Udalgintza

Pasa den apirilaren 10ean Gurea zineko erakusketa gelan aurkeztu eta onartu zen Amasa-Villabonako EH Bilduko lantaldeak osatutako Herri Programaren lehen dokumentua. Ez da behin betiko dokumentua izango, oraindik herritarren ekarpenak biltzen jarraitzeko Koaderno zuria ekimena eta datozen asteetan herriko etxe guztietara zabalduko den inkesta bat egingo baitira. Hala ere, dagoeneko esan daiteke EH Bilduko militantziak eta oinarri sozialak, herri programaren oinarrizko gakoak definitu dituela. 

Herri Programak ardatz eta zehar-lerro nagusi bat izango du: Herritarren parte hartzea. Udalaren gobernantza eredua demokrazia zuzen eta parte hartzailearen terminoetan garatu nahi dugu. Eredu aldaketa honek udaleko sail eta alor guztietan izango du eragina, horregatik diogu zehar-lerroa dela, lan egiteko eredu bat baita, ez proiektu edo egitasmo konkretu bat. Beraz, aurrerantzean udaletik martxan jarriko diren politika guztiek herritarren eta herriko elkarte zein eragileen parte hartzeari bide eman beharko diote ezinbestean.

Hala ere, Herri Programa honetan 2019-2023 legealdirako proposamen eta proiektu zehatzak ere aurkituko dira, garrantzitsua iruditzen baitzaigu herritarrei ikus eta uki daitezkeen proiektu zehatzak ere eskaintzea, beti ere gure ezkerreko oinarri ideologikoekin modu koherentean, herritarren ongizatea bilatuz.

1. PARTE HARTZEA ARDATZ

Udal politika gardena, parte hartzailea eta herrikoia.

Amasa-Villabonako udala gobernatzeko modua eraldatu nahi dugu, hartu beharreko erabaki garrantzitsu eta esanguratsuenak herritarren esku utziz. Guk demokrazia zuzen eta parte hartzailea defendatzen dugu eta horregatik ez dugu udaleko bulego itxietan, politikari gutxi batzuen artean eta herritarrei bizkarra emanda garatzen den politika ereduan sinesten.

Ondorioz, herritarren parte hartzerako ordenantza aplikatuko dugu, parte hartze espazioak sortuz eta herritarrei hitza eta erabakia emanez. Alkaterik edo agintaririk onena herria bera dela defendatzen dugu. Horregatik EH Bilduko kideok ez dugu agintzeko bokaziorik, herritar eta elkarteek eskatzen digutena gestionatzea izango da gure betebehar nagusia.

Martxan jarriko ditugun tresna eta baliabideak

• Herritarren parte hartzea bermatzeko batzordea. Batzorde honek udala parte hartze neurriak hartzera behartzeko ahalmena izango du.
• Lan-mahai parte hartzaileak. Gutxienez bost mahai parte hartzaile jarriko ditugu martxan: Hezkuntza, Kultura, Euskara, Ingurumena eta Berdintasuna. Mahai hauek udal politikak erabakitzeko ahalmena izango dute.
• Telefonoetarako Aplikazioa (App). Herritarrei aukera ugari eskainiko dizkie: Eskaerak edo kexak bideratzea, inkestak, tramite azkarrak egitea...
• Herri Galdeketak: Estrategikoak diren edo herrian eragin handia izango duten erabakietan.
• Aurrekontu parte hartzaileak: Udalak prozesu parte hartzaile eta garden bat garatuko du urteko aurrekontuak onartu baino lehen.
• Auzoko erabakiak auzoan: Diru kopuru bat ezarriko da auzo bakoitzean inbertitzeko eta Auzo Batzarren bidez erabakiko da diru hori zein proiektu edo egitasmoetara bideratuko den.
• Gardentasuna: Udalaren web orria eraberrituko dugu eta modu sinplean aztertu ahal izango da udalaren jarduna: Bileretako aktak, Osoko Bilkuren grabazioak, udal ordezkarien soldata eta dietak...


2. HERRI PROGRAMAKO PROIEKTU ESANGURATSUAK

Malkar plazaren azpian Udalak dituen 60 aparkalekuak herritarren eskura jarriko ditugu

weberako1

Villabonako herri-gunearen erdialdean, eguneko hainbat momentutan autoak aparkatzeko gero eta arazo handiagoak daude. Hau kontuan izanik, onartezina da udalak Malkar plazaren azpialdeko garajeetan 60 aparkaleku plaza hutsik edukitzea. Ondorioz, EH Bildutik aparkaleku horiek herritarren erabilerari irekiko dizkiogu. Horretarako hainbat formula aztertu ditugu eta guk parking publiko bat zabaltzea lehenetsiko dugu. Egitasmo honen bidez aparkaleku publiko hauek autoen rotazioa izatea lortu nahi dugu eta herri-gunean dauden aparkatzeko arazoak neurri esanguratsuan arindu egingo direla aurreikusten dugu.

Etxebizitzaren arazoa: Gazteentzako alokairurako laguntzak, etxe hutsak merkaturatu eta adineko pertsonentzat tutoretzapeko etxebizitzak 

etxebizitzaweberakoAmasa-Villabonan ere, etxebizitza duina izateko eskubidea ez da bermatzen. Gazteek arazo handiak dituzte emanzipatu eta bizi proiektu independentea garatu ahal izateko. Gazte askok herritik kanpora jo dute, etxebizitza eskaintza urria eta garestia delako. Alokairuen prezioak izugarriak dira. Horregatik, alokairu eskaintza handituko dugu, hutsik dauden 316 etxebizitzak alokairu merkatura ateratzeko neurriak hartuz eta gazteentzako laguntza sistema bat martxan jarriz alokairuak ordaindu ahal ditzaten. Etxebizitza berrien eraikuntzan, alokairu soziala, Babes Ofizialeko Etxebizitzak edota adineko pertsonentzako etxebizitza tutelatuak ezartzea bermatuko dugu.

Herritarrek aukeratutako Larreako parkea estaltzeko proiektua 

Larrea proiektua2014an herrian gune estali bat izateko eskaerari erantzun bat emateko udalak garatutako parte hartze prozesu zabal baten ondoren, herritarrek bozka zuzenaren bidez Larreako parkea estaltzeko proiektua aukeratu zuten. EAJk proiektu hori geldiarazi zuen inolako azalpenik eman gabe. Gure ustez, herritarrei zor zaien errespetuagatik eta Larrea-Arroa auzoetan jende asko bizi delako, parkearen eremua eraberritu eta estaltzea lehentasun osoa duen egitasmoa da. Ondorioz, EH Bilduk proiektu hau egiteko konpromisoa hartzen du.

Kirol arloko premien inguruko prozesu bat zabalduko dugu datozen urteetan kirol azpiegitura berriak eraikitzeko 

kirola weberakoAmasa-Villabonako eragileen parte hartzerekin, prozesu bat zabalduko dugu herriko kirol azpiegituren (Kiroldegia, Frontoiak, Futbol Zelaia) birmoldaketa edo eraberritzeari heltzeko eta etorkizunean ezarri daitezkeen kirol eremu eta zerbitzu berriak adosteko. Gaur egungo kirol azpiegiturak zabaldu eta dibertsifikatu nahi ditugu momentu honetan herrian praktikatu ezin diren hainbat kirol modalitate berri garatu ahal izateko. Zentzu horretan, kirol anitzen gune berriak sortzea bultzatuko dugu. Adibidez pumptruck, rocodromoa, padel, skate-park…


3. HERRI PROGRAMAKO EGITASMOAK
*Gai ezberdinen ordenak ez dauka arrazoi zehatzik, EH Bilduren lantaldean landutako ordena da, ez besterik.

1. KULTURA
• Kultura bonoa sortuko dugu: Amasa-Villabonako dinamika kulturala indartu eta bertako kontsumo kulturala sustatzeko.
• Liburutegia: Etorkizunean udal-liburutegiak izan beharreko erabileraren inguruko hausnarketa prozesu bat zabalduko dugu, gaur egun oso zaharkitua geratu den azpiegitura eraberritzeko.
• Kulturan Ados! mahaia: Herri eragileen eta udalaren arteko hartu emana sendotzeko eta Amasa-Villabonako kultur politikaren ildo nagusiak adosteko gunea izango da. Herritarren eta herriko eragile kulturalen parte hartze aktiboa bultzatuko da eta gune honek herrian garatuko den dinamika kulturala marraztuko du.
• Gazteek beraien egitaraua sortzeko aukera izango dute. Beti parte hartze zuzenaren bidez.
• Musika emanaldiak Aljibean: Herrian musika zuzenean entzuteko dauden gabeziei aurre egiteko modua izango da. Emanaldi hauek aurreko legealdian martxan jarritako Aljibe-gauen filosofia izango dute, hau da, emanaldiak herriko eragileek eta udalak elkarlanean antolatuko dituzte.

2. KIROLA
• Kiroldegiko kantxaren berrikuntza: Olaederra kiroladegian egin beharreko mantenu lanez gain, instalakuntzen zahartzeari aurre egiteko inbertsioak egingo dira eta kiroldegiko kantxa nagusiaren egoera tamalgarria izanik, lehen inbertsio esanguratsua hau berritzea izango da. Inbertsio honi aurre egiteko (100.000 euro inguru) Foru Aldundiaren eta Eusko Jaurlaritzaren laguntza bilatuko dugu.
• Kirol egokitua bultzatzea: Aniztasun funtzionala duten pertsonek kirol jarduera ezberdinak egin ahal izatea bultzatuko dugu.

3. INGURUMENA
• Ingurumen Batzordea berreskuratu eta Ingurumenean Ados mahai parte hartzailea berriro martxan jarri. Mahai honek udalaren ingurumen politikaren ardatzak eta proiektu nagusiak erabakitzeko ahalmena izango du.
• Amasamendiko kudeaketa plana: Berriro mahai gainean jarriko dugu, ondo aztertuz eta mahai parte hartzailean erabakiko dira plan honetan aurreikusten diren zein proiektu garatu daitezkeen urtez urte.

• Egungo hondakin bilketa sistema mantenduko dugu. Alderdi politiko ezberdinen arteko akordioa errespetatuko dugu, edukiontzien sistemarekin jarraituz. Lortutako akordio zabalari eta aurreko legealdian ezarritako atez-ateko sistemari esker, hondakinen bereizketan emaitza positiboak lortu dira eta amasa billabonatarrak zoriondu nahi ditugu horregatik. Hala ere, datuek erakutsi digute organikoaren bilketan hobetu beharra dagoela (organikoa ez den hainbat hondakinek organikoaren edukiontzian amaitzen dute) eta organikoa behar bezala bereiz dadin informazio kanpaina bat bultzatuko dugu. 
• Auzo-konpostaren zabalpena. Auzo-konpost gune berriak zabalduko ditugu, hondakinen sorrera murriztuz.
• Gutxitu, Bererabili, Birziklatu filosofian sakondu. Sentsibilizazio kanpaina berritzaileak gauzatuko ditugu hondakinen kudeaketa zuzen bat garatzeko eta ekonomia zirkularra sustatzeko.

4. HIRIGINTZA
• Hirigintza Plan Orokorra: Orain 10 urte adostu zen eta oraindik indarrean sartu ez den hirigintza plangintza berraztertu eta egokitu egingo dugu. Hau ere modu ireki, zabal, garden eta parte hartzailean egin nahi dugu, herriari hitza eta erabakia emanez.
Eztabaida eta hausnarketa prozesu bereziak martxan jarriko ditugu Amasa-Villabonaren etorkizuneko hirigintza garapenerako oso garrantzitsuak izango diren eremuetan zer egin erabakitzeko: SACEM, Agaraitz, Otsabi, Txermingo aparkaleku atzeko mendia eta Amasako herrigunea.
• Auzoetan erabaki: Udalak herriko auzo ezberdinei urtero diru kopuru bat esleituko die mantenua eta inbertsio berriak egin ahal izateko. Diru hori zertan inbertituko den bertako bizilagunek erabakiko dute, auzo-batzarren bidez.
• Txermingo aparkaleku handiaren berritzea eta berrantolaketa. Gaur egun oso egoera txarrean aurkitzen da eta beharrezkoa izango da argi gehiago jartzea, bertara joateko bideak txukuntzea eta aparkalekuaren berrantolaketa integral bat egitea.
• Agaraitz auzoko etxebizitzen ingurua txukundu edo duindu egingo dugu, gaur egun egoera penagarrian dago eta.
• Zebrabideen argiztapena. Antzeman diren segurtasun arazoak konpontzeko.
• Kale Nagusia arratsaldez oinezkoentzat soilik irekia egongo dela ziurtatzeko neurri eraginkorrak hartuko ditugu.
• Kale Nagusia 62-66 etxeen eraisketa. Etxebizitza hauek guztiz utzita eta hondatuta daude. Egoera horrek segurtasun eta higiene arazoak sortzen ditu; teilatuetako teila zaharren erorketak, arratoiak... Beraz, udalak (hirigintza plangintzak markatutakoa betez) eraikin horiek bota edo eraisteko neurriak hartuko ditu.
• Amasara iristeko oinezkoen bide duina. Gaur egun Villabonatik Amasara oinez igotzeko dauden bideak ez dira batere egokiak: aldapa handiak daude, Otsabi inguruan segurtasun arazo nabarmenak etab. Beraz, Amasara oinez igotzeko bide seguru eta egokiagoak beharrezkoak dira.
• Arratzaingo futbol zelai ondoko aparkalekua txukundu. Aparkaleku hau asfaltatu eta txukun jarriko dugu, gaur egun nahiko trakets dago eta.
• Oztopo arkitektonikoen ezabatzea. Mugikortasun arazoak dituzten herritarren parte hartze zuzenarekin, herrian dauden oztopoen katalogoa egingo dugu, legealdian zehar oztopo guztiekin amaitzeko helburuarekin.
• Oriamendi eta Larreako espaloien konponketa progresiboa, egoera txarrenean daudenetik hasita.
• Elementu naturalekin osatutako parkea. Herrian dauden 7 haur parkeetako bat gutxienez birmoldatu egingo dugu, bertan elementu naturalak jarriz: egurra, hondarra, lurra, belarra...
• Arroako lurzoruaren konponketa. Arroako hainbat eremutan lurzorua hondatuta dago eta euria egiten duenean ur pilaketa eta putzu handiak sortzen dira. Arazo hauek konpontzeko interbentzio batzuk egingo ditugu.
• Santio Egoitza aurrealdeko kalearen konponketa. Kale horrek oso arriskutsuak diren koskak eta zuloak ditu, eta Santio Egoitzako erabiltzaileek dituzten mugikortasun arazoek, eremu hori derrigor konpontzera eramaten gaituzte.

• SACEM-etik Anoetara doan bidean argiztapena ezartzea.

5. HEZKUNTZA
• Hezkuntza Mahaia sortu: Herriko hezkuntza eragile guztiek eta udalak osatuko dute mahaia. Bertan, hezkuntza arloan Amasa-Villabonak dituen erronkei modu bateratuan erantzutea bilatuko da.
• Etorkizuneko hezkuntzaren inguruko gogoeta partekatua egitea sustatuko dugu, horretarako hezkuntza mahaia baliatuz.
• Zubimusu Ikastola eta Fleming Herri Eskola-ren arteko elkarlana bultzatuko dugu.
• Amasa-Villabonako curriculuma diseinatu eta aplikatzen hasiko gara.
• Azpiegiturak hobetzeko inbertsio plana garatuko dugu, Fleming Herri Eskolako eta Erniobea Institutuko komunitateekin elkarlanean.
• Jangela zerbitzu propioak. Herriko ikastetxeetan bertako eta sasoiko produktuetan oinarrituko diren jangela zerbitzuak martxan jar daitezen lagunduko dugu.
• Seaska Haur Eskolan matrikulatzeko diru laguntza programa bat ezarriko dugu zerbitzu publiko hau doakoa izatea lortzeko helburuarekin.

6. BERDINTASUNA-FEMINISMOA

• Udaleko Berdintasun Saila sortu eta berdintasun lan mahai parte hartzailea eratu. Ezinbestekoa den herriko mugimendu feministaren eta udalaren arteko elkarlan serio eta konprometitu bat bideratzeko gunea izango da. Lan mahai honek erabakiko du udalak berdintasunerako izango duen aurrekontua zertara bideratuko den.
• Amasa-Villabonako emakumeen elkargunerako gune bat sortuko dugu, kalean egongo dena eta emakume guztiei irekia. Bertan hitzaldiak, bideo emanaldiak, tailerrak... antolatu ahal izango dira.
• Berdintasuna zehar-lerro gisa. Udaleko sail guztietako lanean, genero ikuspegia txertatzeko bitartekoak jarriko ditugu martxan. Udalak bai barnean eta baita kanpora begira ere, genero berdintasuna ardatz izan dezan.
• LGTBI kolektiboaren eskubide berdintasuna defendatuko dugu beti.

7. ELKARTASUN INTERNAZIONALISTA

• Elkartasun astea berreskuratuko dugu. Herritarren sentsibilizazioan eragiteko egitarau zabala izango du eta Giza Eskubideen defentsan oinarrituko da.
• Amasa-Villabonak dituen senidetzeen berreskurapena eta indartzea. Gure herriak Saharako Agti dairarekin (2014) eta El Salvadorreko Segundo Montes komunitatearekin (2009) dituen senidetzeetan sakonduko dugu, harremanak berreskuratuz eta herrien arteko elkartruke berriak bilatuz.
• Herri zapalduekin elkartasuna, bereziki askapen nazionalaren alde borrokan ari diren nazioekin: Palestina, Kurdistan, Korsika, Katalunia... Eta baita egoera humanitario oso larria bizi dutenekin ere: Haiti, Bangladesh, Somalia, Yemen, Siria...

8. GIZARTE ZERBITZUAK
• Etxez etxeko Laguntza Zerbitzua indartuko dugu arreta integraleko zerbitzu bilakatuz.
• Pobreziaren aurkako borroka: Pertsona guztiek, pertsona izateagatik, bizirauteko gutxieneko baliabide ekonomikoak izateko eskubidea dute. Herritar askok pertzepzio eta iritzi okerra du: RGIa kanpotarrek jasotzen dutela. Hau ez da egia. Errealitate hau gizarteratuko dugu, arrazakeria eta xenofobiari aurre egiteko eta RGIaren aldeko sentsibilizazioa garatzeko.
• Prebentzioa: Etorkizunean arazoak izan ditzaketen esparruak identifikatu eta prebentzioan sakonduko dugu. Adibidez, apustuak (ludopatia), telefono mugikorren, sare sozialen adizioak etab. Gehienbat haur eta nerabeei begirako programak garatuko ditugu hezkuntza eragileekin elkarlanean.
• Parte hartzea: Erabiltzaileak, herritarrek eta gizarte eragileek, gizarte zerbitzuen plangintzan, garapenean, ebaluazioan, kudeaketan eta erabakiak hartzean parte hartzea. Erabakitzeko ahalmena (loteslea) emanez.

• Dependentzia: Pertsonen autonomia pertsonala eta arreta sustatuko ditugu. LPPE-ari (Laguntza Pertsonalerako Prestazio Ekonomikoa) lehentasuna ematea. Zaintzaile ez profesionalei balioespen bat jasotzeko eskubidea: laguntza tekniko eta psikologikoa, prestakuntza, atseden hartzeko programak...

9. ENPLEGUA
• Azpikontratak gutxitu eta zerbitzu publikoak indartu. Udalak ahal den heinean udal zerbitzuak zuzenean kudeatzea bultzatuko dugu.
• Klausula Sozialak udalak egiten dituen kontratazioetan. Udalak kontratatzen dituen enpresa guztiek, beren sektoreko lan-hitzarmena errespetatu beharko dute eta klausula sozialekin jarduten duten enpresei lehentasun osoa emango zaie. Aldi Bateko Lan Enpresak (ETT bezala ezagutzen direnak) ez dira kontratatuko.
• Santio festetan herriko langabetuak edota gazteak kontratatzea.

10. ADINEKO PERTSONAK
• Udala, Santiago Egoitza eta Jubilatu Elkartearen arteko lankidetza sustatuko dugu. Adineko pertsonen zahartze aktiboa bultzatzeko: irteerak, jolasak, herriko ekintzetan parte hartzea...
• Nerabe-gazte eta adineko pertsonen arteko harremana sustatzeko programak bultzatuko ditugu herriko ikastetxeekin. Belaunaldi ezberdinen arteko transmisioan sakontzeko.
• Etxebizitza tutelatuen eraikuntza aztertuko dugu, bakarrik bizi diren adineko pertsonen bizi kalitatea hobetzeko helburuarekin.

11. EUSKARA
• Euskararen erabilera bermatuko dugu. Udalak euskaraz lan egingo du eta berdintasuna bezalaxe, euskararen erabilera ere zehar-lerroa izango da udalaren jardun publiko guztian.
• Euskaran Ados lan mahaia berreskuratuko dugu. Euskararen normalizazioaren aldeko herri eragileen bilgunea izan dadin eta udaleko hizkuntza politikak bertan diseinatu eta adostu daitezen.
• Amasa-Villabonako Euskara Plana garatu. Dagoeneko eginda dagoen plangintza hau eta bertan jasotzen diren neurriak martxan jarriko ditugu.
• Haur eta nerabeei zuzendutako kontzientziazio kanpainak. Ikastetxeen, eskola kirolaren eta herriko kirol zein kultur elkarteen inplikazioa bilatuz.
• Amasa-Villabona UEMA-ko (Udalerri Euskaldunen Mankomunitatea) partaide izango da. Herri euskalduna garelako eta UEMAk euskararen normalizazioan aurrera urratsak emateko baliabideak eskainiko dizkigulako.
• Euskara ikasteko doakotasuna. Amasa-Villabonan euskara ikastea doakoa izango da, udalak euskaltegietako matrikulen %100a ordainduko du. Etorkinentzako ikaste-plan bereziak ere diseinatuko ditugu, gure herrira datozen guztiek lehen momentutik euskara ezagutu eta dohain ikasteko dauden aukerak ezagutu ditzaten.

12. GAZTERIA
• Gazteen emanzipaziorako laguntza sistema bat ezarriko dugu. Gazteek beren lehen etxebizitza independentea izateko aukera izan dezaten.
• Droga menpekotasunak saihesteko programak.

13. JATORRI ANIZTASUNA
• Etorkinentzako harrera plan Integrala osatuko dugu. Etorri berriak diren herritarrek dituzten zerbitzu, betebehar eta eskubideak adieraziz.
• Jatorri atzerritarreko haurrentzat euskara ikastaro espezifikoak sortuko ditugu haur hauek euskara ez ezagutzeagatik herriko ikastetxeetan dituzten arazoak ahalik eta modu erraz eta azkarrenean konpon ditzaten.
• Jatorri ezberdinetako herritarren arteko elkar ezagutza areagotzeko ekimenak egin eta bultzatuko ditugu. Ekimen hauek kulturartekotasuna, berdintasuna eta munduko kultura aberastasunaren balio positiboak zabaltzeko helburua izango dute.

14. ENERGIA
• Energia efizientziaren aldeko apustu irmoa egingo dugu. Argiteria publikoan eta udal instalakuntzetan energia eredu efizienteak ezarriko ditugu.
• Eraikuntza publiko berri guztiak energetikoki eraginkorrak izango dira eta eraikita dudenetan trantsizio energetikoa garatzeko konpromisoa hartzen dugu.
• Udalak kontsumituko duen energia guztia jatorri berriztagarrikoa izango da. Horretarako energia hornitzaile berriak kontratatuko ditugu, erregai fosilen bidez lortutako energia kutsakorraren hornidura eskaintzen duten enpresak baztertuz.

15. ELKARBIZITZA, MEMORIA ETA PRESOAK

• Memoria eta Bizikidetza batzordea. Batzorde honetan parte hartuko duten alderdi politiko guztien arteko adostasunaren bidez, giza eskubideen aldeko sentsibilizazioan sakonduko dugu.
• Egia, justizia eta erreparazioa: Euskal Herrian bizi dugun gatazka politikoaren biktima guztiei aitortza publikoa egingo diegu. Biktima guztiek eskubide berberak eduki behar dituztelako.
• 1936-2019 urte artean motibazio politikoengatik eman diren giza eskubideen urraketa guztiak bilduko dituen azterketa zientifikoa osatu eta argitaratuko dugu.
• Udalak, estatuaren salbuespen legedia guztia desaktibatu eta desagertzearen aldeko jarrera eta konpromiso garbia adieraziko du eta zentzu horretan, salbuespen egoeren aurkako herri ekimen oro babestuko du.
• Udalak dispertsioan oinarritzen den kartzela politika behin betiko amaitzeko bere eskuetan dagoen guztia egingo du eta bitartean herriko presoen familia eta lagunek pairatzen duten dispertsioaren eraginak murrizteko neurriak hartzea aztertuko du.

16. ETXEBIZITZA
• Amasa-Villabonan dauden 316 etxebizitza hutsen azterketa sakon bat gauzatuko dugu. Etxebizitza horiek okupatu gabe egotearen arrazoiak aztertuz, etxebizitza hauek errentan ateratzeko neurri eraginkorrak hartzea izango da helburua.
• Alokairu soziala bultzatuko dugu. Etxe jabe eta errentan bizi nahi duten pertsonen artean bitartekaritza lana egingo dugu, alokairurako dauden administrazio ezberdinen laguntzen inguruko informazioa zabalduz etab.
• Bigarren etxebizitza hutsei zerga errekargua aplikatzen jarraituko dugu, hauen merkaturatzea bultzatzeko asmoz.
• Hainbat eremutan hutsik dauden lokal komertzialak etxebizitza moduan alokairuan jartzeko aukerak aztertuko ditugu.

17. MERKATARITZA

• Merkataritza Mahaia sortuko dugu herriko merkataritza sustatzeko. Merkatari guztiei irekia egongo da eta udalak garatuko dituen herriko merkataritzaren aldeko politikak bertan adostuko dira.
• Erosketak etxera eramateko zerbitzua bultzatuko dugu, herriko merkatarien eta udaleko Gizarte Zerbitzuen elkarlanean oinarrituko den zerbitzu berri bat izateko.
• Udal zerga eta tasetan laguntzak komertzio berriak sustatzeko.
• Herriko Oria merkatarien txartela beste funtzio batzuetara zabaltzeko proiektu bat garatuko dugu.

18 BESTEAK:

• Wifi publikoa ezarriko dugu herri-gunean.
• Herritarren eskaera txikiei bizkortasunez erantzuteko "ti-ta" zerbitzua ezarriko dugu. Udal ordezkari baten kontaktua zabalduko dugu egunerokotasunean ematen diren arazo txikiei segituan irtenbide bat aurkitzeko.

 

Ekainaren 16an, PNVren udal gobernuak egindako prentsaurreko baten albistea ikusi genuen komunikabideetan. Alkatea eta beste 4 zinegotzi jeltzale (horietatik 3 herritik kanpokoak) ageri ziren udalean eta titularrak honakoa zioen: "Amasa eta Villabona elkartu zirela 400 urte beteko dira 2019an".

Lehenik eta behin, ez zaigu normala iruditzen herriaren urteurrenaren lehen aurkezpena PNVko zinegotziek bakarrik, udaleko beste talde politikoei ezertxo ere esan gabe egitea. Ez al litzateke askoz egokiagoa udalean herritarren ordezkariak garen guztiok modu bateratuan aurkeztea? Gure inguruko hainbat herrik ere ospatu dute 400. urteurrena eta lehen momentutik, udaleko alderdi guztiek parte hartu dute ekimen publiko guztietan, Andoainen kasu.

Albistearen mamira joanez, PNVk dagoeneko erabaki batzuk hartu dituela ikusi dugu:

Urteurrenaren logoa

Aipatutako prentsaurrekoan, PNVko ordezkarien atzean, pantaila batean, irudi edo logotipo hau ageri zen:

 IMG 7814

Hau ikusita burura etorritako lehen galdera argia da, nork egin ote du logo hori? Albistean informazio hori ez zegoenez, udaleko plenoan galdetzea bururatu zitzaigun. Galderaren erantzuna harrigarria izan zen, udal gobernuko inork ez omen zekien nork egin zuen logoa "komunikazio enpresa batek egin du, baina ez dugu gogoratzen zehazki zeinek" erantzun zuen Eneko Urdangarin zinegotziak. Misterioa argitzeko asmoz, udaleko ekonomia sailera joan eta fakturen artean begiratuta jakin genuen erantzuna: Logoaren faktura Arantzazu Garin andrearen izenean dago. Bai, udal gobernuak Amavi aldizkaria egiteko kontratatu zuen (urtean 20.000 euroko kontratuarekin) Ordiziako PNVko kidearen izenean! eta udalak 583 euro ordaindu dizkio lan honengatik. Orduan, norbaitek sinetsi al dezake Urdangarin jaunak plenoan esandakoa? argi dago udal gobernuak apropos, Arantzazu Garin jeltzaleari eman ziola logoa egiteko lana. PNVren jardunean ohikoa den klientelismoaren beste adibide bat.

Ez al litzateke egokiagoa izango Amasa Villabonaren urteurreneko logoa herriko norbaitek egitea? Gure ustez lehiaketa publiko bat egin zitekeen, herriko jendeari proposamenak aurkezteko aukera emanez eta logotipo irabazlea modu parte hartzailean (bozketa bidez) erabakiz. Dagoeneko gastatu den dirua, beren lanak aurkeztutako herritarren artean sari gisa banatu zitekeen.

Baina ez, PNVkoek erabaki dute logoa herritik kanpoko alderdikide batek egitea eta kitto.

Santio eta San Martin jaietarako zapiak

Aipatutako albistearen azken esaldian hau irakur zitekeen: "Aurtengoan zein datorren urtean logotipo berriaren irudia izango duten zapiak banatuko dira Villabonako Santio festetan eta Amasako San Martin festetan."

Urteurrena datorren urtean bada, zein zentzu dauka aurtengo jaietan logo hori duten zapiak banatzeak? zer ospatzen da aurten? 399. urteurrena? Gure ustez honek ez du inolako logikarik eta lotuta dago pasa den urtean udalak Santioetako zapiekin egindakoarekin. Azken urte luzetan herri mugimenduko taldeen eskutik jaietarako ateratzen zen zapia boikotatzeko asmoz, pasa den urtean udalak (lehen aldiz) zapiak atera eta doan banatu zituen. Dirudienez aurtengoan helburu berdinarekin jarraitzen dute eta 400. urteurrena erabili dute gauza bera egiteko aitzakia gisa. Bestalde, Santioetako jai batzordean udal gobernuak ez du hau aipatu ere egin. San Martin jaietako antolatzaileak ere, komunikabideen bidez jakin dute Amasako jaietan udalak zapi horiek banatuko dituela.

Egia esan, honek guztiak ez gaitu gehiegi harritu, jeltzaleak gauza bera egiten aritu baitira hasieratik. Beti oposizioa bazterrean utzi dute, gu ere herritar askoren ordezkariak garela ahaztuz. Bestalde, udalak egiten duen guztia beraien propaganda edo marketina egiteko erabiltzen dute. Udal Gobernu honek hiru urtetan ez du aipagarria den ia ezertxo ere egin, oso trakets ari dira udala kudeatzen eta herritarren aurrean ezintasun hori konpentsatzeko asmoz, edozer egiteko gai dira. 

Denona, herritar guztiena izan behar lukeen Amasa Villabonaren 400. urteurrena bera ere, interes alderdikoietarako erabili nahi izatea izan da azken kapitulua.

 


Amasa Villabonan, 2018ko uztailaren 5ean
EH BILDU UDAL-TALDEA

logoa horizontala

 

 

 

 

 

 

Pasa den ostiral arratsaldean Gurea zinean egindako ekitaldian ezagutzera eman genuen datorren maiatzaren 26an izango diren Udal hauteskundeetarako Amasa-Villabonako EH Bilduko hautagaien zerrenda.

Ekitaldian hautagaiak banan banan aurkeztu ziren eta ondoren berresteko bozketa egin zen. Bertaratutako herritarrek babes osoa eskaini zioten hautagai zerrendari eta bozka guztiak aldekoak izan ziren.

Bozketaren emaitza: 126 alde, 0 kontra eta 0 zuri.

Ekitaldiaren BIDEOA: https://www.youtube.com/watch?v=4TJ9JFSLuGE&feature=youtu.be 

EH Bildu Amasa Villabona erabiltzailearen argazkia.Ostiraleko ekitaldian hautagai zerrenda berresteko bozketa egin zen unea

Beraz, dagoeneko EH Bilduko oinarri sozialak 16 herritarrez osatutako hautagaien zerrenda berritsi du eta hauek izango dira urrenez urren, gure hautagaitza osatuko dutenak:

1. Beatriz Unzue Esnaola

Lanbide heziketako ikasketak: Informatika kudeaketa. Lanbidez idazkaria. Kirolaria: Bolo jaurtiketako Euskadiko txapelduna eta palista.

2. Xabat Laborde Etxabe

Geografian Lizentziatua. Hirigintza eta euskara zinegotzia 2015-19 legealdian. Euskal Herrian Euskaraz-eko militantea.

3. Arantxa Lopez Luloaga

Jubilatua. Ebakuntza gelako laguntzailea Asunción klinikan. Duintasuna pentsionisten elkarteko eta Lurgatz talde feministako kidea.

4. Gorka Kamio Rodriguez

Gorputz eta kirol sustapeneko goi-mailako teknikaria. Lehen Hezkuntzako gradua. Olaederra kiroldegiko kirol-teknikaria.

5. Amagoia Agirre Alkorta

Haur Hezkuntzako gradua, Ingeleseko berezitasuna. Irakaslea Altsasuko Iñigo Aritza ikastolan.

6. Ander Goikoetxea Arana

Elektronikako Ingenieritzan Doktorea. Ikerlari irakaslea Mondragon Unibertsitatean. Sare-ko kidea.

7. Garazi Bengoetxea Iguaran

Diseinatzailea. Oinkari dantza taldeko irakaslea eta partaidea.

8. Aitor Sarasola Murua

Lanbide Heziketako ikasketak. Berokuntza eta klimatizazio sistemen instalatzailea. Alegiko alkate ohia.

9. Garbiñe Galarraga Iñurrita

Haur Hezkuntzan Diplomatua, Gorputz Hezkuntzako espezialitatea. Irakaslea.

10. Iker Zaldua Jauregi

Geomatika eta Topografiako Ingenieritza gradua. Lanbide Heziketako irakaslea.

11. Oihane Ayestaran Oyarzabal

Administrazioa eta finantza ikasketak. Administraria. Ernai gazte mugimenduko kidea.

12. Beñat Iguaran Amondarain

Goi-mailako ikasketak: Mekanizazio teknikaria. CAF-eko montatzailea. Bertsolaria eta Harituz Bertsozale elkarteko partaidea.

13. Maite Barandiaran Lasa

Erizaintzan Doktorea. EHUko irakaslea. Oinkari dantza taldeko sortzailea, festa batzordeko kidea "Santioak kantari" ekimenaren antolatzailea.

Ordezkoak:

1. Juan Luis Irazusta Diaz

Lanbide Heziketa ikasketak. Komertziala. EH Bilduko zinegotzia 2011-2015 legealdian.

2. Ixone Lahidalga Ugarte

Soziologian lizentziatua. Haur Hezkuntzan diplomatua. Haur hezitzailea.

3. Julen Zelarain Errasti

Elektronika ikasketak. AAM-ko kide eta preso politiko ohia. Flemingoak guraso elkarteko kidea.

EH Bildu Amasa Villabona erabiltzailearen argazkia.

Amasa Villabonako EH Bildutik gure poza eta harrotasuna agertu nahi dugu lortu dugun hautagai zerrenda bikainagatik. Talde anitza eta prestatua da, bertakoa, eta garrantzitsuena: Amasa-Villabonaren alde lan egiteko gogo eta ilusioz gainezka dauden 16 herritar konprometitu aurkezten ditugu. 

Maiatzeko udal eta foru hauteskundeek aukera berriak ekarriko ditu eta EH Bildu prest eta gogotsu dago herritarrekin batera, politika egiteko beste modu askoz parte hartzaile, garden eta demokratikoago bat martxan jartzeko. Herritarren beharrei erantzungo dien udal bat jarri nahi dugu martxan eta konbentzituta gaude datozen 4 urteetan garatu beharreko udalgintza lanerako pertsona talde egokiena dugula.

 

Amasa Villabonako EH Bilduren Udal-Taldeak ekimen berri bat abiatu, eta pasa den maiatzaren 22an Gipuzkoako Batzar Nagusietan onartutako Zerga Erreformaren aurkako Mozio bat aurkeztu zuen udalean. Zerga erreforma horren bidez, Gipuzkoako pertsona aberatsenek, diru gehien dutenek, zerga gutxiago ordaindu beharko dituzte eta ondorioz, Foru Ogasunak jasoko duen diru kopurua nabarmen jaitsiko da.

Honako neurriak herritarren gehiengoaren iritziaren kontra hartutakoak direla pentsatzen dugu eta ondorioz, Amasa Villabonako PNV eta PSEri ausartak izatea, diziplina partidistak albo batera uztea eta herritarren gehiengoak pentsatzen duenarekin bat egin eta mozio honen alde egitea eskatu genien. Mozioak jasotzen dituen puntuak edonorentzat onargarriak izan behar luketela pentsatzen genuen.

Udaleko Osoko Bilkuran PNV eta PSEk kontra bozkatu zuten, aberatsei zergak jaitsi izana ontzat emanez.

PNVko ordezkariak, gai hau "gehiago dakitenen artean, Foru Aldundian" landu behar zela argudiatu zuen, udala ez omen da posizonatu behar gai hauetan. Nahiz eta zerga erreforma honek gipuzkoar guztioi eragingo digun, jeltzaleen ustez, udalek ezin dute ezertxoe ere esan, eta isilik geratzea tokatzen zaie. Zer nolako aitzakia merkea, egia ez esateko: PNV izan da erreforma honen bultzatzaile nagusia eta aberatsenei, enpresari handiei, kontu korronteetan miloiak dituztenei zergak jaistea bere ADNan doa, eskuineko ideologia neoliberala duten alderdi guztietan bezala. Baina badirudi udaletxeko jeltzaleek ez dutela hori aitortu nahi eta udalak gai honetan duen konpententzia eza jartzen dute gaiaz ez hitz egiteko aitzakia gisa.

Are penagarriagoa da PSEko M.L. Arija zinegotziaren jarrera. EH Bildutik mozioaren kontra bozkatzearen arrazioa galdetu ondoren, bere erantzuna hau izan zen "por pura disciplina de partido". Badirudi gai honetan ezeroso dagoela Arija, dagoeneko hamarkadak dira PSOEk ezkerroko alderia izateari utzi zionetik, baina badirudi Arija oraindik ez dela enteratu, edo ez duela ikusi nahi. Gero diskurtso aurrerakoi eta ezkertiarrekin ahoa betetzen zaio, baina egiaren orduan, disziplinaren izenean ez du inolako arazorik gipuzkoarron gehiengoaren interesen kontra aritzeko. Patetikoa.  

Hau da EH Bilduk Amasa Villabonako udalean aurkeztu zuen, eta PNV eta PSEk kontra bozkatu zuten MOZIOA osorik:

ARRAZOIEN AZALPENA

Pasa den maiatzaren 9an izandako Gipuzkoako Batzar Nagusietako osoko bilkuran, EAJ-PSE koalizioak eta PPk, Gipuzkoako aberatsenei zergak jaistea erabaki zuten.

Hemendik aurrera, Gipuzkoako 38 aberatsenek, batez beste, 408.316 euro gutxiago ordainduko dute urtero eta guztira 15, 5 milioi euro gutxiago jasoko ditu Gipuzkoako Foru Ogasunak.

Bitartean, EAJ-PSE koalizioak murrizketa sozialak egiten jarraitzen du, adibidez, urteko 300 eta 1000 euro arteko murrizketa pairatu dute mendekotasuna duten 4.330 familia gipuzkoarrek.

Normala den bezala, Gipuzkoako herritarren gehiengoarentzat honakoa kontu eskandalagarria da. Gipuzkoako %1 aberatsenentzat, berriz, ospatzeko moduko erabakia izan da, aberatsenek, milioika euroko kontu korronteak dituztenek, badute zer ospatua. Izan ere Fortuna Handien gaineko Zerga bertan behera garatzeko erabakia hartu dute EAJ-PSE eta PPk, eta ondorioz zerga sistema ezberdin bat indarrean sartuko da, askoz insolidario eta injustuagoa.

Datuak argiak dira: Zerga erreformaren memoria ekonomikoaren arabera, Foru gobernuak egin nahi duen aldaketarekin “zerga ezkutua” delakoa (“escudo fiscal”) baliatuko luketen 875 zergadun aberatsenek batez beste 37.794 euro gutxiago ordainduko liokete Ogasunari. Guztira, 33 miloi gutxiago jasoko lirateke ezkutuaren eraginez, diru hori ezinbestekoa denean herritarren ongizatea bermatzeko.

Baina memoria ekonomikoan are eta larriagoa den beste datu bat ere ematen da: zehazki, 12,8 miloi euro baino aberastasun handiagoa duten 38 pertsonetako bakoitzak, batez beste, 408.316 euro gutxiago ordainduko lioke urtero Ogasunari. Hau da, EAJ-PSE koalizioak Gipuzkoako 38 aberatsenei urtero 15 miloi t’erdi oparituko dizkie.

Baina gehien dutenen zergak jaistea larria bada, are larriagoa da, aldi berean gehien behar dutenei murrizketak ezartzea. Foru Aldundiko datuei erreparatuz, Gipuzkoan 16.697 pertsonek jasotzen dute mendekotasun prestazioren bat. Urtarrilaren 1etik indarrean sartu den Foru dekretuarekin, 16.697 onuradunetatik % 27a, hau da, 4.330 pertsonak, murrizketak jasaten hasi dira. Gainera, mendekotasun handiena (III. Gradua) dutenek pairatuko dituzte murrizketarik handienak, hau da, diru-laguntzak gehien behar dituztenek.

Esate baterako, mendekotasuna duen pertsona etxean zaintzeagatik diru-laguntza jasotzen duten senideei hilero 25 eta 80 euro arteko murrizketa aplikatu zaie urtarrilaz geroztik, hau da, 300 euro urtean 1. gradukoen kasuan eta 1000 euro urtean 3. gradukoetan. Eta kontuan hartu behar da laguntza hauek, batez ere, senarra zaintzen ari den emakume pentsiodunek kobratzen dituztela.

Datuak argiak dira. Ez dira EH Bilduk asmatutako datuak, ezta sindikatu edo eragile sozialen datuak ere. Hauek guztiak Foru Aldundiak emandako datu ofizialak dira.

MOZIOA

1. Amasa Villabonako udalak, ez du zerga erreforma hau babesten eta ondorioz, ez du bat egiten Gipuzkoako aberatsenei zergak jaisteko erabakiarekin.

2. Amasa Villabonako udalak Fortuna Handien gaineko Zerga bere horretan mantentzea eskatzen du, zerga hau (beste askorekin batera) aberastasunaren banaketa solidario eta justua egiteko trena egokia dela pentsatzen baitu.

3. Amasa Villabonako udalak ez du babesten aberatsen mesedetan ezarri den "zerga ezkutua" edo "escudo fiscal" delakoa.

4. Amasa Villabonako udalak mendekotasuna duten familiek jasotzen dituzten diru- laguntzetan murrizketarik ez egitea eskatzen dio Foru Aldundiari.

5. Amasa Villabonako udalak Mozio hau Gipuzkoako Foru Aldundiari eta Gipuzkoako Batzar Nagusietako mahaiko lehendakariari helaraziko dio.

 

 

EH BILDU UDAL-TALDEA

Amasa Villabonan, 2018ko maiatzaren 22an

   

Amasa-Villabonako EH Bilduko hauteskunde lantaldeak amaitutzat eman du azken hilabeteetan garatutako maiatzaren 26ko udal hauteskundeetarako hautagaien zerrenda osatzeko prozesua.

Beraz, dagoeneko zehaztu da zeintzuk izango diren Beatriz Unzue alkategaiarekin batera EH Bilduren hautagaitza osatzeko proposatuko diren beste 15 herritarrak. Hautagaitza osoa ofizialki onartua izan dadin bete beharreko azken baldintza, Amasa-Villabonako EH Bilduren oinarri sozialaren oniritzia edo berrespena jasotzea izango da.

Datorren ostiralean 19:00etan Villabonako Gurea zinean egingo den ekitaldi publikoan ezagutaraziko da zerrenda osoa eta bertan berrespena emateko aukera izango da.

Ekitaldiaren lehen minutuetan azken hilabeteetan hautagai zerrenda eta Herri Programa osatzeko EH Bilduko lantaldeak egindako ibilbidea azalduko da eta programan jasoko diren proposamen aipagarrienak ere aurkeztuko dira. Ondoren, hautagai guztien banan banako aurkezpena egingo da eta amaieran hautagaitzaren berrestea gauzatuko litzateke.

Amasa-Villabonako EH Bildutik ekitaldira gerturatzeko gonbidapena luzatu nahi diegu herritar guztiei. 

Maiatzeko udal eta foru hauteskundeek aukera berriak ekarriko ditu eta EH Bildu prest, ilusioz gainezka eta gogotsu dago herritarrekin batera, politika egiteko beste modu askoz parte hartzaile, garden eta demokratikoago bat martxan jartzeko. Herritarren beharrei erantzungo dien udal bat jarri nahi dugu martxan eta horretarako lanerako prest dagoen pertsona talde prestatua dugu.

Ekitaldiaren deialdi-kartela:

011kartela kalitate txarra

Astelehenean Villabonako udaletxean izandako osoko bilkuran, Asuncion klinikako langileen ordezkariek aurkeztutako mozio bat eztabaidatu eta bozkatu zen. Amasa Villabonan agintea duten PNV eta PSEko ordezkariek, mozioaren kontra bozkatu zuten eta inolako konpromisorik jasotzen ez duen kontra-mozio bat aurkeztu eta onartzea erabaki zuten.

Udaletxeko osoko bilkurako 6. puntuan jorratu zen Asuncion klinikako langile batzordearen proposamena. Aurretik, hainbat langilek kontzentrazioa egin zuten udaletxeko atarian eta horietako batzuk pleno aretora igo ziren osoko bilkurara. Gogoratu behar da klinikako langileak lan baldintzak hobetuko dituen hitzarmen duin baten alde borrokatzen ari direla 2017ko abendutik eta asko izan direla egin dituzten protesta ekintzak (paroak, grabak, manifestazioak, kontzentrazioak...). Udalbatzako ordezkari politikoen aurrean, langile batek aurkeztutako mozioaren defentsa egin zuen, mozioa aurkeztearen arrazoiak azalduz eta azken urteetan Asuncion klinikan eman diren hainbat gertakariren inguruko azalpenak emanez. Luze hitz egin zuen eta besteak beste klinika pribatua izateak sortu dituen arazoak aipatu zituen; langileen baldintzen okertzea, prekarietatea, diru publikoaren kontrol falta, Montoya klinikako jabeak egindako negozioak eta diru desbideraketak etab.

Hau da Asuncion klinikako langile batzordeak aurkeztutako mozioa, Amasa Villabonako udalbatzak bozkatzeko:

mozioa

 

Lehenik eta behin, Arantza Lopez EH Bilduko zinegotziak hartu zuen hitza (bera ere Asuncion klinikako langilea izan da urte luzez eta ondo ezagutzen du egoera) eta langileen ordezkariaren ildo beretik, langileen baldintza eskasak kritikatu zituen eta beste eskualde guztiek duten bezala, Tolosaldeak ere ospitale publiko bat edukitzeko eskubide osoa duela aldarrikatu zuen. Montoya klinikaren jabearen jokabidea gogor kritikatu zuen Lopezek, Jaurlaritzatik jasotzen duen diru publikoari esker aberasten aritzea leporatuz, eta horren aurrean Eusko Jaurlaritzak beste alde batera begiratzen duela salatuz. Arantza Lopezek azaldu zuenez, EH Bilduk urteak daramatza Asuncion klinikaren publifikazioa eta langileen baldintzak Osakidetzakoekin parekatzea defendatzen eta TOPA eragilearekin eta sindikatuekin elkarlanean aldarrikapen hauek defendatu ditu Tolosaldeko udaletan, kaleetan eta baita Gasteizko legebiltzarrean ere.

Ondoren, Eneko Urdangarin PNVko zinegotzi andoaindarrak hartu zuen hitza eta mozio honen aurrean PNV eta PSEk aurkeztutako kontra-mozioa defendatu zuen, testu hori langileek aurkeztutakoa baino egokiagoa eta eraginkorragoa izango dela argudiatuz. Langileekin hitz egiteko prest agertu zen, baina ez horrela, plenoa bezalako bilera irekietan. Bestalde, langileei leporatu zien lehenago ez jarri izana Villabonako PNVrekin harremanetan beren azalpenak emateko. 

DbOEbuUXUAA4fSnAsuncion klinikako zenbait langile, hitzarmen duin bat eskatzeko egindako paro batean

Interbentzio honen ondoren, EH Bilduko Xabat Laborde zinegotziak hartu zuen hitza eta langileek aurkeztutako mozioaren aldeko jarrera agertu zuen, Tolosaldeko edozein arduradun politikok sinatu beharko lukeen mozio bat dela esan zuen Labordek. PNV eta PSEri galdera zuzena bota zien Labordek: "Mozio honen kontra bozkatzea erabaki duzue, beste testu alternatibo bat aurkeztuz, zergatik? langileek aurkeztutako mozioaren zein punturekin ez zaudete ados?" eta Jeltzaleei zuzendu zitzaien jarraian "izan zaitezte ausartak eta esan ezazue benetan pentsatzen duzuena, klinika gaur egun dagoen bezalaxe oso ondo dagoela eta ez duzuela Tolosaldearentzat ospitale publiko bat nahi, izan zaitezte ausartak eta esan iezaiezue langileei aurpegira, hori baita egia". Gainera jendea engainatu nahi izatea leporatu zion Labordek Urdangarin jaunari, "zuek aurkeztutako testu hau, langileek aurkeztu dutena baina haratago doala sinestarazi nahi diguzu? mesedez! hori ez du inork sinesten". Eskuineko alderdi guztiek egiten duten bezala, osasuna, eskubide unibertsala dena, pribatizatu nahi izatea leporatu zion Labordek PNVri.

Azkenik bozkatzeko momentua iritsi zen eta Asuncioneko langileek aurketutako mozioa ez zen onartua izan, EH Bilduren aldeko 6 bozka izan zituen eta PNV-PSE koalizioaren kontrako 7. PNV-PSEk aurkeztutako kontra-mozioak aldeko 7 bozka izan zituen eta EH Bildu abstenitu egin zen.       

BIDEOA: https://www.youtube.com/watch?v=bD7v1_d3zS8

Urtea hasi bezain pronto, maiatzeko udal hauteskundeetarako herri programa osatzeko dinamika zabal bat jarri du martxan Amasa-Villabonako EH Bilduko hauteskunde lan-taldeak. Amasa-Villabonarako herri programa eraginkor eta eraldatzaile bat osatzeko hainbat molde eta tresna jarri ditu martxan EH Bilduko lan-taldeak:

Herriko elkarte eta eragileekin aldebiko bilerak: 

2018ko ekainean hasita, hilabete luze hauetan Amasa-Villabonako mota guztietako elkarte eta eragileekin bilerak egin dira. Bilera hauen helburu nagusia, arlo ezberdinetan lan egiten duten elkarteetako kideen iritziak, ideiak, zalantzak, kezkak, proposamenak etab. entzun eta jasotzea izan da. Oso prozesu aberasgarria izan da, elkarteetan lanean ari diren pertsonek inork baino hobeto ezagutzen baitute herriko arlo bakoitzeko (kultura, kirola, aisialdia...) egoera eta egon daitezkeen arazoak. Beraz, bilera guzti hauek Amasa-Villabonako egoeraren analisi edo diagnostiko zehatz bat edukitzeko oso lagungarriak izan dira.

Arloz arloko lan-bilerak EH Bilduren militantziarekin eta oinarri sozialarekin:

Urtarriletik hasita, guztira 13 lan-bilera egin dira: Herrigintza, gazteria, euskara, kirola, hezkuntza, feminismoa, osasuna etab. Lan-bilera hauetan, aurretik egindako arlo bakoitzeko diagnostikoa aurkeztu eta etorkizunera begira mahai gainean jar daitezkeen egitasmo eta proiektu zehatzak identifikatzea izan da helburua. 2019-2023 legealdian garatu daitezkeen ildo zehatzak proposatu, eztabaidatu eta (horrela erabaki bada) onartu dira. Beraz, lan-bilera guzti hauen ondoren, herri programaren lehen zirriborroa osatu ahal izango da.

Herritarren proposamenak jasotzeko tresnak:

- Koaderno zuria-ren dinamika: Azken asteetan Beatriz Unzue alkategaia herritarrek egindako proposamenak biltzen ari da berarekin daraman koaderno zurian. Bestalde, dagoeneko bi aldiz ezarri da koaderno zuria Villabonako kaleetan (lehenengoa kiroldegi kanpoaldean eta bigarrenez Malkar plazan). Dinamika honek jarraipena izango du hurrengo asteetan eta EH Bildutik koadernoa herriko zein tokitan ezarriko den jakinaraziko da.

- Herritarren ekarpenak biltzeko beste bitartekoak: Koaderno zuriaz gain, Amasa-Villabonako EH Bilduk herritarren parte hartzea ahalbidetu eta errazteko beste herraminta batzuk ere martxan jarriko ditu hurrengo asteetan. Besteak beste, herri osoan zabalduko den galdetegi edo inkesta bat prestatzen ari da hauteskunde lan-taldea.

Amasa-Villabonak behar duen herri programa osatzeko lanean buru belarri murgilduta dago EH Bildu, gure herriak hori eta gehiago merezi baitu. Aukera berriak daude mahai gainean eta aukera horiek baliatzeko eta Amasa-Villabona justu, parekide, alai, solidario, euskaldun eta duina eraikitzeko gogo biziz lan egiten jarraitzeko borondate irmoa adierazi dute EH Bilduko kideek.


Amasa-Villabonan 2019ko otsailaren 26an

 

Maite Izagirre alkateak zuzentzen duen PNVren udal gobernuaren erabakiz, aurrerantzean herriko elkarte eta eragileek antolatzen dituzten ekintzetarako ezingo dute Villabonako frontoia erabili. Erabaki hau aldebakartasunez hartu du alkateak edota bere taldeak, beste talde politikoek parte hartzen duten udaleko organoetan ezertxo ere aipatu gabe.

Aurreko urteetan ez bezala, BeerToki artisau garagardo azokaren antolatzaileei (eskaera egin eta 3 hilabetera) frontoia erabiltzeko baimena ukatu izanak erreakzioa ekarri du eta herriko elkarte eta eragile gehienek babestu duten idatzi bat kaleratu dute. Idatzi horretan udal gobernuaren jarrera debekatzailea salatu eta frontoiaren erabilera publikoa defendatzen da, hau da udalari egiten zaion eskaera: "Udalak ezarritako debekuak bertan behera uztea eta orain arte bezala, herriko elkarte eta eragileek Behar Zana frontoia erabili ahal izatea, nahi dituzten ekintzak antolatzeko". Idatzi honen aldeko sinadura bilketa bat ere abiatu da norbanakoek ere bere atxikimendua eman ahal izateko. Sinadurak biltzeko hainbat leku ezarri dira herrian zehar: Lainoa eta RK tabernetan, Amasa kafetegian, Errota txiki eta Arroako Labezain okindegietan, Basajaun liburu dendan eta Kazetarian. 


Amasa Villabonako EH Bilduk bat egiten du frontoiaren erabilera publikoaren aldeko idatziarekin

Hau da EH Bilduk sare sozialetan argitaratu duen iritzi laburra:

Ulertezina iruditzen zaigu udalak herriko elkarteei frontoia erabiltzeko baimenik ez ematea. Herrian antolatzen diren ekimenak lagundu beharrean, traba, oztopo eta debekuak ezartzeak ez dauka zentzurik. Beraz, bat egiten dugu frontoiaren erabilera publikoaren alde herriko hainbat elkarteren babesarekin, Beertokik abiatutako sinadura bilketarekin. Debekurik ez!

 

 

Beatriz Unzue Esnaolak, Amasa-Villabonako EH Bilduren hautagaiak honako mezua zabaldu du sare sozialen bidez: "Gaurtik aurrera, Koaderno zuri bat eramango dut soinean, herritarron behar, kezka eta proposamenak bertan jasotzeko."

Ekimen berri honekin, EH Bilduko alkategaiak herriko kaleetan jendearekin egon eta herritarren kezkak, kritikak, proposamenak edota ideiak jasoko ditu koadernoan. Ondoren, bertan jasotako ekarpenak EH Bilduko hauteskunde lan-taldean aurkeztuko dira eta guztiek erantzun bat jasoko dute.

Modu horretara, herritarren parte hartzea sustatu nahi du EH Bilduk eta honakoa ez da zentzu horretan garatuko den ekimen bakarra izango, hurrengo aste eta hilabeteetan herritarren ekarpenak jasotzeko beste hainbat tresna (galdetegiak, ekarpenak jasotzeko e-posta helbidea etab.) jarriko baititu martxan koalizio abertzaleak.

Deialdia: Otsailaren 8an, ostirala, 17:30etatik aurrera, Olaederra kiroldegi aurreko geltokian. Bertan Beatriz Unzue alkategaia eta EH Bilduko hainbat kide izango dira, herritarren ekarpenak jasotzeko ezarriko den postuan. Postu hau herriko beste hainbat lekutan kokatuko da datozen asteetan.

BEATRIZ KUADERNOA

 

Amasa Villabonako EH Bilduko udal taldeak mozio bat osatu eta ofizialki erregistratu du udalean, testua datorren martxoaren 21eko osoko bilkuran aurkeztu, eztabaidatu eta bozkatuko da. Mozio honen bidez, Donostialdea, Buruntzaldea eta Bidasoa eskualdeetan eraikitzekoak diren merkatal-gune handi berriei, merkataritza eta lurralde plan sektoriala onartu bitartean, baimenik ez ematea eskatzen da. EH Bilduren ustez, merkataritza sektoreak bizi duen egoera delikatua kontuan izanda, Amasa Villabonako udalak ezin du afera honetan geldirik eta beste alde batera begira geratu. Ondorioz, martxan dauden plan horiek aztertzeko eskatzen dio EH Bilduk udal gobernuari, beti ere gure herriko merkataritza sektorea babesteko helburuarekin.

Hau da Amasa Villabonako EH Bilduk mahai gainean jarri duen mozioa:

MERKATARITZA-GUNE HANDIAK ETA LURRALDE-PLAN SEKTORIALA

Gure lurraldearen antolamenduan berebiziko garrantzia dute merkataritza-ekipamenduek. Sektore estrategikoa da, ekonomiari bete-betean eragiten diona, eta gure kontsumo eta bizi ohiturak errotik baldintzatzen dituena.

Azken aldian maiz iristen zaizkigu merkataritza-gune handiei buruzko albisteak. Gune berrien proiektuak nonahi sortu dira. Donostia inguruan, ekialdetik mendebaldera, ez dira gutxi proposatu diren egitasmoak: Zaldunborda, Illunbe, Garbera, Belartza, eta beste hainbat. Gutxi gorabeherako estimazioa eginda, esan daiteke horiek gauzatuz gero beste 210.000m² gehiago okupatuko liratekeela merkataritza-gune handietarako. Donostialdea, de facto, korridore komertzial handi bat bihurtuko litzateke.

Paradoxikoki, handitzeko joera hori ez dator bat mundu zabalean, eta guregandik gertu ere, nabarmentzen den ereduaren krisiarekin. Gaur egun, merkataritza-guneak ixten ari dira. Joera orokorra da, bestelako eredu batzuek (bereziki online merkataritzak) hartu duten indarrarengatik.

Honetaz gain, herrietako merkataritza txikiaren egoera gero eta zailagoa da eta milaka lanpostu galdu dira azkeneko hamarkadetan Gipuzkoa osoan. Gainbehera honek, eragin ekonomikoa izateaz gain, gure hiri zein herri ereduan izugarrizko eragina du ikuspegi sozial, energetikoa, edo eta mugikortasunari dagokienez.

Egoera honetan, proiektu berri ugarien presakako tramitazioek desestabilizazioa ekarri dute. Inoiz baino beharrezkoagoa da sektorea erregulatzea, udalez gaindiko planifikazioa, eta neurriz kanpoko handitze-eskaera horiei muga jartzea. Inoiz baino beharrezkoagoa da merkataritza, kontsumo eta bizi-ohiturak zaintzea, eta gure herrietako izaera eta bizitza babestea.

Hain zuzen ere, Eusko Jaurlaritzaren Ingurumen, Lurralde Plangintza eta Etxebizitza Sailak aurkeztua du “Euskal Autonomia Erkidegoko Ekonomia Jardueretarako Lurzoru Publikoa Eta Merkataritza Ekipamenduak Sortzeko Lurralde Plan Sektorialaren Berrikuspen Partzialaren Aurrerakina, Merkataritza-Gune Handien Antolamenduari Dagokionez” izeneko dokumentua. Dokumentu horrek aukera eman behar luke merkataritza-guneen ugaritzea eta handitzea arautzeko edota mugatzeko, udalerriz gaindiko ikuspegi batetik.

Horrenbestez, honako puntu hauek onartzea eskatzen diogu Udalbatzari:

1- Eusko Jaurlaritzaren Ingurumen, Lurralde Plangintza eta Etxebizitza Sailak aurkeztu duen merkataritza-gune handien antolamenduari buruzko aurrerakinaren azterketa eta berrikuspena egingo du Amasa Villabonako Udalak, eta dokumentu horri ekarpenak aurkeztuko dizkio, sektorearen gaindimentsionatzea geldiarazteko eta merkataritza-eskaintza ez desorekatzeko.

2- Eusko Jaurlaritzaren Ingurumen, Lurralde Plangintza eta Etxebizitza Sailari eskatzen diogu merkataritza-gune handien antolamenduari buruzko lurralde plan sektoriala behin-betiko onartu arte ez ditzala baimendu tramitazio-bidean dauden eskaerak eta Gipuzkoa ekialdeko udalei eskatzen diegu ez aldatzea egungo planeamendua horrelakoei bide emateko. Izan ere, sektorea erregulatzeko prozedura martxan dagoen bitartean, guztiz kaltegarria da ekimen berriei bide ematea.

3- Erabaki honen berri helaraziko zaio Eusko Jaurlaritzaren Ingurumen, Lurralde Plangintza eta Etxebizitza Sailari.

 

Amasa Villabonan, 2018ko martxoaren 16an
EH Bildu udal-taldea

Beatriz Unzueren hautagaitzak Amasa-Villabonako EH Bilduren Hauteskunde Batzordearen aho bateko babesa jaso du.

Amasa Villabonako EH Bilduk amaitutzat eman du alkategaia hautatzeko prozesu parte hartzailea eta pasa den azaroaren 23an Berdura plazan egindako ekitaldi jendetsuan aurkeztu genuen gure alkategaia amasa-billabonatarren aurrean:
BEATRIZ UNZUE ESNAOLA

Beatriz amasan

Jaiotza data: 1974-01-09 (44 urte)

Ikasketak: FP II: Informatica de gestión
Lanbidea: Idazkaria (Indarbi Electricidad SL enpresan)
Ezkondua da eta bi alaba ditu.


Emakume langilea eta adeitsua da, mundu guztiarekin ondo eramaten den horietakoa. Herriko hainbat elkartek antolatutako ekimenetan parte hartzen du eta laguntzen ere aritzen da: Aizkardi elkartearen mendi ibilaldietan, emakumezkoen pala txapelketak eta bolo tiraldiak, gabonetako haurren kabalgatan, Amasako jaietan, ikastolako gurasoekin ekintzak antolatzen... Kirolaria ere bada eta Behar Zana elkartearekin lehiatzen du palan eta bolo tiraldietan.

Amasa Villabonako EH Bilduko herrigintza taldeko kidea da 2015etik. Bere konpromisoa erakutsi du hasieratik eta EH Bildun bere ekarpena egin du azken urte hauetan. Emakume gazte eta indartsua da, konpromiso politikoa erakutsi duena, abertzalea, euskaltzalea eta herrigintzan lan handia egin duena.

Ondorioz, Amasa Villabonako EH Bilduko kideek, aho batez bere aldeko hautua egin dute Amasa-Villabonako alkategaia izan dadin. Modu honetan, pasa den ekainean abiatutako udal-hauteskundeetarako alkategaia hautatzeko prozesu parte hartzailea amaitutzat eman du Amasa Villabonako EH Bilduk.

Guztira 55 herritar ezberdin izan ziren alkategai izateko proposatuak eta EH Bilduren hauteskunde lan-taldeko kideak guztiekin banan-banan hitz egin ondoren, azkenik aukeraketa prozesua amaitu da.

Beatriz Unzuek lehen momentutik adierazi zuen aurrera urrats bat eman, eta EH Bilduren alkategaia izateko konpromisoa hartzeko borondatea.

Amasa Villabonako EH Bildutik gure eskerrik beroenak eman nahi dizkiegu prozesu honetan modu batera edo bestera parte hartu duten guztiei eta bereziki eskertu nahi diegu beren proposamena egin duten ehunka herritarrei.


Amasa-Villabonan, 2018ko abenduaren 11n

EH BILDU AMASA VILLABONA

Sararar Errepublika Arabiar Demokratikoa (SEAD) sortu zenetik 42 urte bete direnean, astelehen honetan izandako Amasa Villabonako udalbatzak, PNV eta EH Bilduk aurkeztutako mozioa onartu du. Bi alderdiek Saharar Errepublika aitortu eta Frente Polisarioari soilik onartzen diogu herri honen ordezkaritza zilegi bakarra, era berean Autodeterminazio eskubidea eta erreferenduma babestu ditugu. PSEko ordezkariak abstentziora jo zuen, udalbatzan inolako azalpenik eman gabe. 

Hau da Amasa Villabonako PNV eta EH Bilduk modu bateratuan aurkeztu eta onartutako mozioaren edukia:

SEADen 42. URTEURRENARI BURUZKO ERAKUNDE-ADIERAZPENA

Egun gutxi barru, Saharar Herriak Saharar Estatuaren (SEAD) urteurrena ospatuko du. Hain zuzen ere, 42 urte beteko dira estatua eratzeko eta eraikitzeko faseak arrakastaz gainditu eta herriak askatasuna eta erabateko subiranotasuna lortu zuenetik.

Berrogeita bi urte hauetan, Saharar Herriak bere identitate nazionala finkatzea lortu du, ahaleginari eta batasun nazionalari esker. Saharar guztiak harro egoteko moduan daude, euren erakundeek egoki funtzionatzen baitute erbestearen baldintza gogorrak eta baliabide-falta gorabehera.
Saharar Herria inoiz baino lotuago dago autodeterminaziorako eta independentziarako eskubide legitimoei, eta Marokoren aurka borrokan jarraituko du, potentzia okupatzaile hori baita Mendebaldeko Saharako errepresioaren eta baliabide naturalen espoliazioaren erantzule. 

Hori horrela, Europako Auzitegiak aurki epai bat emango du eta ziur asko legez kanpokotzat joko du EBk Marokorekin indarrean duen arrantza-akordioa, zeinaren bidez onura jasotzen baitu Europako arrantza-sektoreak eta, batik bat, Espainiakoak. Erabaki horrek ondorioak izango ditu: alde batetik, justiziak baliorik gabe utzi ahal izango du sinatutako eta berretsitako tratatu bat, Nazio Batuen dotrinan oinarritutako irizpideak alegatuz; eta, bestetik, Fronte Polisarioarentzat izugarrizko garaipen politikoa izango da.

Horregatik guztiagatik,

ESKATZEN DUGU Nazio Batuek gehiago luzatu gabe eman diezaiotela behin betiko eta bidezko irtenbidea gatazka honi. Horretarako, Saharar Herriak autodeterminaziorako eskubidea baliatu beharko du erreferendum libre eta gardena eginez, amaitzeko dagoen deskolonizazio-prozesuari buru emateko.

BERRESTEN DUGU Fronte Polisarioa dela Saharar Herriaren ordezkari bakar eta legitimoa.

EXIJITZEN DUGU Marokok berehala aska ditzala preso politiko eta kontzientzia-preso saharar guztiak, eta geldiaraz ditzala espetxeetan eta Mendebaldeko Saharako lurralde okupatuetan gertatzen diren giza eskubideen urraketak.

ESKATZEN DUGU Mendebaldeko Saharan Erreferenduma Antolatzeko Nazio Batuen Misioak (MINURSO) lan handiagoa egin dezala giza eskubideak kontrolatzen eta zaintzen Mendebaldeko Saharako lurralde okupatuetan.

ESKATZEN DUGU Espainiako Gobernuak estatus diplomatikoa eman diezaiola Fronte Polisarioak Espainian duen ordezkariari, Saharar Herriaren ordezkari bakar eta legitimo gisa; aitor dezala Saharako Errepublika Arabiar Demokratikoa; eta beharrezko egitasmo politikoak abiaraz ditzala, Mendebaldeko Sahararako Nazio Batuen Bake Planean oinarrituta behin betiko eta bidezko irtenbidea lortzeko.

SALATZEN DUGU Marokoko Gobernuak Mendebaldeko Saharako baliabide naturalak espoliatzen dituela.

ESKATZEN DUGU Mendebaldeko Saharan diharduten enpresek errespeta ditzatela, alde batetik, baliabide naturalen gaineko etengabeko subiranotasuna eta, bestetik, lurralde okupatu bateko baliabide naturalen esplotazioari aplikatu behar zaizkion nazioarteko zuzenbide humanitarioaren arauak.

GOGORARAZTEN DUGU Marokok ez duela inolako subiranotasunik Mendebaldeko Sahararen gainean eta EBk ezin duela Marokorekin akordiorik sinatu Fronte POLISARIOAren baimenik gabe. Gainera, EB behartuta dago printzipio horren eta arau horien urraketak sortzen duen legez kontrako egoera oro salatzera.

IRAGARTZEN DUGU SEAD aldarrikatu zeneko 42. urteurrenaren harira euskal erakunde eta elkarteetako ordezkariak Tindufeko errefuxiatuen kanpalekuetara joango direla Saharar Herriaren borroka justuaren aldeko konpromisoari eusteko.


Mocion prentada por los grupos políticos EH Bildu y EAJ-PNV de Amasa-Villabona

DECLARACION INSTITUCIONAL 42 ANIVERSARIO DE LA RASD

Dentro de pocos días el Pueblo Saharaui conmemorará el Cuadragésimo Segundo Aniversario de la creación del Estado Saharaui (RASD), después de haber logrado superar con éxito las fases de su fundación y edificación hacia la liberación y la plena soberanía.
En estos cuarenta y dos años el Pueblo Saharaui ha logrado consolidar una identidad nacional propia gracias a los sacrificios y a la unidad nacional; cada saharaui debe sentirse orgulloso del funcionamiento de sus instituciones nacionales a pesar de las duras condiciones del exilo yde la falta de recursos.
El Pueblo Saharaui está más que nunca apegado a sus legítimos derechos a la autodeterminación y a la independencia y continuará la lucha contra Marruecos, potencia ocupante, responsable de la represión y el expolio de los recursos naturales del Sahara Occidental.
En este contexto, el Tribunal Europeo de Justicia está próximo a emitir una sentencia en la que probablemente declarará ilegal el acuerdo de pesca que la UE mantiene vigente con Marruecos y del que se beneficia el sector pesquero europeo pero, sobre todo,el español.
Las consecuencias que se derivan de esa decisión suponen: por un lado, que la justicia pueda anular un tratado firmado y ratificado alegando criterios basados en la doctrina de Naciones Unidas; y, por otro, una gran victoria política del Frente Polisario.

Por todo ello,

INSTAMOS a Naciones Unidas a que promueva sin más dilación la solución justa y definitivade este conflicto, que pasa por elejercicio del derecho de autodeterminación del Pueblo Saharauimediante la celebración de un referéndum libre y transparente como culminación del proceso de descolonización inacabado.

REAFIRMAMOS que el Frente Polisario es el único y legítimo representante del Pueblo Saharaui,

EXIGIMOSa Marruecos que lleve a cabo la inmediata liberación de todos los presos políticos y de conciencia saharauis, y cese las violaciones de los derechos humanos en sus prisiones y en los territorios ocupados del Sahara Occidental,

SOLICITAMOS que la Misión de las Naciones Unidas para el Referéndum del Sahara Occidental (MINURSO) amplíe sus funciones y cometidos en elcontrol y seguimiento de losDerechos Humanos en los territorios ocupados del Sahara Occidental,

SOLICITAMOS al Gobierno Español que otorgue un estatus diplomático a la representación del Frente Polisario en España, como único y legítimo representante del Pueblo Saharaui;que reconozca la República Árabe Saharaui Democráticay que promueva las iniciativas políticas necesarias para lograr una solución justa y definitiva sobre la base del cumplimiento del Plan de Paz de las Naciones Unidas para el Sahara Occidental.

DENUNCIAMOS el expolio de los recursos naturales del Sahara Occidental por parte del Gobierno de Marruecos.

SOLICITAMOS a las empresas que operan en el Sahara Occidentalque respetenel derecho de soberanía permanente sobre los recursos naturales y las reglas del derecho internacional humanitario aplicables a la explotación de recursos naturales de un territorio ocupado.

RECORDAMOSque Marruecos no ostenta en ningún caso la soberanía sobre el Sahara Occidental y la UE no puede firmar ningún acuerdo con Marruecos sin el consentimiento del Frente POLISARIO. Además, la UE está obligada a denunciar toda situación ilícita que se desprenda de la violación de este principio y estas reglas.

ANUNCIAMOS que con motivo del 42 aniversario de la proclamación de la RASD representantes de las distintas instituciones y entidades vascas viajarán a los campamentos de población refugiada en Tinduf para renovar su compromiso con la justa lucha del Pueblo Saharaui.

Esta declaración se enviará a las siguientes direcciones:

a) CASA REAL ESPAÑOLA
Palacio de la Zarzuela. Carretera del Pardo s/n. 28071 Madrid
b) PRESIDENCIA DEL GOBIERNO DE ESPAÑA
La Moncloa. Avda. Puerta de Hierro, s/n. 28071 Madrid
c) MINISTERIO ESPAÑOL DE ASUNTOS EXTERIORES
Plaza de la Provincia, 1. 28012 Madrid
d) COMISIÓN EUROPEA
Federica Mogherini
Alta representante de la Unión para Asuntos Exteriores y Política de Seguridad
Rue de la Loi.Wetstraat 170. B-1049 Bruxelles/Brussel. Belgique/België
e) DELEGACIÓN FRENTE POLISARIO EN EUSKADI
Pintor Jesús Apellániz, 9 - 01008 Vitoria-Gasteiz

 

Amasa Villabonako EH Bilduk amaitutzat eman du alkategaia hautatzeko prozesu parte hartzailea eta pasa den azaroaren 23an Berdura plazan egindako ekitaldi jendetsuan aurkeztu genuen gure alkategaia: BEATRIZ UNZUE ESNAOLA.

Beatriz Unzue 

BEATRIZ UNZUE ESNAOLA

Jaiotza data: 1974-01-09
Ikasketak: FP II: Informatica de gestión
Lanbidea: Idazkaria Indarbi Electricidad SL enpresan
Ezkondua da eta bi alaba ditu.

Alkategai gisa hautatzeko arrazoi nagusiak:

Emakume adeitsua da, mundu guztiarekin ondo eramaten den horietakoa, oso jatorra. Herriko hainbat elkartek antolatutako ekimenetan parte hartzen du eta laguntzen aritzen da: Aizkardi elkartearen mendi ibilaldiak antolatzen, emakumenzkoen pala txapelketak eta bolo tiraldiak, gabonetan haurren kabalgatan, ikastolako gurasoekin ekintzak antolatzen... Kirolaria da eta Behar Zana elkartearekin konpetitzen du palan eta bolo tiraldietan (Gipuzkoako txapela jantzi zuen iaz).
Baina batez ere, EH Bilduko herrigintza taldeko kidea da eta asteroko bileretan parte hartzen du 2015etik. Bere konpromisoa erakutsi du hasieratik, 2015eko udal hauteskundeetako zerrendan parte hartu zuen baina ez zuen zinegotzi izatea lortu, hala ere, EH Bildun bere ekarpena egin nahi zuela adierazi zuen eta orduz geroztik herrigintza taldean dabil buru belarri.
Emakume gazte eta indartsua da, konpromiso politikoa erakutsi duena, abertzalea, euskaltzalea eta herrigintzan lan handia egin duena.
Horregatik guztiagatik, Amasa Villabonako EH Bilduko udalgintza eta herrigintza taldeak osatzen dituguk kideok, aho batez bere aldeko hautua egin dugu Amasa Villabonako alkategaia izan dadin.

Modu honetan, pasa den ekainean abiatutako 2019ko maiatzean izango diren udal-hauteskundeetarako alkategaia hautatzeko prozesu parte hartzailea amaitutzat eman du Amasa Villabonako EH Bilduk. Guztira 55 herritar ezberdin izan ziren alkategai izateko proposatuak eta EH Bilduren hauteskunde lan-taldeko kideak guztiekin banan banan hitz egin ondoren, azkenik aukeraketa prozesua amaitu da. Amasa Villabonako EH Bildutik gure eskerrik beroenak eman nahi dizkiegu prozesu honetan modu batera edo bestera parte hartu duten guztiei eta bereziki eskertu nahi diegu beren proposamena egin duten ehunka herritarrei.

Ofizialki alkategai izendatzeko azken pausua falta da:

Beatriz Unzue ofizialki eta behin betirako alkategai edo zerrendaburu izendatu aurretik, EH Bilduren oinarriek bere berrespena eman beharko diote https://elkarrekin.ehbildu.eus helbidean sartu, izena eman eta bertan eskuragarri egongo den bozketa sistema elektronikoaren bidez.

Honako azken tramitea amaitzen denean, publikoki jakinaraziko dugu eta oharra zabalduko dugu komunikabideetan, ordura arte ezingo dugu Beatriz Unzueren hautagaitza %100ean baieztatu.  

EKITALDIKO ARGAZKIAK:

DSC 0016

 

DSC 0022

 

DSC 0028

 

DSC 0030

 

DSC 0031

 

DSC 0033

 

DSC 0034

 

DSC 0035

 

DSC 0038

 

DSC 0042

 

DSC 0047

 

DSC 0052

 

DSC 0053

 

DSC 0061

EH Bilduko udal-taldeak 2016ko ekainean, bai, 2016ko ekainean! ofizialki eskatu zuen grabazio sistema bat ezartzea, udaleko batzarretan esandakoak ez zirelako aktan behar bezala jasotzen.

Urte terdi beranduago, azkenik ezarri da grabazio sistema berria eta udaletxeko areto nagusiko mahaian mikroak jarri dira. EH Bilduren eskaerak 2016ko azaroan jaso zuen erantzuna, eta 2017ko aurrekontuetan 20.000 euro ezarri ziren grabazio sistema hau martxan jartzeko.

2017. urtean zehar egindako ia bilkura guztietan, aurreko bilkurako akta onartzeko puntuan, EH Bildutik grabazio sistema ezartzeko eskaera gogorarazten zitzaien PNVko udal gobernuko kideei, hilabetero hilabetero. Kasu batzuetan akta onartzeko puntuan abstentzioa bozkatzea erabaki zuen EH Bilduk, aurkeztutako aktak ez baitzituen aurreko bilkuran esandako hainbat adierazpen, benetan esan ziren moduan jasotzen.

Azkenik, 2018ko urtarrilean ezarri zen grabazio sistema eta bilkura hori izan zen grabatu zen lehena. EH Bildutik harriduraz ikusi dugu aste honetan udal gobernuaren komunikaziotik (gogoratu komunikazioa edo propaganda lana egiteko Ordiziako PNVko kide bat kontratatu zuela alkateak dekretu bidez) komunikabideetara ohar bat bidali dela grabazio sistema berri eta "berritzaile" edo "pionero" bat jartzea erabaki duela adieraziz. Noski, ohar horretan ez da hau EH Bilduren eskaera baten ondorioz egin dela aipatu ere egiten eta PNVren gobernuaren iniziatiba edo erabaki bat balitz bezala saldu nahi izan dute. Beste behin, kosta hala kosta udal gobernuaren propaganda egiteko, ez dute arazorik izan egia edo errealitatea ezkutatzeko.

EH Bildutik gai honetan ere, gauzak nola izan diren argitzeko beharra ikusi dugu, herritarrek egia osoa jakin dezaten eta udaletik egiten den komunikazio praktika manipulatzaileak agerian geratu daitezen.

 

Pasa den ostiralean udal bulegoetan ofizialki aurkeztutako idatzi baten bidez, Amasa Villabonako EH Bilduk udalean eratuta dagoen Herritarren parte hartzea izeneko batzordearen ez-ohiko eta presazko bilkura bat egitea proposatu du.

Izan ere, urriaren 25ean herritar talde batek 512 sinadura aurkeztu zituen udalean eta sinatzaileek Errebote plazaren eraberritzearen proiektua definitzeko "prozesu publiko, ireki eta garden bat egitea" eskatzen dute. Pozgarria da horrenbeste herritarrek beren kezka adierazi izana eta Errebote plazaren aferan herritarren parte hartzea aldarrikatzea, horretarako onartu zen 2014an Herritarren parte hartzearen Araudia (udaleko alderdi politiko guztien babesarekin).

Eskaera parte hartze batzordeaEH Bilduko udal taldeak udal bulegoetan ofizialki aurkeztutako dokumentua.

Gure ustez, aurkeztu diren ehunka sinaduren aurrean, udalak ezin du beste alde batera begira geratu eta are gutxiago ezertxo ere gertatuko ez balitz bezala Errebote plazako obraren esleipenarekin aurrera jarraitu. Herritar askoren parte hartze eskaera bati erantzunik ez ematea onartezina litzateke eta ezikusiarena egiteak udal gobernuaren jarrera autoritario eta inposatzailea agerian utziko luke.

Aipatu behar dugu, sinadura bilketa martxan zegoen egunetan eta sinadurak aurkeztu ondoren ere, udal gobernuak Errebote plaza eraberritzeko proiektuaren esleipenaren baitan pausuak ematen jarraitu duela. Urriaren 19an sinatutako bi Alkatetza Dekreturen bidez, Maite Izagirre alkateak Errebote plaza eraberritzeko obren zuzendaritza (7.865 euro) eta osasun eta segurtasun koordinazioa (1.427 euro) esleitu zizkien bi enpresa pribaturi. Bestalde, sinadurak aurkeztu eta hurrengo egunean, proiektu honen esleipena egiteko Kontratazio Mahaiaren bilkura deitu zen alkatearen aginduz.

Hau ulertezina iruditzen zaigu eta herritarrekiko errespetu falta isladatzen du. Alkatetza honek erakusten duen egoskorkeria eta kosta hala kosta berea egiteko duen borondate itsua ere salagarria iruditzen zaigu.

Azkenik, agerian utzi nahi dugu gaur gaurkoz (urriak 29) gure eskaerak ez duela udal gobernuaren inolako erantzunik jaso. Benetan uste dugu egoera honetan logikoena Herritarren parte hartzea batzordea biltzea eta sinadura bilketaren sustatzaileen eskaera eta arrazoiak ezagutzea dela, hori da behintzat udal normal eta arduratsu batek egingo lukeena.

 

PNVren udal gobernuak, EH Bilduk aurkeztutako 16 zuzenketeta proposamenetatik 8 onartu zituen eta horregatik abstentziora jotzea erabaki zuen EH Bilduk. Azkenean onartu diren aurrekontuak, hasiera batean PNVk aurkeztutakoak baina dezente hobeak direla baloratu du EH Bilduk, eta hori EH Bilduko udal taldeak oposizio lan arduratsua eta eraikitzailea egiteari esker izan dela ondorioztatu du. Udaletxeko osoko bilkuran aurrekontuei egindako zuzenketa bakoitza banan banan eztabaidatu eta bozkatu zen eta denetarik egon zen, akordio zabaletatik, desadostasun eta eztabaida luzeetara.

Lortutako akordioak, aurrekontuetan jasoko diren EH Bilduren proposamenak

- Euskara ikasteko laguntzak handitzea:

EH Bilduk proposatu zuen bezala, aurrekontuetan 3.000 euro gehiago ezarriko dira euskara ikasten ari diren pertsonei laguntzeko. Aldaketa honekin, Amasa Villabonan euskara ikastea doakoa izango da aurrerantzean.

- Desfibriladoreak erostea:

EH Bilduren proposamenari erantzunez, udal gobernuak aurrekontuan aldaketa egitea erabaki zuen eta guztira lau desfibriladore erostea adostu zen guztien artean. Modu horretan, desfibriladore bana izango da Arratzaingo eskoletan, futbol zelaian, Olaederra kiroldegian eta Udaltzaingoan eta eskoletako irakasleei eta futbol monitoreei erabilera kurtsoak emango zaizkie aurten.  

- Udal etxebizitzak berritzeko azterketa:

Udalak Oriamendin eta Kale Nagusian dituen bi etxebizitzak oso egoera kaskarrean aurkitzen dira eta hauek berritu ahal izateko azterketa bat egitea adostu zuten alderdi guztiek. EH Bilduk eta PSEk helburu horretarako zuzenketa bana aurkeztu zuten eta azkenik denen arteko adostasuna lortu zen.

- Aniztasunaren aldeko ekintzak:

EH Bilduren proposamena onartua izan zen eta Amasa Villabonan dugun aniztasun kultural, linguistiko eta erlijiosoa ezagutu, errespetatu eta balorean jartzeko ekimenak antolatuko dira 2018an. Horretarako 3.000 euro bideratuko ditu udalak.

- "Aljibe gauak" emanaldiak:

Hau ere EH Bilduren proposamena izan zen eta PNVko udal gobernuak onartu egin zuen. Beraz, aurten ostiral gauetako lau emanaldi antolatuko ditu udalak, horretarako prest agertzen diren herriko eragileekin elkarlanean. 

- Euskararen aldeko herri dinamikak laguntzea:

Honakoa ere EH Bilduk egindako zuzenketa proposamena izan zen eta udal gobernuak ontzat eman eta aurrekontuetan txertatu zuen, Amasa Villabonan euskararen erabilera sustatzeko sortu daitezkeen dinamikei diruz lagundu ahal izateko.  

- Prebentzio programak indartzea:

Gizarte zerbitzuetako prebentzio programak indartzeko diru gehiketa bat egiteko zuzenketa aurkeztu zuen EH Bilduk, eta udal gobernuak eta PSEk proposamena onartu zuten.

- Harituz bertso elkarteari diru laguntza osoa ematea:

Elkarte honek bertsolaritza eta bertsozaletasuna jorratzen ditu Tolosaldean eta aurten Amasa Villabonan lau bertso eskola talde sortu ditu. PNVk osatutako aurrekontuetan, elkarte honek proiektu baten bidez eskatutakoa baina 1.000 euro gutxiagoko laguntza zegoen eta hau zuzentzea eskatu zuen EH Bilduk. Azkenean, EH Bilduren eskaera onartua izan zen eta guztira 4.000 euroko diru laguntza izango du Harituz-ek.

 

Desadostasunak: Baztertuak izan ziren EH Bilduren zuzenketak

- Larreako parkea estaltzeko proiektua:

EH Bilduk proiektu honen aukeraketa nola egin zen azaldu zuen, 2014an egindako lehiaketa publikoa eta parte hartze eta erabakitze prozesua goraipatuz eta bestalde herriarentzat proiektu honek duen garrantzia azpimarratu zuen. Aurkeztutako zuzenketaren bidez, proiektu hau 2018an egin daitekeela frogatu du EH Bilduk, inbertsio honetarako beharrezkoa izango den ia diru guztia, hirigintza saileko inbertsio txikietatik irtengo litzatekeelarik. PNVk ordea, ez zuen proposamena babestu, eta "proiketu honi dagokionez, zalantzak" dituztela adierazi zuten. EH Bildutik, aitzakiak jartzea leporatu zitzaien eta galdera argia bota zioten udal gobernuari: "Zergatik ez duzue argi esan nahi, ez duzuela proiektu hau egiteko inolako asmorik?" PNVtik ez zitzaion galderari erantzun.

- Etxebizitza hutsen azterketa eta diagnostikoa:

EH Bilduk Amasa Villabonan hutsik dauden etxebizitzen azterketa bat egitea proposatu zuen baina honakoak ez zuen PNVren babesik izan. Beraz, aurten ez da etxebizitza hutsen inguruko ezertxo ere egingo.

- Merkataritza mahaiari lotutako diru-partida ezartzea:

Honako proposamena ere ez zuen onartu nahi izan PNVko udal gobernuak, eta Oria elkarteari diru laguntza ematen zaiola eta alkatea beraiekin behin baino gehiagotan bildu dela esatera mugatu ziren. EH Bilduk, merkataritza sektoreak Amasa Villabonan duen garrantziagatik, udalean merkataritza mahaia sortzea defendatu zuen, merkataritzari eragiten dioten gaiak jorratu eta erabakiak hartzeko gune aproposa izango litzatekeela argudiatuz. Mahai horretatik irten daitezkeen ekimenek finantziazioa izan behar luketela ere defendatu zuten EH Bilduko zinegotziek, baina PNV eta PSEk kontrako bozka eman zuten.

- Hezkuntza mahaiarentzako finantziazioa:

Fleming herri eskolako ordezkariek hala eskatuta, udalean "hezkuntza mahaia" sortzeko konpromisoa hartu zuen PNVk. Baina ez du euro bakar bat ere jarri nahi izan mahai horretatik irten daitezkeen ekimen edo iniziatibak finantzatzeko. Oraingoan ere EH Bilduren proposamenaren aurka bozkatu zuten jeltzaleek eta PSEk. 

- Seaska haur eskolan matrikulatzeko diru laguntzak:

EH Bilduk Seaska haur eskola publikoa bultzatzeko eta matrikulazio kopuruan jasan dezakeen beherakada saihesteko asmoz, diru laguntza sistema bat ezartzea proposatu zuen. Diru laguntza hauek dagoeneko martxan daude Zizurkil eta Adunan. Proposamen honi ere ezeko botoa eman zion PNVk, nahiz eta PNVk alde bozkatu zuen Zizurkilgo udalean. Ez da erraz ulertzekoa proposamen honen kontrako jarrera, eta jeltzaleek ez zuten azalpen zehatzik eman nahi izan, "gurasoek seme-alaben eskola aukeratzeko askatasuna izan behar dute" esatera mugatuz.

- Diru laguntzak Euskal Herriko eragileei:

EH Bilduk hiru zuzenketen bidez, Udalbiltza erakundeari, Gaindegia Euskal Herriko ekonomika eta gizarte garapenerako behategiari eta Euskal Memoria fundazioari, 1.500 euroko diru laguntza bana ematea proposatu zuen. Erakunde hauek egiten duten lana azaldu eta gure herriarentzat estrategikoak diren eragileak direla baloratu zuen EH Bilduk. Hala ere, oraingo honetan ere kontra bozkatu zuten PNV eta PSEk.  

 

Amasa-Villabonako Udal Gobernuak aurkeztutako 2019. urterako aurrekontu proiektua aztertu ondoren, EH Bilduko udal-taldetik gure ustez aurrekontu hauek hobetzeko baliagarriak izango diren zuzenketa zerrenda bat osatzea erabaki dugu.
Zuzenketa edo hobekuntza hauek aurkeztearen helburu nagusia, Amasa Villabonako herritarren ongizatea bilatuko duten, herriaren beharretara egokituko diren eta udal kudeaketa egokia ahalbidetuko duten aurrekontuak onartzea da. Horretarako, gure herriak dituen beharrak eta lehentasunak kontuan izan behar dira ezinbestean.

Interesa baduzue, hemen irakurri dezakezue EH Bildutik udalean aurkeztu dugun zuzenketen DOKUMENTU OSOAhttps://issuu.com/villabonaehbildu/docs/aurrekontuak_2019_eh_bilduren_zuzen

Udal Gobernuak aurkeztutako 2019ko aurrekontuen balorazioa:

• Beste behin, herritarren parte hartzerik gabeko aurrekontuak:
Azken urteetako jokabideari eutsiz, Udal gobernuak aurrekontu proiektua osatzeko garaian, herritarren parte hartzea erabat alboratu du. Herritarrek kontuan hartzeko modukoak izaten diren proposamen interesgarriak egiten dituzte baina berriz ere udal gobernu honek ez du horretarako inolako biderik eman.

• Larreako parke estaliaren proiektua berriz ere baztertua:
Villabonako herri-gunean estalitako espazio publiko zabal baten beharra herritarren aspaldiko eskaera da, eskaera historikoa dela ere esan daiteke. Gainera Larreako parkea estaltzeko proiektu hau herritarrek zuzenean erabaki ahal izan zuten 2014an egindako parte hartze prozesu zabal baten amaieran. Horregatik, EH Bilduren iritziz honakoak lehentasunezko inbertsioa izan behar luke udalarentzat. PNVk ordea legealdi hasieratik baztertu du proiektu hau, eta ez du erabaki horren arrazoi garbirik adierazi.

• Ekonomikoki garrantzitsuenak diren inbertsioak zehaztu gabe:
2019ko aurrekontu proposamen honetan jasotzen diren bi inbertsio nagusiak, Txermingo aparkalekua eta Espaloiak eta asfaltatze lanak ezin izan ditugu behar bezala aztertu; Txermingo kasuan aparkalekua konpondu edo eraberritzeko inolako obra proiektu konkreturik ez dagoelako, eta konponketa edo asfaltatze lanei dagokienez, zehazki zer egin nahi den zehaztu gabe dagoelako.

• Gobernuaren aurrekontuak gora egin du eta beharrezkoak ez diren gastuak daude:
"Gobernua" izeneko sailaren aurrekontuak %8,60ko igoera izan du. Gure ustez bertan jasotzen diren hainbat gastu ez dira ezinbestekoak eta alferrikakoak dira. Hau litzateke Aholkularitza orokorra, Demokrazian 40 urte, Dietak goi karguak edo protokolo gastuak partiden kasua.

• Etxebizitza politiketan 0 euro:

Nabarmena da gaur egun etxebizitza duin bat izateko zailtasun eta oztopo handiak daudela Amasa Villabonan ere, eta gazteen emanzipazioa (lehen etxebizitza izatea) ia ezinezkoa bilakatu da. Alokairuen prezioen gorakada izugarriak, etxebizitza bat alokatzea luxu batean bilakatu du eta egoera horren aurrean erakunde publikoek ezin dute ezer egin gabe geratu. Arazo hau da gizarte arloan dugun erronka garrantzitsuenetakoa baina udal gobernu honek ezer ez egitea proposatzen du eta ez du euro bakar bat ere bideratuko etxebizitza politika aktiboak garatzeko.

• Nazio eraikuntza baztertzen duten aurrekontuak:

Aurrekontu hauetan, aurreko legealdian ez bezala, Amasa Villabonako udalak ez die inolako diru laguntzarik eskainiko Euskal Herriaren nazio eraikuntzan ekarpen garrantzitsua egiten duten hainbat eragileri.

• Kultura eta Gizarte Zerbitzuetako aurrekontuak nahikoa egokiak dira:
2019ko aurrekontu proiektua aztertuta, alor positiboak ere ikusi ditugu eta horiek aitortzea gizalegezkoa da. Aurrekontu proiektu honetan kultura eta gizarte zerbitzuen sailetan esfortzu ekonomiko nabarmen bat egin dela antzematen da.

Amasa Villabonako EH Bilduk aurkeztu dituen zuzenketen laburpena: 

1. Larreako parkea estaltzeko proiektua: 196.000€

Legealdi osoan zehar behin eta berriz errepikatu dugun bezala, gure ustez proiektu hau gauzatzea hirigintzako inbertsioen ataleko lehentasuna izan beharko litzateke.

LARREA PARKE ESTALIALarreako haur parkea estaltzeko herritarren boto gehien jaso zuen proiektua, "Rayuela" izenekoa

2. Parekidetasuna: Berdintasun Batzordea: + 4.500 euro.

EH Bildutik "Berdintasunaren aldeko batzordea" sortzea proposatzen dugu. Bilgune honetan udaleko alderdi politikoak, mugimendu feministako ordezkariak eta udal teknikari batek parte hartuko lukete gutxienez. Mahai honen eginkizun nagusia, udalak parekidetasuna sustatzeko ezarritako aurrekontua kudeatzea izango da. Bertan erabakiko litzateke berdintasunaren alde udalak zer egingo duen 2019an. Berdintasunaren alde urrats sendoak eman nahi baldin baditugu, ezinbestekoa izango da udalaren eta herri mugimendu feministaren arteko elkarlana eta horretarako proposatzen dugu hau.

albisterako m82018ko martxoaren 8ko mobilizazio jendetsua Villabonako kaleetan

3. Merkataritza batzordearen sorrera: 3.000 euro

Merkataritza da gure herriko sektore ekonomikorik garrantzitsuena eta gizarte ikuspegi batetik ere funtsezkoa da herria "bizirik" mantentzeko. Gure herriko merkataritza sustatzeko ere, udalaren eta merkatarien arteko elkarlana ezinbestekoa da eta horretarako udalean Merkataritza batzordea sortzea proposatzen dugu. Batzorde honek asko lagunduko luke merkatariak-udala elkarlan horretan, koordinazio gune aproposa izango da eta hori oso garrantzitsua da herriko merkataritza modu bateratuan sustatu eta indartzeko garaian.

4. Seaska Haur Eskola: Matrikulazioetarako diru laguntzak: 9.000 euro
Amasa Villabonako haur eskola publikoan haurrak matrikulatzen dituzten gurasoentzat diru laguntza sistema bat ezartzea proposatzen dugu. Arrazoi ekonomikoak medio, Amasa Villabonako zenbait gurasok haurrak Zizurkilera eraman dituztela antzeman da eta Seaska haur eskolako matrikulazio kopuruak behera egin du. Egoera honen aurrean udalak beste alde batera begiratu beharrean, erreakzionatzea eta matrikulazioen kostu ekonomikoa murrizteko diru laguntza sistema bat ezartzea eskatzen dugu (dagoeneko Zizurkil eta Adunan martxan dagoen sistema berbera).

IMG 20180316 112421 893Seaska haur eskolaren eraikina, Villabonako kale Berian.

5. Etxebizitza hutsak: Diagnostikoa eta ekintza plana: 12.000 euro
Lehenik eta behin Amasa Villabonan dauden etxebizitza hutsak identifikatu eta gaur egun duten egoera ezagutzeko azterketa bat egitea da proposatzen duguna. Ondoren, hutsik dauden etxebizitza horietatik ahalik eta gehien merkatura ateratzeko (bai salmenta eta baita alokairuen merkatura) politika aktiboak egin ahal izateko. Horretarako Ekintza Plan bat osatzea planteatzen dugu eta honen helburu nagusia Amasa Villabonan etxebizitza eskubidea bermatzea izango da, hau da, etxebizitza eskaintza duina eta guztientzat ekonomikoki posiblea edukitzea gure herrian.

6. Diru laguntzak: Nazio eraikuntza: 4.500 euro
Gure nazioaren etorkizunerako funtsezkoak diren hiru eragileri 1.500 euroko diru laguntza bana eskaintzea da proposatzen duguna. Eragile hauek Gaindegia (Euskal Herriko ekonomia eta gizarte garapenerako behategia), Udalbiltza partzuergoa eta Euskal Memoria Fundazioa izango lirateke.

Zuzenketa hauekin 2019ko udal aurrekontuan 229.000 euroko aldaketak egingo lirateke, kopuru honek Amasa Villabonako udalaren aurrekontua osoaren %3,5a suposatzen du.

Azkenik, Amasa Villabonako EH Bildutik zuzenketa hauen inguruan hitz egin, eztabaidatu eta adostasunak lortzeko gure prestutasuna adierazi nahi dugu. Udal gobernuaren edo PSEren aldetik horretarako borondaterik balego, ziur gaude adostasun zabalak lor daitezkeela. Beraz, oraingoz EH Bilduko udal taldeak, aurrekontuak landuko diren osoko bilkuran bere bozkek izango duten norabidea (alde, aurka edo abstentzioa) ez dauka erabakita. Gure bozka, zuzenketa hauek izaten duten harreraren eta beste talde politikoek hitz egin zein negoziatzeko erakusten duten borondatearen araberakoa izango da.

2019rako aurrekontuak datorren astelehenean, urriaren 29an, 19:00etan izango den udaleko Osoko Bilkuran eztabaidatu eta bozkatuko dira. Osoko Bilkurak publikoak dira eta herritarrei zabalik egoten dira, beraz interesa duen edonor bertaratu daiteke.

 

2018rako Udal-Aurrekontuen proiektua sakon aztertu ondoren, Amasa Villabonako EH Bilduko udal taldeak hainbat zuzenketa edo hobekuntza aurkeztea erabaki du. Zuzenketa proposamen hauek udaleko Ogasun Batzordean azaldu zitzaizkien udaleko beste alderdi politikoei eta zuzenketen azalpen zehatzak biltzen dituen dokumentua asteazkenean aurkeztu zuen ofizialki EH Bilduko udal-taldeak. 2018ko udal aurrekontuak, datorren urtarrilaren 29an, astelehena, 19:00etan izango den Udaleko osoko bilkuran jorratuko dira eta EH Bilduk egindako zuzenketa proposamenak ere bilkura horretan eztabaidatu eta bozkatuko lirateke.

Zehazki 16 zuzenketa aurkeztu ditu EH Bilduk eta jarraian hauen azalpen orokor bat egingo dugu:

Larreako parke estaliaren proiektua 2018an gauzatzea

Ikuspuntu ekonomikotik hau da egindako proposamenik garrantzitsuena, izan ere, proiektu hau behingoz egikaritzeko 201.000 euroko aurrekontua jarri du mahai gainean EH Bilduk. Zuzenketa honekin, borondatea izanez gero, parte hartze prozesu baten ondoren herritarrek zuzenean aukeratu zuten eta herriko espazio bat estaltzeko eskaera historikoari erantzuten dion proiektu hau, aurten egin daitekeela frogatzen da. Orain arte PNVk diru falta jarri du proiektu hau ez gauzatzeko aitzakia gisa, baina EH Bilduk erakutsi du hirigintza saileko beste hainbat inbertsio txiki murriztearekin nahikoa litzatekeela, zalantzarik gabe herritarrentzat lehentasunezkoa den obra hau egin ahal izateko. PSEko ordezkariak duela gutxi Larreako parkea estaltzea defendatu zuen publikoki eta orain aukera paregabea du proiektu hau errealitate bilakatu dadin, horregatik EH Bilduk zuzenketa hau aurrera ateratzeko interpelazio zuzena egiten dio PSEko zinegotziari.   

Etxebizitza hutsen diagnostikoa eta beharren azterketa

Amasa Villabonako EH Bilduko udal taldearen iritziz, funtsezkoa da udalak Amasa Villabonako etxebizitzen egoera ondo ezagutzea. Ondorioz, etxebizitza hutsak identifikatu eta gaur egun duten egoera ezagutzeko azterketa bat gauzatzea da zuzenketa honen bidez proposatzen dena. Honen helburua gaur egun hutsik dauden etxebizitza ahalik eta gehien merkatura ateratzea (bai salmenta eta baita alokairuen merkatura) bultzatzea da.
Honekin batera gaur egun Amasa Villabonan zein etxebizitza behar objektibo dagoen jakiteko azterketa bat egitea planteatzen du EH Bilduk. Etorkizun hurbilean etxebizitzak eraiki behar badira, funtsezkoa izango baita amasa billabonatarren artean zein etxebizitza behar erreal dagoen jakitea.
Udalak diagnostiko eta azterketa hauek egin ahal izateko, 15.000 euroko diru-partida bat sortzea eskatu du EH Bilduk.

Euskara: Euskaltzaleen aktibazioa. Herri dinamikak laguntzea

2018. urtea, euskaltzaleak aktibatu eta euskararen erabilera indartuko duten dinamika herritarrak pizteko urte emankorra izan daitekeela dio EH Bilduk. Galtzaundi euskara elkarteak eskualdetze prozesu bat abiatu du Tolosaldean herriz herri euskaltzaleak biltzeko helburuarekin. Bestalde, 2018ko azaro eta abenduan "Euskaraldia" ekimena izango da, 11 egunez euskaraz jardunez, Euskal Herriko txoko guztietan euskararen erabilera bultzatzeko asmoz. EH Bilduk, aukera hauek baliatu behar direla defendatzen du, Amasa Villabonan ere euskaltzaleak bildu eta martxan jartzeko helburuarekin. Zentzu honetan, Udalak ere bere ekarpena egitea proposatu du EH Bilduk,euskararen aldeko herri dinamikak laguntzeko sortuko litzatekeen 3.000 euroko diru partida berri baten bidez.

Hezkuntza eta Merkataritza Batzordeetarako finantziazioa

PNVk osatutako 2018ko aurrekontuan, aurten sortzekoak diren bi batzorde berri hauei atxikitako diru partidarik ez egotea ulertezina dela salatu du EH Bilduk. Beraz, batzorde hauetako bakoitzari 3.000 euroko partida bana lotzea proposatu du bi zuzenketen bidez. 

Oriamendiko udal etxebizitza. Berrikuntzarako azterketa

Oriamendi auzoko 6. zenbakian dagoen udal jabetzako etxebizitza egoera penagarrian aurkitzen dela azaldu du EH Bilduk, bizitoki bezala erabiltzea ezinezkoa delarik. Pisu hori egoera horretan uztea zentzugabekeria litzatekela eta udal gobernuak etxebizitza horren inguruko erabakirik hartu gabe beste urte bat pasatzen utzi nahi duela salatu dute.

Etxebizitza publiko hori berriro ere Gizarte Zerbitzuen mesedetara jartzea eskatzen du EH Bilduk eta gizarte larrialdietarako, pertsonen gizarteratzerako, edo beste gizarte-programa baten baitan erabili ahal izateko urratsak ematen hastea. Horretarako etxebizitzaren berrikuntza burutzeko beharrezkoa den azterketa edo proiektua egitea planteatu du koalizio abertzaleak, helburu horretarako 6.000 euroko diru partida bat sortzeko eskatuz. EH Bilduk azaldu du erreforma proiektu bat edukita, udalak beste erakunde publikoetara (Gipuzkoako Foru Aldundira edota Eusko Jaurlaritzara) jo ahal izango duela berrikuntza obra osoa egiteko finantziazio bila. 

Desfibriladore bat erostea

EH Bilduk Arratzaingo eskoletan kokatzeko desfibriladore bat erostea proposatu du, hezkuntza zentroetako haur eta nerabe kopuru handiagatik eta bertan egiten diren kirol ekintza ugariengatik. Gainera desfibriladorea Futbol zelaiarekin konpartitzea eta eskoletako irakasleei zein futbol taldeko monitoreei desfibriladorea erabiltzeko kurtso bat eskaintzea ere planteatzen da. Honetarako 2.000€ proposatzen dira,

"Aljibe Gauak" emanaldiak eta kultura aniztasunaren aldeko ekintzak

Kultura sailerako ere egin ditu proposamenak EH Bilduk. Alde batetik, 2014 eta 2015. urteetan herriko eragileekin elkarlanean antolatzen ziren ostiral gauetako Aljibeko  emanaldiak berreskuratzea eta horretarako 4.000 euroko partida bat sortzea proposatzen da. Eta beste alde batetik, Amasa Villabonako kultur eta jatorri aniztasunaren aldeko ekimenak (beste herrialdeetako gastronomia ezagutzeko azokak, kultura ezberdinetako folklore emanaldiak, beste kulturak ezagutzeko topaketak...) antolatzeko planteamendua legoke, herrian bizi diren eta jatorri zein kultura ezberdina duten pertsonen arteko elkar ezagutza, errespetua eta elkarbizitza bultzatzeko asmoz. Horretarako 3.000 euroko diru-partida sortzea proposatu du EH Bilduk.

agerraldia2 2

Amasa Villabonako EH Bilduko zinegotziak, udalean egindako agerraldian

Diru laguntza berriak sortzea

Diru laguntzen atalean, bi diru laguntzen partida ekonomikoak handitzea, eta PNVk egindako aurrekontuetan jasotzen ez diren lau diru laguntza berri sortzea proposatu du EH Bilduko udal taldeak.

Gehikuntzak:

- Euskara ikasteko laguntzak: Atal honetan 3.000 euroko gehikuntza proposatzen da, euskara ikasteko urratsa ematen duten eta baldintzak (klaseetara asistentzia, euskaltegiek egindako txostena etab.) betetzen dituzten pertsonek euskara doan ikasi ahal izan dezaten. Euskara bertako hizkuntza ofiziala izanik, euskara jakitea eskubidea dela defendatzen du EH Bilduk eta eskubidea den neurrian, horretarako ordaindu behar izatea ez dela bidezkoa adierazten du.

- Harituz bertso elkarteak egindako diru laguntza eskaera betetzeko, 1.000 euroko gehikuntza. Izan ere, Harituz bertso elkarteak, bertsolaritza eta bertsozaletasuna lantzen ditu eta aurten lau bertso eskola talde ditu Amasa Villabonan. Udalean 4.000 euroko diru laguntza eskatu zuten proiektu bat aurkeztuz eta PNVk egindako aurrekontuetan soilik 3.000 euroko laguntza ematea jasotzen da. Beraz, EH Bilduk, elkarte honek egindako eskaera bere osotasunean betetzea proposatu du.

Diru laguntza berriak:

- Seaska haur eskolako matrikulazioetarako: Amasa Villabonako haur eskola publikoan haurrak matrikulatzen dituzten gurasoentzat diru laguntza sistema bat ezartzea da proposatzen dena. EH Bilduk gogoratu du udala haur eskola honetako partaide dela eta Seaska haur eskolaren biziraupena bera dagoela jokoan. Matrikulazio kopuruari dagokionez dauden arriskuak saihestea da diru laguntza honen helburua eta horretarako sistema oso bat proposatzen da; gurasoek jasoko luketen laguntza ekonomikoa errenta aitorpenaren eta haurrek haur eskolan igarotzen dituzten ordu kopuruaren arabera kalkulatuz. Honetarako 10.500 euro bideratzea proposatzen da.    

- Euskal Herrian jarduten duten zenbait erakunde diruz laguntzea: Zehazki Udalbiltza erakundea, Gaindegia (Euskal Herriko ekonomia eta gizarte garapenerako behategia) eta Euskal Memoria Fundazioa bultzatzea proposatu du EH Bilduk, erakunde hauetako bakoitzari 1.500 euroko ekarpena eginez. 

Zuzenketa hauekin guztira 260.500 euro aldatuko lirateke, aurrekontu osoaren %4,02a

Hemen irakurri eta deskargatu dezakezue EH Bilduko udal taldeak aurkeztutako zuzenketak biltzen dituen dokumentu osoa: https://issuu.com/villabonaehbildu/docs/2018ko_aurrekontua_ehbilduren_zuzen

Hitz egin, eztabaidatu eta akordioak bilatzeko eskaera udal gobernuari eta PSEri

EH Bilduko udal taldeak, udaleko gainontzeko alderdi politikoekin biltzeko, eta zuzenketa hauen inguruko azalpenak emateko prest agertu da. Ez hori bakarrik, aurkeztutako zuzenketekin negoziazio fase bat zabaltzeko prestutasuna adierazi die udaleko beste bi alderdi politikoei. EH Bilduren arabera, proposatzen diren zuzenketen finantziazioa nondik lortuko den, bigarren mailako kontua da eta hor aldaketak egiteko guztiz prest agertu da koalizio abertzalea. Beraz, astelehenera bitartean (asteburua barne) PNV eta PSErekin bildu, eztabaidatu eta adostasunak bilatzea izan da hasieratik, EH Bilduko zinegotzi taldearen nahia.  

PNVk ez du EH Bilduko zinegotziekin behin ere bildu nahi izan 

EH Bilduk egindako elkarrizketa eskariari ezezkoa erantzun dio PNVko udal gobernuak eta jeltzaleak "errespetuagatik" bere erabakiak asteleheneko osoko bilkura baino lehen jakinarazioko dituela esatera mugatu dira. Beraz, beste behin agerian geratu da oraingo honetan ere PNVk ez duela oposizioarekin akordioetara iristeko inolako borondaterik eduki. Maite Izagirre alkateak publikoki behin eta berriro errepikatzen du bere gobernatzeko estiloa, etengabeko elkarrizketan eta akordio zabalak bilatzean oinarritzen dela, baina hitz horiek erabat faltsuak direla frogatu da. Era berean, aipatu beharrekoa da EH Bilduko zinegotziek pasa den urtarrilaren 10era arte ez zutela2018ko aurrekontu proposamenaren inguruko informaziorik, eta horrek aurrekontuak aztertu eta proposamenak egiteko oso denbora gutxi izatea ekarri duela. Hala ere, EH Bilduk bere lana egin du eta aipatutako zuzenketak egin eta epearen barruan aurkeztea lortu du. Ikusteko dago datorren asteleheneko osoko bilkuran PNV eta PSEk zein jarrera hartuko duten proposamen zehatz hauen aurrean.   

 

Amasa Villabonako EH Bilduren oharra, azken hilabetean udalak hartutako erabakien aurrean eta batez ere Errebote plaza eraberritzeko proiektuaren aferaren inguruan:

HERRIKO PLAZA IZANDA ERE, HERRITARREK EZ DUTE HITZIK

Pasa den uztailaren 18an, herriko festen prestaketa garaian, Amasa Villabonako udal gobernuak inbertsio sorta handi bat finantzatzeko 888.400 euro bideratzea erabaki zuen. Urte hasieran 2018 urte osoko inbertsioetarako 449.010 euro beharko zirela onartu zuen udalbatzak eta diru horri, ia bikoitza gehitzen zaio orain. Beraz, urtarrilean PNVk aurkeztutako aurrekontua iruzur hutsa zela salatu behar dugu; udal ordezkariok gehienbat inbertsioak eztabaidatzen ditugu aurrekontuetan, hori baita politika egiteko eta erabakiak hartzeko aukera ematen duen atal garrantzitsuena, eta orain kurtso erdia pasa eta gero inbertsioak ia hirukoiztea, ez da batere normala.

Diru hau guztia, udalaren gerakinetik aterako da, hau da, udalak bankuan daukan dirutik. Printzipioz, ondo iruditzen zaigu diru hori geldirik eduki beharrean, momentu jakin batean beharrezkoak diren inbertsioak egiteko edota ezusteko gastuei aurre egiteko erabiltzea. Baina oraingoan, urtearen erdian eta ezusteko ezertxo ere gertatu gabe, udalak urtez urte gordetako diruaren %68a lau hilabetetan xahutzea gehiegizkoa iruditzen zaigu.

taula inbertsioak

Erabaki honen arrazoia bistakoa eta oso agerikoa da: PNVk hauteskunde kanpaina egiteko baliatu nahi du udalaren dirua, legealdiaren azken momentuan obra ugari eginez eta gero hori bere mesedetan erabiliz. Hiru urte luzetan egin ez dutena, orain azken momentuan egin nahi dute. Esan daiteke PNVk hauteskunde kanpaina inbertsio sorta honekin hasi duela. Udal gestioaren erabilera elektoralistaren adibide ezin hobea.

Udal gobernuak orain egin nahi dituen zenbait obra, Amasako frontoiaren berrikuntza edo Oriamendin udalak duen etxearen eraberritzea kasu, legealdian zehar behin baino gehiagotan eskatu izan ditugu oposiziotik. Beraz, herriarentzat beharrezkoak diren neurrian eta egoera hobetuko duten inbertsio eta obrak izanik, ez gara gu izango itsu-itsuan eta forma kontuengatik, kontra agertuko garenak. Ongi etorriak izan daitezela.

ERREBOTE PLAZA:

Inbertsio sorta honetako proiekturik esanguratsuena Errebote plazaren eraberritzea da dudarik gabe.

PNVren Alkatetzak Villabonako plazaren eraberritze-proiektua egiteko enpresa bat kontratatu ondoren, Maite Izagirre alkateak proiektu hori ofizialki onartu zuen pasa den irailaren 10ean sinatutako alkatetza dekretu baten bidez. Plaza guztiz eraberritzeko proiektua abuztuaren 20an erregistratu zen ofizialki eta udal gobernuak berehala onartu nahi izan du. Horrelako proiektu esanguratsu eta garrantzitsua hiru astetan aurkeztu eta onartu nahi izan dute, espaloi bat konpontzea balitz bezala. 

Udalean eztabaidatu ere egin gabe, informazio publikorik eskaini gabe, alegazioetarako aukerarik gabe, herritarren parte hartzerako araudia urratuz eta gutxi batzuen artean, dagoeneko erabaki dute nolakoa izango den gure herriko plaza etorkizunean. Gai honetan (herriko plazaz ari gara) ez al litzateke askoz normalagoa patxadaz aritzea, proiektuari buruz denon artean eztabaidatzea eta adostasun bat bilatzea? Ez al gara gai gure herriko plazaz ere ados jartzeko? Kontua da PNVk ez duela horretarako borondaterik, beren interes elektoralerako baliatu nahi dute eta.

EH Bildutik argi utzi nahi dugu Errebote plazak eraberritze bat behar duela, denboraren poderioz gaur egun oso egoera hondatuan baitago. Agerikoa da plazako lurzoruak eta paretek konponketak behar dituztela.

Resultado de imagen de errebote plazaErrebote plazako hegoaldeko pareta. Argi ikusten da egoera txarrean dagoela eta konponketa behar duela

Baina gure ustez proiektua onartzeko erabilitako aldebakarreko prozedura hau oso larria da, udal gobernu honek herritarrekiko eta herritarren parte hartzearekiko duen mespretxua erakusten baitu. Proiektu hau garatzeko herritarren parte hartzea erabat baztertzea eta herritarrekin ezertarako kontatu gabe herriko plaza birmoldatu nahi izatea onartezina iruditzen zaigu. Gainera jarrera honek 2014an onartutako (PNVren aldeko botoekin) eta indarrean jarraitzen duen Herritarren parte hartzeari buruzko Araudia urratzen duela uste dugu. Araudi horrek proiektu esanguratsuetan herritarrek aktiboki parte hartzeko mekanismoak martxan jartzea aurreikusten zuen, baina argi dago udaleko agintarientzat lehen eta bigarren mailako araudiak daudela, eta herritarren parte hartzea arautzen duena, ez dela derrigor bete beharrekoa. Honek guztiak, Amasa Villabonan PNVk eta bere alkatetzak azken urteetan mantendu duen nagusikeriazko talante inposatzailea erakutsi digu beste behin.

Eraberritze proiektuari dagokionez, aztertzeko eduki dugun denbora laburrean hainbat kezka sortu zaizkigu:

Aurrekontua

Hasieratik iruditu zitzaigun 400.000 eurotik gorako aurrekontua oso handia zela plaza bat eraberritzeko eta aurrekontua puntuz puntu aztertuta, beharrezkoak ez diren diru xahuketa nabarmenak daudela ikusi dugu. Adibide batzuk jartzeagatik, gehienbat apaingarri gisa erabiltzeko argietan 55.000 euro gastatu nahi dira (plazak ez duenean iluminazio gabezia handirik) eta lurrean apaingarri gisa "lehen mailako harri granitiko artifizial zuria" jartzeagatik 67.000 euro xahutuko dira. Gure ustez, honakoak (eta beste batzuk) udalak lasai asko aurreztu zitzakeen gastuak dira, baina badirudi orain Villabonan plaza bat beharrean katedral bat dugula eta dena dekoraziorako argiz eta lehen kalitatezko harriz bete behar dela. Noski, dirua beraiena ez denez (diru publikoa baizik) aurrera!

Gainera aipatu beharrekoa da udal teknikariek plaza eraberritzeko aurreikusten zuten aurrekontua 200.000 euro ingurukoa zela, PNV eta PSEk orain onartu duten proiektuaren kostuaren erdia.

Erabaki eztabaidagarriak

Proiektuak plazaren itxura eta konposizioa eraldatuko duten hainbat obra jasotzen ditu eta beste erabaki batzuk airean geratzen dira, definitu gabe.

Plazaren hegoaldeko partean "txokoa" egiten duen pareta botatzea. Hau gutxienez eztabaidagarria iruditzen zaigu. Ze kalte egiten du pareta horrek? ez al da erabilgarria adibidez esku pilotan aritzeko? Gainera pareta hau botatzeak ere bere gastu gehigarria suposatuko du, merezi al du?

Bestalde, proiektua aztertuta, konklusio honetara iristen gara: Erabateko lehentasuna eta ia erabileraren esklusibotasuna ematen zaio erreboteari, plazak izan ditzakeen (eta dituen) beste hainbat erabileraren kaltetan. Inork ez du zalantzan jartzen Errebote plazan errebotean jokatu behar denik eta guztiok nahi dugu gure herriaren ikurra den kirol honek etorkizunean jarraipen oparoa izatea. Baina ez al da posible plazan erreboteaz gain, orain arte bezala adibidez futbitoan ere jolastu ahal izatea? zergatik kendu behar du batak bestea? ez dugu ulertzen. Honek, PNVren udal gobernuak gure herriko errealitatea ez duela ezagutzen edo errealitate horri aurre egin nahi diola erakusten du, izan ere seguru aski maiatzetik santioetara bitarte luzatzen den kuadrilen arteko futbito txapelketa baita Villabonan urte guztian dagoen ekimenik jendetsuena.

Bestalde, proiektuan guztiz argitzen ez diren zenbait erabaki airean geratzen dira. Zein koloretan margotuko dira plazako paretak? eta udaletxea?...

Azkenik proiektu honetan zentzurik gabeko kontu bat ere ikusi dugu eta aipagarria dela uste dugu. Proiektuak udaletxeko fatxada konpondu eta margotzea jasotzen du, baina eraikinaren atzeko aldea (ibai aldera ematen duena) ez da ukituko eta dagoen bezala utzi nahi da. Udaletxeko fatxadak konpondu eta margotu behar badira (eta horretarako beharra badago), zentzuzkoena eta normalena fatxada guztiak konpontzea litzateke, ezta? Zizurkil aldera ematen duen fatxada dagoen bezala uztea txapuza hutsa izango litzateke zalantzarik gabe.

 

EH Bilduko kideon ustez, penagarria da gure herriko bihotza den Errebote plazaren etorkizuna udal gobernuko pertsona gutxi batzuen artean (tartean herrikoak ere ez diren zinegotzi jeltzaleek), herritarren eta udaleko beste ordezkarien parte hartzeari ateak itxita, korrika eta presaka eta helburu alderdikoi eta elektoralista nabarmenarekin erabakitzea.

Ondorioz, PNV eta PSOEko udal ordezkariei, proiektu honen tramitazioa momentuz gelditzea eta Errebote plazaren etorkizunari eta egin beharreko eraberritzeari buruzko prozesu bat martxan jartzea eskatzen diegu. Prozesu horrek herritarren parte hartze aktiboa bilatu eta ahalbidetu behar luke eta prozesu publiko eta gardena izan beharko da. Hori eginez gero, EH Bilduko ordezkari eta kideak udal gobernuarekin elkarlanean aritu eta bidelagun izateko prest gaude.

Guztion plaza delako, herritarrek erabaki!

 

Amasa Villabonako EH Bildu udal-taldeak proposamen berri bat egin du udalean. Pasa den urtarrilaren 10ean ofizialki erregistratutako eskaera baten bidez, hileta edo omendaldi zibilak egitea arautuko duen ordenantza bat osatu eta onartzea eskatu dio EH Bilduk PNVren Udal Gobernuari. Ordenantza horren bidez, hileta zibilak egin ahal izateko, herriko espazio edo areto publikoak erabili ahal izatea lortuko litzateke, gure gizartean gero eta zabalduagoa dagoen eskakizun honi erantzun bat emanez.

Hau da Amasa Villabonako EH Bilduk egindako eskaera ofiziala: 

EH BILDU UDAL-TALDEAREN PROPOSAMENA
AMASA VILLABONAKO ALKATETZARI

Zioa:

Administrazio publikoen izaera ez-konfesional eta laikoa funtsezko elementua da eta ondorioz, erakundeek pertsonen eta elkarteen askatasun ideologiko eta erlijiosoa eta gurtzarako askatasuna bermatu behar dituzte.

Gure herriko pertsonen artean aniztasun ideologiko, kultural eta erlijiosoa da nagusi, gure jendartea gero eta aberatsagoa da ohituren eta ekintza sozialen adierazpenei dagokionez.

Hil ondorengo hileta eta omenaldi zibilak egiteko beharra, erlijiorik gabe bizitzeko aukera egin duten gizon emakumeek zeremonia duina eta pertsonala eduki ahal izateko beharretik sortu da, eta herritar horiek bizitza ulertzeko duten modua errespetatu beharrekoa da.

Erlijio ezberdinek hildako pertsonei azken agurra emateko liturgia-ekitaldi desberdinak dituzten moduan, Amasa Villabonako Udalak gizartean gero eta eskaera handiagoa duen behar bati erantzun behar dio, hileta edo omenaldi zibilak egin ahal izatea ahalbidetzeko araudi bat onartuz.

Honako hau, amasa billabonatar guztiek, hileta-ekitaldia beraiek erabakitako moduan egiteko duten askatasuna errespetatzeko ezinbesteko tresna izango da.

Proposamena / eskaera:

- Amasa Villabonan hileta edo omenaldi zibilak egiteko ordenantza bat eztabaidatu eta onartzea, 2 hilabeteko epean.

Ordenantza honen xedea, hileta ekitaldi edo omenaldi zibilak egiteko udal lokalen edo herriko espazio publikoaren erabilera eta baimena arautzea izango da.



Amasa Villabonan, 2018ko urtarrilaren 10ean

Izena eman Boletinean!

Showcases

Background Image

Header Color

:

Content Color

: