Laburrak

Osasuna eta Errausketa Ikerketa Taldeak hondakinen errausketak gure osasunean izan dezakeen eraginari buruz, mundu mailan argitara emandako ikerketen datuak plazaratzen segitzen du sare sozialen bidez. Aste honetakoan, “Porta D, 2009 Systematic review of epidemiological studies on health effects associated with management of solid waste” ikerketako datuak dakartza. Datu kezkagarriak, beste behin.

OEIT-ko medikuen agerraldia Donostian

“Kutsadura-iturri ezberdinek duten eraginari buruzko berrikuspen sistematikoa da. Hondakinen errausketari dagokionez, txostenak dio, 3 kilometroko esposizio-erradio batean minbizien kasuak orotara %3 gehitzen direla eta 10 kilometroko erradio batean, sortzetiko malformazioen kasuak %6-220 gehitzen direla”.

Osasun-arriskua ofizialki onarturikoa baino askoz handiagoa izan daiteke

Osasuna eta Errausketa Ikerketa Taldeak (OEIT) astero sare sozialen bidez artikulu ezberdinak argitaratzeari ekin zion urte amaieran. Eta horretan segitzen du osasun eta medikuntza arloko profesionalen ikerketa taldeak, abiatu berri dugun urte honetan ere. Egunotan, “errausketa eta dioxinak. Konpondu gabeko arazoa” izeneko idatzia argitaratu dute.

Ondorio benetan kezkagarria plazaratu dute beste behin. Erraustegiak eragin dezakeen “osasun-arriskua ofizialki onarturikoa baino askoz handiagoa izan daiteke, eta beraz, herritarron osasuna ez dago bermatuta”.

Egunotan argitaratu duten dioxinen isurketaren inguruko idatziko baieztapen hau egiteko, duela hamarkada askotatik argitaratu izan diren mundu mailako ikerketa ezberdinen datuetan oinarritzen dira. Segidan duzue OEIT-ren idatzia osorik.

Neurketa ofizialek adierazitakoa baino 460-1290 aldiz altuagoko dioxina isurketak

Adibide gisa jartzen dute, iaz Herbeheretako azken belaunaldiko edo batzuk errauskailu “moderno” deitzen dioten horietako baten inguruan eginiko ikerketa batek zioena. “Honek dio isurketak modu jarraian monitorizatuz gero neurturiko dioxinen isurketa zifrak ofizialki jakinarazitakoak baino 460-1290 aldiz altuagoak direla”. Urtebete lehenago errauskailu berean eginiko beste ikerketa batek, “giza-kontsumorako legezkoak ez diren dioxina mailak atzeman zituen errauskailu baten 2 kilometroko erradioan ekoitzitako arrautzetan; inguruko belardietan ere dioxina maila altuak ziren… Belarretan topaturiko dioxinak eta tximiniatik isuritakoak azpitalde berekoak dira, toxikotasunaren jatorria errauskailua dela frogatuz”.

Belgikan 1998an eginiko beste ikerketa batek agerian jarri zuen OEIT-k adierazi duenez, “dioxinen isurketaren estimazioa 15 eguneko etenik gabeko monitorizazioan oinarrituz gero, ohiko neurketa puntualetan oinarrituta baino 30-50 aldiz handiagoa zela”.

Denbora osoaren %0,4an isurtzen dena baino ez da kontrolatzen

Euskal Herrira etorrita, Zabalgarbiko erraustegia jarri dute adibide gisa. “Adierazgarria da Zabalgarbik 10 urtean 35 geldialdi eta bir-hasiera izan dituela. Datu hauek adierazten digutenez, isuritako dioxina kopuru erreala ofizialki jakinarazitakoa baino askoz ere handiagoa dela pentsatzeko arrazoi sendoak daude”.

OEIT-tik argitzen dutenez, “gaur egun egiten diren kontrolen arabera ez dago jakiterik zer dioxina kopuru isurtzen duten erraustegiek martxan dauden denboraren %99,6an”.

Bai Zabalgarbiko zein Zubieta gainean eraikitzen ari diren erraustegien Ingurumen Baimen Bateratuak “dioxinen isurpenaren kontrola hiru hilabetetik behin egin behar dela agintzen dute, 6 eta 8 ordu arteko lagin bilketa burutuz”. Baina neurketok egin aurretik, “errausketa planta jakinaren gainean jartzen da. Ezaguna da neurketak aurreabisurik gabe egiten direnean emaitzak oso ezberdinak izan ohi direla. Errauskailua martxan dagoen denbora totalaren %0,4 estaltzen duten neurketetan oinarritutako estimazioek-Foru Aldundiko agintarien ustez kontrol hertsiak liratekeenak-nekez adierazi dezakete zein den isuritako dioxina kopuru erreala”.

 

Josu Estarrona EH Bilduko legebiltzarkideak gogora ekarri du Jaurlaritzaren eta Bizkaiko Aldundiaren abokatuek sare klientelarrak egon badaudela berretsi dutela, baina, kritikatu duenez, instituzioek epelkeriaz jokatu dutela praktika ustelen aurka.

EH Bilduren iritziz, De Miguel auzian akusazioak egunotan aurkezten ari diren behin betiko ondorio eta zigor eskaerek agerian utzi dute instituzioetan ez dela benetako borondaterik egon ustelkeriari aurre egiteko eta eremu batzuetan ohikoak bilakatu diren praktika ustelak desagerrarazteko. Legebiltzarrak ustelkeria eztabaidagai izan duela baliatuz, Josu Estarronak gogora ekarri du De Miguel auzian Jaurlaritzaren eta Bizkaiko Foru Aldundiaren abokatuek defendatu duten tesia, Araban, Bizkaian eta Gipuzkoan sare klientelarrak egon badaudela aitortu eta diru publikoa bidegabeki, interes publikoa eta orokorraren aurka, erabiltzea egotzi baitiete orduan Eusko Alderdi Jeltzalean ardurak zituzten hainbat kideri. “Diru, esleipen eta kontratu gehien sinatzen diren instituzio horietan gobernu ardurak dituzten alderdiak, PNV eta PSE, aitortzen ari dira hemen sare klientelarrak operatzen ari direla”.

sindrome sabino arana kU6E U50291939022x0H 624x385El CorreoJosu Estarrona (EH Bildu) Gasteizko legebiltzarrean

EH Bilduko legebiltzarkideak gogorarazi duenez, De Miguel auzia partikular baten salaketaren ondorioa izan da, ez Administrazio edo instituzioen ikuskaritza lanaren ondorioa, eta horrek, salatu duenez, argi uzten du EAJk eta PSEk gobernatzen dituzten instituzioetan “ez dela inoiz egon eta gaur ere ez dagoela praktika ustel hauekin amaitzeko borondate politiko nahikorik, jarrera irmorik”.

Higiene demokratikoaren beharra bistakoa delakoan, Estarronak ustelkeriaren aurkako EH Bilduren konpromisoa berretsi du. “Jarraituko dugu neurriak eta baliabideak jasotzen dituzten proposamenak egiten, erregenerazio demokratiko baten alde, hala nola, ustelkeriaren aurkako fiskaltza sortzea eta jardun egokien aldeko eta ustelkeriaren aurkako bulegoa sortzea.

 

ELNrekin irekia zeukan elkarrizketarako bidea etetea erabaki du Duqueren gobernuak. Bertan behera utzi du elkarrizketarako mahaia eta delegazioko ordezkariak atxilotzeko agindua eman du. Horren aurrean, honako hau adierazi nahi du EH Bilduk:

1. Poliziaren akademiako kideen aurka Bogotan izandako erasoa gaitzesten dugu, gure doluminak agertu nahi dizkiogu Kolonbiako herriari. Era berean, erasoaren egileak nortzuk izan diren lehenbailehen argitzea nahi dugu, ez baitu inork bere gain hartu.

2. Kolonbiako gatazka armatuaren konponbidea elkarrizketa eta negoziazioa direla azpimarratzen dugu; kasu honetan, ELNrekin negoziazioa.

3. Santos presidenteak abiatutako elkarrizketarako mahaia desegiteko Duque jaunaren gobernuak hartutako erabakia okerra dela uste dugu. Krisiak daudenean elkarrizketari eta harremanari eustea inoiz baino garrantzitsuagoa da. Bidezko bake iraunkorra eraikitzeko bide bakarra da.

4. Haustura egonez gero ezarrita dauden protokoloak betetzeko deia egiten diegu alde guztiei eta herrialde bermatzaileei.

5. Kolonbiako herriak merezi duen bakearekin daukagun konpromisoa berresten dugu.

Josu Juaristi izango da EH Bilduren zerrendaburua hurrengo Europako hauteskundeetan. Barne hauteskundeak egin ditu ezkerreko indar subiranistak bere hautagaia aukeratzeko, eta Juaristik eskuratu ditu inskribatuen boto gehien: 2.539 boto (%75,61). Lorena Lopez de Lacallek, barne-hauteskundeetara aurkeztutako beste hautagaiak 733 boto lortu ditu (%21,83). 86 boto zuri ere izan dira (%2,56).

Imagen relacionadaJosu Juaristi Europako parlamentuan egindako hitzartze batean

Barne hauteskundeetan egon den giroa eta mugimenduaren barne-bizitzari egindako ekarpena nabarmendu nahi ditu EH Bilduk. Izan ere 3.358 pertsonek parte hartu dute barne hauteskundeetan, botorako eskubidea zuten -elkarrekin.ehbildu.eus aplikazioan inkribatutakoen- %44,63k. Inskribatutako pertsonek bi modu izan dituzte botoa emateko: telematikoa eta presentziala (ostiraletik igandera arteko epea izan dute inskribatutakoek boto eskubidea gauzatzeko). Boto presentziala bermatzeko, irekita izan dira hamarnaka bilgune, joan den larunbatean, Hego Euskal Herri osoan.

Nafarroako emaitzak

Nafarroako parlamenturako zerrendak osatzeko barne hauteskundeak ere egin dituzte asteburu honetan. Nafarroan inskribatutakoen %54k parte hartu dute hauteskundeetan, eta 749 boto izan dira. Bozketen ondoren, honako hauek osatuko dute Nafarroako zerrenda, Bakartxo Ruiz zerrendaburuarekin batera: Adolfo Araiz, Laura Aznal, Maiorga Ramirez, Patricia Perales, Miren Aranoa, Txomin Gonzalez, Arantza Izuriaga, Patxi Zamora, Miren Zabaleta, Joseba Gines, Esther Korres, Carlos Arellano, Dabid Anaut, Blanca Unzue eta Andres Etxenike.

EH Bilduren inguruan dauden pertsonekin batera EH Bildu eraikitzeko konpromisoa hartuta dauka ezkerreko indar subiranistak, eta Europako zerrendaburua aukeratzeko zein Nafarroako zerrenda osatzeko izan den barne prozesua lagungarria izan da bide horretan. Zentzu horretan, EH Bilduri dagozkion erabakietan oinarriek hitza eta erabakia izateko bidean sakontzen jarraitzeko asmoa dauka indar subiranistaren zuzendaritzak.

 

 

Adolfo Araiz eta Bakartxo Ruiz EH Bilduko bozeramaileek agerraldia egin dute Nafarroako egoera politikoaren irakurketa egiteko. Egoeraren larritasunaz ohartarazi dute, eta arduraz jokatzeko deia egin die aldaketaren aldeko eragile politiko eta sozial guztiei.

EH Bilduko Bakartxo Ruiz eta Adolfo Araiz. /

Hemen duzue Nafarroako EH Bilduk egiten duen irakurketa:

IRAKURKETA

1. 2015eko hauteskundeetan Nafarroako jendarteak erabaki zuen, gehiengoz, historiaren etapa bat atzean uztea eta berri bat irekitzea, aldaketa grina instituzioetara indar handiz eramanez. Herri agindu hori izan da beti EH Bilduren erreferentzia eta uste dugu agindu horrekiko leialtasunaz jardun beharko genukeela aldaketaren indar politiko guztiok.

2. Jendartearekin zintzo izan behar dugu beti eta oraingoan argi esan behar dugu aldaketa une kritikoan dagoela. Iruñean esaterako, batzuek gehiengoa hautsi dutelako, aldaketaren kontrakoekin lerrokatuz. Edo aldaketarekin bateraezinak diren jokabideak erakusten ari direlako, bide polizial eta errepresioetan tematuz. Halaber, oso larriak dira Podemos eta Orain Bai-ren arteko barne lehiaren ondorioak, Parlamentuaren Lehendakaritza eta hainbat gehiengo kolokan jartzen ahal dituztenak.

3. Krisi hau ez dator oposizioaren presiotik, aldaketaren barne mailako alderdikeria eta joera autoritarioengatik baizik. Oposizioak jokoz kanpo eman ditu azken urteak, Nafarroarako proposamenik ez zuela nabarmenki agerian utziz: haserrea besterik ez du erakutsi, botere instituzionala galdu izanagatik haserrea. Gauzak horrela ulertezina da aldaketaren esparrutik halako oparirik egitea. Aldaketa sustatu duten herritarrek ez dute egoera hau ulertzen ez eta onartzen ere, jakina.

4. Arduragabekeria handia litzateke krisia ukatzea, eta are gehiago egoera hau eragin duten jokabideei eustea. Ardura berreskuratzeko unea da, herritarrok horixe eskatzen digute eta. Esan bezala, aldaketaren indarrok herri agindua hartu behar dugu gure jardueraren gida. Ardura eta zentzu pixka bat jarri behar dugu gure jardueran, jokoan dagoena milaka eta milaka herritarrek egindako esfortzua eta borrokaren uzta delako.

Munduan, Europan eta Espainiar Estatuan gertatzen ari dena ikusita, nabarmena da jarrera autoritarioak datozela, indar oroz etorri ere, eta hau gurean bereziki larria da. Izan ere, Nafarroan ederki dakigunez, inoiz ez baita joan iraganeko hondar autoritarioa. Ez diezaiogun bidea ireki autoritarismoari antzeko joera eta praktika batzuekin, edota aldaketaren garrantzia gutxietsiz. Gaur egun, lehia politiko nagusia ez da aldaketa eta aurreko erregimenaren itzuleraren artean, aldaketa eta erregimenaren bertsio autoritarioago eta atzerakoiagoaren artean baizik. Hau ikusi nahi ez duena arduragabekeriaz jokatzen ari.

5. Bizi, lan eta elkarbizitza baldintzen okertze orokorra da agenda autoritarioaren funtsa. Gehiengoaren kontrako agenda dute, aberatsei zergak kendu, dena pribatizatu, lan baldintzak gehiago kaskartu, berdintasun mailako aurrerapen mugatuak deuseztatu, arrazakeria eta xenofobia normaltzat hartu eta gure gizartearen erraietaraino hedatzea... Guk, esan bezala, gure eskuetan dagoen guztia egiteko determinazioa dugu aldaketa indartu eta autoritarismoa erregaia duen Erregimenari aurre egiteko.

DEIA

1. Aurrera-urrats bat egiteko garaia da eta EH Bilduk horixe egiteko determinazioa erakutsi nahi du. Ez da etsipenerako unea, jendarteak ez liguke barkatuko. Aterpe sendoa eraiki behar dugu Nafarroan eskubide kolektibo eta indibidualak suntsitzera datorren oldarraldiaren aurrean, aldaketan sakondu nahi baitugu. Geure autogobernu mugatua bera ere kolokan dago, ez baita ahantzi behar Andaluziako itun atzerakoiaren hiru indarretatik bik proposatzen dutela Nafarroako erregimen fiskala bertan behera uztea, esate baterako. Nafarroa Espainian indarrez urtzea da hauen helburua eta UPNk, diskurtsoan foruak darabilzkien arren, erabakia hartu du jada: agenda autoritario-neoliberal-pribatizatzaile horren menpe jarri du bere burua, Nafarroa Foru Komunitate gisa sakrifikatzeko prest dagoela erakutsiz.

2. Gauzak horrela, deialdia egiten diegu aldaketaren aldeko indar sozial eta politikoei ardurari eusteko eta krisia lehenbailehen gainditzeko, jendarteari aldaketa sendotzeko eta luzatzeko zerumuga argi eta erakargarria eskaintzeko. Inertziak astindu eta ausardiaz aritzeko tenorea da: ezin dugu huts egin!

3. Jendarteari mezu argia luzatu beharrean gaude, aldaketak baduela bere barne auziak kudeatzeko gaitasuna, aldaketa agindu gisa hartzen dugulako norberaren ikuspegia eta interesen gainetik. Aldaketak badu etorkizunik!

NEURRIAK

Arestian esan bezala, ez da gelditik egoteko unea. Aldaketaren indarrei eta, oro har, jendarteari dei egiteaz gain, egoerari aurre egiteko neurriak adosteko eta konpromisoak hartzeko dei egin nahi diegu:

1. Parlamentuan aldaketaren gehiengoa bermatzeko beharrezko neurriak hartu behar dira. Gertatutakoa gertatuta ere, gehiengoa bermatu behar da, horretarako, guztiok arduraz eta egoerak eskatzen duen umiltasunez jokatuz. Guk gure burua ere konpromiso horretara lotzen dugu.

2. Aldaketak arazo sozial eta politikoei irtenbidea emateko elkarrizketa eta negoziazioa lehenetsiko du. Eragile sozial eta sindikalekin hitz egiteko konpromisoa beharrezkoa da, arazoei eta jendarte eragileen aldarrikapenei irtenbide justu eta duina ematearren. Areago, aldaketaren lehen urte hauetan instituzioen eta mugimendu sozialen artean sumatu den desoreka eta interakzio arazoak gainditu beharra dago. Jendartearen aktibazioak ekarri zuen aldaketaren hasiera instituzioetara eta aktibazio sozial horrek ahalbidetu beharko luke berriro ere Erregimenari aurre egin eta aldaketan sakontzea. Gogoeta horri berriro ere bide emateko konpromisoa hartzen dugu.

3. Aldaketa ezin da inola ere lotu protesta sozialei bortizkeriaz erantzutearekin. Aldaketak beste era batera kudeatu behar ditu auzi sozialak. Lehenbailehen adostu behar da protokolo berri bat gertatutakoa berriz gerta ez dadin. Nafarroak bere Polizia behar du, polizia demokratikoa, gurea, jendartearen zerbitzura, konfiantzazkoa. Horren inguruko eztabaida sozial eta politikoa abiatu behar da, horretarako behar diren baliabideak jarriz.

Bitartean, eredu aldaketa horren norabidean lehendik adostuak ziren neurriak -akordio programatikoan besteak beste- praktikan jarri behar dira. Zentzu horretan, konpromisoa hartzen dugu Huertas de Peraltako greban zein Iruñeko Alde Zaharreko okupaziorekin gertatutakoa argitzeari begira neurriak eskatu eta aurrerantzean halakorik ez errepikatzeko protokolo bat planteatzeko. Lehen irizpidea hauxe da: aldaketaren Gobernuaren pean dagoen poliziak ezin du jendea mehatxatu, iraindu eta jo!

