Laburrak

Legebiltzarrak Katalunian atxilotuak kaleratzea ere galdegin du. Maddalen Iriartek salbuespen egoera salatu du. “Espainiak bere batasuna beste edozeren gainetik jarri du, giza eskubide eta demokraziaren gainetik ere”.

Maddalen Iriartek garrantzitsutzat jo du Legebiltzarrak, EH Bilduren ekimenez, gaur egindako adierazpena, Osoko Bilkurak –EAJ, Podemos eta EH Bilduren beraren botoekin– Konstituzio espainolaren 155. artikulua indargabetzea eskatu baitu, bai eta urriaren 1eko erreferendumaren ondorioz Katalunian atxilotutakoak kaleratzea ere. Halaber, Legebiltzarrak Gobernu espainolari galdegin dio oztoporik ez jartzeko hauteskunde autonomikoetara aurkeztu ziren eta kartzelan edo atzerrian dauden hautagaiei, eta, horren haritik, ez eragozteko Govern eta presidentearen inbestidura saioa, Kataluniako instituzioak lanean has daitezen bertako gehiengoak hauteskundeetan adierazitako borondateari jarraituz.

Maddalen Iriarte Gasteizko legebiltzarrean

Iriartek ohartarazi du Estatu espainola salbuespen egoeran dagoela zigorgabetasuna erabatekoa delako Estatuko botereek nahieran joka dezaten Espainiaren batasuna bermatzearren. “Espainiak bere batasuna beste edozeren gainetik jarri du, eta prest dago demokrazia eta elkarbizitza dinamitatzeko, batasuna defendatzearen truke. Ez dago ezer inportanteagorik Espainiaren batasuna baino, ez giza eskubideak, ez demokrazia, ez ezer. 155. artikulurik gabe ere, Estatu espainola salbuespen estatua da; Espainiak ez du 155. artikulua behar, Espainia bera delako 155. artikulua”. Horren adibide da sistema judiziala, zeinak “oso delitu larriak leporatu dizkien Kataluniako hainbat ordezkariri eta aldi berean uko egiten dion haien kontra egiteari Estatuko mugetatik kanpo, barregarri ez geratzeagatik”.

EH Bilduko bozeramailearen iritziz, 155. artikulua aplikatuta, “Madrilek herri oso bat, Katalunia, umiliatu nahi izan du, bertako instituzioak gutxietsi ditu, argi uzteko nork dituen hogeita hamaika eskutik”.

EH Bilduk merkataritza txikiaren egoera larriaz ohartarazi du. PNV-PSE gobernuei egotzi die sektorea desagertzeko bidean jartzea, gune handi berriak irekitzeko proiektuei alfonbra gorria jarrita. 2004ko legedia berreskuratzea eskatu du merkatal gune handi gehiagorik ez irekitzeko.

Herrietako merkataritza sektorearen (merkataritza txikia deitzen zaio, baina betetzen duen funtzio soziala izugarria da) egoera larriaz jabeturik, EH Bilduk proposamenak aurkeztuko ditu Gasteizko Legebiltzarrean, Batzar Nagusietan eta Udaletxeetan sektore ekonomiko hori babesteko, denda txikiak egunero ixten eta desagertzen direla ikusteak alarma gorriak piztu dituelako. Iker Casanova EH Bilduko legebiltzarkideak azaldu duenez, Jaurlaritza merkatal gune handiei buruzko Lurralde Arloko Plan berria egiten ari da eta EH Bilduk prozesu hori baliatu nahi du aurreko planak, 2004koak, ezartzen zituen mugak berreskuratzeko; alegia, merkatal gune handi berriak irekitzea edo jada existitzen direnak zabaltzea debekatzeko, hain justu, superfizie handi horiek mehatxu eta arrisku nagusia direlako herri eta auzoetako merkataritza sektorearentzat. Beraz, EH Bilduk 2004ko araudia berreskuratzea proposatuko du, eta bien bitartean, merkatal gune handiak irekitzeko edo zabaltzeko baimenik ez emateko ere eskatuko du.

Hiri, herri eta auzoei bizitza emateko duen garrantzia kontuan hartuta, merkataritza txikiari babes berezia eman behar zaiola azpimarratu du Casanovak, baina “hori egin beharrean, PNV-PSE gobernuek labankada eman diote, merkatal gune handi berriak irekitzeko proiektuei alfonbra gorria jarrita”.

DWZS6vmXUAUmVlCAmaia Almirall eta Iker Casanova EH Bilduko kideak, merkataritzaren inguruan egindako agerraldian

Horren haritik, Amaia Almirall Donostiako EH Bilduko bozeramaileak salatu du PNV eta PSE erraztasun guztiak ematen ari direla gune handi berriak ireki edota zabaldu ahal izateko. Egoera bereziki larria da Gipuzkoan, proiektu ugari jada martxan daudelako, baina Bizkaian eta Araban ere fenomeno bera gertatzen ari da, EAEko merkatal-gune handien zabalera %10a handitzeko. Almirallen esanetan, “hori eromena da eta merkataritza txikia suntsitzea ekarriko du; ez du zentzurik superfizie handi gehiago irekitzea, gaur EAEko biztanleria osoa sartzen delako jada existitzen diren gune handietan”.

Iker Casanovak, hortaz, beharrezkotzat jo du neurriak hartzea merkatal gune handien kontrolik gabeko hedapena saihesteko. “Merkataritzan hiru eredu ditugu gaur egun: merkataritza elektronikoa, superfizie handiak eta merkataritza txikia; hirurak dira beharrezkoak, hirurek betetzen dute funtzio bat, baina haien arteko oreka egon behar du, eta instituzioek merkataritza txikiaren alde egin behar dute, balio erantsirik handiena ematen duelako, baina gaur, zoritxarrez, kontrakoa ikusten ari gara, instituzioetatik gune handiak bultzatzen ari direlako, horrek merkataritza txikiaren heriotza ekarriko duen arren. Horregatik, EH Bilduk merkataritza txikiaren alde eta makroproiektu horien kontra egingo du”.

 

Pasa den asteburuan Aiztondo bailaran Altsasuko auzipetuekin elkartasun ekimenak burutu ziren #EzDaPosible lemapean. Ostiral arratsaldean auto karabana eta elkartasun argazkia egin ziren: Autokarabana Villabonako Txermingo kamioien aparkalekutik abiatu zen, eta Zizurkilgo Danena futbol zelaiaren atzekaldeko aparkalekuan amaitu zen. Ondoren, Joxe Arregi plazan elkartasun argazkia atera zuten. Larunbatean berriz, Altsasurekin elkartasuna adierazteko bertso afaria izan zen Villabonako Gaztetxean. 

Hemen duzue ekimen hauek jasotzen dituen bideoa: https://www.youtube.com/watch?v=tRw66lj0oTI

Parte hartzaileek datorren apirilaren 14an Iruñean egingo den manifestazioan parte hartzeko deia egin zuten.

DXmKAqPXUAATyQL

Leire Pinedo EH Bilduko Fiskalitate eta Finantza idazkariak publikoki egindako agerraldian, ezinbestekotzat jo du euskal pentsio sistema propioa sortzea, egungo sistema espainolarekin pentsiodunak gero eta pobreagoak izango direlako.

EH Bilduk Gizarte Segurantzaren gaineko eskuduntzaren transferentzia exijitu du Gasteizko Legebiltzarrean, eskuduntza hori giltza izango delako babes sistema publiko indartsua eta orekatua eraiki ahal izateko eta, besteak beste, euskal pentsio sistema sortzeko, pentsio duinak ordaintzea ahalbidetuko duena. Leire Pinedok horren inguruko azalpenak eskatu dizkio Jaurlaritzako Ogasun sailburuari, baina, tamalez, erantzuna eskasa izan da, ez baitu inolako borondaterik agertu pentsio sistema propioa sortzeko.

Leire Pinedo 3Leire Pinedo EH Bilduko legebiltzarkidea, proposamenaren aurkezpen agerraldian

Pinedok gogorarazi du Araba, Bizkaia eta Gipuzkoan 192.000 lagunen pentsioak ez direla gutxieneko soldatara iristen, eta ohartarazi du egoerak okerrera egingo duela datozen urteotan Gobernu espainolaren erreformen ondorioz. Hori horrela, EH Bilduko legebiltzarkideak ezinbestekotzat jo du euskal pentsio sistema sortzeko urratsak ematen hastea, sistema espainolak ez dituelako bizi baldintza duinak bermatzen eta pentsiodunak pobrezian bizitzera kondenatzen dituelako. “Pentsio publiko duinak, bizimodu duina, bermatzen dituen sistema berria, propioa, behar dugu, eta hori ez da posible izango sistema espainolaren baitan jarraituz gero”.

 

EH Bilduk tamalgarritzat jo du PNVk euskara sustatzeko neurri zehatzak hartzeko erakusten duen ezintasuna. Euskarazko hedabideak babesteko proposamenari ere ezezkoa eman diote jeltzaleek.

Legebiltzarrak Euskararen Agenda Estrategikoa eztabaidagai izan du gaur eta, tamalez, PNVk agerian utzi du berriz ere borondatea falta zaiola euskara sustatzeko neurri zehatzak hartzeko. Rebeka Uberaren iritziz, “Jaurlaritzak ezin du esan gaurkoan ekarri digun Euskararen Agenda estrategikoa denik, ez dielako herri honek hizkuntza arloan dituen beharrei erantzuten, PNV-PSE gobernuaren interes politikoari baizik”.

Resultado de imagen de rebeka ubera euskara doanRebeka Ubera EH Bilduko legebiltzarkidea

Talde parlamentarioen proposamenen botazioa horren isla izan da. EH Bilduk proposatu du euskara ikasketak doakoak izan daitezela gutxienez B2 maila lortu bitartean, eta Lakuak hala berma dezala. Podemos ere ados agertu da, baina PNVk, ordea, PP eta PSErekin bat egin du, ekimenaren aurka, eta atzera bota dute. Berdin egin dute Uberak euskarazko komunikabideak babestu beharra aldarrikatu duenean.

Euskararen etorkizuna bermatzeko hedabideek berebiziko garrantzia dutela jakinik, EH Bilduko legebiltzarkideak eskatu du Jaurlaritzak sektore hori babesteko eta harekin finantziazio eredu iraunkorra adosteko, berrikuntza erronkei aurre egin ahal izan diezaien. PNV, PP eta PSEk, hala ere, bertan behera utzi dute proposamena.

Akordioa egon da, aldiz, hezkuntza arloan Jaurlaritzari galdegiteko urratsak eman ditzala ikasle guztiek gutxienik B2 euskara maila izan dezaten DBH amaitzen dutenean. Horren ildotik, Uberak ohartarazi du horrek aldaketak eskatzen dituela: hizkuntza ereduen sistema gainditzea eta murgiltze eredua ezartzea.

Mikel Otero EH Bilduko legebiltzarkideak proposamena aurkeztu du Legebiltzarrean espainiar Auzitegi Konstituzionalak fracking-aren aurkako legeaz emandako epaia efektu praktikorik gabe uzteko asmoz.

EH Bilduk efektu praktikorik gabe utzi nahi du Auzitegi Konstituzionalak fracking-aren aurkako legeaz berriki hartutako erabakia, eta legez besteko proposamena aurkeztu du Legebiltzarrean horretarako. Zehazki, haustura hidraulikoa erabiltzea planteatzen duen edozein proiektu galaraz dezala eskatzen dio Jaurlaritzari. Mikel Oterok azaldu duenez, “aferaren oinarrian borondate politikoa besterik ez dago, eta guk nahi dugu EAJk eta PSEk fracking-aren aurkako konpromiso irmoa har dezatela, Jaurlaritzak eskura dituen neurri eta baliabide guztiak erabil ditzala fracking-aren erabilpena galarazteko”.

Mikel Otero 5Mikel Otero legebiltzarrean, fracking-a gelditzeko proposamenaren aurkezpenean

EH Bilduko legebiltzarkideak gogorarazi duenez, fracking-aren aurkako legearen hainbat artikulu bertan behera utzita, Konstituzionalak teknika horren kontrako babesa murriztu du eta beste urrats bat eman du Estatuaren birzentralizazio prozesuan, oraingoan ingurumenaren babes arloan ditugun eskumenak urratuz. Autogobernuaren aurkako eraso horri ere erreparatzen dio Oteroren proposamenak: Jaurlaritzari eskatzen dio, batetik, bestelako neurriak eta aukerak aztertu ditzala Araba, Bizkaia eta Gipuzkoa fracking-aren mehatxutik babesteko eta, bestetik, akuiferoen zaurgarritasun mapa eguneratu dezala, Konstituzionalaren epaiak bereziki akuiferoak babesgabeturik utzi dituelako.

Irun, Hondarribia, Errenteria, Lezo, Pasaia, Oiartzun, Donostia, Lasarte-Oria, Hernani, Astigarraga, Andoain eta Usurbilgo hautetsiek euren lurraldearen garapen iraunkor eta orekatuarekin lotutako eskaintza egin dute EH Bilduren izenean.

Kezka dute, eta kezka hori partekatua da Gipuzkoako hainbat sektore sozioekonomikotan, merkataritza-gune handien zabalkundeak hankaz gora jar ditzakeelako dagoeneko ahul samarrak izan daitezkeen orekak.

Gaur egun, Donostia inguruan, ekialdetik mendebaldera, merkataritza-gune handiek 180.000 metro koadro hartzen dituzte: Txingudi, Lintzirin, Urbil, Garbera, Belartza… Gaur egungoa gutxi ez, eta azken aldian maiz ari dira iristen merkataritza-gune handiei buruzko albisteak. Gune berrien proiektuak nonahi sortu dira. Eta kezkatuta daude, izan ere, merkataritza-gune handiak sortzeko edo oraingoak zabaltzeko gaur egun mahai gainean dauden proiektu guztiak gauzatzen badira, beste 200.000 bat metro koadro izango direlako, datozen urteetan, eremu txiki honetan. Besteak beste: Zaldunbordako outlet berria, Hondarribian (40.000 metro koadro); Garberaren zabalkundea, Ilunbe eta Belartza 2 Donostian (beste 100.000 metro koadro baino gehiago); Teresategi eta Michelin, Lasarte Orian (37.000 metro koadro); Urbilen handitzea, Usurbilen (37.000 metro koadro)…

Donostialdea, Bidasoa eta Buruntzaldeako EH Bilduko alkate eta hautetsiak, prentsaurrekoan

Proiektu horiek guztiak eta aurreikusitako beste batzuk gauzatuz gero, merkataritza-gune handien azalera ia bikoiztu egingo da Bidasoaldean, Oarsoaldean, Donostialdean eta Buruntzaldean. Donostialdea, de facto, korridore komertzial handi bat bihurtuko litzateke.

Paradoxikoki, handitzeko joera hori ez dator bat mundu zabalean, eta hemendik gertu ere, nabarmentzen den ereduaren krisiarekin. Gaur egun, merkataritza-guneak ixten ari dira. Joera orokorra da, bestelako eredu batzuek, bereziki online merkataritzak, hartu duten indarrarengatik. Hala, gaur egun salerosketak hiru bide nagusi ditu: merkataritza-gune handiak, internet bidezko salerosketa eta dendari txikiak. Bakoitzak bere tokia izan dezake, baina lurralde osoaren garapen iraunkorra bilatu nahi bada, eta herri eta auzo biziak nahi badira, oreka ezinbestekoa da. Proiektu berrien presakako tramitazioek desestabilizazioa ekar dezakete. Onar dadila orain ere ahula dela oreka hori eta kaltetu nagusia, zalantzarik gabe, merkataritza txikia dela. Datu bat ematearren: azken hamar urtean, Donostian, 557 denda itxi dira.

Donostia inguruan aurreikusten diren merkataritza-gune handien inguruan dauden proiektu guztiak aurrera ematen badira, beraz, oraingo oreka ahula lehertu egingo da erabat. Eta kaltetuak dendari txikiak izango dira, eta haiekin batera, herriak eta herritarrak. Merkatari txikiak herrietako sare ekonomikoko eta sozialeko parte ezinbestekoa direlako.

Horregatik, inoiz baino beharrezkoagoa da sektorea erregulatzea. Inoiz baino beharrezkoagoa da merkataritza-, kontsumo- eta bizi-ohiturak zaintzea, eta herrietako izaera, erro sakonak dituena, babestea.

Justu, orain, Eusko Jaurlaritza merkataritza-gune handiei buruzko Lurralde Arloko Plana egiten ari da -aurrekoa 2004koa zen- eta han jasoko diren arauek eragin nabarmena izango dutela sektorean.

Donostia inguruan, eki eta mendebaldean, merkataritzaren inguruko oreka erabat hauts daitekeela-eta, eta dendari txikien defentsan, EH Bilduk honako eskaintza hau egiten die gainerako indar politikoei eta, bereziki, haien ardura instituzionalarengatik, PNV eta PSEri: batetik, Eusko Jaurlaritzaren Lurralde Arloko Plan berrian, merkataritza-gune handiei 2004an ezarritako mugak berreskuratzea, eta bestetik, moratoria bat aplikatzea. Eta, halaber, plan hori onartu bitartean, Donostia inguruko udalek inongo garapenik ez ahalbidetzea.

Horrela, indar politiko nagusien artean egoeraren diagnostikoa egin eta, erabaki okerrak hartu baino lehen, ahalik eta akordio politikorik zabalena egiteko aukera izango litzateke.

EH Bildu koherentea izango da planteamendu honekin, eta EH Bilduren udaletan lantzen ari diren arau subsidiarioen berrikuspenetan edota plan orokor berriak aipatutako irizpideon arabera egiteko konpromisoa hartzen du.

Arduraz jokatzeko garaia dela uste dute EH Bilduko hautetsiek, izan ere, orain hartuko diren neurriek erabat baldintza dezakete gure eskualdeetako dendari txikien etorkizuna eta, ondorioz, auzo eta herrien bizi-kalitatea, lokal hutsez beteriko kaleak eta plaza hutsak inork ez dituelako ikusi nahi; lotarako herrietan inork ez duelako bizi nahi.

EH Bildu koherentea izango da apustu honekin, eta PNVk eta PSOEk berdin egitea espero du.

 

Agerraldiaren bideoa: https://www.youtube.com/watch?time_continue=1&v=2UA25_N5cv0

Legebiltzarrak Rebeka Uberaren proposamena eztabaidatuko du bihar, haur eskolen sare publikoan doakotasuna orokortzeko lehenengo urrats gisa.

EH Bilduk Haurreskolak Partzuergoan, 0-3 urteko zikloan, doakotasuna modu progresiboan ezartzeko eta orokortzeko lehenengo urratsa ematea defendatuko du bihar Legebiltzarrean. Zehazki, Rebeka Uberak aurkeztu duen legez besteko proposamenaren arabera, “2018-2019 ikasturtetik aurrera 18.000 eurotik beherako errenta duten familiek ez lukete ordaindu beharko, haientzat zerbitzua doakoa bailitzateke”. Uberak berak azaldu duenez, “0-3 urteko ziklo osoa doakoa izan dadila nahi dugu, Lehen edo Bigarren Hezkuntza bezalaxe, eta gure proposamena norabide horretan doa”.

Resultado de imagen de rebeka ubera eh bildu parlamentoRebeka Ubera EH Bilduko legebiltzarkidea eta Hezkuntza arduraduna

EH Bilduko legebiltzarkideak behar-beharrezkotzat jo du Haurreskolak Partzuergoak duen izaera estrategikoa aintzat hartzea eta Jaurlaritzak horren arabera jokatzea, 0-3 zikloaren aldeko apustu tinkoa eginez. “Lehendakariak familia politiken garrantzia hainbestetan aipatzen duen honetan, Jaurlaritzaren neurri bakarra ezin da izan diru-laguntza bat seme-alabak edukitzeagatik; familia politikei ikuspegi global batetik heldu behar zaie, eta horrek ezinbestean dakar, besteak beste, haurreskolei begiratzea eta doakotasunaren norabidean urratsak ematea familia guztien aukera berdintasuna bermatzeko eta emakumezkoen ahalduntzea eta emantzipazioa bultzatzeko”.


Amasa Villabonan, PNV eta PSE Seaska haur eskolan matrikulatzeko laguntzen aurka

EH Bilduk 2018ko udal aurrekontuei aurkeztutako 16 zuzenketetako batean, haurra Seaska haur eskola publikoan matrikulatzen duten gurasoentzat diru-laguntza sistema bat ezartzea proposatzen zen. PNV eta PSEk ordea, azalpen argirik eman gabe zuzenketa honen kontrako bozka ematea erabaki zuten Amasa Villabonako udalbatzan. Ariznabarreta PNVko hezkuntza zinegotziak, PPk eta eskuin atzerakoienak behin eta berriro errepikatzen duena errepikatu zuen "gurasoek eskubidea dute haurra beraiek nahi duten eskolara eramateko". Aipatzekoa da dagoeneko Zizurkil eta Adunan haur eskola publikoaren aldeko laguntza hauek martxan daudela eta Zizurkilen PNVk aldeko botoa eman zuela. Zergatik Zizurkilen bai eta Amasa Villabonan ez? Jeltzaleek azalpen bat eman behar luketela iruditzen zaigu.

Hau da Amasa Villabonako EH Bilduk udalean aurkeztutako dokumentuak jasotzen zuen planteamendua:

SEASKA HAUR ESKOLA: MATRIKULAZIORAKO LAGUNTZAK: 10.500€

Amasa Villabonan dugun haur eskola publikoan haurrak matrikulatzen dituzten gurasoentzat diru laguntza sistema bat ezartzea da proposatzen duguna.

Hau ez da EH Bilduren burutazio bat, udalak herrian ematen den egoera zehatz bati erantzuteko sortuko lukeen diru laguntza sistema zuzentzaile bat baizik (Zizurkil eta Adunako udalean ezarri dira dagoeneko): Kontuan izan beharrekoa da, Zubimusu ikastolak ere, 0-2 urteetarako haur eskola zerbitzua eskaintzen duela (oraingoz Zizurkilgo eraikinean) eta zentro honetako matrikulazioaren kostua, titulartasun publikoa duen Seaskaren matrikulen kostearen azpitik kokatu dela. Honek arrazoi ekonomikoak medio, Amasa Villabonako guraso askok haurrak Zizurkilera eramateko arriskua dakar.
Beraz, proposatzen ditugun diru laguntza hauek egoera anormal honi erantzuten diote eta haur eskola zerbitzu publikoaren biziraupena ziurtatzea dute helburu. Diru laguntza hauen bidez, ahal den neurrian haur eskola zerbitzu ezberdinen matrikulen kostuak berdintzea da bilatzen duguna, matrikularen koste ekonomikoak haurren matrikulazio kopuruetan sekulako desorekak sortu ez ditzan. Kontuan izan behar dugu Villabonako udala Seaska haur eskolaren parte dela.

Diru laguntza hauek jasotzeko garaian, errenta aitorpena hartuko da kontutan eta 80.000 eurotik gorako diru-sarrerak dituztenak ezingo dute diru laguntza hau jaso.

ERABILTZAILEEN DIRU SARRERAK

HILABETE BAKOITZEKO DIRU LAGUNTZA

ORDU KOPURUAREN ARABERA

8 ORDU 5 ORDU
50.000 euroz azpikoak 50€ 43€
50.000 - 80.000 euro artean 40€ 35€
80.000 eurotik gorakoak 0€ 0€

 

Diru laguntza honek behar lukeen partida ekonomikoa kalkulatzeko edo estimazio bat egiteko, gaur egungo matrikulazio datuak hartu ditugu kontutan:

Gaur egun 25 haur daude matrikulatuta Seaska haur eskolan, hauetatik 6 sehaska gelan edota 0-1 adin tarteko gelan daudelarik eta gainontzeko 19ak, nagusien gelan edo 1-2 adin tartea osatzen duten haurren gelan.
• 0-1 Gela: 5 ordurarte: 160€ (2 haur) eta 8 ordurarte: 208€ (4 haur)
• 1-2 Gela: 5 ordurarte 160€ (14 haur) eta 8 ordurarte 208€ (5 haur)

Hau horrela izanik, udalak diru laguntza hau eskaini ahal izateko jarri behar lukeen diru kopurua kalkula dezakegu. Hau litzateke udalak hilero behar lukeen dirua:
• 5 ordu arteko kuota dutenei: 16x35: 560 euro
• 8 ordu arteko kuota dutenei: 9x40: 360 euro
Guztira: 920 euro hilean.

Kontuan izanda abuztuan ez dagoela zerbitzurik, urtean 10.120 euro (920x11) nahikoak lirateke diru laguntza hau bermatzeko. Kopuruak borobiltze aldera, EH Bildutik diru laguntza honetarako 10.500 euroko partida bat sortzea proposatzen dugu.

  

“Enpresek berdintasunaren bidean urratsak ematea sustatu nahi dugu horren bidez”, azaldu du Oihana Etxebarrieta EH Bilduko legebiltzarkideak. Proposamenak egin ditu gurasotasun baimen parekoak sektore pribatura hedatzeko eta industrian emakumeen presentzia indartzeko, botereguneetan kuotak ezarrita.

Martxoaren 8ko greba feministaren bezperetan, EH Bilduk proposamen zehatzak aurkeztu ditu gaur Legebiltzarrean parekidetasunaren bidean aurrera egiteko, emakumeek egun pairatzen duten arrakala iraganeko kontua izan dadila lortzeko. Jasone Agirre eta Oihana Etxebarrietak EH Bilduko kideek aintzat hartu dituzte Administrazio Publikoan ematen ari diren urratsak, baina ezinbestekotzat jo dute aurrerapauso horiek sektore pribatura hedatzea.

Helburu horrekin, EH Bilduk enpresetan berdintasun ziurtagiria sortzea proposatu du. Etxebarrietak azaldu duenez, “enpresa guztiak bultzatu nahi ditugu berdintasunaren bidean urratsak ematera; ziurtagiri horrek adieraziko luke enpresa bide horretan ari dela, kontziliazio eta berdintasun planak martxan jartzen dituela, emakumeen parte-hartzea sustatzen duela… eta, bost urteko epean, ziurtagiria edukitzea ezinbesteko baldintza litzateke administrazio publikoan kontratatua izateko”.

EH Bilduren bigarren proposamenak industriari begiratzen dio, esparru horretan emakumeen presentzia indartzeko eta segregazioa gainditzeko. “Industria maskulinizatuen dagoen sektorea izanik, emakumeen parte-hartzea sustatzeko plangintza integrala egin behar dela uste dugu, besteak beste, emakumeak ikasketa tekniko eta zientifikoetara erakartzeko eta, baita ere, aztertzeko ea aukera dagoen enpresen administrazio kontseiluetan emakumeek bete beharreko derrigorrezko kuotak ezartzeko”.

Gurasotasun baimenei dagokienez, Etxebarrieta pozik agertu da Jaurlaritzak EH Bilduk proposatutako bideari jarraitu diolako, administrazio publikoan aita eta amen baimenak parekatzeko, alegia. Edonola ere, harago joan beharra aldarrikatu du; hartara, gurasotasun baimen parekoak enpresa pribatuetara hedatzea proposatu du. “Garrantzitsua da kontziliaziorako arazorik handienak egon daitezkeen eremuetan bideak irekitzea; hori dela eta, Jaurlaritzari eskatuko diogu proiektu pilotuak babestu ditzala, gurasotasun baimen parekoak bultzatzeko, berdintasunarekiko konpromisoa erakusten duten enpresetan. Lehenengo urrats bat litzateke, aurrerantzean gainerako enpresetan aplikatu ahal izateko”.

EH Bilduk Memoria Historikoaren Lege Proposamena aurkeztuko du bihar Osoko Bilkuran, “gizarte bezala frankismoaren biktimekin oraindik dugun zorra kitatzeko”. PNV-PSEren Eusko Jaurlaritza ordea, lege hau tramitatzearen aurka agertu da.

EH Bilduk Memoria Historikoaren Lege Proposamena aurkeztuko du bihar Legebiltzarreko Osoko Bilkuran “frankismoaren biktimak aitortzeko eta dagokien erreparazio integrala emateko, gizarte bezala haiekin oraindik dugun zorra guztiz kitatzeko eta biktima gisa dituzten oinarrizko eskubideak bermatzeko”, Julen Arzuagak azaldu duenez.

Resultado de imagen de julen arzuaga parlamento

Julen Arzuaga EH Bilduko Askatasun Demokratikoen idazkaria eta EAEko legebiltzarkidea 

Arzuagak proposamenaren garrantzia azpimarratu du, biktimen aldarrikapen historikoei bide ematen dielako, eta horren tramitatzea ez eragozteko eskatu die EAJ eta PSEri, Jaurlaritza tramitera onartzearen aurka agertu den arren. “Hori, proposamena bertan behera uztea, iraingarria litzateke biktimentzat eta zapuztu egingo lituzke aitortza eta erreparazioa jasotzeko euren itxaropenak; sekulako zaplaztekoa litzateke”.

EH Bilduren lege proposamenak frankismoaren biktima guztiak aintzat hartzen ditu, altxamendu faxistaren egunetik bertatik Konstituzio espainola indarrean sartu zen egunera arte, hau da, 1978ko abenduaren 29ra arte. 45 artikulutan zehar, legeak biktimei dagozkien oinarrizko eskubideak bermatzea du helburu: egia jakiteko eskubidea, aitortza eta erreparaziorako eskubidea, justiziarako eskubidea eta memoriarako eskubidea, bai eta gertatutakoa ez dela errepikatuko bermatzeko eskubidea ere.

 

Mozal Legearen aurka osoko zuzenketa bat aurkezten lehena izan zen EH Bildu joan den irailean, legearen izaera irauli eta herritarren giza eskubideak bermatzeko asmoz. Egungo legearen zama errepresibotik erabat aldenduta, EH Bilduk estatu mailako lege baten harira testu alternatibodun osoko zuzenketa bat aurkezten zuen lehenbiziko aldia izan zen ordukoa. Helburua abiapuntu hobea sortzea zen legearen indargabetzea babesten duten indar politikoen gehiengoarekin bat joan zedin amaierako testua. Madrilgo Kongresuak, halere, atzera bota zuen EH Bilduk eginiko proposamena.

EH Bilduren bozeramaile Marian Beitialarrangoitiak azaldu duenez, gaur-gaurkoz Mozal Legea indargabetzeko modu praktiko eta eraginkorrena “zama errepresiboa kentzea da lege berri bat egiteko”. Muinean du arazoa legeak, EH Bilduko diputatuaren hitzetan: “Legearen funtsezko elementua izaera errepresiboa izan beharrean, eskubide zibilak defendatzeko izaera izan beharko litzateke”. Beitialarrangoitiaren ustez, Espainiako Gobernuak “Mozal Legearen gisako legeak erabiltzen ditu salbuespen egoerak betikotu eta oinarrizko eskubideak urratzeko”.

Ildo horretan, diputatuak gehitu du “legea erreformatu beharrean komenigarriagoa dela legea bera edukiz hustea eta indargabetzea”. EH Bilduk aurkeztu dituen zuzenketa partzialak, hain justu ere, bide horretan doaz. Beitialarrangoitiaren aburuz, legeak ordenamendu juridikoko zenbait printzipio urratzen ditu. “Biltzeko eta protesta egiteko eskubideari atxikita, arrazoi sozial edo politikoengatik kalean kontrako iritziak aldarrikatu nahi dituzten herritarrak kontrolatzea eta zigortzea du helburu legeak. Autoritatearen jaun eta jabe bihurtu dira poliziak, eta badirudi eztabaidaezinak direla haien erabakiak”.

Legearen berebiziko garrantziak eta ezarpenak Euskal Herrian duen eraginak bultzatuta, EH Bilduk premiazkotzat du legea indargabetzeko bidean pauso irmoak ematen jarraitzea. Hori dela eta aurkeztu ditu orain Mozal Legearen aurkako zuzenketak. Indar subiranistaren asmoa legearen egungo norabidea aldatzea da, indarra adierazpen askatasunean eta eskubideen gauzatzean jarrita, ez horien murrizketan.

“Emakumeok* planto” lelopean, greba deialdiaren nondik norakoak azaldu dituzte Donostiako Tabakaleran. Lau esparrutan jarriko dute fokua aurtengo greban: zaintza greba, lan greba, kontsumo greba eta ikasle greba. Bi lanuzte iragarri dituzte, bata goizean eta bestea arratsaldean. Kontsumoari dagokionez, saltoki handietan ez erosteko deia zabaldu dute.

Bizitza erdigunean kokatzen duen ekonomia bat aldarrikatu behar dela nabarmendu dute, egungo sistemak ikusezin bihurtzen baititu lan feminizatuak eta zaintza lanak. “Horren ondorioz datoz hainbat indarkeria”. “Lana” kontzeptu gisa zalantzan jartzeko ordua dela esan dute, eta enplegatuta dauden emakumeez gain, zaintza lanetan, kontsumoan eta ikasketetan ere greba egiteko deia egin dute.

Lanuzteak bi zatitan egingo dira: 11:00etatik 15:00etara eta 18:00etatik 22:00etara. Grebari babesa erakusteko tresna gisa, besoko morea jantzi eta amantalak balkoi edo leihoetan zintzilikatzeko eskatu dute.

Ondasunen eta lanen banaketa parekidea eskatu dute, eta zaintza lanetarako ardurak hartzeko eskatu diete instituzioei. "Lan esparruaz harago doa borroka hau. Indarkeria ororik gabeko bizitza nahi dugu, gure bizitzez, sexualitateaz eta bizitzaz erabaki ahal izatea".

Nazioarteko greba bat izango da, eta herriz herri antolatutako ekintzekin osatuko dituzte deialdi nagusiak. Egun horretan ez kontsumitzeko deia egin dute, "bereziki enpresa eta saltoki handietan".


Amasa Villabonako EH Bildutik martxoaren 8ko emakumeen greba deialdia babesten dugu eta bat egiten dugu Euskal Herriko Mugimendu Feministak antolatu dituen mobilizazio eta ekimenen deialdiekin. Bada garaia genero berdinatasunerako urrats sendoak emateko eta emakumeek egungo sistema kapitalista eta patriarkalaren ondorioz pairatzen duten bazterketa, rolen inposaketa, prekarietatea, mota askotako indarkeria matxista eta diskriminazio ugariekin amaitzeko.  

 

 

Europako Batasunaren migrazio politika salatu dute Bilbon, Donostian, Gasteizen eta Iruñean

Hirugarren urtez, errefuxiatuen alde kalera atera dira "Ongi Etorri Errefuxiatuak" elkarteak. Ehunka lagun elkartu dira Hego Euskal Herriko hiriburuetan, eta Europar Batasunak martxan jarri dituen politika ankerrak salatu dituzte. Tartean izan dira EH Bilduko hainbat kide eta hautetsi ere, babesa adierazten. EBk ez ezik gertuagoko erakundeek ere jarrera bera dutela salatu dute, eta giza eskubideen errespetuarekin keztatu beharrean, gerraren negozioarekin aberasten eta mugak zaintzearekin arduratuta egotea egotzi diete. Duela gutxi Santurtziko portuan eraikitako "lotsaren murrua" hor dagoela ere salatu dute.

jarraia149161Bilboko manifestazioaren irudi bat

Manifestazioetan bildu direnenek azken urteetan egoerak okerrera egin duela plazaratu dute; "Europa inoiz baino espetxeago da". Asko dira Europara bidean itsasoan itota hiltzen direnak; "Mediterraneoa hobi komun bat da", salatu dute, "eta Saharako basamortua, beste bat". Gainera, "atxiloketa guneak" gero eta beteago daudela ohartarazi dute, eta azpimarratu dute han dauden pertsonek beren herrian ukatzen dieten bizi berri bat topatu nahi dutela, ez besterik.

 

Emakumeen arazo eta kezkak aztertzeko, politika feministaz hausnartzeko eta irizpide feministak ezartzeko gune berria martxan jarri du EH Bilduk. Pasa den astean Emakumeen gunearen aurkezpen ekitaldia egin zuten Bilborock aretoan, eta batzarra egiteaz gainera, ekitaldi irekia ere egin zuten.

DVC399jX4AAxf55

EH Bilduko emakumeen batzarraren amaieran ateratako argazkia

Bertan, EH Bilduk gonbidatutako nazioarteko hainbat ordezkarik ere parte hartu zuten: Kurdistan, Guatemala eta Kataluniako emakume ezagunek hitza hartu eta momentu hunkigarriak bizi izan ziren. Amaitzeko musika emanaldiak izan ziren eta jaialdi txiki bat egin zuten parte hartzaileek. 

Ekitaldiaren laburpen bideoa: https://www.youtube.com/watch?v=GM6cZZ5ATN4

Parte hartu zuten nazioarteko ordezkarien interbentzioak:

- Maryam Fathir (Kurdistan): https://www.youtube.com/watch?v=SJowD06s0Ic

- Lolita Cháves (Guatemala): https://www.youtube.com/watch?v=spIg6SWskl0

- Mireia Vehí (Katalunia): https://www.youtube.com/watch?v=Jw0ZfvO-8rk

 

Indarrak birziklapenean jartzea, eta ez hondakinak zuzenean erretzea; horixe eskatu zioten milaka lagunek Gipuzkoako Foru Aldundiari, Errausketaren Aurkako Mugimenduak Donostian antolatutako manifestazioan.

Antolatzaileek gogora ekarri zutenez, diputazioak Zubietako erraustegia eraikitzeko asmoa iragarri zuenetik hamasei urte igaro dira; garai hartan, Gipuzkoako birziklatze tasa %20koa zen, eta zabortegiak betetzen hasiak ziren. Erraustegirik nahi ez zuten herritar eta udalek, ordea, gaikako bilketa sistema berriak jarri zituzten martxan, horrela zabor nahasi gutxiago sortzen zela frogatzeko. «Dagoeneko jakin badakigu %80ko birziklatze tasa lortzea posible dela, horretarako bitartekoak jarri eta borondatea izanez gero», adierazi dute manifestazioaren antolatzaileek. Haien ustetan, oraindik birziklatze tasa apalak dituzten herri handi eta hiriei «aitzakiak bukatzen ari zaizkie». Donostian, adibidez, herritar bakoitzak batez beste 288 kilo igortzen ditu urtero zabortegira; hondakinak gaika biltzen dituzten eskualdeetan, aldiz, %77 eta %88 artekoa da birziklatze tasa.

Markel Olanoren foru aldundiari ere ahalegin hori eskatu zioten: «Jar ditzala indarrak emaitza horiek lortzen, eta ez alferrikako azpiegitura kutsakor eta garestia eraikitzen. Lehenbizi, lortu %80 [birziklatzea], eta gero ikusiko dugu zer egin geratzen denarekin, baina ez alderantziz».

0225 eh ManifaManifestazioko lehen lerroetan Gipuzkoako herrietako ordezkariak izan ziren, tartean Amasa Villabonako EH Bilduko kideak

Manifestazioaren amaieran, Osasuna eta Errausketa ikerketa taldeko sendagileek eta Lasarte-Oriako (Gipuzkoa) Garaikoetxea-Landaberri ikastolako bi irakaslek ere hartu zuten hitza. Azken hori erraustegia eraikitzen ari diren lekutik 500 metrora dago, salatu zutenez: «Nitrogeno oxidoak, karbono monoxidoak, metanoa, dioxinak... arnastuko ditugu. Gainera, goi tentsioko lineak eraikiko dira gure ikastetxetik hurbil. Eremu kutsatu batean dagoen ikastetxe bat onartu behar al dugu?». Mediku taldeak ere nabarmendu zuen erraustegiek osasun arazoak sortzen dituztela inguruko gizartean: «Malformazioak, erditze goiztiarrak, abortuak, gaixotasun kardiobaskularrak, arnasbideetakoak eta hainbat minbizi». Bizkaiko Zabalgarbi erraustegiaren inguruko landareetan ere antzeman dute artsenikoaren maila igo dela, eta, Errausketaren Aurkako Mugimenduak gogora ekarri duenez, Europako Parlamentuak erabaki berri du errauste plantei diru laguntzak kentzea. «Interes politikoen gainetik» herritarren osasuna lehenesteko eskatu zieten Foru Aldundiko PNV eta PSEko agintariei.

Tolosaldea Buseko langileek greba egitea erabaki zuten urtarrilaren 27tik otsailaren 18ra arte. Izan ere, 2014. urtetik lan hitzarmena berritu gabe dute eta enpresa arloko hitzarmena nahi dute langileek euren lan-baldintzak hobetu ahal izateko. Hitzarmen berria adosteko eskaeraren aurrean, enpresako zuzendaritzak ez zuen inolako erantzunik eman eta hori izan zen grebara jotzeko eta mobilizazioak abiatzeko arrazoi nagusia.

Greba honetan zehar zerbitzu minimoak, %30ekoak, izango dira lineako zerbitzuetan eta Tolosako hiribusean, bestalde, langileek inauterietako gaueko autobus zerbitzua ez dute zerbitzu minimo gisa ikusten. Langileek eta ELA sindikatuak argi adierazi dute enpresa negoziatzera esertzen ez den bitartean, langileek grebari eutsiko diotela. Beraz, eta inauteriak baino lehen mugimendurik egiten ez bada, gaueko zerbitzurik ez du eskainiko Tolosaldea Busek. 

Langileekin bilduko gara astelehenean

Tolosaldea Buseko langileek eta ELA sindikatuko ordezkariek eskualdeko 28 herrietako udal arduradunekin bilerak egiteko eskaerak sartu dituzte aste honetan. Amasa Villabonan, datorrean astelehenean 17:00etan izango da bilera udaletxean, eta PNV eta EH Bildu bertan izango dira (ez dugu PSEren erantzunaren berririk). 

EH Bildutik gure babesa adierazi nahi diegu greba eta mobilizazioak egiten ari diren Tolosaldea Bus enpresako langileei eta enpresako zuzendaritzari lan hitzarmen berria negoziatu dezan eskatzen diogu.  

Greban diren Tolosaldea Bus-eko langileek prentsaurrekoa egin dute. Bertan, administrazioek diru publikoaz egiten duten azpikontratazioek prekarietatea bultzatzen dutela salatu dute. Era berean, enpresaren jarrera eta beraien lan baldintzak salatu dituzte.

Tolosaldea Buseko langileak urtarrilaren 27tik daude greban, enpresa-hitzarmen bat eskatuz. Lan-baldintza duinak aldarrikatzen dituzte. Gaur egun oso egoera prekarioan egiten dute beren lana, eta horrek arriskuan jartzen ditu beraien bizitza eta baita erabiltzaileena ere.

Urtean 1.800 orduz lan egiten dute. Beraien autobusek 13 metroko luzera dute, eta mendiko errepideetatik eramaten dute jendea, batzuetan oso azkar, geralekuetara garaiz heltzeko. Zoritxarrez, urte hasi denetik 2 lankide (autobus-enpresa desberdinetakoak) hil dira lan-istripuetan Hego Euskal Herrian. Urteko egun guztietan lan egiten dute, igandeetan, jai-egunetan, eta gauez ere bai. Astean gutxieneko atsedenaldiak hartzeko eskubidea dute, baina askotan ez dute ezta hori ere hartzen. Hala ere, hilean 1.300 euroko soldata baino ez dute jasotzen.

DWT2Q0pWAAAZ7O7Tolosaldea Bus-eko langileek protesta elkarretaratzea egin zuten pasa den igandean Anoeta estadioaren kanpoaldean

Beraien lana hiru motatakoa da: eskatu ahalako autobus-zerbitzua; linea-zerbitzua (Gipuzkoako Aldundiaren menpekoa); eta hiri-zerbitzua (Tolosako Udalaren menpekoa). Autobusak gidatzeaz gain, garbitu ere egiten dituzte, nahiz eta Aldundiaren esleipen-orrietan diru-sail bat egon garbitzaileak kontratatzeko. Halere, beraiek, esan beharrik ez dago, debalde egin behar dute garbiketa. Non dago, baina, diru hori? Bi lankidek hiri-garraioa egiten dute, Tolosako Udalarenpekoa, eta astero lau aparteko ordu sartu behar dituzte, astean guztira 44 ordu egin arte. Udalaren esleipen-orrien arabera, zerbitzu hori bi gidarik (lanaldi osoan) eta batek (lanaldi erdian) egin behar dute. Non dago hirugarren langilea? Diru publikoaz ordaindutako zerbitzua da, horregatik eskatzen diete Aldundiari eta Udalari esleipen-orriak benetan betetzen diren jarraipen bat egiteko, orain arte ez baitute horrelakorik egin.

Esleipen-orrien gaineko kontrolik eza diru-kontuez harantzago doa. Emakidari atxikita ez dauden autobusak erabiltzen dira, esate baterako:

- 0715-GWY autobusa linea-zerbitzuak egiteko dago, bakarrik. Baina linea-zerbitzua goizez bakarrik egiten du, eta gero mota guztietako zerbitzuak egiten ditu (eskola, eskatu ahalakoa).

- 3033-HMF autobusa eskola-garraioak eta eskatu ahalako zerbitzua egiteko da. Autobus hori lineako zerbitzua egiteko erabiltzen da urteko egun guztietan, zehazkiago esateko, T021 Hernialde-Tolosa.

- 8267-CNL ibilgailua ere linea-zerbitzua egiteko erabiltzen da egunero, eta arazoak sortzen ditu. Ibilgailu hori erabili ahal izateko, aldez aurretik jakin behar da gurpildun aulkian dabilen inor ez dela sartuko.

Tolosako inauteriak joan dira, eta Olatz Peon Tolosako alkateak, enpresari negoziatzen hasteko eskatu beharrean, gaueko gutxieneko zerbitzuak eskatu zizkion, Tolosaldea Buseko langileen greba-eskubidea errespetatu gabe. Zorionez, Eusko Jaurlaritzak ez du gutxieneko zerbitzurik ezarri.

Azken egunotan Marisol Garmendiak, Mugikortasun eta Lurralde Antolamenduko diputatuak, jendaurrean deitoratu du Eusko Jaurlaritzaren erabakia, alegia, Tolosako inauterietan gaueko gutxieneko zerbitzuak ezartzeko eskaera ez onartzearena. Marisol Garmendiari errepikatuko diogu Olatz Peon alkateari esandakoa: Tolosaldea Bus enpresak linea-zerbitzu publikoaren emakida jaso du Tolosaldean, eta Gipuzkoako Foru Aldundiaren esleipen-orrien arabera eskaini behar du. Inauterietan gaueko gutxieneko zerbitzuak onartu ez izana deitoratu beharrean, langileek bitartekari-lana egitea eskatzen diote eskatzen diote Marisol Garmendiari, enpresaren aurrean negoziatzen hasteko. Hortik doa gatazkaren konponbidea, eta ez gutxieneko zerbitzuak ezartzetik. Eta bide batez eskatzen diote Mugikortasun diputatuari greba dela-eta eskaintzen ez diren zerbitzuak ez ordaintzeko. Gatazka honen erantzukizuna ez dagokio soilik Tolosaldea Buseko Zuzendaritzari, eskaintzen den zerbitzua publikoa denez, eta gipuzkoar guztien diruaz ordaintzen denez, Olatz Peonek eta Marisol Garmendiak ere badute beren erantzukizuna. Zerbitzua azpikontratatu daiteke, erantzukizuna ez, ordea.

Bitartean, Tolosaldea Bus enpresako Zuzendaritzak ez du bilerarik egin nahi langileekin. Esaten dieten gauza bakarra zera da: “nekatuko zarete...” Langileak buru makur ikustea nahiago dute, negoziazio bidetik gatazka konpontzea baino. Ez zaizkie axola erabiltzaileen arazoak autobusik ez izateagatik, eta, are gutxiago, langileak greban egotea. Ordaintzen dieten artean, ederki.

Enpresa kidetuek (Autocares Aizpurua, Autobuses Garayar, Ekialde Bus) lan-baldintza hobeak dituzte, beraienak baino. Eskaera bakarra lan-baldintzak duintzea da, enpresa-hitzarmen negoziatu baten bidez. Konponbidea: negoziazioa.

 

*Albiste hau ela.eus webgunetik hartu dugu.

 

Diasporaren Eguna behingoz izendatzea albiste ona da diasporaren beraren aspaldiko eskaria zelako.

EH Bilduk duela bi hilabete aurkeztu zuen proposamena erabakigarria izan da prozesua azkartzeko, orduan hasi baitzen mugitzen Jaurlaritza, ez lehenago.

EH Bilduren iritziz, pozgarria da Diasporaren Eguna behingoz izendatzea, diasporaren beraren aspaldiko aldarrikapena zelako, baina salatzekoa da, aldi berean, Jaurlaritzak urteetan gai horretan erakutsi duen pasibotasuna. Izan ere, Lakuan ez dute ezer egin Diasporaren Eguna izendatzeko Jasone Agirre EH Bilduko legebiltzarkideak duela bi hilabete –abenduaren 1ean, hain zuzen ere– proposamen zehatz bat aurkeztu arte. “Une hartan hasi zen mugitzen Jaurlaritza, protagonismo bila, gure ekimen politikoa kontraprogramatzeko”. Hiru egunera, datak proposatzeko eskatu zien munduan zehar dauden euskal etxeei, eta atzo bertan Euskal Gizataldeekiko Harremanetarako Aholku Batzordeak Diasporaren Eguna irailaren 8an ospatzea erabaki zuen, data horretan Juan Sebastian Elkanok munduari bira ematen amaitu zuen eguneko urteurrena delako. Agirreren iritziz, “bistakoa da EH Bilduren proposamenak Jaurlaritza mugiarazi zuela eta erabakigarria izan dela Diasporaren Eguna behingoz izendatuta egoteko”.

Resultado de imagen de jasone agirre parlamento

Jasone Agirre EH Bilduko legebiltzarkide eta Diaspora idazkariak aurkeztu zuen proposamena

EH Bilduk beste data bat proposatua zuen, abenduak 3, alegia, Euskararen Eguna, data hori diasporan antolatu eta ospatu zelako lehen aldiz, 1949an. Edonola ere, Agirrek azaldu duenez, “ez da gure asmoa datei buruzko eztabaida bat piztea, inondik inora; garrantzitsuena da Diasporak bere eguna izango duela behingoz eta pozten gaitu jakiteak prozesu honen jatorrian gure proposamena egon dela, hala izan ez balitz, ziurrenik Lakuan inor ez zelako mugituko”. Hori dela eta, EH Bilduk abenduan erroldatu zuen legez besteko proposamena bertan behera utzi du eta, ondorioz, ez da bihar eztabaidatuko.

 

EH Bilduk salatu du sistema espainolak ez duela pentsiodunen bizimodu duina ahalbidetzen, eta ezinbestekotzat jo du, beraz, pentsio sistema propioa sortzea. Bitartean pentsio baxuak osatzeko eskatu dio Jaurlaritzari.

EH Bilduk proposamen zehatzak egin ditu gaur Legebiltzarrean pentsio duinak bermatzeko, Gobernu espainolak indarrean dagoen sisteman hartutako neurriek muturrera eraman dutelako pentsiodunek pairatzen duten egoera. Maddalen Iriartek salatu duenez, “Espainiako pentsio sistemak ez du bizimodu duina bermatzen eta gero eta argiago dago ezinbestekoa dugula horren gaineko eskumena edukitzea eta gure pentsio sistema propioa eraikitzea, jendea erreskatatzeko”. Edonola ere, EH Bilduk argi du ezin daitekeela sistema propioa eduki arte itxaron pentsiodunek gaur dituzten beharrak asetzeko; hortaz, Iriartek Jaurlaritzari eskatu dio eskura dituen tresnak erabil ditzala pentsioak hobetzeko. “Pentsioak osatzea Jaurlaritzaren esku dago, ez du zertan itxoin sistema propioa eduki arte, Estatu burujabea izan arte, besteak beste, pentsiodunek ere ezin dutelako itxoin, egunero jan behar dute eta”.

DWe 68SW4AA2avANerea Kortajarena, Maddalen Iriarte eta Leire Pinedo EH Bilduko legebiltzarkideak, pentsioei buruzko proposamenak aurkezten

Hori dela eta, EH Bilduk bi proposamen iragarri ditu gaur. Batetik, Leire Pinedok azaldu duenez, Legebiltzarrak Gernikako Estatutuak dioena behingoz betetzeko exijitu behar dio Gobernu espainolari, bi hilabeteko epean egitasmo eta egutegi zehatza aurkez dezan Gizarte Segurantzaren erregimen ekonomikoaren transferentzia gauzatzeko, hori lehenengo urratsa izango delakoan euskal pentsio sistema lortzeko.

Bigarrenik, jakinik pentsiodunen gaurko beharrak asetzea premiazkoa dela, EH Bilduk Jaurlaritzari galdegin dio haren eskumenak baliatu ditzala pentsio baxuak hobeto osatzeko, “hemendik lau urtetara 1.080 euroko gutxieneko pentsioak bermatu ahal izateko, bereziki emakumezkoen zaurgarritasun egoerari erreparatuz”. Nerea Kortajarenak gogora ekarri du Lakuak 16.000 pentsio osatzen dituela gaur egun Diru-Sarrerak Bermatzeko Errentaren bitartez, baina motzegi geratzen da, kopuruak oso urrun daudelako Europako Gutun Sozialak gomendatzen dituen 1.080 euroetatik.

Norabide horretan, 1.080 euroko pentsioak gutxieneko helburua izanda, Kortajarenak Jaurlaritzari eskatu dio pentsioak KPI-Kontsumorako Prezioen Indizearen igoeraren arabera osatzeko. Izan ere, “Gobernu espainolak aplikatu duen %0,25eko igoerak, KPI kontuan hartu gabe, erosmen ahalmena nabarmen galtzea ekarri die pentsiodunei”.

 

EH Bilduk estrategia integral baten beharra azpimarratu du enplegu, industria eta gizarte kohesioaren alorretan, Lakuak irtenbide kosmetikoak baino ez dituelako planteatzen. Kontratazio publiko guztietan 1.200 euroko soldatak bermatzea proposatu du, besteak beste.

EH Bilduk datozen hilabeteotan Legebiltzarrean gauzatuko duen proposamen sorta iragarri du gaur, politika publikoei bultzada soziala emateko, makroekonomian igartzen diren hobekuntzek herritarren bizi kalitatean eragin dezaten benetan. Maddalen Iriartek ohartarazi duenez, arrakala eta ezberdintasun sozialak gero eta handiagoak dira Araba, Bizkaia eta Gipuzkoan, erronkak ere handiak dira oinarrizko esparruetan, baina Jaurlaritzak, ikuspegi estrategiko eta integrala erakutsi beharrean, “tiritatxoak eta irtenbide kosmetikoak” baino ez ditu eskaintzen arazoen aurrean, “arazo estrategikoak komunikazio arazoak balira bezala tratatzen dituelako”, Iker Casanovak gaineratu duenez. Hori dela eta, EH Bilduk egoera hori iraultzeko motorra izan nahi du eta 20 ekimen baino gehiago iragarri ditu, enplegu, industria eta kohesio sozialaren arloetan, politika publikoei bultzada soziala emateko.

Nerea Kortajarena, Maddalen Iriarte eta Iker Casanova legebiltzarkideek aurkeztu dituzte EH Bilduren proposamenak

Enpleguari dagokionez, Casanovak “lanpostu gehiago eta kalitatezkoak” sortu beharra azpimarratu du, eta norabide horretan proposamen zehatza egin ere bai: kontratazio publiko guztietan, azpikontratak barne, 1.200 euroko soldatak bermatzea, hain zuzen ere. Halaber, ezinbestekotzat jo du, batetik, iraupen luzeko langabeziaren aurkako talka plana abian jartzea eta, bestetik, plan estrategiko orokorra egitea lan merkatuaren aldaketa era antolatu eta orekatuan garatzeko, hemendik 2024ra bitartean, belaunaldi aldaketa dela eta, 300.000 lanpostu inguru bete beharko direlako.

Industriari buruz, EH Bilduk Ikerketa eta Garapena sustatzeko akordioa nahi du, funtsezkoa den atal horretan egiten den inbertsioa BPGren %1,84tik %3ra igotzeko. Horrekin batera, Adimen Ekonomikoaren Euskal Zentroa sortzea proposatu du joera ekonomikoak aztertzeko, arazoei aurrea hartzeko eta politika publikoak norabide egokian jartzeko.

Gizarte kohesioa da EH Bilduren proposamenek jorratutako hirugarren arlo nagusia. Nerea Kortajarenak nabarmendu du politika publikoak indartu behar direla herritarren babesa, zaintza eta garapena ziurtatzeko, eta kezkatuta agertu da, “horren ordez bi abiadurako gizartea eraikitzen ari delako”. Azaldu duenez, eskola segregazioa, desberdintasun sozialak, langile pobreak, gazteen emantzipazio arazoak edota pentsio kaskarrak eboluzio horren erakusle dira.

Hori horrela, Kortajarenak presazkotzat hartu du Gizarte Zerbitzuen Sistema sakon berraztertzea, bai eta arlo horretan lidergoa behingoz Jaurlaritzak hartzea ere, legeak hala eskatzen duelako. Bigarrenik, 1.080 euroko pentsioak bermatzea proposatu du pentsiodun guztien bizimodu duina ahalbidetzeko eta, hirugarrenik, inbertsio funts baten beharra aldarrikatu du gizarte zerbitzuetan ere ikerketan eta garapenean inbertitzeko, berrikuntza ez-teknologikoa esploratu beharreko esparrua delako jendearen ongizatea hobetzeko.

 

Izena eman Boletinean!

Showcases

Background Image

Header Color

:

Content Color

: