen duen pertsona zigortua izan ez dadin. Bigarrenik, Espainiako Gobernuari eskatzen dio eutanasia arautzeko legea bidera dezala, ekinbide legegilea Espainiako Gorteetan onartu eta sei hilabeteko epean. Azkenik, Espainiako araudi hori onartu bitartean, bideak abiaraziko dira Eusko Legebiltzarraren proposamena aplikatzeko.

Rebeka Ubera, Gasteizko legebiltzarrean EH Bilduren proposamena aurkezten

Rebeka Uberak gogorarazi du Eusko Legebiltzarrean ordezkaritza duten alderdi gehienek eutanasia arautzearen alde egin dutela Espainiako Gorteetarako hauteskundeetan. PP izan da alde agertu ez den bakarra. EH Bilduko legebiltzarkidearen ustez gehiengoaren aldeko jarrera horrek erraztu beharko luke proposamena aurrera ateratzea eta tramitatzea.

Tramitea ohiko ekinbide legegile baten modukoa litzateke. Eusko Jaurlaritzak irizpena aurkeztu beharko luke, eta gero Eusko Legebiltzarrean lege moduan garatuko litzateke. Onartuz gero Espainiako Gorteetara bidaliko lukete, Eusko Legebiltzarraren izenean.

Estrasburgoko Auzitegiaren erabakiak euren eskubideen alde borrokatzen jarraitzera behartzen ditu Estatuaren biktimak, eta EH Bilduk bide horretan babesa eta laguntza emateko determinazio osoa dauka.

Giza Eskubideen Europako Auzitegiak BVEren eta GALen zenbait biktimaren eskabidea aintzat hartzeari uko eginda, “Estatuko terrorismoaren biktimekin bat egiteko unea” da, Julen Arzuaga EH Bilduko legebiltzarkidearen iritziz. Arzuagaren esanetan, “erabaki horrekin Estrasburgoko Auzitegiak euren eskubideen alde borrokatzen jarraitzera behartzen ditu Estatuko terrorismoaren biktimak, beste biktimekiko berdintasun baldintzetan tratatuak izatea lortzeko”.
EH Bilduko ordezkariak azpimarratu du “Estatuaren biktimak ahaztutako biktimak direla, instituzioek baztertutakoak, eta gaur ere, ikusi dugunez, euren eskubideak ez dira babestuak izan. Hori dela eta, EH Bildutik gure elkartasuna eta gertutasuna adierazi nahi diegu, bai eta egiaren eta justiziaren bidetik laguntzeko gure determinazioa ere”.

Herri askea, bidezkoa eta demokratikoa eraiki nahi dugu, herritar guztiei eskubide eta askatasun guztiak bermatuko dizkiena, herritar klasearen interesak eta gizarte ongizatea babestuko dituena.

Horregatik, EH Bilduk konpromiso hauek hartzen ditu:

Euskal gizarteari dagokion autodeterminazio eskubidea egikaritzea defendatzea, konponbide demokratiko gisa euskal gizartearen gehiengo zabal batek babesten duen erreferendum baten bitartez.

Espainiako estatuak eta bere alderdiek gure autogobernuaren eta bere tresnen aurka egiten dituzten arazoen aurrean defendatzea. Oraindik eskuz aldatu ez diren eskumen guztien transferentzia exijituko dugu, negoziaziaziorik eta trukean ezer eman gabe, EAEko eta Nafarroako gizartearen eskubideak ez direlako negoziatzen, bete egiten dira.

(EAEko eta Nafarroako gizartearen gehiengoaren borondatea errespetatuta), Espainiako eskuinak geratzeko konpromisoa hartzen dugu, inboluzio demokratikoari, birzentralizaziorari eta Eskuinarekin akordiorik ez egiteko konpromisoa hartzen dugu, eta euskal herritarren eskubideak eta askatasunak defendatzen dituzten euskal alderdiei zabaltzen diegu gure konpromisoa.

Euskal presoen eskubideak defendatzeko konpromisoa hartzen dugu, sakabanaketarekin eta salbuespeneko neurri guztiekin amaituz eta guztiak etxean egoteko lan eginez.

Askatasunen defentsa, 78ko Errejimenari aurre egiteko, Errejimenetik eratortzen diren errepresio politiko eta soziala eta askatasunen murrizketari aurre eginez. Indar polizialen inpunitatearekin, epaiketa politikoekin eta epaileen eta epaitegien mendekuarekin amaituz, ustelkeria sistematikoarekin amaituz eta elite ekonomikoen eta IBX35-aren interesei aurre eginez, beren Erregearen eta Erret Etxearen aurrean gure izaera errebeldea adieraziz.

Herritar klasearen eskubideen babesa eta defentsa, hauen bizitzak hobetzeko eta duintzeko ekimena hartuz. 1.080 euroko gutxieneko pentsioak exijitzeko eta KPIra legez egokitzeko konpromisoa hartzen dugu; prekarietatearekin amaitzea, 1.200 euroko gutxieneko soldata eta lan harremanetarako euskal esparrua defendatuz.

Egiturazko indarkeria matxistarekin amaitzeko lan egingo dugunaren konpromisoa hartzen dugu, Espainiako Justiziak erasotzaileei eskaintzen dien babesari aurre eginez, eta lan eremuan, arlo sozialean eta ekonomikoan egiazko berdintasuna sustatzeko neurriak bultzatuz.

PSOEk eta PPk bultzatutako lege antisozialak bertan behera uzteko konpromisoa hartzen dugu: lan erreformak, pentsioen erreformak, mozal legea, LOMCE, 135 eta 155 artikuluak, Egonkortasun Legea.

Erabateko gardentasunarekin aritzeko konpromisoa hartzen dugu, erabat zabaldua dagoen ustelkeriari aurre eginez. Jatorria edozein dela ere, kasu guztiak salatu eta erantzukizunak eskatuko ditugu. Ustelkeriagatik zigortutako alderdiek diru-laguntza publikorik ez jasotzea proposatuko dugu.

Euskal Errepublika defendatuko dugu, herritar orok bere eskubideak babestuak izango dituen etorkizun librea, demokratikoa eta bidezkoa eraikitzeko berme gisa.

Mikel Otero EH Bilduko legbiltzarkideak salatu du CO2-aren isuriak gora egin dutela eta 2012ko kopuruetara itzuli direla. Honako datua, Eusko Jaurlaritzaren ingurumen politikaren porrotaren isla da, bere iritziz. Dioenez, Klima Aldaketaren Lege Aurreproiektuak uko egiten dio trantsizio energetikoaren bidean Europak jarritako helburuak lortzeari.

Mikel Otero (EH Bildu)

Jaurlaritzako Ingurumen sailburu Iñaki Arriolaren autokonplazentziazko diskurtsoaren gainetik, Araba, Bizkaia eta Gipuzkoan berotegi efektuko gasen isuria jaitsi beharrean, igo egin da, jakinarazi du Mikel Oterok Legebiltzarrean. EH Bilduko legebiltzarkideak azaldu duenez, 2017an, datu ofizialak ezagutzen diren azken urtean, (http://es.eustat.eus/elementos/ele0009000/Evolucion_de_las_emisiones_totales_de_gases_de_efecto_invernadero_por_pais_CA_de_Euskadi_Ano_base_Kioto/tbl0009060_c.html) CO2 isuria %5,5 igo zen, 2016ko datuekin alderatuta, azken 15 urteotan izandako eboluziorik okerrena, hain zuzen. Zehazki, berotegi efektuko gasen isuria 2016koa baino milioi bat tona altuagoa izan zen eta, guztira, 20 milioitik gora jarri zen, 2012az geroztik gertatzen ez zen zerbait. “Bost urte atzera egin dugu”, ondorioztatu du Oterok, eta datu horiek ezkutatzen saiatzea egotzi dio Arriola sailburuari.

Oterok adierazi duenez, klima aldaketaren arloan erreferentzia den 1990. urteaz geroztik Europak CO2 isuriak %25 murriztu ditu, baina EAEn murrizketa %6,2koa baino ez da izan. Horren haritik, erantsi du, Jaurlaritzak propaganda egin arren, datu objektiboek “erakusten dute Europan atzean gaudela, azken postuetan, ez garela inondik inora aitzindariak”. Beraz, “Lakuak arlo horretan egin dituen politika eta planek emaitza txarrak izan badituzte, bistakoa da diseinua ez zela egokia, eta orain lantzen ari den Klima Aldaketaren Legea plan eta politika berberetan oinarritzen badu, porrota ziurtaturik dago”.

Horri jarraituz, EH Bilduko legebiltzarkideak salatu du Ingurumen sailburuak Klima Aldaketaren Lege Aurreproiektuan 2030 eta 2050erako ezarri dituen helburuak oso urrun geratzen direla Europak jarri dituenetatik, iragan martxoan Legebiltzarrean bertan Euskal Energia Ituna egiteko EH Bildurekin hitzartu zirenetatik eta, baita ere, Arriolaren beraren alderdiaren Gobernuak Madrilen Klima Aldaketaren eta Trantsizio Energetikoaren Lege Aurreproiektuan jaso dituenetatik.

Pasa den apirilaren 10ean Gurea zineko erakusketa gelan aurkeztu eta onartu zen Amasa-Villabonako EH Bilduko lantaldeak osatutako Herri Programaren lehen dokumentua. Ez da behin betiko dokumentua izango, oraindik herritarren ekarpenak biltzen jarraitzeko Koaderno zuria ekimena eta datozen asteetan herriko etxe guztietara zabalduko den inkesta bat egingo baitira. Hala ere, dagoeneko esan daiteke EH Bilduko militantziak eta oinarri sozialak, herri programaren oinarrizko gakoak definitu dituela. 

Herri Programak ardatz eta zehar-lerro nagusi bat izango du: Herritarren parte hartzea. Udalaren gobernantza eredua demokrazia zuzen eta parte hartzailearen terminoetan garatu nahi dugu. Eredu aldaketa honek udaleko sail eta alor guztietan izango du eragina, horregatik diogu zehar-lerroa dela, lan egiteko eredu bat baita, ez proiektu edo egitasmo konkretu bat. Beraz, aurrerantzean udaletik martxan jarriko diren politika guztiek herritarren eta herriko elkarte zein eragileen parte hartzeari bide eman beharko diote ezinbestean.

Hala ere, Herri Programa honetan 2019-2023 legealdirako proposamen eta proiektu zehatzak ere aurkituko dira, garrantzitsua iruditzen baitzaigu herritarrei ikus eta uki daitezkeen proiektu zehatzak ere eskaintzea, beti ere gure ezkerreko oinarri ideologikoekin modu koherentean, herritarren ongizatea bilatuz.

1. PARTE HARTZEA ARDATZ

Udal politika gardena, parte hartzailea eta herrikoia.

Amasa-Villabonako udala gobernatzeko modua eraldatu nahi dugu, hartu beharreko erabaki garrantzitsu eta esanguratsuenak herritarren esku utziz. Guk demokrazia zuzen eta parte hartzailea defendatzen dugu eta horregatik ez dugu udaleko bulego itxietan, politikari gutxi batzuen artean eta herritarrei bizkarra emanda garatzen den politika ereduan sinesten.

Ondorioz, herritarren parte hartzerako ordenantza aplikatuko dugu, parte hartze espazioak sortuz eta herritarrei hitza eta erabakia emanez. Alkaterik edo agintaririk onena herria bera dela defendatzen dugu. Horregatik EH Bilduko kideok ez dugu agintzeko bokaziorik, herritar eta elkarteek eskatzen digutena gestionatzea izango da gure betebehar nagusia.

Martxan jarriko ditugun tresna eta baliabideak

• Herritarren parte hartzea bermatzeko batzordea. Batzorde honek udala parte hartze neurriak hartzera behartzeko ahalmena izango du.
• Lan-mahai parte hartzaileak. Gutxienez bost mahai parte hartzaile jarriko ditugu martxan: Hezkuntza, Kultura, Euskara, Ingurumena eta Berdintasuna. Mahai hauek udal politikak erabakitzeko ahalmena izango dute.
• Telefonoetarako Aplikazioa (App). Herritarrei aukera ugari eskainiko dizkie: Eskaerak edo kexak bideratzea, inkestak, tramite azkarrak egitea...
• Herri Galdeketak: Estrategikoak diren edo herrian eragin handia izango duten erabakietan.
• Aurrekontu parte hartzaileak: Udalak prozesu parte hartzaile eta garden bat garatuko du urteko aurrekontuak onartu baino lehen.
• Auzoko erabakiak auzoan: Diru kopuru bat ezarriko da auzo bakoitzean inbertitzeko eta Auzo Batzarren bidez erabakiko da diru hori zein proiektu edo egitasmoetara bideratuko den.
• Gardentasuna: Udalaren web orria eraberrituko dugu eta modu sinplean aztertu ahal izango da udalaren jarduna: Bileretako aktak, Osoko Bilkuren grabazioak, udal ordezkarien soldata eta dietak...

2. HERRI PROGRAMAKO PROIEKTU ESANGURATSUAK

Malkar plazaren azpian Udalak dituen 60 aparkalekuak herritarren eskura jarriko ditugu

Villabonako herri-gunearen erdialdean, eguneko hainbat momentutan autoak aparkatzeko gero eta arazo handiagoak daude. Hau kontuan izanik, onartezina da udalak Malkar plazaren azpialdeko garajeetan 60 aparkaleku plaza hutsik edukitzea. Ondorioz, EH Bildutik aparkaleku horiek herritarren erabilerari irekiko dizkiogu. Horretarako hainbat formula aztertu ditugu eta guk parking publiko bat zabaltzea lehenetsiko dugu. Egitasmo honen bidez aparkaleku publiko hauek autoen rotazioa izatea lortu nahi dugu eta herri-gunean dauden aparkatzeko arazoak neurri esanguratsuan arindu egingo direla aurreikusten dugu.

Etxebizitzaren arazoa: Gazteentzako alokairurako laguntzak, etxe hutsak merkaturatu eta adineko pertsonentzat tutoretzapeko etxebizitzak 

Amasa-Villabonan ere, etxebizitza duina izateko eskubidea ez da bermatzen. Gazteek arazo handiak dituzte emanzipatu eta bizi proiektu independentea garatu ahal izateko. Gazte askok herritik kanpora jo dute, etxebizitza eskaintza urria eta garestia delako. Alokairuen prezioak izugarriak dira. Horregatik, alokairu eskaintza handituko dugu, hutsik dauden 316 etxebizitzak alokairu merkatura ateratzeko neurriak hartuz eta gazteentzako laguntza sistema bat martxan jarriz alokairuak ordaindu ahal ditzaten. Etxebizitza berrien eraikuntzan, alokairu soziala, Babes Ofizialeko Etxebizitzak edota adineko pertsonentzako etxebizitza tutelatuak ezartzea bermatuko dugu.

Herritarrek aukeratutako Larreako parkea estaltzeko proiektua 

2014an herrian gune estali bat izateko eskaerari erantzun bat emateko udalak garatutako parte hartze prozesu zabal baten ondoren, herritarrek bozka zuzenaren bidez Larreako parkea estaltzeko proiektua aukeratu zuten. EAJk proiektu hori geldiarazi zuen inolako azalpenik eman gabe. Gure ustez, herritarrei zor zaien errespetuagatik eta Larrea-Arroa auzoetan jende asko bizi delako, parkearen eremua eraberritu eta estaltzea lehentasun osoa duen egitasmoa da. Ondorioz, EH Bilduk proiektu hau egiteko konpromisoa hartzen du.

Kirol arloko premien inguruko prozesu bat zabalduko dugu datozen urteetan kirol azpiegitura berriak eraikitzeko 

Amasa-Villabonako eragileen parte hartzerekin, prozesu bat zabalduko dugu herriko kirol azpiegituren (Kiroldegia, Frontoiak, Futbol Zelaia) birmoldaketa edo eraberritzeari heltzeko eta etorkizunean ezarri daitezkeen kirol eremu eta zerbitzu berriak adosteko. Gaur egungo kirol azpiegiturak zabaldu eta dibertsifikatu nahi ditugu momentu honetan herrian praktikatu ezin diren hainbat kirol modalitate berri garatu ahal izateko. Zentzu horretan, kirol anitzen gune berriak sortzea bultzatuko dugu. Adibidez pumptruck, rocodromoa, padel, skate-park…

3. HERRI PROGRAMAKO EGITASMOAK
*Gai ezberdinen ordenak ez dauka arrazoi zehatzik, EH Bilduren lantaldean landutako ordena da, ez besterik.

1. KULTURA
• Kultura bonoa sortuko dugu: Amasa-Villabonako dinamika kulturala indartu eta bertako kontsumo kulturala sustatzeko.
• Liburutegia: Etorkizunean udal-liburutegiak izan beharreko erabileraren inguruko hausnarketa prozesu bat zabalduko dugu, gaur egun oso zaharkitua geratu den azpiegitura eraberritzeko.
• Kulturan Ados! mahaia: Herri eragileen eta udalaren arteko hartu emana sendotzeko eta Amasa-Villabonako kultur politikaren ildo nagusiak adosteko gunea izango da. Herritarren eta herriko eragile kulturalen parte hartze aktiboa bultzatuko da eta gune honek herrian garatuko den dinamika kulturala marraztuko du.
• Gazteek beraien egitaraua sortzeko aukera izango dute. Beti parte hartze zuzenaren bidez.
• Musika emanaldiak Aljibean: Herrian musika zuzenean entzuteko dauden gabeziei aurre egiteko modua izango da. Emanaldi hauek aurreko legealdian martxan jarritako Aljibe-gauen filosofia izango dute, hau da, emanaldiak herriko eragileek eta udalak elkarlanean antolatuko dituzte.

2. KIROLA
• Kiroldegiko kantxaren berrikuntza: Olaederra kiroladegian egin beharreko mantenu lanez gain, instalakuntzen zahartzeari aurre egiteko inbertsioak egingo dira eta kiroldegiko kantxa nagusiaren egoera tamalgarria izanik, lehen inbertsio esanguratsua hau berritzea izango da. Inbertsio honi aurre egiteko (100.000 euro inguru) Foru Aldundiaren eta Eusko Jaurlaritzaren laguntza bilatuko dugu.
• Kirol egokitua bultzatzea: Aniztasun funtzionala duten pertsonek kirol jarduera ezberdinak egin ahal izatea bultzatuko dugu.

3. INGURUMENA
• Ingurumen Batzordea berreskuratu eta Ingurumenean Ados mahai parte hartzailea berriro martxan jarri. Mahai honek udalaren ingurumen politikaren ardatzak eta proiektu nagusiak erabakitzeko ahalmena izango du.
• Amasamendiko kudeaketa plana: Berriro mahai gainean jarriko dugu, ondo aztertuz eta mahai parte hartzailean erabakiko dira plan honetan aurreikusten diren zein proiektu garatu daitezkeen urtez urte.

• Egungo hondakin bilketa sistema mantenduko dugu. Alderdi politiko ezberdinen arteko akordioa errespetatuko dugu, edukiontzien sistemarekin jarraituz. Lortutako akordio zabalari eta aurreko legealdian ezarritako atez-ateko sistemari esker, hondakinen bereizketan emaitza positiboak lortu dira eta amasa billabonatarrak zoriondu nahi ditugu horregatik. Hala ere, datuek erakutsi digute organikoaren bilketan hobetu beharra dagoela (organikoa ez den hainbat hondakinek organikoaren edukiontzian amaitzen dute) eta organikoa behar bezala bereiz dadin informazio kanpaina bat bultzatuko dugu. 
• Auzo-konpostaren zabalpena. Auzo-konpost gune berriak zabalduko ditugu, hondakinen sorrera murriztuz.
• Gutxitu, Bererabili, Birziklatu filosofian sakondu. Sentsibilizazio kanpaina berritzaileak gauzatuko ditugu hondakinen kudeaketa zuzen bat garatzeko eta ekonomia zirkularra sustatzeko.

4. HIRIGINTZA
• Hirigintza Plan Orokorra: Orain 10 urte adostu zen eta oraindik indarrean sartu ez den hirigintza plangintza berraztertu eta egokitu egingo dugu. Hau ere modu ireki, zabal, garden eta parte hartzailean egin nahi dugu, herriari hitza eta erabakia emanez.
Eztabaida eta hausnarketa prozesu bereziak martxan jarriko ditugu Amasa-Villabonaren etorkizuneko hirigintza garapenerako oso garrantzitsuak izango diren eremuetan zer egin erabakitzeko: SACEM, Agaraitz, Otsabi, Txermingo aparkaleku atzeko mendia eta Amasako herrigunea.
• Auzoetan erabaki: Udalak herriko auzo ezberdinei urtero diru kopuru bat esleituko die mantenua eta inbertsio berriak egin ahal izateko. Diru hori zertan inbertituko den bertako bizilagunek erabakiko dute, auzo-batzarren bidez.
• Txermingo aparkaleku handiaren berritzea eta berrantolaketa. Gaur egun oso egoera txarrean aurkitzen da eta beharrezkoa izango da argi gehiago jartzea, bertara joateko bideak txukuntzea eta aparkalekuaren berrantolaketa integral bat egitea.
• Agaraitz auzoko etxebizitzen ingurua txukundu edo duindu egingo dugu, gaur egun egoera penagarrian dago eta.
• Zebrabideen argiztapena. Antzeman diren segurtasun arazoak konpontzeko.
• Kale Nagusia arratsaldez oinezkoentzat soilik irekia egongo dela ziurtatzeko neurri eraginkorrak hartuko ditugu.
• Kale Nagusia 62-66 etxeen eraisketa. Etxebizitza hauek guztiz utzita eta hondatuta daude. Egoera horrek segurtasun eta higiene arazoak sortzen ditu; teilatuetako teila zaharren erorketak, arratoiak... Beraz, udalak (hirigintza plangintzak markatutakoa betez) eraikin horiek bota edo eraisteko neurriak hartuko ditu.
• Amasara iristeko oinezkoen bide duina. Gaur egun Villabonatik Amasara oinez igotzeko dauden bideak ez dira batere egokiak: aldapa handiak daude, Otsabi inguruan segurtasun arazo nabarmenak etab. Beraz, Amasara oinez igotzeko bide seguru eta egokiagoak beharrezkoak dira.
• Arratzaingo futbol zelai ondoko aparkalekua txukundu. Aparkaleku hau asfaltatu eta txukun jarriko dugu, gaur egun nahiko trakets dago eta.
• Oztopo arkitektonikoen ezabatzea. Mugikortasun arazoak dituzten herritarren parte hartze zuzenarekin, herrian dauden oztopoen katalogoa egingo dugu, legealdian zehar oztopo guztiekin amaitzeko helburuarekin.
• Oriamendi eta Larreako espaloien konponketa progresiboa, egoera txarrenean daudenetik hasita.
• Elementu naturalekin osatutako parkea. Herrian dauden 7 haur parkeetako bat gutxienez birmoldatu egingo dugu, bertan elementu naturalak jarriz: egurra, hondarra, lurra, belarra...
• Arroako lurzoruaren konponketa. Arroako hainbat eremutan lurzorua hondatuta dago eta euria egiten duenean ur pilaketa eta putzu handiak sortzen dira. Arazo hauek konpontzeko interbentzio batzuk egingo ditugu.
• Santio Egoitza aurrealdeko kalearen konponketa. Kale horrek oso arriskutsuak diren koskak eta zuloak ditu, eta Santio Egoitzako erabiltzaileek dituzten mugikortasun arazoek, eremu hori derrigor konpontzera eramaten gaituzte.

• SACEM-etik Anoetara doan bidean argiztapena ezartzea.

5. HEZKUNTZA
• Hezkuntza Mahaia sortu: Herriko hezkuntza eragile guztiek eta udalak osatuko dute mahaia. Bertan, hezkuntza arloan Amasa-Villabonak dituen erronkei modu bateratuan erantzutea bilatuko da.
• Etorkizuneko hezkuntzaren inguruko gogoeta partekatua egitea sustatuko dugu, horretarako hezkuntza mahaia baliatuz.
• Zubimusu Ikastola eta Fleming Herri Eskola-ren arteko elkarlana bultzatuko dugu.
• Amasa-Villabonako curriculuma diseinatu eta aplikatzen hasiko gara.
• Azpiegiturak hobetzeko inbertsio plana garatuko dugu, Fleming Herri Eskolako eta Erniobea Institutuko komunitateekin elkarlanean.
• Jangela zerbitzu propioak. Herriko ikastetxeetan bertako eta sasoiko produktuetan oinarrituko diren jangela zerbitzuak martxan jar daitezen lagunduko dugu.
• Seaska Haur Eskolan matrikulatzeko diru laguntza programa bat ezarriko dugu zerbitzu publiko hau doakoa izatea lortzeko helburuarekin.

6. BERDINTASUNA-FEMINISMOA

• Udaleko Berdintasun Saila sortu eta berdintasun lan mahai parte hartzailea eratu. Ezinbestekoa den herriko mugimendu feministaren eta udalaren arteko elkarlan serio eta konprometitu bat bideratzeko gunea izango da. Lan mahai honek erabakiko du udalak berdintasunerako izango duen aurrekontua zertara bideratuko den.
• Amasa-Villabonako emakumeen elkargunerako gune bat sortuko dugu, kalean egongo dena eta emakume guztiei irekia. Bertan hitzaldiak, bideo emanaldiak, tailerrak... antolatu ahal izango dira.
• Berdintasuna zehar-lerro gisa. Udaleko sail guztietako lanean, genero ikuspegia txertatzeko bitartekoak jarriko ditugu martxan. Udalak bai barnean eta baita kanpora begira ere, genero berdintasuna ardatz izan dezan.
• LGTBI kolektiboaren eskubide berdintasuna defendatuko dugu beti.

7. ELKARTASUN INTERNAZIONALISTA

• Elkartasun astea berreskuratuko dugu. Herritarren sentsibilizazioan eragiteko egitarau zabala izango du eta Giza Eskubideen defentsan oinarrituko da.
• Amasa-Villabonak dituen senidetzeen berreskurapena eta indartzea. Gure herriak Saharako Agti dairarekin (2014) eta El Salvadorreko Segundo Montes komunitatearekin (2009) dituen senidetzeetan sakonduko dugu, harremanak berreskuratuz eta herrien arteko elkartruke berriak bilatuz.
• Herri zapalduekin elkartasuna, bereziki askapen nazionalaren alde borrokan ari diren nazioekin: Palestina, Kurdistan, Korsika, Katalunia... Eta baita egoera humanitario oso larria bizi dutenekin ere: Haiti, Bangladesh, Somalia, Yemen, Siria...

8. GIZARTE ZERBITZUAK
• Etxez etxeko Laguntza Zerbitzua indartuko dugu arreta integraleko zerbitzu bilakatuz.
• Pobreziaren aurkako borroka: Pertsona guztiek, pertsona izateagatik, bizirauteko gutxieneko baliabide ekonomikoak izateko eskubidea dute. Herritar askok pertzepzio eta iritzi okerra du: RGIa kanpotarrek jasotzen dutela. Hau ez da egia. Errealitate hau gizarteratuko dugu, arrazakeria eta xenofobiari aurre egiteko eta RGIaren aldeko sentsibilizazioa garatzeko.
• Prebentzioa: Etorkizunean arazoak izan ditzaketen esparruak identifikatu eta prebentzioan sakonduko dugu. Adibidez, apustuak (ludopatia), telefono mugikorren, sare sozialen adizioak etab. Gehienbat haur eta nerabeei begirako programak garatuko ditugu hezkuntza eragileekin elkarlanean.
• Parte hartzea: Erabiltzaileak, herritarrek eta gizarte eragileek, gizarte zerbitzuen plangintzan, garapenean, ebaluazioan, kudeaketan eta erabakiak hartzean parte hartzea. Erabakitzeko ahalmena (loteslea) emanez.

• Dependentzia: Pertsonen autonomia pertsonala eta arreta sustatuko ditugu. LPPE-ari (Laguntza Pertsonalerako Prestazio Ekonomikoa) lehentasuna ematea. Zaintzaile ez profesionalei balioespen bat jasotzeko eskubidea: laguntza tekniko eta psikologikoa, prestakuntza, atseden hartzeko programak...

9. ENPLEGUA
• Azpikontratak gutxitu eta zerbitzu publikoak indartu. Udalak ahal den heinean udal zerbitzuak zuzenean kudeatzea bultzatuko dugu.
• Klausula Sozialak udalak egiten dituen kontratazioetan. Udalak kontratatzen dituen enpresa guztiek, beren sektoreko lan-hitzarmena errespetatu beharko dute eta klausula sozialekin jarduten duten enpresei lehentasun osoa emango zaie. Aldi Bateko Lan Enpresak (ETT bezala ezagutzen direnak) ez dira kontratatuko.
• Santio festetan herriko langabetuak edota gazteak kontratatzea.

10. ADINEKO PERTSONAK
• Udala, Santiago Egoitza eta Jubilatu Elkartearen arteko lankidetza sustatuko dugu. Adineko pertsonen zahartze aktiboa bultzatzeko: irteerak, jolasak, herriko ekintzetan parte hartzea...
• Nerabe-gazte eta adineko pertsonen arteko harremana sustatzeko programak bultzatuko ditugu herriko ikastetxeekin. Belaunaldi ezberdinen arteko transmisioan sakontzeko.
• Etxebizitza tutelatuen eraikuntza aztertuko dugu, bakarrik bizi diren adineko pertsonen bizi kalitatea hobetzeko helburuarekin.

11. EUSKARA
• Euskararen erabilera bermatuko dugu. Udalak euskaraz lan egingo du eta berdintasuna bezalaxe, euskararen erabilera ere zehar-lerroa izango da udalaren jardun publiko guztian.
• Euskaran Ados lan mahaia berreskuratuko dugu. Euskararen normalizazioaren aldeko herri eragileen bilgunea izan dadin eta udaleko hizkuntza politikak bertan diseinatu eta adostu daitezen.
• Amasa-Villabonako Euskara Plana garatu. Dagoeneko eginda dagoen plangintza hau eta bertan jasotzen diren neurriak martxan jarriko ditugu.
• Haur eta nerabeei zuzendutako kontzientziazio kanpainak. Ikastetxeen, eskola kirolaren eta herriko kirol zein kultur elkarteen inplikazioa bilatuz.
• Amasa-Villabona UEMA-ko (Udalerri Euskaldunen Mankomunitatea) partaide izango da. Herri euskalduna garelako eta UEMAk euskararen normalizazioan aurrera urratsak emateko baliabideak eskainiko dizkigulako.
• Euskara ikasteko doakotasuna. Amasa-Villabonan euskara ikastea doakoa izango da, udalak euskaltegietako matrikulen %100a ordainduko du. Etorkinentzako ikaste-plan bereziak ere diseinatuko ditugu, gure herrira datozen guztiek lehen momentutik euskara ezagutu eta dohain ikasteko dauden aukerak ezagutu ditzaten.

12. GAZTERIA
• Gazteen emanzipaziorako laguntza sistema bat ezarriko dugu. Gazteek beren lehen etxebizitza independentea izateko aukera izan dezaten.
• Droga menpekotasunak saihesteko programak.

13. JATORRI ANIZTASUNA
• Etorkinentzako harrera plan Integrala osatuko dugu. Etorri berriak diren herritarrek dituzten zerbitzu, betebehar eta eskubideak adieraziz.
• Jatorri atzerritarreko haurrentzat euskara ikastaro espezifikoak sortuko ditugu haur hauek euskara ez ezagutzeagatik herriko ikastetxeetan dituzten arazoak ahalik eta modu erraz eta azkarrenean konpon ditzaten.
• Jatorri ezberdinetako herritarren arteko elkar ezagutza areagotzeko ekimenak egin eta bultzatuko ditugu. Ekimen hauek kulturartekotasuna, berdintasuna eta munduko kultura aberastasunaren balio positiboak zabaltzeko helburua izango dute.

14. ENERGIA
• Energia efizientziaren aldeko apustu irmoa egingo dugu. Argiteria publikoan eta udal instalakuntzetan energia eredu efizienteak ezarriko ditugu.
• Eraikuntza publiko berri guztiak energetikoki eraginkorrak izango dira eta eraikita dudenetan trantsizio energetikoa garatzeko konpromisoa hartzen dugu.
• Udalak kontsumituko duen energia guztia jatorri berriztagarrikoa izango da. Horretarako energia hornitzaile berriak kontratatuko ditugu, erregai fosilen bidez lortutako energia kutsakorraren hornidura eskaintzen duten enpresak baztertuz.

15. ELKARBIZITZA, MEMORIA ETA PRESOAK

• Memoria eta Bizikidetza batzordea. Batzorde honetan parte hartuko duten alderdi politiko guztien arteko adostasunaren bidez, giza eskubideen aldeko sentsibilizazioan sakonduko dugu.
• Egia, justizia eta erreparazioa: Euskal Herrian bizi dugun gatazka politikoaren biktima guztiei aitortza publikoa egingo diegu. Biktima guztiek eskubide berberak eduki behar dituztelako.
• 1936-2019 urte artean motibazio politikoengatik eman diren giza eskubideen urraketa guztiak bilduko dituen azterketa zientifikoa osatu eta argitaratuko dugu.
• Udalak, estatuaren salbuespen legedia guztia desaktibatu eta desagertzearen aldeko jarrera eta konpromiso garbia adieraziko du eta zentzu horretan, salbuespen egoeren aurkako herri ekimen oro babestuko du.
• Udalak dispertsioan oinarritzen den kartzela politika behin betiko amaitzeko bere eskuetan dagoen guztia egingo du eta bitartean herriko presoen familia eta lagunek pairatzen duten dispertsioaren eraginak murrizteko neurriak hartzea aztertuko du.

16. ETXEBIZITZA
• Amasa-Villabonan dauden 316 etxebizitza hutsen azterketa sakon bat gauzatuko dugu. Etxebizitza horiek okupatu gabe egotearen arrazoiak aztertuz, etxebizitza hauek errentan ateratzeko neurri eraginkorrak hartzea izango da helburua.
• Alokairu soziala bultzatuko dugu. Etxe jabe eta errentan bizi nahi duten pertsonen artean bitartekaritza lana egingo dugu, alokairurako dauden administrazio ezberdinen laguntzen inguruko informazioa zabalduz etab.
• Bigarren etxebizitza hutsei zerga errekargua aplikatzen jarraituko dugu, hauen merkaturatzea bultzatzeko asmoz.
• Hainbat eremutan hutsik dauden lokal komertzialak etxebizitza moduan alokairuan jartzeko aukerak aztertuko ditugu.

17. MERKATARITZA

• Merkataritza Mahaia sortuko dugu herriko merkataritza sustatzeko. Merkatari guztiei irekia egongo da eta udalak garatuko dituen herriko merkataritzaren aldeko politikak bertan adostuko dira.
• Erosketak etxera eramateko zerbitzua bultzatuko dugu, herriko merkatarien eta udaleko Gizarte Zerbitzuen elkarlanean oinarrituko den zerbitzu berri bat izateko.
• Udal zerga eta tasetan laguntzak komertzio berriak sustatzeko.
• Herriko Oria merkatarien txartela beste funtzio batzuetara zabaltzeko proiektu bat garatuko dugu.

18 BESTEAK:

• Wifi publikoa ezarriko dugu herri-gunean.
• Herritarren eskaera txikiei bizkortasunez erantzuteko "ti-ta" zerbitzua ezarriko dugu. Udal ordezkari baten kontaktua zabalduko dugu egunerokotasunean ematen diren arazo txikiei segituan irtenbide bat aurkitzeko.

Rebeka Ubera EH Bilduko legebiltzarkidearen iritziz, Nekane Murga sailburuak sinesgarritasuna galdu du Lan Eskaintza Publikoari buruzko barne ikerketa zuzentzeko, aurreko oposizio batean filtrazioen gaian "jakinaren gainean" zegoela publiko egin eta gero.

Rebeka Ubera (EH Bildu) Gasteizko legebiltzarrean

EH Bilduko legebiltzarkide Rebeka Uberak eskandalagarritzat jo du egun Osasun sailburua denak, Nekane Murgak, aurreko Lan Eskaintza Publiko (LEP) batean naturaltasunez onartu izana Osakidetzan azterketak filtratzen direla pertsona zehatz batzuek plaza lor dezaten. “Ez lehendakariak ez Murgak berak ezin dute pentsatu hemen ez dela ezer gertatu, gaur ezagutu dugun audio batek erakusten duelako aurreko LEP batean egungo sailburua filtrazioen jakinaren gainean zegoela eta ontzat ematen zituela ohiko sistemaren baitan. Hori ezagutu ostean, Murgak ez du sinesgarritasunik Osakidetzaren barne ikerketa zuzentzeko eta irregulartasunak argitzeko”.

Uberak eldiario.es egunkari digitalak argitara emandako audioa aipatu du, Osakidetzak eginiko barne ikerketaren grabazioak jasotzen dituena, alegia. Audio horrek agerian uzten du Nekane Murgak ondo zekiela aurreko oposizioetan ere azterketak filtratzen zirela, hala azaldu baitu orain ikertzen ari den lan eskaintza publikoan Kardiologia arloko epaimahaia osatu duten doktoreetariko batek.

Hori dela eta, EH Bilduko legebiltzarkideak interpelazioa egingo dio ostiralean Kontroleko Plenoan Osasun sailburuari, eta salatuko du Osakidetzaren barne ikerketa zuzentzeko ardura Belen Greaves jeltzalearen eskuetan jarri izana, “horrek horrelako kasu batean ezinbestekoak diren independentzia eta neutraltasun politikoaren printzipio guztiak urratzen dituelako”. Uberaren esanetan, “lehendakaria eta bere gobernua iseka egiten ari zaizkio euskal gizarteari; Greaves EAJko Euskadi Buru Batzarreko idazkaria izan da eta ezinezkoa da bera orain neutrala izatea, bere alderdiak Osakidetzan egin duen kudeaketa politikoa ezbaian jartzen duen ikerketa bat egiten ari denean. Inork ez zukeen onartuko Gürtel auzian ikerketa Marotoren esku uztea”.

Uberaren aburuz, argitara ateratzen ari den informazio guztiak agerian uzten du ez Osakidetzak ez Osasun Sailak inoiz ez dutela nahi izan jendeak oposizioen egia osoa ezagutzea. “Garden eta zorrotz jokatu dutela behin eta berriz esan duten arren, gertatu denak frogatzen du hori ez dela horrela izan. Horretaz jabetzeko aski da ikustea epaileak dokumentazioa osorik bidaltzeko eskatu behar izan diola Osakidetzari, lehenengo momentuan epaitegira igorritako informazioan atal garrantzitsuak falta zirelako, Murgari buruzko grabazioa, esaterako”.

Euskaltelen kontrola Euskal Herritik kanpo geratu izana gaitzetsi du EH Bilduko legebiltzarkide taldeak.

Zegonak ez zukeen Euskaltelen kontrola eskuratuko eta enpresaren erabakiguneak ez leudeke arriskuan, Lakua eta Kutxabank desinbertsio prozesu batean sartu ezean. EH Bilduk ekimen sorta iragarri du Lakuak esku hartzeko. “Gobernu serioek enpresa estrategikoak babesten dituzte”.

Zegona inbertsio funts britainiarrak Euskaltelen kontrola eskuratu izana hain da larria eta arriskutsua euskal ekonomiarentzat, ezen EH Bilduk Legebiltzarrak Jaurlaritzaren jokaera gaitzestea proposatu baitu, “Urkullu buru duen Gobernuaren utzikeriak, arduragabekeriak eta inakzioak ahalbidetu dutelako Zegonaren operazioa”, Iker Casanovak salatu duenez. “EH Bilduk zortzi aldiz ekarri du gaia Parlamentura eta lehen momentutik ohartarazi zuen gerora errealitate bilakatu den arriskuaz, eta Jaurlaritzak bere lana arduraz egin balu, gaur Zegonak ez luke Euskaltelen kontrola izango eta inork ez luke hitz egingo enpresaren egoitza eta erabakiguneak Euskal Herritik kanpora eramateko arriskuaz. Patronalak berak ohartarazi du euskal ekonomiari sekulako kaltea egingo liokeen arrisku horretaz eta, are gehiago, berretsi du EH Bilduk behin eta berriz egin duen salaketa, alegia, Jaurlaritzak eta Kutxabankek Euskaltelen burutu duten desinbertsio prozesua dagoela afera honen jatorrian”.

Horri jarraituz, Casanovak gogor kritikatu du Euskaltel auzian Lakuako eledun Josu Erkorekak emandako erantzuna. “Benetan larria eta penagarria da, eta euskal herritar guztiak kezkatu beharko lituzke, Urkulluren Gobernuak eskaintzen duen konponbide bakarra izatea adi egotea eta begira jarraitzea, inolako neurririk proposatzeko kapaza izan gabe, eta hori Jaurlaritza bera denean hein handi batean Zegonaren operazioaren errudun nagusietariko bat, bere garaian Euskaltelen zituen akzioak saldu zituelako eta gero, konpainiaren kontrola Euskal Herrian mantentze aldera, akzioak berriz erosteari uko egin diolako EH Bilduk hala proposatu duenean. Gobernu serio batek bere herriko enpresa estrategikoak defendatzen ditu eta, Jaurlaritzak hala egiten ez badu, ondorioztatu behar dugu ez gaudela gobernu serio baten aurrean”.

Hori dela eta, EH Bilduk legez besteko proposamena aurkeztuko du Legebiltzarrak EAJ-PSE Gobernuaren kudeaketa arduragabea gaitzetsi dezan eta Lakuari neurri zehatzak hartzeko –Euskaltelen akzioak erosteko– eska diezaion, Zegonaren operazioaren ondorio kaltegarriak ezerezean uzteko. Zehazki, Casanovak azken urteotako desinbertsio prozesua irauli beharra aldarrikatu du. “Jaurlaritzak, Kutxanbankek zein azken honen jabe diren hiru Banku Fundazioek estrategikoak diren enpresetan inbertsio politika esanguratsu eta iraunkorra garatu behar dute enpresa horien lurraldearekiko atxikimendua eta erabakimena bertan dagoela ziurtatzeko eta eredu produktibo propio sendo, osasuntsu eta jasangarria garatzeko”.

Halaber, legez besteko proposamenetik harago, EH Bilduk kontuak eskatuko dizkie Legebiltzarrean Urkullu lehendakariari eta Arantxa Tapia Ekonomiaren Garapen sailburuari, eta Euskaltel, Kutxabank eta Kutxa, Vital zein BBKren fundazioetako presidenteen agerraldiak ere galdegingo ditu.

Larunbat honetan 12:00etan udalbatzaren eta alkate berriaren izendapena gauzatzeko osoko bilkura berezia izango da udaletxeko pleno aretoan. Ekitaldi instituzional hori amaitu ondoren, EH Bilduk ekitaldia antolatu du Errebote plazan.

Larunbata ospakizun eguna izango da Amasa-Villabonako EH Bilduren komunitatea osatzen dugunontzat eta osoko bilkuraren ondoren Beatriz Unzue gure hautagaia ofizialki alkate izendatu bezain pronto, ekitaldi xume bat egingo dugu udaletxearen atarian.

Guk ez dugu aginte makila gure eskuetan izan nahi, ez dugu udal gobernuak eskainiko digun boterea gure kasa erabili nahi, EH Bilduko kideok demokrazia zuzen eta parte hartzailean sinesten dugu eta herriari hitza eta erabakia eman nahi diogu uneoro. Beraz, larunbatean aginte makila herritarrei eskainiko diegu, guk, udaletik, herritarrek eskatu edo erabakitzen dutenari bide emateko konpromisoa hartzen dugu eta hori horrela izan dadin tresna zein bitarteko berriak martxan jartzera goaz. Herritarrek eta bertako elkarte eta eragileek osatzen dute Amasa-Villabona eta gu beraien zerbitzura gaude.

ALKATERIK HOBERENA: HERRIA!

Maddalen Iriartek kexa formala helarazi dio Legebiltzarreko Mahaiari PPko legebiltzarkideek atzo Arzuagaren berbaldia eragotzi zutelako oihu eta irainen artean.

“Zigorgabetasuna nahi dutenei aurre egitea obligazio demokratikoa da eta Mahaiak Arzuaga babestu behar du atzodanik jasotzen ari den irain eta mehatxuen aurrean”.

EH Bilduk protesta formala helarazi dio Legebiltzarreko Mahaiari, Estatuaren biktimak aitortzeko legearen eztabaidan atzo “Julen Arzuagak jasan behar izan zuena onartezina delako”, Maddalen Iriartek salatu duenez. “Hitza hartu eta berehala, PPko legebiltzarkideak keinuka altxatu eta normaltasunez jarraitzea galarazi zioten oihu eta irainen artean, Legebiltzarreko presidentearen inakzioa baliatuta”. Bada, “Mahaiari dagokio orain, PPren jokabidea dela eta, Erregelamenduan aurreikusitako zehapen neurriak hartzea, eta hala eskatu diogu”.

PPk gonbidatuta, Ganbaran izan ziren Jusapol sindikatu polizialaren ordezkarien aurkako zehapen neurriak ere eskatu ditu EH Bilduk, “haien mehatxu eta mespretxu keinuak nabarmenak izan zirelako hasieratik eta eztabaida politikoa eragotzi zutelako”. Halaber, azaldu du Iriartek, “Mahaiak babes eta elkartasuna adierazi behar dio Arzuagari atzodanik sare sozialen bidez etengabe jasotzen ari den irain eta mehatxuak ezin direlako onartu parlamentu batean”.

PPko legebiltzarkideak Julen Arzuagaren auka oldartuta

EH Bilduko bozeramailearen iritziz, “Estatuaren biktimak umiliatzen dituztenei, krimen izugarriak egin dituzten polizia eta guardia zibilen zigorgabetasuna nahi eta eskatzen dutenei, aurre egitea obligazio demokratikoa da, eta horixe da Julen Arzuagak egin zuena. Jusapol bezalako elkarteei tinkotasun osoz esan behar zaie Estatuaren biktimek ere, gainerako guztiek bezala, egia osoa, justizia eta erreparazioa merezi eta behar dutela, eta penagarria da atzo onartu zen legea bide horretan motz geratzea. Hala ere, argi izan dezatela guztiek EH Bildu tematurik dagoela bide horretan eta lanean jarraituko duela biktima horiei ere justizia eta erreparazio osoa eman arte”.