4. Iruñeko aldaketaren aldeko gehiengoa berreskuratu behar da jarrera sektario eta elektoralistak gaindituz. Gogoeta kolektiboa ireki behar da hurrengo egunotan Iruñeko aurrekontuak ez onartzeak eragin duen kaltea gutxitzeko.

5. Aldaketaren indarrok konpromiso publikoa hartu behar dugu maiatzeko lehia elkarrekin irabazteko, aldaketari bide ematen jarraitzeko eta horretan sakontzeko konpromiso argia hartuz eta horrekiko leialtasuna bermatuz.

Horrenbestez, Aldaketak urrats sendoak egin behar ditu elkarbizitza ereduaren demokratizazioan.

 

Iruñean, 2019ko urtarrilaren 16an

 

 

Euskaraldiarekin bat egiteko, talde argazkia egin eta agerraldia egin du EH Bilduk. Eraitz Saez de Egilaz gazte idazkariak irakurri du agiria:

EUSKARAZ GARA, EUSKARALDIAN BAGABILTZA

Euskaltzale eta ekintzaile askoren ahaleginak ez dira alferrikakoak izan eta euskara orain dela 50 urte baino hobeto dago, askoz hobeto baina ez aski. Izan ere, euskara ez baita hizkuntza normalizatua izango gure lurralde guztietan hizkuntza ofiziala ez bada.

Ezin ukatu nolanahi ere, azken urteotan lortu dugula Euskal Herriko lurralde guztietan aurrera urrats esanguratsuak egitea. Egun, inoiz ez bezala euskaldunok berariazko erakundeak dauzkagula Araban, Bizkaian eta Gipuzkoan, alde batetik, Lapurdin, Nafarroa Beherean eta Zuberoan, bestetik, eta Nafarroa Garaian, azkenik. Baina ez daukagu hizkuntza politika bateraturik, eta euskara ez dugu hizkuntza ofiziala Euskal Herriko lurralde guztietan.

Badakigu, nola ez, edozein hizkuntza gutxituren behineneko arazoa, transmisiotik harago, erabilera dela, hizkuntza biziberritzea berau erabiltzea dela, alegia. Baina euskararen erabilera, xedea bada ere, ez da areagotuko oinarrian ez badu hiztun-elkarte zabala, sendoa, trinkoa eta engaiatua.

Aurten, urte berezia da. Euskaltzaindiak eta Eusko Ikaskuntzak 100 urte bete dituzte eta 1968ko Arantzazuko Bileratik hona 50 urte igaro dira. Euskara Batuaren 50. urteurrena, alegia. Hezkuntzan eta unibertsitatean, literaturan eta, oro har, kulturan, hedabideetan eta gizarte zerbitzuetan lortu duguna ez zitekeen posible izan hizkuntza eredu estandarrik izan ez bagenu.

Batasuna. Hori da giltzarria: batasuna. Euskara Batua izan da, eta, euskaren normalizaziorako euskarri sendoenetakoa eta euskararen hiztun-elkartearen batasuna erabilera eraikitzeko orube egokiena. Sakondu eta zabaldu behar dugu batasun hori.

EUSKARALDIAK asmo honi erantzuten dio neurri batean, Euskaltzaleen Topaguneak abiatutako proposamenak, ehunka elkartek babestuak, eta milaka herritarrek bultzatuak, azaroaren 23tik abenduaren 3ra Euskal Herri osoan 11 egun euskaraz ekimena burutzeko.

Euskal Herria Bildutik bat egiten dugu ekimenarekin, aktore nagusiak herritarrak diren neurrian, eta elkarte zein erakundeen aldetik jasotzen ari den atxikimenduarekin bat eginez.

Euskal Herria Bilduko emakume eta gizonak, egunero eta urte osoan egiten dugun moduan, 11 egun horietan ere Aho bizi edo Belarri prest rolean jarduteko konpromisoa hartzen dugu.

Sinistuak gaude EUSKARALDIAK azken urteotako euskara biziberritzeko jarduna astintzeo lagungarri izango dela, unibertso euskaltzalea aktibatzeko, herri bezala dagokigun berariazko gure hizkuntza zabaltzen jarraitzeko, euskara ikasten, irakasten eta egunerokoan eraikitzen ari diren milaka emakume eta gizon horien lana nabarmentzeko, eta gaurkoan oraindik daukagun lan eskerga burutzeko indarrak eskuratzeko.

Baina bistan denez, hori guztia ez dugu lortuko EUSKARALDIAren bidez soilik.

Euskaraz oso-osoan bizitzea ahalbidetuko duten baldintza politikoak, juridikoak, sozialak, ekonomikoak eta kulturalak lortu behar baititugu: euskararen erabilera handitzeko, euskal hiztunon hizkuntza eskubideak bere osotasunean eta gure lurralde osoan bermatuak izateko, lan, aisialdi, kultura, ekonomia, politika eta edozien esparrutan ohiko hizkuntza bihurtzeko eta euskararen normalizazioa bideratzeko. Finean, euskara jakitea unibertsalizatzeko eta euskararen normalizazioan jauzi kualitatiboa emateko.

Horretarako, eta euskaradun herritar garen neurrian geure etorkizuna bermatze aldera, herri gisa dagozkigun estrategiak landu, adostu eta burutu behar ditugu. Egunerokoan eta esparru orotan. Konpromiso zehatzak burutuz modu pertsonal zein kolektiboan, euskara irabazpidean jartzeko.

Herritar burujabe izan nahi dugun neurrian, euskara burujabe izatea ezinbestekoa baitugu.

Horregatik, euskararen osasuna indartuko duen ekimen oro burutu eta bultzatzeko konpromiso irmoa dugun neurrian Euskal Herria Bildu osatzen dugun emakume eta gizonok, EUSKARALDIAn ere parte hartuko dugu, geure etxe, lantoki, elkarte, erakunde eta lagunartean.

 

EH Bilduk eskoletako jantokiak kudeatzeko eredua aldatu beharra berretsi du eta haren erantzukizunari ihes egitea egotzi dio Eusko Jaurlaritzako Hezkuntza Sailari, berea den ardura gurasoen bizkarrean utzi nahi izan baitu.

EH Bilduk, hezkuntza arloko hainbat eragilek bezala, urteak daramatza eskola publikoan jantokiak kudeatzeko eredua alda dezala eskatzen Jaurlaritzari, kudeaketa zuzena ahalbidetzeko. Hau da, catering enpresak kontratatu ordez, ikastetxeek hala erabakiz gero, sukalde propioa izango lukete eta jangelen jardun osoa bideratuko lukete bertan, horrek ikasleen elikadura hobetzea ekarriko lukeelarik. Aspaldiko aldarrikapena da hori eta, Haurreskoletan gertatu zen bezala, jantokien aferan presio politiko eta sozialak Jaurlaritza mugiarazi du. Hala ere, Eva Lopez de Arroyabe EH Bilduko legebiltzarkidearen esanetan, "jangelen kasuan, Hezkuntza Sailak atzo iragarri zuen aldaketak ez dio aipatutako eskariari erantzuten, jantokien kudeaketaren ardura guraso elkarteen bizkarrean uztea planteatzen duelako, erantzukizun hori Hezkuntza Sailarena berarena denean". 

Resultado de imagen de Eva Lopez de Arroyabe EH BilduEva Lopez de Arroyabe EH Bilduko legebiltzarkidea

Horren haritik, eskola jantokiak kudeatzeko ardura ikastetxeek beraiek hartu behar dutela euren gain berretsi du EH Bilduko legebiltzarkideak; “beraz, ez da inondik inora onargarria zama hori gurasoen bizkar utzi nahi izatea, EHIGE gurasoen elkarteak jada kritikatu duen bezala”. Lopez de Arroyabek azaldu duenez, “guraso elkarteetan aritzen diren pertsonak boluntarioak dira eta Jaurlaritzak ondo baino hobeto daki elkarte horiek ez dutela gaitasun errealik jantokien jardun osoa antolatu eta bideratzeko eta horretarako beharko liratekeen kontratuak egiteko, horrek guztiak ikastetxeen ardura izan behar duelako”.

Bere iritziz, “Hezkuntza Saila berari bakarrik dagokion erantzukizunari ihes egiten saiatzen ari da, modu traketsean gainera, atzo eskola jantokien jarraipen batzordearen bilera akordiorik gabe amaitu zelako, baina, hala eta guztiz ere, eredu berria iragarri zuen horren ostean”. Jaurlaritzaren planak zuzentzea ezinbestekoa delakoan, EH Bilduk hiru agerraldi eskatu ditu jada Legebiltzarrean: Hezkuntza sailburuarena, EHIGErena eta LABena, azken hau sindikatu nagusia delako eskola jantokietako langileen artean.

 

EH Bilduk adierazi du hurrengo abenduaren 6a ez dela jai eguna izango Euskal Herriko subiranistentzat, eta jai egun hori aldarrikapen egun bihurtuko duela. Era horretara, manifestaziora deitu du abenduaren 6an, Espainiako Konstituzioaren 40. urteurrenean. Eguerdiko 12:00etan hasiko den mobilizazioak Bilboko kaleak hartuko ditu, Plaza Eliptikotik Arriagara.

“Gure herriari Espainiako Konstituzioa inposatu ziotenetik 40 urte betetzen direnean, Espainiako Konstituzioa gure herriaren askatasun nahiak lotzeko giltzarrapoa baino ez dela sinesten duten euskal herritarrei Bilboko kaleetara ateratzeko gonbita egiten die EH Bilduk. Herri honen erabakitzeko eskubidearen eta bere egikaritzearen alde dagoen gehiengo politiko eta soziala da giltzarrapo hori irekiko duen giltza. Euskal Errepublika libre eta duinean bizi nahi duten euskal herritar guztiek hitzordu garrantzitsua dute abenduaren 6ko eguerdian”, agertu dute Oihana Etxebarrietak eta Oskar Matutek, Donostian egindako agerraldian.

Etxebarrietak gogora ekarri du 40 urte joan direla Espainiako Konstituzioa onartu eta indarrean jarri zutenetik eta Hego Euskal Herriko lau herrialdeetan ez zuen behar besteko onarpenik izan konstituzio horrek. “Duela 40 urteko euskal jendarteak argi eta garbi adierazi zuen Espainiako Konstituzioa ez dela berea. Argi esan zuen ezin zuela bere egin 78ko Erregimena egonkortzeko helburua baino ez zeukan konstituzioa, hau da, ezin zuela onartu herri honetan eta jendarte aske eta justuetan bizi nahi duten herritarren artean hain oroitzapen txarrak dituen aurreko erregimenaren aurpegi garbiketa bat.

DrPAPa9XgAIRWyD.jpglargeOskar Matute eta Oihana Etxebarrieta, Manifestazioaren aurkezpen agerraldian

40 urte joan dira, eta 78ko Erregimenak -eta beraz, Espainiako Konstituzioak- konpontzeke utzi zituen arazo politikoak kalean eta instituzioetan daudela zehaztu du EH Bilduko legebiltzarkideak. “Hautestontziak jarri eta herritarrei beren etorkizun politikoaren jabe izan eta Kataluniako Errepublika sortu nahi zuten galdetzeagatik Espainiako estatuaren neurrigabeko erantzun basatia pairatzen ari da herri katalana”, azpimarratu du.

Etxebarrietaren hitzetan, Euskal Herriak bere etorkizuna erabakitzeko eskubide demokratikoa daukala uste duen gehiengo politiko eta soziala dago gure herrian. Erantsi duenez, gehiengo hori behin baino gehiagotan agertu da azken urteotan, besteak beste, Gure Esku Dagok deitutako mobilizazio erraldoietan. “Arlo politiko eta instituzionalean, Araba, Bizkai eta Gipuzkoan erabakitzeko eskubidearen alde dagoen gehiengo politikoak estatus politiko berriaren oinarriak ezarriak ditu eta, modu horretara, agortutzat eman du Gernikako Estatutua. Eta Nafarroan, modu eraginkorrean ari dira lanean aurreko Erregimena instituzioetatik ateratzea ekarri zuen aldaketa egonkortzeko”.

“Baldintza eta egoera politiko eta sozial guztiek ekarri dute 78an aurpegi garbiketa behar zutela erabaki zuten indar politikoek mozorro guztiak kentzea eta eskura dituzten baliabide eta tresna guztiekin beren erregimena defendatzea, hau da, Espainiaren batasun hautsi-ezina defendatzea”, esan du Etxebarrietak. “Atzeraldi demokratiko nabarmenean murgilduta dago Espainiako estatua. Herri honetako zein Espainiako estatuko subiranista guztiei elkar hartuta eta partekatutako estrategiarekin jokatzera behartzen gaitu atzeraldi demokratiko horrek. Datorkigunaren aurrean, gure herrian zein aske eta burujabe izan nahi duten Espainiako estatuko beste herrietan, elkar hartuta, ausardia politikoaren eta herri eta etorkizun ikuspegiarekin jokatzera behartuta gaude”.

Agerraldiaren bideoa HEMEN: https://www.youtube.com/watch?v=nzcci31aado

 

Rebeka Ubera (EH Bildu): “Azken prozesuak begi bistan utzi du Osakidetzan funtzionatzeko eredu bat dagoela, zeharo hedaturik, lagunkerian eta entxufismoan oinarritua, lanpostuak emateko. Konponbidea ez da aurpegi bat besteagatik aldatzea, baizik eta Pertsonal eredua aldatzea”

Osakidetzako Giza Baliabidetako arduradunaren kargugabetzearen harira, Rebeka Ubera legebiltzarkideak ohartarazi du Osasun sailak haratago joan behar duela irregulartasunak berriro gerta ez daitezen. Osakidetzako zuzendaritzaren berregituraketaz gain, ezinbestekoa da neurri zuzentzaileak martxan jartzea: “Lan Eskaintza Publikoak Osakidetzaren pertsonal arloko arazo estrukturala azalarazi du, eta agerian utzi du oposizioen eta giza baliabideetako politikaren eredua sakon aldatu behar direla, hala egin ezean, oraingoan gertatu diren irregulartasunak hurrengo oposizioetan ere berriro errepikatuko direlako. Bermeak ipini behar ditugu gardentasuna eta aukera berdintasuna ziurtatzeko”.

Resultado de imagen de ope osakidetza irregularidadesELA sindikatuaren protesta mobilizazioa Osakidetzako EPEn egondako irregulartasunak salatuz 

Uberak azaldu du auziak Osakidetzako Pertsonal politika osoari eragiten diola: “Azken prozesuak begi bistan utzi du Osakidetzan funtzionatzeko eredu bat dagoela, zeharo hedaturik, lagunkerian eta entxufismoan oinarritua, lanpostuak emateko. Orain, berandu bada ere, Osakidetzako arduradunak erantzukizun pertsonalak beren gain hartu dituzte, baina konponbidea ez da makillajea egitea, aurpegi bat besteagatik aldatzea. Gakoa da Osasun Saileko politikak eta Osakidetzan nagusi den eredua aldatzea”.

Hortaz, premiazkoa da beste eredu bat ezartzea Lan Eskaintza Publikoetan eta Pertsonal politikan, Funtzio Publikorako sarbidean bermatzeko meritu, gaitasun, objektibotasun eta aukera berdintasun printzipioak errespetatzen direla. EH Bilduk neurri sorta bat aurkeztu zuen azaroan. Besteak beste, lehen hiruhilekoan Osakidetzako Giza Baliabideetako politika aztertzeko eta hobetzeko talde txostengilea abiatzea proposatu zuen.

 

Jaurlaritzaren egitasmoak ez du sektorearen babesa, gogorarazi du EH Bilduk, eta erretiratzea eskatu du, baina Lakuako gobernukideek PPrekin bat egin dute. Ezinbestekoa da prozesua berriro abiatzea sektorean adostasunak bilatzeko, Hezkuntza Lege berria onartzera heltzeraino.

EH Bilduk Hezkuntzaren aldeko Akordioa erretiratzeko eskatu dio gaur Jaurlaritzari, akordio horren oinarriak aurkezteko Hezkuntza sailburuak Legebiltzarrean egin duen agerraldian. Rebeka Uberak propagandatzat jo du Urkullu Gobernuaren proposamena eta gogora ekarri du sektoreko sindikatuak eta sare publikoko familiak (EHIGE) ere horren aurka agertu direla. Hala eta guztiz ere, PNV-PSE gobernukideek aurrera jotzea erabaki dute eta PPren babesa bilatu dute horretarako, “herri ikuspegi batetik oso larria eta kezkagarria dena”, Uberaren irudiko, “hezkuntza gai estrategikoa delako edozein herriren garapen eta etorkizunerako”.

Rebeka Ubera eta EH Bilduko beste ordezkariak Hezkuntza arloko bilkura batean Gasteizen

Horren haritik, EH Bilduko legebiltzarkideak “itsu-itsuan aurrera egitea” egotzi dio Jaurlaritzari, “sektorean orokorra den oposizioaren gainetik, eta noren eta PPren eskutik, LOMCE inposatu zuen eta hezkuntza arloan ditugun eskumenak ere murriztu nahi dituen alderdiaren eskutik, alegia”. Erantsi duenez, “zer nolako hezkuntza sistema eraiki nahi du PNVk bere aliatua ikuspegi zentralizatzaile eta espainola inposatu nahi duen alderdi bat baldin bada?”.

Ubera Hezkuntzaren aldeko akordioa erretiratzearen alde agertu da, “prozesua berriro abian jartzeko, hasieratik, hezkuntza komunitateko eragile guztiekin batera Euskal Eskola Publikoaren legea bete den aztertzeko, hutsuneak identifikatzeko eta arloz arloko eztabaida eta negoziazio bati ekiteko, bai eta talde politikoekin ere, denona izango den hezkuntza sistema eraikitzeko”.

EH Bilduko legebiltzarkideak adierazi duenez, prozesu horrek balio behar du euskal hezkuntza sistemari bestelako oinarriak, sendoak, jartzeko, indarrean dugun sistemak porrot egin duelako. “Ikasle guztien eskola arrakasta, aukera berdintasuna eta kohesio soziala lortu behar dugu eta, norabide horretan, prozesuak jo behar du eskuduntza esklusiboak garatuko dituen Euskal Hezkuntza Lege berria onartu eta egikaritzera”.

Izan ere, egungo sistemaren porrota bistakoa da hainbat arlotan: ikasleen segregazioa, ikastetxeen azpiegituretan dauden gabeziak, irakasle eta bestelako langileen egonkortasun laboral falta, jantokien kudeaketa eta kalitate eskasa, euskararen irakaskuntzak emandako datu txarrak, D ereduan barne, etab.

 

Errauste-planta ordezkatuko lukeen hondakinen kudeaketarako sistema alternatibo bat aurkeztu zuen GuraSOSek Hernanin egindako ekitaldi publikoan: «Gordailu inertizatua». Hiri hondakinak bioegonkortu ondoren zigilatutako eta isolatutako gelaxketan gordetzean datza sistema hau, eta ez luke lixibiaturik, usainik, ezta metanorik ere sortuko.

Herritarrek instituzioetara iristeko egin beharreko bidea labirintikoa begitantzen zaio Bernardo Atxaga idazleari. «Eta, agian, labirintoaren bukaeran ez dago inor», esan zuen idazleak Hernaniko Orona Fundazioan, GuraSOS plataformak 2019-2030 urte arteko Gipuzkoako hiri hondakinen kudeaketarako ondutako plan teknikoaren aurkezpen ekitaldian.

Labirintoan galdu beharrean, Gipuzkoako Aldundiak herritarrei eman ez zien hitza hartu zuen GuraSOSek, bertako bozeramaile Joseba Belaustegik esan bezala, eta 2017ko abenduan abiatutako Hitzartu prozesu parte-hartzailearen emaitza aurkeztu zuten atzo: hiri hondakinen kudeaketarako proposamen errealista bat, apirilerako martxan jartzekoa den Zubietako erraustegia eta ohiko isurketa baino iraunkorragoa dena, bai ingurumen eta baita ekonomia ikuspegitik ere.

Hitzartu prozesuaren jarraipena egin duen Berme Batzordeko kidea da Atxaga, Garbiñe Biurrun epailearekin, Esther Larrañaga Lakuako Ingurumen sailburu ohiarekin, Juanjo Alvarez Zuzenbideko katedradunarekin, Pedro Ibarra Politika Zientzien katedradunarekin eta Ernesto Ganuza Ikerketa Zientifikoen Kontseilu Goreneko (CSIC) titularrarekin batera.

1230_eh_gurasosGuraSOS-en ekitaldia Hernaniko Orona fundazioaren aretoan

«Aspaldi gertatu ez den ekintza demokratiko baten lekuko» izateagatik pozik agertu zen Atxaga. Alvarezek ere Hitzartu goraipatu zuen, «ekimen plurala» izan dela esanez, «demokrazia transnazional bat indartzeko beharrezkoa».

Parte-hartze prozesuak «hondakinen kudeaketa jasangarriaren inguruan eztabaida publikoa sortzea» lortu duela nabarmendu zuten Berme Batzordeko kideek, eta Belaustegik zehaztu zuenez, eztabaida horretako ondorioak argiak izan dira: «Jendeak ez du erraustegirik nahi», eta instituzioen «informazio falta» salatu dute.

Ildo horretatik, Berme Batzordeko kideek dei garbia egin zioten atzo Aldundiari: «Hitzartu gizarte-ekimenaren ordezkaritzarekin bil daitezela; landutako prozesua eta emaitzak azter ditzatela, eta elkarlanerako lerroak ireki ditzatela hondakinen kudeaketa jasangarri eta osasuntsua lortzeko helburuarekin, adostasun sozial zabalean oinarrituta».

Alta, ordezkari politikoek elkarrizketarako eskaera onartuko ez balute ere, urtarrilaren 4an Aldundiaren parean, Donostiako Gipuzkoa plazan, hondakinen kudeaketarako plana zein Hitzartu prozesuaren baitan jasotakoak emango dizkiete Foru Gobernuari, Markel Olano alhaldun nagusiari eta Batzar Nagusietako ordezkariei.

PLAN TEKNIKOA

Hondakinen kudeaketarako plan teknikoa Residua Consulting enpresako Iñigo Irigoyen eta Antton Lete industria-ingeniariek osatu dute, Europak aholkatutako ekonomia zirkularraren eredua errespetatuz.

Letek azaldu zuenez, plan berri honek Bizkaiko Foru Aldundiaren Artigaseko instalazioak izan ditu eredu. Bertan, birziklatu ezin diren hondakinak biolehortu egiten dituzte, ondoren zigilatutako gordailu batzuetan gordetzeko.

GuraSOSeko teknikariek proposatu zuten, halaber, materiala lehortu beharrean bioestabilizatzea edo inertizatzea. Metodo horren bidez hondakinek kimikoki edo biologikoki eraldatzeko gaitasuna galduko lukete; hots, materia bizigabe bilakatuko lirateke.

Berebat, besteak beste Alemanian erabiltzen dituzten “DK II” izeneko gordailu inertizatuak erabiliko lituzkete, zeintzuen bidez hondakinek ez luketen lixibiaturik, usainik, ezta metanorik ere sortuko.

GuraSOSek proposatutako alternatibak ez luke zoru berriak okupatzeko beharrik izango, «gaur egun martxan diren instalazioak» erabil daitezkeelako. Aztertu duten aukera bat Zubietan eraikitzen ari diren errausketa-instalazioa aprobetxatu eta bertan Tratamendu Mekaniko-Biologikoko (TMB) planta bat instalatzea da. Bestalde, Zubietako proiektuan jada adjudikatuta dagoen biometanizazio planta handitzea «beharrezkoa» dela aipatu zuen Antton Letek.

Gordailu inertizatuen sistemak, kutsadura murriztu eta gizartearen osasunean kalte gutxiago eragiteaz gain, hondakinen kudeaketa merkatuko lukeela ziurtatu zuen Joseba Belaustegik.

«Sistema honek ez lioke inongo gainkosturik ekarriko Gipuzkoako Aldundiari», adierazi zuen. Are, Zubietan eraikitzen ari diren errauste plantaren lanak bukatuko balira ere, GuraSOSen planak berau ordaintzeko gaitasuna izango lukeela baieztatu zuen: «Erraustegiko lanak gelditzen ez badira ere, ordaindu egingo dugu».

PLASTIKOAREN GEZURRA

GuraSOSek proposatutako plana behin-behinekoa dela zehaztu zuen Letek eta 2030era bitartean funtzionatuko luke. Izan ere, urte horretatik aurrera gutxienez ere hiri hondakinen %65 birziklatzera behartuko du Europako Batzordeak, baita sortzen den plastikoaren %50 ere; eta plastikoarena «arazo globala» izaki, GuraSOSekoen iritziz, Aldundiaz gaindiko erakundeek izan behar dute hori kudeatzeko eskuduntza.

«Plastikoarena gezur handia da», esan zuen Belaustegik. Egun, edukiontzi horira jaurtitzen denaren %30 besterik ez dela birziklatzen baietsi zuen, eta horren atzean «petrolio-sektorearen interesak» daudela. Orobat, erretzen denean, energia gehien ekoizten duen materiala da plastikoa.

Hala, prebentzioak (produkzioaren murrizketak, kasu) berebiziko garrantzia duela azpimarratu zuen Letek, plastikoa erraustean oraindik ezezagunak zaizkigun substantzia kaltegarriak isurtzen baitira.

 

Polizien bahiketa, tortura eta hilketen senideen biktimekin batera egindako agerraldi batean, EH Bilduk salatu du giza eskubideen urraketa larriekin lotutako gutxienez ehun polizia inguruk jaso zituzten kondekorazioei eusten dietela gaur-gaurkoz. Informazio bilketa eta ikerketa mardul bat egin ondoren, koalizio subiranistak frogatutzat jo du tortura “praktika ohikoa” bilakatu dela denbora luzez, jardun arrunta, eta Espainiako Estatuak inpunitate osoz erantzun diola inplikatutako agente oro babestuz, “bai frankismo garaian eta baita ondorengo urteetan ere”.

Kondekorazioa, indultua eta goi karguetara mugitzea. Frogatutako torturekin zerikusia izan arren saria jaso duten ehun polizia horien kasuen aurrean, modu berean erantzun du beti Espainiako Estatuak: lanetik eta zeuzkan erantzukizunetatik baztertu ordez, zigorgabetasun osoa eskaintzea eta kargu hobeagoetara aldatzea izan da kolore politiko ezberdinetako gobernuen jardun nagusia azken urteotan. Horren isla dira EH Bilduren Kongresuko eledun Marian Beitialarrangoitiak aletu dituen torturatzaileen kasuak. “Hurbilpen hutsa baino ez dugu egin, inpunitateaz babestuta giza eskubideen urraketa ardatz izan duen jardun polizialaren errealitatearen zertzelada batzuk emateko asmoz”.

EH Bilduko ordezkariak tortura eta hilketen senideen biktimekin elkartu ziren azterketa honi buruz hitz egiteko

Luze da zerrenda Lasa eta Zabala, Gurutze Iantzi, Joxe Arregi, Jose Mari Larretxea, Eduardo Moreno Bergaretxe ‘Pertur’ edota Mikel Zabalzaren kasuen erantzuleei erreparatuta: Billy el Niño, Jesus Muñecas, Felix Criado, Meliton Manzanas, Manuel Ballesteros, Jose Ramón Pindado, Francisco Alvarez Sanchez, Juan Antonio Gil Rubiales, Manuel Davo Soler, Jose Perez Navarrete, Angel Alba Coca, Julian Marín Ríos… Badira, halaber, behin baino gehiagotan indultatuak izan diren poliziak; Jose Dominguez Tuda da horren adibide. “1984an kondekoratu zuten Intxaurrondon, Joxean Lasa eta Joxi Zabala bahitu, torturatu eta hiltzeagatik kondenatutako guztiekin batera, Tolosako bi gazteak bahitu eta hilabete gutxira”, gogoratu du Beitialarrangoitiak.

Sebastian Sotos Garcia, berriz, bost aldiz saritu du Estatuak, Jose Mari Larretxea Goñiren bahiketa saiakeran parte hartzea leporatuta. Gobernuburu guztiek saritu zuten gerora: Gonzalezek, Aznarrek, Zapaterok eta Rajoyk. GALekin lotutakoez gain, Jose Martinez Salas guardia zibila ere aurki dezakegu zerrenda horretan, Tuteran, Lemoizko zentralaren aurkako protesta batean, Gladys del Estal tiroz hil zuen polizia.

‘Billy el Niño’-rena ez da kasu bakarra

Beitialarrangoitiari, oro har, “albiste ona” iruditzen zaio ‘Billy el Niño’ bezalako poliziek izan duten inpunitate sarea zulatzen hasteko Espainiako Gobernuak erakutsi duen borondatea, baina uste du ez dela aski. “Bada honekin amaitzeko garaia, ez da nahikoa ‘Billy el Niño’-ri kondekorazioa kentzea, guztiei kendu behar zaie, baldin eta Espainiako Gobernuak ez badu uste ‘ibilbide eredugarria izatea’ edo ‘aberriaren alde jardutea’ denik norbait torturatzea, bahitzea eta hiltzea jardun polizialean”. Hori dela eta, EH Bilduk Sanchezen gobernuari exijitu dio ken diezaiela kondekorazioa guztiei, Grande-Marlaska ministroak esan zuen moduan “ibilbide eredugarria” izan ez duten horiei. “Ehun kasu inguru behintzat badira, ziurrenik gehiago ere bai, beraz badu nondik hasi”, ohartarazi dio.

Are okerragoa da, horietako bati, Kepa Urraren torturatzaileari, Manuel Sanchez Corbi koronel ohiari, Espainiako Gobernuak berriki eman dion kondekorazioa. Sanchezen gobernuari zuzendu zaio Beitialarrangoitia diputatua, kezkatuta: “Ez dugu oso argi zein den Gobernuaren benetako asmoa, eta galdetzea derrigorrezkoa zaigu. Tortura ukatzeari, zigortutako torturatzaile apurrak indultatzeari eta goi karguetara iristeko bide emateari utziko al dio behingoz torturaren errealitatea aitortzen hasteko? Biktima guztiek merezi dute, egia, justizia, aitortza, erreparazioa eta ez errepikatzeko bermeak; gizarte osoak behar dugu etorkizuneko elkarbizitzak oinarri sendoak izan ditzan”.

Agerraldian parte hartu dute:

Axun Lasa (Joxean Lasaren arreba).
Maribi Arregi (Joxe Arregiren arreba).
Idoia Zabalza (Mikel Zabalzaren arreba).
Jon Etxabe (Torturatua).
Elixabete Nosellas (Jesus Muñecas-ek torturatua).
Mikel Arrizabalaga eta Josu Arrizabalaga (Jesus Muñecas-ek torturatuak).

 

EH Bilduk Gasteizko Legebiltzarrera eramango ditu 2019ko Aurrekontuen proiektuan barneratu nahi zituen proposamenak. Nerea Kortajarena eta Iker Casanova legebiltzarkideek aurkeztu dituzte lehenengo bi ekimenak.

Espainiako Gobernuak iragarri berri du lanbide arteko gutxieneko soldata 900 euroraino igoko duela. EH Bilduren ustez, kopuru hori ez da nahikoa euskal herritarrentzat, EAEko per capita errenta eta bataz besteko soldata Estuarenen gainetik daudelako. Hori dela eta, Iker Casanova legebiltzarkideak Legez Besteko Proposamen bat aurkeztu du gaur Legebiltzarrean, Jaurlaritzari eskatuz 1.200 euroko gutxieneko soldata sustatzea Araba, Bizkaia eta Gipuzkoako langileentzat. Horrekin batera, Nerea Kortajarena legebiltzarkideak beste ekimen bat erregistratu du, non Administrazio publikoari eskatzen zaio ez dezala diru-publikoz lagundu 1.200 euro baino gutxiagoko kontratuak.

EH Bilduk hainbat neurri sozial proposatu zizkion Jaurlaritzari 2019ko aurrekontuen negoziazioan, batik bat pentsiodunen bizi baldintzak eta enpleguaren kalitatea hobetzeko. Gobernuak hobekuntza horiei atea itxi zizkien arren, EH Bilduk ez du etsiko eta aurrekontuen proiektuan barneratu nahi zituen proposamen multzoa Legebiltzarrera eramango ditu banan-banan.

Resultado de imagen de casanova eh bildu nerea kortajarenaPrekarietatearen aukako mobilizazioa Bilbon

Lehenik eta behin, langileen prekarietateari aurre egiteko bi proposamen aurkeztu dituzte Iker Casanova eta Nerea Kortajarena legebiltzarkideek. Izan ere, inkestek argi erakusten dute lan baldintza kaxkarrek herritarren lehenengo kezka bilakatu direla, enpleguaren sorrera geldoa izateaz gain, kalitatea ere exkaxa baita. Hortaz, Urkulluren Gobernuak ezin du beste aldera begiratu gure herrian miseriazko kontratuak egiten ari direnean.

Lehenengo Legez Besteko Proposamenean, EH Bilduk Jaurlaritzari eskatu dio “konpromisoa har dezala eta aktiboki susta dezala eragile sozio-ekonomikoekin 1.200 euroko gutxieneko soldata indarrean sartzeko EAE mailako lanbide arteko akordioa”. Izan ere, ”ezinbestekoa da lanbide-arteko gutxieneko soldata lurralde bakoitzaren errealitatearekin, bizi mailarekin eta ekoizpen ereduarekin bereziki lotzea”. 

Horrek suposatuko luke, de fakto, gutxieneko soldata EAEko errealitatera egokitzea, lan harremanetarako esparrua eraikitzeko eskuduntzak bereganatzen ditugun bitartean. Era berean, Administrazioek kopuru hori bermatu behar dute “bai sektore publiko osoan bai kontratazio publikoen bitartez sustatzen diren lanpostu guztietan”. Iker Casanovaren iritziz, “1.200 eurotik beherako soldata batek euskal langileak pobreziara zigortzen ditu”

Bigarrenik, Nerea Kortajarenarenak uste du “politika publikoak erreparatzen hasteko unea dela”. Hortaz, beste ekimen bat aurkeztu du Jaurlaritzari eskatzeko “gure errealitate sozio-ekonomikoarekin estuki lotuta dagoen 1.200 euroko gutxieneko soldata bermatzea politika publikoen bitartez enplegua sustatu eta bultzatzeko martxan jartzen diren programa, plan eta lan ildoetan eta, zehazki, programa horien baitan diruz laguntzen diren kontratazio guztietan”.

 

Oihana Etxebarrietak azpimarratu du “enpresek, gizarteko eragile garrantzitsuenetariko moduan, izugarrizko ardura dutela ezberdintasuna sustatu edo aldatzeko garaian”. Horregatik, salatu du Gobernuak emakume eta gizonen arteko berdintasunaren aldeko politikak oztopatzea.

EH Bilduk proposamen zehatza aurkeztu du gaur Legebiltzarrean parekidetasunaren bidean aurrera egiteko: Enpresetan berdintasun ziurtagiri bat sortzea eskatu du. Berdintasunaren aldeko ekimen positibo bat izan arren, Legez Besteko Proposamena ez da aurrera atera, PNVk eta PSEk, PPrekin batera, atea itxi diotelako. Hortaz, Jaurlaritzak ez du martxan jarriko enpresek berdintasunaren alde egiten dituzten praktika onak saritzeko ziurtagiria.

Oihana Etxebarrieta EH Bilduko legebiltzarkidea, Berdintasun ziurtagiria sortzeko proposamena aurkezten

“Enpresek, gizarteko eragile garrantzitsuenetariko moduan, izugarrizko ardura dute ezberdintasuna sustatu edo hau aldatzeko garaian. Eta hona ekarri dugun hau, proposamen konstruktiboa da, posibilista, eta beharrezkoa. Beharrezkoa, ez duelako balio betikoarekin jarraitzeak, ideia berriak behar ditugu, 2018ko titularrak 2019an errepikatu ez daitezen”, azaldu du Oihana Etxebarrietak Osoko bilkuran. Bere hitzetan, “ziurtagiri bat sortzea eskatzen genuen, zeinak eragile eta adituen laguntzarekin, enpresek bete beharrezko gutxienekoak izendatuko zituen. Hontara atxikitzen zirenak kontratazio publikoetan saritzea ere proposatzen genuen. Eta horri ere ezetz esan diozue”, leporatu die gobernukideei.

Horregatik, EH Bilduko legebiltzarkideak adierazi du “pena handiarekin” hartu duela PNV eta PSEren ezetza: “Berdintasunaz ari gara, lan parekidetasunaz, emakumeok pairatzen dugun bazterkeriaz, kontziliazioaz, arrakalaz eta hainbat gauza gehiagoz. Beraz, edo denak berdin jarraitzea nahi dugu, emakumeok prekarietatean geratu daitezela ziurtatzeko, edo ausartzen gara”.

 

Euskadiko Futbol Federazioko ordezkariek Durangoko San Agustin aretoan egindako batzar orokorrean, FIFAri eta UEFAri eskubide osoko kide moduan onartua izatea eskatzea erabaki dute. Bilkura horretan eman diren 44 bozetatik 43 aldekoak izan dira.

Epaileak atzo jo zuen hasierako txistua, Euskadiko Futbol Federazioak Durangon (Bizkaia) eginiko bileran, eta orain lehia luze bat jokatu beharra dauka. Lehen pausoa baino ez da, baina nazioarteko federazioetan integrazioa eskatzeko lehenbizi batzarraren babesa behar zuen ekinaldiak, eta arazorik gabe lortu zuen bermea. 44 kide agertu ziren urteroko bilera orokorrera, eta 43k bozkatu zuten UEFAri eta FIFAri integrazioa eskatzearen alde.

Euskadiko Futbol Federazioko ordezkariek atzo Durangoko San Agustin aretoan egindako batzar orokorra.Euskal Futbol Federazioak abenduaren 12an Durangon egindako batzar orokorraren irudia

Pauso historiko bat da, mugarri bat euskal kirolean. Hurrengo jokaldia Espainiako federazioan jokatuko da, haren bermea behar baitu eskaera egiteko. Ezezkoa aurreikusten da, eta auzibidea hastea kirol epaitegietan.

Federazioaren bilerara futbol munduko izen handi asko bertaratu ziren: Jose Angel Iribar, Jose Mari Amorrortu, David Zurutuza, Asier Illarramendi, Ainhoa Tirapu, Manu Garcia, Asier Riesgo etab. 

Luis Mari Elustondo Euskadiko federazioko presidenteak hitza hartu, eta boto sekretua izango zela jakinarazi zuen. Ezohiko prozedura da, baina bere esku zegoen. 44 boto izan ziren guztira. Asko dira, presidentearen ustez. «Nik karguan daramatzadan urteetan inoiz ez dira hainbeste parte hartzaile agertu, baina, era berean, egia da inoiz ez dela ezer bozkatu. Horri gehitu behar zaio boto nominala duen jendeak ezin duela beste inoren esku utzi, eta asko ezin dira hona etorri asteazken arratsalde batean». 87 ziren boto eskubidea zuten kirol elkarteak, eta 38 jokalari, epaile eta entrenatzaileen estamentuetako ordezkariak. Deigarria da 38 horietatik bakarra dela emakumea.

Elustondo pozik irten zen bileratik, «Baiezkoak irabaztea espero nuen, baina ez hain modu garbian. Federazioko kideek argi utzi dute eskaera egin nahi diotela UEFAri eta FIFAri». Bide luzearena izan zen Elustondok nabarmendu zuen beste ideia. Partida hasi da, baina luzea izango da, eta Gabonak pasatuta jarriko dira harremanetan Espainiako federazioarekin. 

Kike Zurutuza Euskal Herria Kirolako kidea ere bileran egon zen. Ofizialtasunaren aldeko elkarteak lanketa egin du kluben artean informazioa emateko, eta aurrerapausotzat jo zuen emaitza. «Bozketa hau 40 urte berandu iritsi da. Duela hamabost urte egin izan balute, jokalariek ofizialtasunaren gaia mahai gainean jarri zutenean, nazioarteko testuingurua ezberdina litzateke. Baina guk ez dugu iraganera begiratu nahi, eta aurrerapauso bat da, eman beharreko pauso bat».


EH Bildutik oso positiboki baloratzen dugu Euskadiko Futbol Federazioak eman duen aurrera urratsa eta euskal kluben bozketan egondako ofizialtasunaren aldeko hautu orokorra txalotu nahi dugu. Euskal kirol selekzioek (ez bakarrik futbolekoek) Europan eta mundu osoan modu ofizialean, beste nazioek bezalaxe lehiatzearen aldeko aldarrikapena aspaldikoa da eta konbentzituta gaude euskal gizartearen gehiengoaren nahia, horixe dela. Beraz, ongi etorria ematen diogu erabaki honi eta hurrengo hilabeteetan ofizialtasuna lortzeko pausu gehiago egotea espero dugu. 

Bereziki azpimarratu nahi dugu hainbat futbol jokalarik (hauetako asko oso ezagunak) eta bereziki EAEko futbol klubek erakutsi duten determinazioa eta gogoa. Denok batera lortuko dugu!

OFIZIALTASUNA ORAIN!

Makina-txanponjale eta apustu-makinetan tabakoa erosteko makinetan erabiltzen den sistema bera aplikatzea planteatu du Eba Blancok, adingabeen kontsumoa eragozteko. Jokorako adikzioari buruzko azterlana egitea eskatu du, eta horren arabera Adikzioen Plana aldatzea.

EH Bilduk legez besteko proposamen bi aurkeztu ditu Legebiltzarrean apustu eta jokorako adikzioaren arazoari behar bezala heltzeko, benetan kezkagarria delako joko eta kirol apustuen fenomenoak azken urteotan izan duen hazkundea, Eba Blancok ohartarazi duenez. Izan ere, Jaurlaritzak egiten duen Adikzioei buruzko Inkestaren arabera, kirol apustuetan jokatzen duen portzentajea zortzi aldiz altuagoa izan zen 2017an 2012an baino, eta gaur 10.500 pertsona arrisku egoeran daude, joko eta apustuekin duten harremana dela eta. Blancoren esanetan, “kopurua txikia da oraindik, egia da, baina kezkatzekoa da bost urtetan hainbeste igotzea”. Gainera, erantsi du, jokoaren inguruan dagoen pertzepzio soziala ez dator bat arazoak duen garrantziarekin. “Herritarren %54ak bakarrik uste du jokorako adikzioa arazo nahiko larria edo oso larria dela, eta gazteen artean portzentajea %49ra jaisten da”.

Eba Blanco legebiltzarkidea joko adikzioaren inguruan EH Bilduk dituen proposamenak aurkezten

EH Bilduko legebiltzarkidearen iritziz, “joko eta apustuen munduan sartzea gero eta errazagoa da, bai eta nerabe eta gazteentzat ere; horrek jokorako adikzioan erortzeko arriskua areagotzen du eta arazoak duen tamainaren araberako erantzuna eskatzen du instituzioen aldetik”.

Hori horrela, EH Bilduk neurri zehatzak proposatu ditu, fokua bereziki adingabeengan eta gazteengan ipinita, kirol apustuek eta on-line jokoek sekulako eragina dutelako haiengan. “Hor ate handi bat dago adikzio egoera batean sartzeko, eta prebentzioa ezinbestekoa da”. Zentzu horretan, EH Bilduk kontrol neurriak nahi ditu tabernetan hain ohikoak diren apustu-makinetan eta makina-txanponjaleetan. Blancok azaldu duenez, “tabakoa erosteko makinetan erabiltzen den sistema bera aplikatzea planteatzen dugu; hau da, zerbitzariek aktibatu ditzatela bezeroek eskatuz gero. Horrela bermatuko genuke adingabeek ez dutela makina horietan jokatzen”.

Bigarren proposamenari dagokionez, “Jaurlaritzari eskatzen diogu adikzioa sortzeko arriskua duten joko eta apustuei buruzko azterlan bat egin dezala sei hilabeteko epean. Lan horrek aztertu beharko luke jokoaren fenomenoak azken 10 urteotan izan duen bilakaera eta jendearengan, bereziki adingabeengan, duen eragina. Azterketa horren emaitzak ikusita, Lakuak neurri zuzentzaileak txertatu beharko lituzke Adikzioen Planean. Halaber, ikastetxe eta unibertsitateetan kontzientziazio kanpaina egitea ere eskatzen diogu, joko eta apustuen munduak dituen arriskuei buruz”. Horrek guztiak, azkenik, “Adikzioen Legearen garapena ekarri behar du, jokorako adikzioari behar bezalako erantzuna emateko”.

 

Urriaren 22an inauguratu zuten Eibarko ospitale berria, Debabarrena eskualdeko Osakidetzaren bigarren ospitalea; TOPAko kideak oso haserre azaldu ziren, Eusko Jaurlaritzako Osasun sailetik Gipuzkoako eskualdeei ematen zaien trataera ezberdinagatik.

Tolosaldea Osasun Publikoaren Alde koordinakundea Eibarreraino bertaratu zen bere betiko aldarriak plazaratzera. Joan den urriaren 22an ospitale berria inauguratu zuten bertan, eta 75.000 herritarri zerbitzu emango die eraikin berriak. Hain justu hori gaitzetsi zuen TOPAk: Mendaron ospitale bat izanda bigarren bat eraikitzea, eta eskualde horrek dituen beharren gainetik gainera.

Eibarren ospitale berria eraiki izana gaitzetsi du TOPAkTOPAren elkarretaratzea Eibarko ospitale publiko berriaren aurrean

Izan ere, 2019 hasieran zortzi urte beteko ditu TOPAren ibilbideak eta Tolosalderako kudeaketa publikoa duen ospitale publikoa lortzea izan da, urteotan guztiotan, koordinakundearen aldarrikapen eta helburu nagusia.

Bide horretan, Javi Arana TOPAko ordezkariak nabarmendu du beren aldarriak ez direla «kontu ideologiko bat», eta datutan oinarritzen dutela beren diskurtsoa: «Beti esan izan dugu, enpresa pribatuak eskuratzen dituen etekinak direla, guk kalitatean galtzen ditugunak. Horregatik, ospitale publiko bat eskatzen dugu. Zergatik? Ekitateagatik. Guk ez dugu pribilegiorik nahi, gainerako eskualdeek dutena eskatzen dugu, ez besterik».

Koordinakundeko kideek haserre azaldu zuten beren burua Eibarren, eta Jon Darpon Osasun Sailburuaren esanak baliatu zituzten beren egonezina arrazoitzeko: «Bere lehen agintaldiaren hasieran zehaztu zuen, Eibarren aurretik hitzartutako ospitale berria egitea ez zela lehentasun bat izango. Tira, ez zen lehentasun bat, baina egin dute».

TOPAk azaldu zuenez, Asuncionen aferaren bueltako informazioa bildu nahian dabiltza orain, soka horren guztiaren arrazoiak plazaratzeko; bitartean, herritarren «onarpena eta pasibotasuna» aldatzea espero dute.

Aurrekontuen eztabaidaren aurrean izango duen jarrera erabaki du gaur EH Bilduren mahai politikoak, Donostian egindako ohiko bileran. EH Bilduk erantzukizuneko jarrera zintzoa izango du eztabaida honetan, eta bi abstentzio jarriko ditu mahai gainean, baldin eta Eusko Jaurlaritzaren aurrekontuek bizkarrik ez badiote ematen gizarteak aldarrikatzen dituen aldaketei. Ezkerreko indar subiranistak lehentasun bezala jarri du gutxieneko pentsioak 1080 eurora arte osatzen joatea, kalitatezko enplegu egonkorra sortzea, batez ere gazteei eta emakumeei eragiten dien lan prekarietarearekin amaitzen joatea eta gizonen eta emakumeen arteko soldata arrakalarekin amaitzeko neurriak hartzea.

Maddalen Iriarte legebiltzar taldeko bozeramailea eta Arnaldo Otegi koordinatzaile nagusiak eman dute hartutako erabakiaren berri. Iriartek gogoratu du EAJ eta PSE-EEk osatzen duten gobernua gutxiegoan dagoela eta EH Bilduk herri akordioak egiteko deia egin ziela EAJri, Podemosi eta eragile sindikal eta sozialei. EAJk, ordea, nahiago izan zuen PSE-Eerekin gutxiengoan dagoen gobernua osatu eta PPren botoak erabili aurrekontuak eta zerga politikaren inguruko neurriak aurrera ateratzeko. “Legealdiak iraun bitartean, PPren babesa izaten jarraituko zutela uste zuen EAJk. Baina PP Espainiako gobernutik kentzeko mugimenduaren ondoren, EAJk PPren babesa galdu du aurrekontuak aurrera ateratzeko edo kutsu neoliberaleko neurri guztiak aurrera ateratzeko”.

Horrez gain, azken hilabeteetan izan diren mobilizazio sozialek ere baldintzatzen dute, EH Bilduren ustez, aurrekontuen inguruko debatea. “urten gauza asko aldatu dira gure herrian, herritarren haserreak eraginda kaleak beteta izan direlako: pentsiodunak, emakumeak, gazteak, presoen eskubideen alde daudenak edota gure ontziolen industriaren alde daudenek bere buruarekin gustura den Gobernua ispiluaren aurrean jarri dute. Eta ezin da aurrekonturik egin EAEn eta Nafarroan errealitate hori aintzat hartu gabe”, adierazi du Iriartek.

Do m OVX0AAj0caMaddalen Iriarte eta Arnaldo Otegi prentsaurrekoa ematen

EH Bilduk azpimarratu nahi du EAEko aurrekontuen debatearekin hasi ere ezin dela egin azken urteetan herritarrekin egindako aldarrikapenak eta premiazko beharrak aintzat hartu gabe: Horregatik, honela abiatzen du debate hau EH Bilduk:

Pentsioak:

Gure egiten ditugu euskal pentsiodunen aldarrikapenak: nahikotasunera heltzen diren pentsio duinak. Gutxieneko pentsioak 1.080 eurokoak izateko helburuarekin, eta gure eskuduntzek ahalbidetutako tresnak baliatuta, gutxieneko pentsioak osatzen joan behar gara, aurrekontuen partida sendo bat horra bideratuta. Modu horretara, milaka pentsiodunen egoera arinduko dugu, batez ere alargunena. Gure lehentasuna da pentsio oso-oso txikiak jasotzen dituzten emakumeen egoera hobetzea.

Enplegu politikak:

XXI. mendean egon arren, emakumeok ikaragarrizko soldata arrakalari egin behar diogu aurre. Lan berdina egiteagatik soldata txikiagoak jasotzen jarraitzen dugu. Diskriminazio egoera honekin amaitu behar da. Emakumeok soldata eta lan baldintza duinak izateko, aurrekontuetan askoz inbertsio handiagoa egin beharra dago.

Gazteen arteko langabezia Europako gure inguruko herrietan baino 10 puntu handiagoa dugu hemen eta, gainera, sortzen den enplegua prekarioa eta behin-behinekoa da. Inoiz izan dugu belaunaldi prestatuena badaukagu, agintari politikoen ardura izan behar da gure gazteek hemen lan eta bizi baldintza duinak edukitzea.

“Hauek dira EH Bilduren lehentasunak. Euskal gizartearen gehiengoaren lehentasunak ere badirela uste dugu”, agertu du Iriartek. “Pentsio duinak, prekarietatean oinarritzen ez den enpleguaren sorrera... Arazo horiei irtenbidea bilatzea exijitzen ari dira herritarrak. Europako herrialderik aurreratuen parean jarri nahi badugu, berehala hasi behar gara norabide horretan urratsak ematen, autokonplazientzia arrasto guztiak albo batera uzten eta herri ikuspegiz eta anbizio handiagoarekin jokatzen. Aurrekontuek ezin diete bizkarra eman premiazko behar sozial horiei, gure herrian gutxiengoa dien eliteei mesede egiteko”.

Indarrean dituen politiketan aldaketak egiten hastea eskatu dio Iriartek Jaurlaritzari. “Gure adineko pertsonek, gazteek eta emakumeek dituzten beharrizanak asetzeko diru-sarreren eta gastuen politikak aldatzen hastea lehen urratsa izango da Eusko Jaurlaritza azken urteetan egiten ari den politika ekonomikoa, fiskalak eta enplegu arlokoak zuzentzen hasteko”.

“EH Bilduk eskua luzatzen du, baina ez aurrekontuen inguruko akordioa lotzeko, baizik eta azken urteetan gizartearen egiazko beharretatik oso urrun dagoen anbiziorik gabeko gobernu ahul honek egin dituen politikak zuzentzen hasteko”, azpimarratu du EH Bilduren legebiltzar taldeko bozeramaileak.

“Gobernu horren eta lehendakariaren esku dago herritarren beharrei bizkarra ematen jarraitzea edo EH Bilduren eskaintza hartzea, modu partzialean bada ere, premiazko larri horiei konponbidea ematen hasteko”, esan du. “EH Bildurekin akordioa egiteak esan nahiko du politika horiek zuzentzen hasten direla eta norabide egokian jartzen hasten direlako. Zuzenketa hori gertatzen bada, gure talde parlamentarioak bi abstentzioaren abala emango luke. Gure eskua horretarako dago luzatuta”.

 

 Gaur eman da argitara 2016ko Sanferminetako bortxaketaren inguruko epaia. Epaileek, gehiengoz, delituaren kalifikazioa berretsi eta abusutzat jotzen dute gertatutakoa, eraso sexuala gertatu zenik ukatuz. Alegia, indarkeriarik eta intimidaziorik ez zela izan berretsi dute. Berriro ere, irizpide eta interpretazio juridikoen marra fin eta estuek ebatzi dute gertatutakoa ez dela indarkeria, ez dela erasoa.

EH Bilduk irmoki salatzen du epai hau emakume guztion aurkako erasoa dela. Sistema judizialaren muinean sistema patriarkala dagoela agerian geratu da, berriro ere. Gizon eta emakumeen arteko botere harreman desrorekatuak ordena sozial jakin bat sustengatzen du, eta sistema judiziala horren zutabeetako bat da, zalantzarik gabe. Emakumeon kontrako indarkeria gutxietsi eta emakumeon bizkar jartzen du erantzukizuna, geure hitza eta askatasuna ukatuz.

webLa manada auziaren lehen epaia salatzeko, Lurgatz Talde Feministak deitutako kontzentrazioa Villabonan

Hau guztia gutxi balitz, gaur hainbat komunikabidek zabaldu dute webgune bat jarri dela abian, 2016ko gertaera lazgarriak gogora ekartzeko tour turistikoa eskaintzen duena. Erabat onargaitza da eta irmoki salatzen dugu emakumeon indarkeria eta sufrimendua banalizatzea eta baliatzea edonolako etekinik ateratzeko. Erasotutako neskari nahiz emakume guztioi egindako irain eta erasoa da. Horregatik, webgunea lehenbailehen ixteko eta sustatu dutenekiko behar diren neurriak hartzeko exijitzen dugu.

Agerikoa denez, bide luzea dugu egiteko. Gizon eta emakumeon arteko berdintasunaren alde eta emakumeon aurkako indarkeriaren aurka lanean tinko jarraitu behar dugu. Ildo honetan, mugimendu feministak eta euskal jendarteak orain arte emandako erantzun eredugarria txalotu nahi dugu, eta aurrerantzean ere injustiziaren aurka eta geure eskubideen alde borrokan jarraitzeko dei egiten dugu.

 

Aurten, beste urte batez, MINTZALAGUNA egitasmoa izango dugu gurean. 

Urte osoan zehar, astean behin, ordubetez, euskaraz hitz egitea da egitasmo honen helburu nagusia. Lagunartean, solasean, elkarri kontuak kontatuz... euskaraz.

Mintzalagunak norbere lotsak gainditzen laguntzen du, praktikatuz ikasten delako. Eta jakina, harreman berriak egiteko ere aukera bikaina eskaintzen du. Beraz, herritar guztiak gonbidatu nahi ditugu ekimen honetan parte hartzera. 

Egitasmo honetan parte hartzeko bi profil edo eredu ezberdin daude:

- "Bidelari": euskara ikasten ari dena edo euskaraz hitz egiteko zailtasuna duena.

- "Bidelagun": euskaraz dakiena edo euskaldun zaharra, eta euskaraz egin nahi duen horri lagundu nahi diozuna.

Era batera edo bestera, modu asko ditugu gure hizkuntzan eragiteko.

Izena emateko: Villabonako Euskara Zerbitzuko 943 692100 telefonara deitu.

Animatu eta parte hartu!

Izena eman Boletinean!

Showcases

Background Image

Header Color

:

Content Color

: