Herrigintza
Amasa Villabonako EH Bildutik ere, beste hainbat eragile eta sindikaturekin batera, datorren igandean, maiatzak 29, osasunaren alde eta erraustegiaren kontra Onkologiko eta Diputazio bitartean egingo den giza-katea osatzeko deialdiarekin bat egiten dugu.
Errausketaren Aurkako Mugimenduak antolatu du ekimena eta mugimendu honek herritarrei deia zabalu die izena lehenbailehen eman dezaten, igandea bitartean antolakuntza-lanak ahalik eta txukunen burutu ahal izateko.
Ibilbidea 9 gunetan banatua dago, eta Gipuzkoako eskualde bakoitzari zati bat egokitu zaio. Izena aldez aurretik emateko helburua da parte-hartzaileak ibilbidean zehar era orekatuan banatua egotea. Informazio guztia, erraustuez.org webgunean aurkitu daiteke.
Amasa-Villabonako herritarrek 11:00etatik 11:30etara Anoeta estadioaren aurrealdean dugu hitzordua, ibilbideko 4. zonaldean kokatuko garelarik.
Giza-katean izena emateko bi aukera daude:
– Gipuzkoako herri gehienetan badago lantalde bat tiketak banatzen ari dena. Gainea, Zubieta inguruko herrietan mahaiak kalean jartzen ari dira tiketak eskuratzea errazteko.
– Interneten bidez ere izena eman daiteke, erraustuez.org webgunean sartuta.
Errausketaren Aurkako Mugimenduak zabaldu duen oharrak dio amaitzeko: “Igandean Gipuzkoan ikusiko da zein den Zubietako erraustegiak eragiten dituen samina eta kontrakotasuna. Erraustegiaren eraikuntza kosta hala kosta aurrera eraman nahi duenak entzun beharko gaitu. Igandean erraustegiaren aurka gaudenok ezinbesteko hitzordua dugu, atera gaitezen kalera!”
Lehenik eta behin Amasa Villabonako Aritza kultur elkarteari eskerrak eman nahi dizkiogu, azken urteetan gure herriko memoria historikoa landu eta berreskuratzen sekulako lana egin dute eta oraingoan ere elkarte honek egindako ekarpenari esker, dagoeneko ez da sinbolo frankista bakar bat ere geratzen gure herriko kaleetan.
Beste urte batez, Aiztondo bailara eta El Salvador herrialdeko Segundo Montes komunitatearen arteko senidetzea ospatzeko SENIDETZE EGUNA izango dugu, aurtengoan Asteasun izango dugu zita.
Egitarau zabala izango da:
- 12:00etan Harrera instituzionala Udaletxean.
- 13:00etan Harrera herrikoia plazan: Bertsolariak, kantua, trikitilariak, aurreskua...
- 14:00etan Kalejira txistulari eta trikitilariekin.
- 14:30ean Bazkari herrikoia. Bazkarirako txartelak Iratzar tabernan eta Amasa okindegian daude salgai.
- 16:30ean Erromeria eta Toka txapelketa.
Aurtengoan Zizurkilekin senidetuta dagoen Kataluniako LLadó-ko herritarren bixita izango dugu eta bazkari herrikoia beraiek prestatuko dute.
Amasa Villabonako EH Bildutik, herritarrei ekimen hauetan parte hartzeko gonbidapena egiten diegu. Anima zaitezte!
Ikusgai duzue hemen Amasa-Villabonako EH Bilduko kideok argitaratu dugun aldizkaria. Deskargatu, irakurri, zabaldu eta emaiguzu zure iritzia!
Jakina denez, pasa den abenduaren 20ko hauteskundeen ondoren Madrilen inbestidura akordiorik lortu ez eta datorren ekainaren 26an hauteskunde orokorrak izango ditugu berriz ere. EH Bilduk abenduaren 20ko emaitza kaskarren ondoren, azken hilabeteetan hausnarketa eta autokritika ariketa sakon eta zintzoa burutu du, akatsetatik ikasi eta berriz ere Euskal Herriko gizon-emakumeentzat erakargarria den eskaintza osatu eta aurkeztea da helburua. Horretan ari gara.
Amasa Villabonako EH Bildutik ere, hauteskunde hauek gure proiektu politikoa indartzen eta zabaltzen jarraitzeko aukera bezala ikusten ditugu eta herritarrekin batera prestatu eta landu nahi dugu kanpaina.
Beraz, EH Bilduk egiten duen eskaintza politikoa aurkeztu eta elkarbanatzeko eta hauteskunde kanpainan zer egin eztabaidatu eta erabakitzeko Herri Batzar Irekia antolatzea erabaki dugu. Kanpaina honetan zer eta nola egin, ahalik eta jende gehienarekin batera erabaki nahi dugu, ez EH Bilduko kideon arteko bilera soil batean. Beraz, ineteresa izan, bere iritzia eman, ekarpena egin, edo EH Bilduren mezua ezagutu nahi duen edonork Hauteskunde Batzar honetako ateak zabalik izango ditu.
Deialdia: Maiatzaren 31ean, 19:30etan Gurea zineko erakusketa gelan.
Bestalde, pasa den asteburuan EH Bildu koalizioak Euskal Herri osoko bere hautagaiak aurkeztu zituen, hemen duzue EH Bilduk argitaratutako albistea:
EH Bildu lanera joango da Madrilera, euskal herritarren interes politiko eta sozialak defendatzera
Ekainaren 26ko Kongresurako eta Senaturako hauteskundeetarako Araba, Bizkai, Gipuzkoa eta Nafarroako zerrendak aurkeztu ditu, gaur goizean, EH Bilduk, Hernaniko Orona eraikinean egindako ekitaldian. “Hauteskunde hauek aukera eta erronka paregabea dira”, esan du Bakartxo Ruiz Kongresurako Nafarroako zerrendaburuak. “Hauteskunde hauek aukera paregabea dira gure goranzko tendentzia erakusteko eta gauzak beste modu batera egin nahi ditugula erakusteko”, gaineratu du.
Madrilen ez bezala, Euskal Herrian aldaketa gauzatzeko gehiengo politiko eta soziala badagoela esan du Ruizek, eta Nafarroako adibidea jarri du mahai gainean. “Duela urtebete, aldaketa nafar erara egiten hasi ginen; hau da, aldaketaren indarren artean akordioak bilatu, zailtasunak zailtasun; eta PSOEren zentralitaterik gabe”. Era horretara, PSN edo PSOE ez direla fidagarriak Nafarroan ondo baino hobeto dakitela zehaztu du.
Era horretara, ekainaren 26an EH Bilduren botoak “balio bikoitza” izango duela azpimarratu du. “Madrilen aldaketa egin ahal bada guk ere posible egingo dugu, baina berriro ere ez denez gehiengo politiko nahikorik osatuko, EH Bilduren botoak balioko du herri honek nahi eta behar dituen aldaketa politiko eta sozialari bultzada berri bat emateko”.
Marian Beitialarrangoitia Kongresurako Gipuzkoako hautagaiak, bere aldetik, azpimarratu du azken 5 hilabeteetan “argazki eta titular asko, baina eduki gutxi” ikusi dituela Madrilen. “Ezer gutxi hitz egin da jendearen kezka eta arazoez, eta horren ondorioak euskal herritarrok ordaintzen ari gara”, esan du.
Zentzu horretan, EH Bilduk Madrilen presentzia “indartsua” izatea oso garrantzitsua dela azpimarratu du, “Madrilen erabakitzen diren gauza askok Euskal Herrian eta euskal herritarrengan eragin handia dutelako”. “Gaur hemen bildu garenak, EH Bilduko ekipoa, lanera doa Madrilera, lan zehatz bat egitera, euskal herritarren interes sozial eta politikoak defendatzera”, nabarmendu du Beitilarrangoitiak.
Hain justu, azken hilabeteetan EH Bilduk erakutsi du zer den euskal herritarren interesak defendatzea Madrilen, eta hori herri ikuspegi batetik egitea. Hala, Madrilen egin dituen hilabete gutxian egin duena gogoratu du: pentsio duinak eskatzea, Garoñaren behin betirako itxiera eta desmantelamendua exijitzea, frackingari bidea ixtea, altzairuaren sektorea defendatzea, Espainiako Gobernuak azken urteetan Nafarroan onartutako 17 legeen aurkako errekurtsoak bertan behera uztea modu bateratuan adieraztea.
“Horixe izan da Madrilen egindakoaren ardatz nagusia eta baita egin nahi dugun lanaren helburu nagusia ere: euskal herritarren agenda, euskal herritarren interesak babesteko neurriak hemen adostu eta modu bateratuan, herri gisa, Madrilera eraman eta bertan defendatu. Erakutsi dugu posible dela, lan horrek emaitzak ematen dituela”, adierazi du.
Hauteskundeei buruzko informazio osoa: EH Bildu, Aukerak Zabaltzera Goaz!
EH Bildu koalizioak batzar irekia egingo du larunbat honetan, apirilak 30, Villabonako Gurea zineko erakusketa gelan 11:00tatik aurrera. Batzar bereziki garrantzitsua izango da, bertan EH Bilduren eraberritzean eman diren urratsak publikoki aurkeztuko baitira eta EH Bilduko Herrigintza talde berriaren aurkezpen ekitaldia izango baita
